རང་ཉིད་ལ་མི་དབང་བའི་སེམས་པ་དེ
རྐང་འོག་ཏུ་གནོན་གྱིན་པ་ནི་ས་གཞི་དང
མགོ་ཐོག་ཏུ་འདེགས་ཀྱིན་པ་ནི་ནམ་མཁའ་དེའོ
གནམ་སའི་བར་མཚམས་སུ་རང་ཉིད་ནི་ནོར་བུ་ཞིག་དང་འདྲ་བར་ནམ་ཡང་གཅེས་སུ་འཛིན་ལ
འཇིག་རྟེན་ཏུ་གཡོ་འགུལ་བྱུང་བ་ནས་རང་ཉིད་ཀྱི་སེམས་པ་དེའང་རླུང་རྩེ་རུ་བསྐྱོན
འདི་ནི གྱ་ཙེ་གོམ་ཙེ་ལ་གོམས་པའི་ཁ་ཕྱོགས་ཤིག
འཇིག་རྟེན་གྱི་ཁྱིམ་གཞི་འདིའི་སླད་དུའམ ཟླ་འོད་ཀྱི་འཕྲོ་སྟངས་ཤིག་གིས
གང་ལྟར རང་ཉིད་ནི་སྒྱུ་རྩལ་ལ་དུང་བའི་ཁེར་རྐྱང་གི་བུ་ཆུང་ཞིག་ཏུ་གྲུབ
སྐྱོ་སྡུག་རེས་སུ་འཁོར་བའི་ཉིན་མཚན་གྱི་གྲིབ་རིས་ལ་ཁེན་ཏེ
ནམ་ཡང་ མུན་པ་ཟབ་ས་དང་གླུ་ཆུང་ལེན་ས་ནས་ཨུ་ཚུགས་ཀྱིས་བགྲེང་ཡོད
འདི་ནི རང་ཉིད་ཀྱི་གཤིས་ཀར་འདྲེས་པའི་འཚོ་བའི་གྲུ་ཟུར་ཞིག
དྲ་བར་ན་ཅེར་གྱིས་བལྟས་པའི་ཤ་བ་བཞིན
གནས་ཚུལ་སྣ་མང་གི་སྣང་བརྙན་ཁུར་ཏེ
རྒྱང་རིང་རྒྱང་རིང་དང་ཁ་ཐག་ཉེ་བའི་གྲུ་ཟུར་གྱི་ངོགས་ནས
འདས་མ་ད་གསུམ་གྱི་གནས་ལུགས་ཤིག་འགྲེལ་བཞིན་མཆིས
འདི་ནི རང་དབང་མེད་པའི་སེམས་པ་དེའི་ཕྱི་ནང་ངོ
