སྒོམ་སྡེ་ལྷ་རམས་པ་བཞུགས་ཡོད་དམ།
2010.7.29
དྲ་གྲོགས་ཕུན་ཚོགས་ལགས་ཀྱིས་དངངས་འཚབ་ངང་སྒོམ་སྡེ་ལྷ་རམས་པ་གྲོངས་པའི་སྐོར་གྱི་མཆན་བུ་རང་ཉིད་ཀྱིས་ཟིན་བྲིས་སུ་བཀོད་ཅིང་། ངས་ཀྱང་གནས་ཚུལ་འདི་ཞིབ་དཔྱད་ཅི་ཡང་མེད་པའི་ཐོག་ནས་དྲ་ངོས་འདི་རང་གི་ཐོག་མཆན་བུ་ཞིག་གི་ཚུལ་དུ་ཁྱེད་ཀྱི་སྔོན་ཙམ་དུ་བརྒྱུད་འགོད་བྱས་ཡོད།དེ་ནི་གཞན་མ་ཡིན་ཏེ། ང་ཡང་མི་ཞིག་ཡིན་པའི་ངོས་ནས་སམ། ཡང་ན་ཚོར་ལྡན་གྱི་གང་ཟག་ཅིག་ཡིན་པའི་ངོས་ནས་འདི་ལྟར་ཐལ་བ་ཙམ་རེད། ངས་གནས་ཚུལ་དེའི་སྐོར་ཁོང་གི་ཟིན་བྲིས་ལས་འཕྲོས་ཏེ་ཚོར་སྣང་ཙམ་བྲིས་ཟིན་ཏེ་དྲ་ཐོག་ཏུ་མ་བཞག་པར་ཆུ་ཚོད་གཉིས་གསུམ་ཕྱིན་པའི་རྗེས། སླར་ཡང་ཕུན་ཚོགས་ལགས་ཀྱིས་སྒོམ་སྡེ་བ་སྐུ་གྲོངས་པའི་གནས་ཚུལ་དེ་དཀྲོག་གཏམ་ཡིན་པར་སྨོན་ཞེས་ཟིན་བྲིས་གསར་པ་ཞིག་སྤེལ་བ་ཤེས། དེ་ནས་ཡུད་ཙམ་གྱི་རྗེས་ངའི་གྲོགས་པོ་ཞིག་གིས་ཀྱང་སྒོམ་སྡེ་བ་གྲོངས་པ་དེ་དཀྲོག་གཏམ་ཡིན་གྱི་རེད། དེ་སྔོན་ཨ་རིག་དགེ་མཐོང་ལ་ཡང་དེ་ལྟར་བྱུང་བ་རེད་ཅེས་བཤད། ངས་བློ་རྣལ་དུ་ཕབ་སྐབས། གཏམ་ངན་བརྒྱུད་འགོད་བྱས་པ་དེ་ཡང་བདེན་ན་ནི་འགྲིག་ཀྱང་། མི་བདེན་ན་ངས་ཀྱང་ནག་ཉེས་ཤིག་ཞར་ཞོར་ལ་བསགས་འདུག་སྙམ་བྱུང་།
དེ་ནས་སླར་ཡང་བསམ་གཞིགས་བྱེད་སྐབས། ང་ལ་ཐེ་ཚོམ་ཞིག་སྐྱེས་བྱུང་། དེ་སྔོན་གནམ་ལྕགས་ལགས་ཀྱིས་ཨ་རིག་དགེ་མཐོང་གྲོངས་པའི་སྐོར་གྱི་ཟིན་བྲིས་ཤིག་སྤེལ།
དྲ་གྲོགས་ཚོས་ཀྱང་གཅིག་ནས་གཉིས་བརྒྱུད་ཀྱིས་དོགས་འདྲི་དང་དཔྱད་ཞིབ་བྱས་བྱས་པའི་མཐར། ཨ་རིག་དགེ་མཐོང་ལགས་གདན་ས་ན་ཆོས་གྲྭར་རྩོད་གྲྭ་འབྲུག་སྒྲ་ལྡིར་ལྡིར་དང་། ཚོགས་འདོན་འུར་སྒྲ་ལིང་ལིང་། རྔུལ་ཆུ་ཆུ་མོ་བཞུར་བཞུར་ངང་བདེ་ཐང་ངང་འཚོ་བཞིན་བཞུགས་ཡོད་པ་རྟོགས། སྐབས་དེ་ནས་ངས་ཨ་རིག་དགེ་མཐོང་ལགས་སུ་ཨ་ཁུ་ཤི་ལོག་ལགས་ཞེས་ཀྱང་འབོད་མགོ་ཚུགས།
དེ་རྗེས་ཁོ་བོས་གནམ་ལྕགས་ལགས་སུ་ཁྲིམས་ཐག་བཅད་པ་མ་ཟད། དེའི་སྐོར་གྱི་བཅད་ཁྲ་ཞིག་ཀྱང་ཟིན་བྲིས་ཀྱི་ཚུལ་དུ་སྤེལ། དེ་ནས་གནམ་ལྕགས་ལགས་ཀྱིས་བློ་འགྱོད་དང་བཅས་ཁྲིམས་ཁང་ལ་ནག་ཉེས་ངོས་ལེན་གནང་སྟེ་དྲ་ཐོག་ནས་ཀློག་པ་པོ་ཚོར་དགོངས་སེལ་ཞུས་སྟབས། ཁྲིམས་དཔོན་བསེ་རུས་ལམ་སྟོན་བསླབ་བྱ་དང་བཅས་གུ་ཡངས་སུ་བཏང་བའི་གནས་ཚུལ་དེ་བྱུང་བ་རེད།
དེ་རིང་ཡང་ལེགས་རྩོམ་སྙིང་བསྡུས་རྩོམ་སྒྲིག་པ་བློ་བཟང་དོན་ལྡན་གྱིས་གནས་ཚུལ་མཁོ་གཏོང་བྱས་ཞེས་བཀོད་དོན་ལྟར། བློ་བཟང་དོན་ལྡན་ལགས་ཀྱིས་དངོས་ཡོད་ཀྱི་གནས་ཚུལ་སྤེལ་ཡོད་ན། དེ་ལས་ཞིབ་ཙམ་གྱི་གནས་ཚུལ་སྤེལ་རྒྱུར་ངང་སྒུག་བྱ་རྒྱུ་ཙམ་མ་ཟད། གུས་བཀུར་ཞུ་རྒྱུ་དང་། དེ་མིན་གླེང་སློང་དང་འདྲོགས་མགོ་སློང་བྱེད་ཙམ་དུ་སྤེལ་ཡོད་ན། དེ་ཡང་ཀུན་སློང་དུ་གང་ཞིག་བཅངས་ཡོད་མིན་ཆ་མ་འཚལ་ཡང་། དོན་དམ་དུ་དྲ་གྲོགས་ཚོར་སེམས་ཁྲལ་འཕར་མ་ཞིག་བཟོས་ཡོད་པ་ཙམ་མ་ཟད། ཁ་སྔོན་ནས་པ་དང་ཝ་ཡི་སྐོར་ལས་འཕྲོས་ཏེ། སྒོམ་སྡེ་ལྷ་རམས་པར་རྩོད་ལན་གནང་མཁན་གྱི་རིགས་ལ་ལྷག་པར་ཐུགས་ཕམ་ཡོང་ངེས་པས་གང་མགྱོགས་གནས་ཚུལ་འདི་གཙང་སེལ་གནང་དགོས་འདུག། འདི་ལྟར་སྨྲ་དགོས་དོན་ནི། དྲ་གྲོགས་ཕུན་ཚོགས་ལགས་ཀྱིས་གནས་ཚུལ་དེ་བརྒྱུད་འགོད་གནང་བ་དང་། སྤོབས་པ་མཐའ་ཡས་ལགས་ཀྱིས་སྒོམ་སྡེ་ལྷ་རམས་པས་ཁ་བརྡ་དྲ་རྒྱའི་ཐོག་སྤེལ་བའི་མཆན་བུ་ཞིག་དྲ་གྲོགས་ཕུན་ཚོགས་ལགས་ཀྱི་ཟིན་བྲིས་ཀྱི་གཤམ་དུ་མཆན་བུའི་ཚུལ་དུ་བརྒྱུད་འགོད་གནང་བ་དེར། སྤྱི་ལོ་ཟླ་དུས་ཚེས་གྲངས་ཆུ་ཚོད་སྐར་མ་དང་བཅས་པ་འཁོད་པར་ཞིབ་པར་དཔྱོད་སྐབས། ཨོའོ། ད་ཡང་འདྲོགས་མགོ་བསླངས་པ་ཞིག་མིན་ནམ་སྙམ་གྱིན་ཚིག་དམ་དུམ་འདི་དག་འབྲི་དགོས་བྱུང་།
འོན་ཀྱང་། དེང་སྐབས་བོད་ཀྱི་སྐད་ཡིག་དྲ་བའི་ཁྲིམས་ཁང་གུང་གསེང་དང་སྟབས་འཁེལ་ཡོད་ལ། ཁྲིམས་དཔོན་བསེ་རུ་ཡང་ལས་གནས་ནས་གཞན་དང་གཞན་ལ་མགོ་བོ་གཡེང་བཞིན་གནས་ཡོད་སྟབས། གནས་སྐབས་རིང་གྱོད་དང་ཁ་མཆུའི་རིགས་ལ་ལག་པ་འཆང་ཐབས་བྲལ་བར་གྱུར་ཡོད་པས། དྲ་གྲོགས་ཚོས་ནང་མོལ་གྱི་ཐོག་ནས་གནས་ཚུལ་འདི་བདེན་མིན་གྱི་བགྲོ་གླེང་དང་བརྩད་ཞིབ་གནང་ཐོག་ནམ་མཁའ་གཡའ་དག་པ་ཞིག་དང་ས་གཞི་རྡུལ་དག་པ་ཞིག་ཡོང་བ་གནང་རོགས།།
