ཀྲུང་དབྱང་ཆབ་སྲིད་རྒྱུན་ལས་ལི་ཁྲང་ཁྲུན་གྱི་''གསལ་པོ་ཤོད་དགོས་པ་གསུམ''ལ་ལྟ་བ།

འདོན་སྤེལ། ༢༠༡༣/༠༦/༢༠

ཤར་ཕྱོགས་ཁུག་རྟ། ༼ བཀའ་ཤག་སྐབས་བཅུ་གསུམ་པའི་ལན་འདེབས་ཚོགས་ཆུང་གི་རྒྱུན་ལས་ཟུར་པ། ༽

༄༅།། ཚང་མས་ཤེས་གསལ་ལྟར། ༢༠༡༢། ༡༡། པའི་ནང་ཏང་གི་ཚོགས་ཆེན་སྐབས་བཅོ་བརྒྱད་པ་ཟེར་བ་སྐོང་འཚོགས་གནང་སྟེ། སྐུ་ཞབས་ཞིས་ཅིན་ཕིན་ཀྲུང་གུང་ཀྲུང་དབྱང་གི་ཏང་སྲིད་གཉིས་ཀྱི་དབུ་ཁྲིད་དུ་འདེམས་ཐོན་བྱས་ཚུལ་བསྒྲགས་པ་དང། ༢༠༡༣། ༣། པའི་ནང་ཏང་སྲིད་དམག་གསུམ་གྱི་གོ་གནས་ཆ་ཚང་བླངས་ཏེ། ལོ་ངོ་དྲུག་ཅུ་ལྷག་གི་ལོ་རྒྱུས་ལྡན་པའི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དུས་སྐབས་གསར་རྙིང་དང་མི་རབས་གསར་རྙིང་གཉིས་ཀྱི་དཀྱོགས་མཚམས་གལ་ཆེན་ཞིག་ཏུ་རྒྱལ་ཁབ་ཀྱི་གཙོ་འཛིན་དུ་གྱུར་བ་རེད། སྐུ་ཞབས་ཅིན་ཕིན་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མཛད་གཙོར་གྱུར་བ་དང་མཉམ། རྒྱལ་སྤྱིའི་སྟེང་རྒྱ་ནག་ལ་རེ་བ་གསར་པ་ཞིག་གསལ་ལ་མ་གསལ་བ་དང། གསང་དང་མ་གསང་བའི་ཚུལ་གྱིས་ཁྱབ། དེ་ནི་ཏག་ཏག་ཏང་གི་ཚོགས་ཆེན་བཅོ་བརྒྱད་པ་ཚོགས་ལ་ཉེ་བའི་ཟླ་ཤས་ནང། སྐུ་ཞབས་ཅིན་ཕིན་ཕྱོགས་བསྐྱོད་སྐབས་ཀྱི་བོར་བརླག་ལས་འཕྲོས་ཏེ་གླེང་སློང་སྣ་ཚོགས་བྱུང་བ་ལས་རྟོགས་ནུས་ལ། རླངས་འཁོར་བརྡབ་སྐྱོན་ནམ་ཏང་ཁག་ནང་ཁུལ་གྱི་འཐབ་རྩོད་ཀྱིས་རྗེས་འདེད་ལྐོག་གསོད་བྱས་པ་མིན་ནམ་ཟེར་བའི་བཤད་ཡམས་རྒྱ་ཁྱབ་དུ་སོང་ནའང། མཐའ་མར་བོར་བརླག་ལྟ་བུའི་ངང་ཚུལ་དེས་རྒྱལ་སྤྱིའི་སྟེང་སྐུ་ཞབས་ཅིན་ཕིན་དང་ཅིན་ཕིན་གྱི་གཞུང་གསར་པར་ཅི་ཙམ་དོ་སྣང་ཡོད་མེད་ཉམས་ཚོད་ཐེངས་གཅིག་བླངས་པ་སྲིད་དོན་དབྱེ་ཞིབ་པ་མང་པོས་མཁྱེན་ཡོད་ནའང། གསལ་བོར་བརྗོད་མཁན་དཀོན་པོ་བྱུང་ཡོད། ཡིན་ནའང་སྐབས་དེའི་གསལ་ལ་མ་གསལ་བའི་རེ་བའི་འཕེལ་འགྲིབ་དེས། སྣང་བརྙན་ཡག་པོ་མེད་པའི་རྒྱ་ནག་གཞུང་ལ་མུ་མཐུད་ནས་གཤེ་གཤེས་གཏོང་རྒྱུ་དང་རེ་ཆད་ཡིན་པ་སྟོན་རྒྱུ་ལས་ལྡོག་སྟེ། སྐུ་ཞབས་ཅིན་ཕིན་གྱི་གཞུང་གསར་པར་གློ་བུར་ཅི་ཞིག་བརྗོད་དགོས་མ་ཤེས་པའི་ཚུལ་དུ་གྱུར་ཡོད་ཅིང། ཕྱོགས་སྡོམ་བྱས་ན་རེ་ཆད་གཤེ་གཤེ་གཏོང་མཁན་ལས་རེ་བ་རྒྱག་མཁན་མང་པོ་བྱུང་ཡོད་ལ། དེའི་ནང་རང་རེའི་དབུ་འཁྲིད་རྣམ་པས་ཐུགས་རེ་ཡོད་གནས་ཉིན་བཞིན་ཡར་རྒྱས་སུ་བཏང་ནས་གསུང་གི་ཡོད། དེ་བཞིན་བོད་དམངས་ཁྲོད་དང་ཤེས་ལྡན་པའི་ཁྲོད་དུའང་ཧུའུ་ཅིན་ཐོས་རང་སྐྱོང་ལྗོངས་ཟེར་བ་ནས་མི་ལས་དགུ་ལས་བྱས་རྗེས་གཙོ་འཛིན་དུ་བསླེབས་སྐབས་ལས་སྐུ་ཞབས་ཅིན་ཕིན་ལ་རེ་བ་ཆེན་པོ་བྱས་པ་མ་གཏོགས་གཤེ་གཤེ་མང་པོ་བཏང་མེད།

དེ་འདྲའི་རེ་བ་ཆེན་པོའི་འོག་མི་རྣམས་ཀྱིས་སྐུ་ཞབས་ཅིན་ཕིན་གྱི་སྐབས་བཅོ་བརྒྱད་པའི་ཚོགས་ཆེན་གཏམ་བཤད་ལ་གཟབ་ནན་གྱིས་ཉན་ཞིང། སྐུ་ཞབས་ཅིན་ཕིན་གྱི་གཏམ་བཤད་ལས་གུང་བྲན་ཏང་གི་མདུན་ལྗོངས་དང་མི་རིགས་སྲིད་བྱུས་གནས་བབ་ལ་ཕྱོགས་ཚང་མས་དོ་སྣང་དེ་བས་བྱེད་ཀྱི་ཡོད་རབ་གླེང། སྐབས་དེར་སྐུ་ཞབས་ཅིན་ཕིན་གྱིས་''ངས་རྩ་ཁྲིམས་ཀྱིས་དཀྲིས་པའི་འགན་འཁྲི་ཟོལ་མེད་ངང་སྒྲུབ་པ་དང། མེས་རྒྱལ་དང་མི་དམངས་ལ་ལྷག་བསམ་རྣམ་དག་བྱེད་པ། རང་འགན་གཙང་སྒྲུབ་དང་དུས་རྣམ་ཀུན་དུ་སྤྱི་དོན་སྒྲུབ་པ། མི་དམངས་ལ་ཞབས་འདེགས་ཞུ་བ་དང་རྒྱལ་ཁབ་ཀྱི་ཆེད་ནུས་པ་གང་ཡོད་འདོན་པ། མི་དམངས་ཀྱི་ལྟ་སྐུལ་རང་རྟོགས་དང་ལེན་བཅས་བྱས་ཏེ་མི་དམངས་ཀྱི་མངགས་བཅོལ་དང་ཡིད་ཆེས་ཆུད་ཟོས་གཏོང་གི་མིན་ཞེས''མགོ་བཙུགས་ཏེ། ཀྲུང་གོའི་སྐབས་གསུམ་གྱི་དབུ་འཁྲིད་ཚོའི་བྱས་རྗེས་གླེང་ཞིང་དེའི་རྒྱལ་སྤྱིའི་སྟེང་བསྐྲུན་འིསྣང་བརྙན་ལ་རྗེས་དྲན་དང་འབྲེལ། ''འབྱོར་འབྲིང་སྤྱི་ཚོགས་སྒོ་ཀུན་ནས་བསྐྲུན་ཐུབ་པ་དང་འབྱོར་ཕྱུག་མང་གཙོ་ཤེས་དཔལ་ཞི་མཐུན་བཅས་ཀྱི་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་བསྐྲུན་པའི་འབད་ཐབས་དམིགས་ཚད་མངོན་འགྱུར་བྱེད་པ། ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བ་བྱེད་པའི་ཀྲུང་གོའི་བསམ་འདུན་འགྲུབ་པ་བྱེད་པར་རྒྱལ་ཁབ་འབྱོར་ཕྱུག་དང། མི་རིགས་དར་རྒྱས། མི་དམངས་བདེ་སྐྱིད་བཅས་ཡོང་བ་བྱེད་དགོས་པ་དེའི་ཐོག་ནས་ཀྲུང་གོའི་ཕུགས་བསམ་གསལ་བོར་མཚོན་ཡོད་''ཅེས་''ཀྲུང་གོའི་ཕུགས་འདུན་''དང། ཡང་ན་ཕྱི་ཕྱོགས་ནས་''རྒྱ་ནག་གི་རྨི་ལམ་''ཞེས་འབོད་པའི་དམིགས་ཚད་དང་གཞི་གདན་གསལ་སྟོན་གནང་བས། ཡུན་རིང་སྲིད་དོན་དཔྱད་བརྗོད་པ་ཚོས་རྒྱ་ནག་གི་རྨི་ལམ་བཙལ་ཞིང་རྒྱ་ནག་གི་རྨི་ལམ་ནི་བརྗོད་གཞི་ལྟེ་བ་ཞིག་ཆགས།

སྐུ་ཞབས་ཅིན་ཕིན་གྱིས་''ཀྲུང་གོའི་ཕུགས་འདུན་''གླེང་སྐབས་''ཀྲུང་གོའི་ཕུགས་འདུན་འགྲུབ་པར་ངེས་པར་དུ་ཀྲུང་གོའི་འགྲོ་ལམ་ཐོག་བསྐྱོད་དགོས། དེ་ནི་ཀྲུང་གོའི་ཁྱད་ཆོས་སྤྱི་ཚོགས་རིང་ལུགས་ཀྱི་འགྲོ་ལམ་དེ་རེད་''ཅེས་དང། '' ཀྲུང་གོའི་ཕུགས་འདུན་ནི་མི་རིགས་ཀྱི་ཕུགས་འདུན་ཡིན་ལ། ཀྲུང་གོ་བ་ཚང་མའི་ཕུགས་འདུན་ཡིན། ང་ཚོས་མི་ཁྲི་སེམས་གཅིག་བྱས་ནས་ཐུན་མོང་གི་དམིགས་འདུན་༼ ཀྲུང་ཧྭ་མི་རིགས་ཀྱི་བསྐྱར་དར་ཆེན་མོ། རྩོམ་པ་པོའི་མཆན། ༽འགྲུབ་པ་བྱེད་དགོས་''''ཀྲུང་གོའི་ཕུགས་འདུན་འགྲུབ་པ་བྱེད་པར་ཀྲུང་གོའི་སྙིང་སྟོབས་དར་སྤེལ་གཏོང་དགོས། དེ་ནི་རྒྱལ་གཅེས་རིང་ལུགས་སྲོག་ཤིང་བྱེད་པའི་མི་རིགས་ཀྱི་སྙིང་སྟོབས་དང་བསྒྱུར་བཅོས་གསར་གཏོད་སྲོག་ཤིང་བྱེད་པའི་དུས་རབས་ཀྱི་སྙིང་སྟོབས་རེད། རྒྱལ་གཅེས་རིང་ལུགས་ནི་སྔ་ཕྱི་བར་གསུམ་དུ་ཀྲུང་ཧྭ་མི་རིགས་མཐུན་སྒྲིལ་རྡོག་རྩ་གཅིག་ཏུ་སྒྲིལ་བའི་བསམ་པའི་སྟོབས་ཤུགས་རེད་''ཅེས་ནན་བཤད་གནང་ཡོད། གསུང་བབ་འདི་དག་ལ་གཞིགས་ན་སྐུ་ཞབས་ཞིས་ཀྱི་''ཀྲུང་གོའི་ཕུགས་འདུན་''ནི་གཞི་རྩ་''མི་རིགས་ཆེན་པོའི་རང་ཞེན་དང་ནུས་སྟོབས་''སྟེང་བཙུགས་ཡོད་ལ། དེ་ནི་མི་ཁྲི་སེམས་གཅིག་བྱེད་པའི་ཀྲུང་གོའི་ཁྱད་ཆོས་ལྡན་པའི་ལམ་ལུགས་སྟེང་མདུན་ངོས་གང་ལ་ཐུག་ཀྱང་ཤར་བསྐྱོད་བྱེད་རྒྱུ་ཡིན་པ་དེས། དམངས་སེམས་''རིགས་ཞེན་རིང་ལུགས་''ཀྱིས་དྲག་ཏུ་སྐུལ་བཞིན་གྲུབ་འབྲས་ཡོད་ཚད་མི་དམངས་ཀྱི་ཆེད་དུ་ཡིན་པའི་སྙན་དབྱངས་སྒྲོག་བཞིན་པ་ནི་ཟུར་ལྟོས་ལེབ་མཐོང་རེད་ཅེས་བརྗོད་ནུས། དེར་རྒྱ་ནག་གཞུང་འབྲེལ་གྱི་དཔྱད་བརྗོད་པ་ཞིག་གིས་''གཙང་བོར་ཆུ་མེད་ན་ཆུ་ལག་སྐམ་''ཞེས་ཀྲུང་གོའི་ཉེ་བའི་ལོ་རྒྱུས་ནང་གི་ཉམས་མྱོང་ཕྱོགས་སྡོམ་བྱས་ཏེ་ཀྲུང་ཧྭ་བསྐྱར་དར་ཆེན་མོའི་དོན་དུ་ཚང་མ་གཙང་བོ་གཅིག་ལ་འདུས་དགོས་ཤིང། གཙང་བོ་གཅིག་གི་ཆེད་དུ་ནུས་པ་འདོན་དགོས་ཞེས་ཤུགས་ཆེན་པོས་བསྒྲགས་ཡོད་ཀྱང། ཀྲུང་ཧྭ་བསྐྱར་དར་ཆེན་མོ་ལྟེ་བ་ཡིན་པའི་ཀྲུང་གོའི་ཕུགས་འདུན་དེས་འདས་པའི་སྐབས་གསུམ་གྱི་མགོ་ཁྲིད་ཚོའི་ལམ་ནོར་ལྡོག་ཤེས་དང། མི་དམངས་ལ་དོན་དམ་པའི་བདེ་སྐྱིད་ག་ཚོད་ཅིག་བསྐྲུན་ཐུབ་བམ་ཞེ་ན། དེ་ནི་ཚིག་གི་མཛེས་རྒྱན་གྱི་སྡེབས་སྦྱོར་ཇེ་ལེགས་སུ་བཏང་སྟེ་ཐ་སྙད་གསར་པ་འགའ་བཏགས་པ་མ་གཏོགས། དོན་དངོས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཞེས་མཚན་བཏགས་པའི་ནང་གི་''སྤྱི་མཐུན་''མིང་དོན་མཚུངས་པ་ཡོང་རྒྱུའི་རྨི་ལམ་མམ་ཕུགས་འདུན་ཞིག་མིན་པ་ཀུན་གྱིས་ངོས་འཛིན་མི་བྱེད་ག་མེད་དེ་རེད།

དེས་ན་ཀྲུང་ཧྭ་མི་རིགས་བསྐྱར་དར་ཆེན་མོའམ། ཀྲུང་ཧྭ་མི་རིགས་གཅིག་སྒྲིལ་ཆེན་མོ་ལྟེ་བ་ཡིན་པའི་རྒྱ་ནག་གི་ཕུགས་འདུན་ཁྲོད་བོད་གཙོས་མི་རིགས་གཞན་རྣམས་གང་དུ་འགྲོ་རྒྱུ་རེད་ཅེས་དྲི་བ་ཞིག་ཡོད་དབང་དུ་བྱས་ན། དེར་སྐུ་ཞབས་ཅིན་ཕིན་གྱིས་''རྒྱལ་ཡོངས་མི་རིགས་ཁག་གི་མི་དམངས་ཚོས་ངེས་པར་དུ་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་རིགས་པའི་གཞུང་ལུགས་ལ་རང་ཡིད་རང་ཆེས་དང། འགྲོ་ལམ་ལ་རང་ཡིད་རང་ཆེས། ལམ་ལུགས་ལ་རང་ཡིད་རང་ཆེས་བཅས་བྱེད་ཤུགས་ཆེ་རུ་བཏང་སྟེ་བློ་བརྟན་འགྱུར་མེད་དང་ཡང་དག་པའི་ཀྲུང་གོའི་འགྲོ་ལམ་བརྒྱུད་དཔའ་མཛངས་རྟུལ་ཕོད་ཀྱིས་མདུན་དུ་བསྐྱོད་དགོས་''ཞེས་བཤད་ཡོད། ཀྲུང་གོའི་ཕུགས་འདུན་དང་དེ་སྒྲུབ་ཐུབ་ཀྱི་ཀྲུང་གོའི་ཁྱད་ཆོས་ལྡན་པའི་ལམ་ལུགས་ལ་ངེས་པར་དུ་ཡིད་ཆེས་བྱེད་དགོས་པ་ཡིན་ན། རྒྱལ་སྤྱིའི་ནང་ཧུའུ་ཅིན་ཐའོ་ལས་སྣང་བརྙན་མཛེས་པའི་སྐུ་ཞབས་ཅིན་ཕིན་གྱི་ཟླ་བ་འགའི་རིང་གི་གུ་ཡངས་པོའི་རྣམ་འགྱུར་དང། དཔྱད་ཞིབ་པ་ཁ་ཤས་ཀྱིས་བཤད་པ་ལྟར་ན་སྐུ་ཞབས་ཅིན་ཕིན་གྱི་བསིལ་སང་སིང་གི་གཏམ་བཤད་ཟེར་བ་སོགས་ཀྱིས་ཡང་སྙིང་བོད་ལ་དངོས་གྲུབ་ཅི་ཙམ་གནང་མིན་ཆ་མ་འཚལ་ཞིང། དེ་འབྲེལ་གསང་བ་ཕྱིར་གྱར་ཡིན་ཚུལ་གྱི་སྐུ་ཞབས་ཅིན་ཕིན་གྱི་ནང་གཏམ་དེ་དང། ཞིས་ཀྲུང་ཞིན་གྱིས་དེ་སྔ༸པཎ་ཆེན་རིན་པོ་ཆེར་སྤྲིངས་པའི་འཕྲིན་ཡིག་རྙིང་པ་ཞིག་ཉེ་ཆར་ཚགས་པར་ནང་ཐོན་ཚུལ། དེ་བཞིན་གནད་དོན་ཆུང་ཚགས་ཁ་ཤས་ཐད་གུ་ཡངས་པོའི་རྣམ་འགྱུར་ཐོན་གྱི་ཡོད་པ་བཅས་ཀྱིས་''ཀྲུང་གོའི་ཕུགས་འདུན་''ནང་''བོད་ལ་རྨི་ལམ་''ཡག་པོ་ཅི་ཞིག་ཡོད་མེད་ཕུགས་འདུན་སྟོན་པའི་གཏམ་བཤད་ནང་ཞེ་དྲག་བཙལ་ན་མི་རྙེད་པར་གྱུར་ཡོད་མོད། ཉེ་ཆར་གྲོས་ཚོགས་ནང་རང་རེའི་སྲིད་སྐྱོང་མཆོག་གིས་ནི་རྒྱ་ནག་གི་མགོ་ཁྲིད་གསར་པ་ཚོའི་སྐོར་ལ་དཔྱད་གཏམ་སྤེལ་སྐབས་རྦད་དེ་སྐུ་ཞབས་ཅིན་ཕིན་གྱི་''ཀྲུང་གོའི་ཕུགས་འདུན་'' སྐོར་ཟུར་ཙམ་ཡང་གླེང་ཐུབ་མེད།

སྐུ་ཞབས་ཅིན་ཕིན་གྱི་ཟླ་ངོ་འདི་དག་ལ་རང་རེའི་ཕྱོགས་ནས་འབྲེལ་མོལ་དང་བོད་ནང་གི་རང་སྲེག་དང་འབྲེལ་བའི་བཙོན་འཛུག་གི་གནས་སྟངས་ཇེ་ཉུང་དུ་འགྲོ་རྒྱུར་རེ་ལྟོས་ཅི་ཙམ་བྱས་ཀྱང་ཆུ་མོ་འཁྱགས་པས་བསྡམས་པ་ལྟར་གྲགས་འགུལ་གང་ཡང་མེད་ཀྱང། སྐུ་ཞབས་ཅིན་ཕིན་གྱི་གཞུང་གསར་པས་རྦད་དེ་བོད་ཕྱོགས་ལ་ཁ་གང་ཡང་མ་གྲགས་པའང་མ་རེད། ཧུའུ་ཅིན་ཐོའི་སྐབས་དང་བསྡུར་ན་བརྒྱུད་ལམ་ཁག་ནས་འདྲ་མིན་བཅོ་བརྒྱད་བཤད་རྒྱུར་ཆེ་མཐོང་གང་འཚམས་ཡོད་པའི་ཞིས་གཞུང་འདིས་འབད་བརྩོན་བྱེད་ཀྱི་མེད་པ་ནི་འགྱུར་བ་རེ་ཡིན་སྲིད་ནའང། ༢༠༡༢། ༨། ནང་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ལི་ཁྲང་ཁྲུན་ལྷ་སར་གཟིགས་ཞིབ་སྐབས་''གསལ་བོ་ཤོད་དགོས་པ་གསུམ་''ནན་བརྗོད་གནང་བ་དེ་ཞིས་ཀྱི་གཞུང་གསར་པས་གསར་ལམ་ཁག་དུ་གཙོ་བོའི་རྣམ་པར་བསྐྱར་འགོད་ཡང་འགོད་དང་དཔྱད་གཏམ་རིང་ཐུང་སྣ་ཚོགས་སྤེལ་སྟེ་མཇུག་གནོན་གནང་ཡོད་པས། ''གསལ་བོ་ཤོད་དགོས་པ་གསུམ''ཅི་ལྟར་ས་བསྒྲགས་གནམ་བསྒྲགས་བྱས་ཀྱང་དེས་བོད་ཀྱི་དོན་དངོས་གསལ་བོ་བཤད་ཐུབ་མེད་པ་དང་ཤོད་ནུས་བྲལ་བ་ནི་བོད་ཀྱི་བདག་པོ་ངོ་མ་བོད་མི་ཚོར་ཧ་ཅང་གསལ་བའི་གནས་ཚུལ་ཞིག་རེད། གཤམ་དུ་བརྗོད་སྙིང་''གསལ་བོ་ཤོད་དགོས་པ་གསུམ་''ལ་ལྟ་བར་བྱ་སྟེ། ཁོང་ཚོའི་ཤོད་དགོས་པ་གསུམ་ནི། ༡ བོད་འདི་གནའ་སྔ་མོ་ནས་བཟུང་ཀྲུང་གོའི་ཁ་བྲལ་ཐབས་མེད་པའི་ཆ་ཤས་ཤིག་ཡིན་པ་གསལ་བོར་ཤོད་དགོས། ༢ ཞིང་བྲན་ཁྲི་ཚོ་བརྒྱ་ཡར་ལངས་བཅིངས་འགྲོལ་ཐོབ་པ་ནི་བོད་རྙིང་པའི་ཆོས་སྲིད་ཟུང་འབྲེལ་གྱི་བཀས་བཀོད་རྒྱུད་འཛིན་ལམ་ལུགས་མགོ་རྟིང་སློག་པའི་སྤྱི་ཚོགས་ཀྱི་འཕོ་འགྱུར་ཞིག་ཡིན་པ་གསལ་བོར་ཤོད་དགོས། ༣ བོད་ཀྱི་དཔལ་འབྱོར་དང་སྤྱི་ཚོགས་ལ་གྲུབ་འབྲས་འོད་སྟོང་འབར་བ་ཐོབ་ནས་མི་རིགས་ཁག་ཐུན་མོང་དར་རྒྱས་འགྲོ་བའི་གནས་བབ་བརྟན་དུ་ཕྱིན་པ་གསལ་བོར་ཤོད་དགོས་ཟེར་བ་བཅས་རེད།

ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ཞིག་ནས་ཐེ་ཚོམ་གང་ཡང་མེད་པར་གནའ་སྔ་མོ་ནས་''བོད་ཀྲུང་གོའི་ཆ་ཤས་''ཡིན་ཟེར་པའི་གནའ་སྔ་མོའི་མཚམས་དེ་གང་ལ་ངོས་འཛིན་གནང་གི་ཡོད་མེད་ནས་དཔྱད་ཚེ། ང་ཚོ་སླར་ཡང་རྩོད་པ་རྙིང་པ་བསྐྱར་ཟློས་ནང་འགྲོ་བར་བྱེད་ཅིང། དེ་ལས་རྒྱ་ནག་གཞུང་འབྲེལ་གྱིས་ཁས་བླངས་ཟིན་པའི་གནད་དོན་འགའ་དང་སྦྲེལ་ཏེ་སྙིང་བསྡུས་ཙམ་སྤྲོ་ན། དེང་སང་རྒྱ་གཞུང་གིས་''གནའ་སྔ་མོ་ནས་བོད་ཀྲུང་གོའི་ཆ་ཤས་''ཟེར་སྲོལ་འདི་ལ་འགྱུར་བ་བཏང་ཡོད་པ་མ་ཟད། དེ་སྔ་ཐང་བོད་འབྲེལ་བའི་སྐབས་ནས་བོད་ཀྲུང་གོའི་ཆ་ཤས་ཡིན་པར་བསྙད་པ་དེས་ཀྱང་ཁུངས་མ་འཁྱོལ་བ་གསལ་བོར་ཤེས་ནས། ཐང་བོད་སྐབས་ཀྱི་ཆ་ཤས་ཡིན་མིན་གྱི་རྫུན་གཏམ་སྡུད་གསོག་རྒྱབ་སྟེ་རྗེས་སུ་ཡིག་ཆ་ཐོན་པའི་ནང་སྐབས་དེར་རྒྱལ་ཁབ་གཉིས་ཡིན་པ་ཁས་བླངས་པ་དང་ཞོར་དུ། ཐང་བོད་འབྲེལ་བའི་མངའ་ཐང་སུ་ཆེ་ཙམ་རྩོད་ཁུལ་བྱས་འདུག་པ་ནི་ཆབ་སྲིད་ཅུས་ཀྱི་རྒྱུན་ལས་ཨུ་ཡོན་ནས་མ་གཟིགས་པའི་ཚུལ་གནང་པ་ཡིན་སྲིད། དེའི་རྗེས་ཐད་ཀར་ཧོར་རམ་ཡོན་རྒྱལ་རབས་ཀྱི་དུས་སྐབས་སུ་འཆོང་ལྡིང་བྱས་ཏེ། ཡོན་རྒྱལ་རབས་ནས་བོད་ཀྲུང་གོའི་ཆ་ཤས་ཡིན་ཟེར། དེ་ཡིན་པའི་སྒྲུབ་བྱེད་ལ་ཡོན་རྒྱལ་རབས་དེ་ཉིད་ཆེན་པོ་ཧོར་གྱི་རྒྱལ་རབས་མིན་ཚུལ་དང། ཡོན་ཆིང་གཉིས་ཀྲུང་གོའི་གོང་མ་ཡིན་ཚུལ་ཨུ་ཚུགས་བྱས་ཏེ། མདོ་དོན་ཧྭ་ཞ་མི་རིགས་ཀྱིས་རང་གི་མེས་རྒྱལ་ལ་ཀྲུང་གོ་འབོད་ཚུལ་དང། ཀྲུང་གོ་ནི་ཧྭ་ཞའི་རྒྱལ་ཁབ་ཁག་གི་སྤྱི་མིང་ཡིན་པས་ཀྲུང་གོ་ཟེར་བའི་ཚིག་དེའི་གོ་དོན་ནི་མེས་རྒྱལ་ཡིན་ཚུལ། ཡོན་ཆིང་གཉིས་ཀྱི་རིགས་བརྒྱུད་ཧྭ་ཞ་ཡིན་པས་དེ་གཉིས་ཀྲུང་གོའི་གྲངས་ཉུང་མི་རིགས་ཀྱི་གོང་མས་ཀྲུང་གོ་ཡོངས་ལ་དབང་བསྒྱུར་བྱས་པའི་ཀྲུང་གོའི་གོང་མ་འཁྲུལ་མེད་ཡིན་ཚུལ། ད་དུང་ཀྲུང་གོའི་གོང་མ་འཁྲུལ་མེད་ཡིན་ཚུལ་ལ་གོང་མ་དེ་གཉིས་ཀྱིས་སྔར་གྱི་ལམ་སྲོལ་ལྟར་ལོ་རྟགས་དང་རྒྱལ་རྟགས། གསེར་ཡིག་ཁྱབ་བསྒྲགས་བྱས་པ་རེད་སོགས་ཨུ་ཚུགས་ནན་དགུ་བྱས་ཡོད་ནའང། ཡོན་ཆང་གཉིས་ཧྭ་ཞ་ཟེར་བའི་རིགས་བརྒྱུད་དང་ཧྭ་ཞས་གནའ་སྔ་མོ་ནས་རྒྱ་ནག་ལ་''ཀྲུང་གོ་''ཟེར་ཚུལ་སོགས་ནི་ཟེར་བ་རེད་ཅེས་བཤད་པ་ཙམ་ལས། སྔ་མོའི་བྱུང་རབས་ཀྱི་ཡིག་ཆ་ཚད་ལྡན་གང་ཞིག་ལས་དྲངས་མིན་དང་རྩོམ་པ་པོ་མཁས་པ་སུ་ཡིན་གསལ་ཁ་མེད་པར་བློས་རང་བཟོ་འབའ་ཞིག་བྱས་འདུག་པ་ནི་སུས་བལྟས་ན་ཤེས་གསལ་རེད། དེ་མིན་རྒྱ་ནག་ལ་བོད་ཀྱི་བདག་དབང་ཐད་ཁུངས་ལྡན་ཡིག་ཆ་འདྲེན་རྒྱུ་ཡོད་ན་ས་འཕྱར་གནམ་འཕྱར་མི་བྱེད་པ་ག་ལ་སྲིད་དེ། ཐ་ན་གངས་ཅན་བླ་མ་ལྟ་བུའི་ཅི་བཤད་ལུང་དུ་དྲངས་ནས་རྫུན་ཚོགས་སྒྲིག་པར་ཡ་ང་བག་ཚ་མེད་མཁན་ཞིག་ལ་དེ་རིང་འདི་དག་གི་ཁུངས་ལུང་སྟོན་རྒྱུ་མེད་པ་ནི། སྤྲང་པོའི་དབྱུག་པ་སྤྲང་པོའི་མགོ་གཅོག་ཟེར་བ་ལྟར་ཕྱུག་པོའི་ཧམ་པ་ཕྱུག་པོའི་སྲོག་ལེན་དུ་གྱུར་སོང་བ་མིན་ན་ཅི་རེད། ལར་ནས་ལོ་ངོ་ ༥༠ ། ༦༠ རིང་རྫུན་ཡར་བཤད་མར་བཤད་བྱས་པའི་རྐུན་མའི་འབབ་ས་འདི་ལ་ཁུངས་ལུང་ཡང་དག་ཞིག་བསྟན་རྒྱུ་མ་རྙེད་ཚེ། མི་རྣམས་ནི་རང་དབང་མེད་པའི་ཀྲུང་གོ་མི་དམངས་ལྟར་མགོ་གཡོག་ཆོག་ཆོག་ཅིག་ག་ལ་ཡིན། གཏན་ནས་མ་རེད་དོ། དེས་ན་ཡོན་ཆིང་གཉིས་རྒྱ་ནག་གི་གོང་མ་ཡིན་ཚུལ་ཨུ་ནན་བྱེད་པ་ནི་རྫུན་མའི་ནོངས་རྟགས་གསལ་བོར་ཐོན་པ་རེད་སྙམ།

བོད་རྙིང་པའམ་དེ་སྔའི་དགའ་ལྡན་ཕོ་བྲང་གི་ལམ་སྲོལ་རེ་འགའ་འགྱུར་བ་གཏོང་དགོས་པ་ཞིག་ཡིན་པ་༸གོང་ས་བཅུ་བཞི་པ་ཆེན་པོས་ལན་མང་བཀའ་གནང་ཟིན་པ་ལྟར། རྒྱ་ནག་གཞུང་གིས་མིང་སྙན་མོ་བཏགས་ཏེ་དབང་བསྒྱུར་སྟབས་བདེ་མ་བཟོས་སྔོན་ནས་ལེགས་བཅོས་སྤྱི་ཚོགས་འཛུགས་རྒྱུའི་ཐུགས་གཞིགས་གཟབ་ནན་གནང་འདུག་ལ། ཕྱི་ནང་གི་དཀའ་ངལ་མང་པོའི་འོག་ལོ་རབས་ལྔ་བཅུའི་སྟོད་དུ་ལེགས་བཅོས་སྤྱི་ཚོགས་དངོས་སུ་མགོ་བཙུགས་ཡོད་པ་དེས། མི་མང་གི་ཤེས་ཚད་སྨིན་མིན་ལ་མ་བལྟས་པར་༸གོང་ས་མཆོག་ནི་མི་མང་གི་བདེ་ཐབས་ཁོ་ནར་འབད་བརྩོན་གནང་མཁན་གྱི་དབུ་འཁྲིད་ཅིག་ཡིན་པ་ལྷན་སྐྱེས་དང་སྐྱེས་སྦྱངས་གཉིས་ཀས་ར་སྤྲོད་གནང་བ་རེད། མིའི་རིགས་ཀྱི་སྤྱི་ཚོགས་འཕེལ་འཕེལ་འགྲིབ་ཆེན་པོའི་ཁྲོད་ཞིང་བྲན་ལམ་ལུགས་མ་བརྒྱུད་པའི་མི་རིགས་ཤིག་འཛམ་གླིང་ཤར་ནུབ་གང་དུའང་ཡོད་ཚོད་མེད་པ་དེང་སང་ཤེས་ལྡན་ཀུན་གྱིས་མགྲིན་གཅིག་གིས་གླེང་བཞིན་པ་དང། རྩོམ་པ་པོ་ཁོ་བོར་མཚོན་ན་ཆུང་དུས་ནས་གྲོང་ཚོའི་ནང་གི་རྒན་རྒོན་ལོ་ལོན་བསམ་ཤེས་ཚོའི་ཁ་ནས་ཐོས་པ་ནི་ཁོང་ཚོར་རྒྱ་ནག་གིས་བཤུ་བཤོག་ཞིང་བྲན་དངོས་སུ་ལག་བསྟར་བྱས་སོང་གསུངས་པ་མ་གཏོགས། རང་སའི་རང་དཔོན་རྣམས་ཀྱི་དུས་སུ་མུ་གེ་དང་སྡེབས་གསོད་མགོ་ལ་ཡོང་མྱོང་མེད་ཚུལ་རྐྱང་ཐོས་རྒྱུ་ཡོད། དམིགས་བསལ་རྒྱ་མོ་རྐང་ཏོ་མ་ལས་འཕྲོས་ཏེ་རྒྱ་ནག་གི་འཚོ་བའི་གནས་བབ་བཤད་དུས་སེམས་ལ་དངངས་འདར་ཐེངས་མང་སྐྱེས་མྱོང། སྨྱུག་འཛིན་པས་ཟླ་འགའི་སྔོན་རྒྱ་གར་གྱི་བྷ་རོ་ཏྲ་མངའ་སྡེའི་ནང་གི་ཡུལ་དེའི་རྒྱལ་བོའི་ཅ་དངོས་འགྲེམས་སྟོན་ཁང་ནས་ཨེ་ཤ་ཡའི་ལུང་པ་ཁག་གི་དངོས་པོ་བཤམས་སྟོན་བྱས་པ་རྣམས་མཐོང། དེར་གྱོན་གོས་དང་མཚོན་ཆ། རྫ་མ། ཡི་གེ་སོགས་འདྲ་མིན་འདུག ཕོ་མོའི་གྱོན་གོས་རྣམས་ལས་མིའི་བོང་ཚད་ཆེ་ཤོས་བོད་མི་དང་ཅ་དངོས་དག་ལ་གསེར་དངུལ་གྱི་རིན་ཐང་ལྡན་ཤོས་བོད་ཀྱི་ཅ་དངོས་དེ་ཚོ་རེད། དངོས་རིགས་དེ་དག་གི་ཁྲོད་དུ་རྒྱ་མོ་རྐང་ཏོ་མའི་ལྷམ་བྱ་ཕོའི་མགོ་ཙམ་ལས་མེད་པ་དེ་དངོས་སུ་མཐོང་བས། ཞིང་བྲན་ཁྲི་ཚོ་བརྒྱ་ཟེར་བའི་མ་ཎི་སྐྱོར་སྐྱོར་དེ་ཡིད་ལ་དྲན་ནས་གད་མོ་རང་ཤོར་དུ་སོང་<། གང་ཡིན་ཞེ་ན་ཞིང་བྲན་གྱི་སྡུག་རྩུབ་སུ་ཆེ་ཕྱོགས་གཉིས་ཀྱི་གནས་བབ་བཤིབ་བསྡུར་བྱས་ན་ད་གཟོད་ཤེས་གསལ་རེད་མ་གཏོགས། བོད་རྙིང་པའི་བརྙན་འཕྲིན་དུམ་བུ་རེ་འགའ་བསྐྱར་སྟོན་ཡང་སྟོན་དང། པེད་ཤག་དམར་པོ་མཐོང་ན་འབུ་མེར་ལྕེབས་བཞིན་གྲིམ་རིག་རིག་བྱེད་པའི་རང་སྐྱོང་ལྗོངས་ཀྱི་རྒན་རྒོན་ཁ་ཤས་གླ་གླས་བྱས་ཏེ་སྐྱིད་རབ་བདེ་རབ་སྐྱོར་པ་ཙམ་གྱིས་ཞིང་བྲན་ཁྲི་ཚོ་བརྒྱ་བཅིངས་འགྲོལ་ཐོབ་ཡོད་མེད་བཤད་ཁག་ཅིང། དངོས་གནས་ཁོང་ཚོར་བཅིངས་འགྲོལ་ཐོབ་ནས་ལྷ་ཡུལ་ལྟ་བུའི་བདེ་སྐྱིད་ཀྱི་འཚོ་བ་རོལ་གྱི་ཡོད་ན། ཞའོ་སྟོན་དང་སྨོན་ལམ་ཆེན་མོ། དགའ་ལྡན་ལྔ་མཆོད་སོགས་ཀྱིས་མཚོན་དུས་ཆེན་དག་གི་སྐབས་དམ་དྲག་དེ་ཙམ་གནང་དགོས་དོན་ཡོད་པ་མ་རེད་ལ། མཆོད་མཇལ་བ་ལས་སོ་ལྟའི་པར་ཆས་མང་པའི་གནས་སྟངས་དེ་འདྲ་ཞིག་ཀྱང་ཁྱོན་ནས་ཡོང་དོན་མེད། དེ་བཞིན་བོད་རིགས་ཆོས་ལྡན་ནང་པ་ཚོའི་རང་ཁྱིམ་དུ་ཆོས་དུག་ཏུ་བརྩི་བའི་རྒྱལ་ཁབ་ཀྱི་མགོ་ཁྲིད་ཚོའི་འདྲ་པར་བཙན་འགེལ་བྱེད་འཇུག་དོན་དེ་བས་ཀྱང་ཡོད་པ་མ་རེད།

གལ་སྲིད་རྒྱལ་སྤྱིའི་ཁྲིམས་དོན་མཁས་པའི་ལྷན་ཚོགས་སམ། ཡང་ན་མི་མང་གིས་དགའ་མོས་བྱེད་པའི་རྒྱ་ནག་དང་བོད་ནང་གི་ཤེས་ལྡན་གཟུར་གནས་སྐོར་ཞིག་རང་དབང་གིས་བོད་རིགས་ས་ཁུལ་ཁག་ཏུ་གདན་འདྲེན་ཞུས་ཏེ། ད་ལྟའི་རང་སྐྱོང་ཟེར་བའི་གནས་བབ་ཐད་ཞིབ་འཇུག་བྱས་པ་ཡིན་ན། བོད་མི་ཚོའི་འདོད་བློ་གཏན་ནས་ཚིམས་ཀྱི་མེད་པ་དང། མི་རིགས་ས་ཁོངས་རང་སྐྱོང་བཅའ་ཁྲིམས་དང་རྩ་ཁྲིམས་ནང་འཁོད་པའི་མི་རིགས་སྲིད་བྱུས་འགན་ལེན་རྣམས་རྦད་དེ་ཡིག་ཐོག་ནས་རུལ་ལ་ཉེ་བ་ཤེས་ཚོར་གསལ་བོ་འབྱུང་གི་རེད།

ཡང་ཀྲུང་དབྱང་ཆབ་སྲིད་རྒྱུན་ལས་ཁྲིང་ཁྲོན་ནས་བོད་དུ་མི་རིགས་ཁག་མཐུན་སྒྲིལ་དང། དཔལ་འབྱོར་ཡར་རྒྱས་ཕྱིན་ཏེ་འཚོ་བ་འོད་སྟོང་འབར་བའི་ཚད་དུ་སླེབས་ཡོད་པས། དེ་དྲིལ་བསྒྲགས་བྱས་ཏེ་''གུང་བྲན་ཏང་ཡག སྤྱི་ཚོགས་རིང་ལུགས་ཡག བཅོས་བསྒྱུར་སྒོ་འབྱེད་ཡག རླབས་ཆེན་མེས་རྒྱལ་ཡག མི་རིགས་ཁག་གི་མི་དམངས་ཡག་''བཅས་ཡག་པོ་དྲུག་བརྩེགས་གསལ་འདོན་བྱེད་དགོས་ཟེར། དངོས་དོན་དུ་བོད་རིགས་ས་ཁུལ་ཁག་ཏུ་ཡག་པོ་དྲུག་བརྩེགས་ཡོད་ན། ས་ལ་མི་འབབ་པའི་འུར་བསྟོད་བྱེད་མཚམས་བཞག་ནས་གུང་བྲན་ཏང་དང་བཅོས་བསྒྱུར་སྒོ་འབྱེད་སོགས་ཀྱིས་བོད་རིགས་མི་དམངས་ལ་ཡག་པོ་གང་བྱས་སྙན་ཐོ་ཞིབ་གསལ་འདོན་པ་དང། བོད་རིགས་ས་ཁུལ་ཁག་ཏུ་དེའི་གྲུབ་འབྲས་ཐད་བོད་མི་ཚོའི་ས་ནས་བསམ་ཚུལ་ཅི་ཡོད་ལ་<ཉན་ཞིབ་དང་བསྐྱར་ཞིབ་བྱས་ཏེ་བོད་མི་རང་ངོས་ནས་ཡག་པོ་དྲུག་བརྩེགས་ཡིན་པ་རང་དབང་ངང་བཤད་དུ་བཅུགས་ན་འཇིག་རྟེན་འདིའི་སྟེང་མི་མང་ལ་དབང་བའི་གཞུང་སྤྱི་མཚུངས་ལྟར་གྱི་གནང་སྲོལ་ཞིག་ཡིན་མོད། ད་དུང་དབུ་འཁྲིད་ཚོའི་རང་སྐྱོན་འགེབས་ཐུབ་ཀྱི་ཁ་གཡང་བསྐྱར་ཟློས་དང། མི་མང་གི་རྣ་ལ་སུན་པའི་ཀྲུང་གུང་ཀྲུང་དབྱང་གི་ཆབ་སྲིད་དྲིལ་བསྒྲགས་ཀྱིས་མ་ཉེས་ཁག་གཡོག་བྱས་པའི་ཐ་སྙད་ཁག་ཅིག་སྟེ''འཆམ་མཐུན་སྤྱི་ཚོགས། '' དང། '' དངོས་ཐོག་བདེན་འཚོལ། "ཟེར་བ་སོགས་ཕྲེང་བསྟར་བསྒྲིགས་ནས་བཞུགས་ན་ནམ་རིང་སྒྲུང་གིས་འཁྱོལ་མིན་དུས་ཚོད་ཀྱིས་གསལ་བཤད་བྱེད་ངེས་སྟབས། ལུགས་སྲོལ་ལྟར་བྱུང་བའི་"ཀྲུང་གོའི་ཕུགས་འདུན་''ཡང་ཐ་སྙད་གསར་པ་ལྟར་སྣང་ཡང་སྔར་ལམ་གྲོག་རོང་ནང་ཐོན་སྐྱེད་བྱས་པའི་དངོས་པོ་ཞིག་ཡིན་པ་ཀུན་གྱིས་ཤེས་གསལ་ཡིན། ཚིག་ལས་དོན་སྟོང་པ་དང། ཐ་སྙད་སྐམ་པོ་ཙམ་ལས་སྲོག་མ་ཞུགས་པའི་ཀྲུང་དབྱང་གི་གཞུང་འབྲེལ་ཡིག་ཆ་རྣམས་ངེས་པར་དུ་མིང་དོན་མཚུངས་པའི་ཕྱོགས་སུ་བསྐྱོད་རྒྱུ་ནི་ཁ་ཚ་དགོས་གཏུགས་ཤིག་རེད་ལ། བོད་ལ་ཤོད་དགོས་པ་གསུམ་འདོན་རྒྱུ་ལས་རང་ཉིད་ཀྱིས་ཤེས་དགོས་པ་གསུམ་ཡིད་བཅངས་བྱས་ཏེ། ''ཀྲུང་གོའི་ཕུགས་འདུན་''ཟེར་བའི་ཐ་སྙད་སྙིང་རྗེ་བོ་འདི་དག་ལ་མི་རིགས་ལྔ་བཅུ་ལྔ་དྲུག་ཐུན་མོང་འདྲ་མཉམ་གྱི་ཁེ་ཕན་དང་མདུན་ལམ་ཡོད་པའི་ནང་དོན་ལྡན་པར་བྱེད་རྒྱུ་ནི་དངོས་གནས་''རྒྱ་ནག་གི་རྨི་ལམ''ངོ་མ་དེ་ཡིན་པ་འདྲ།

མཇུག་མཐར་སྨྱུག་འཛིན་པས་ཀྲུང་དབྱང་ཆབ་སྲིད་རྒྱུན་ལས་ལགས་ལ་གསལ་འདེབས་ཁ་ཤས་ཤིག་ཞུ་འདོད་པ་དེ། ༸གོང་ས་མཆོག་གིས་བོད་རྙིང་པའི་ལམ་སྲོལ་བསྐྱར་སློག་བྱེད་རྩིས་ཡོད་གནས་ཀྱི་དྲིལ་བསྒྲགས་རྫུན་མ་དེས་ད་ནི་རྦད་དེ་ཁུངས་འཁྱོལ་གྱི་མེད་པ་ངོས་ལེན་གནང་སྟེ་སྐྱག་རྫུན་ཡིན་ཡང་ཅུང་རྣ་ལ་འགྲོ་བོ་ཞིག་བཤད་ཐུབ་ན་ཡག་པོ་ཡོད་པ་དང། དེ་བཞིན་༸གོང་ས་མཆོག་གིས་ནམ་ཞར་ཡང་ནུབ་ཕྱོགས་ཀྲུང་རྒོལ་ཚོགས་པར་ལག་འབྲེལ་བྱས་ཏེ་''བོད་རང་བཙན་''རྩ་བ་ནས་རྩོད་ཀྱི་མེད་ལ། མ་འོངས་པའང་མི་རྩོད་པའི་ཐུགས་འདུན་བརྟན་པོ་ཡིན་སྟབས། ''བོད་རང་བཙན་''ཟེར་བཞིན་བོད་ཐོག་ཅི་བྱས་ཆོག་པའི་གཡོ་ཇུས་མཇུག་བསྡུ་བྱས་ཏེ་བོད་ནང་གི་ཛ་དྲག་གནས་སྟངས་ཐད་༸གོང་ས་ཆེན་པོའི་སྐུ་ཚབ་མཉམ་འབྲེལ་མོལ་མགོ་འཛུགས་ཀྱིས། ཧ་ཅང་རིན་ཐང་བྲལ་བའི་༸གོང་ས་མཆོག་གི་ཡོང་རྒྱུའི་སྐུ་ཚེའི་རིང་གི་གོ་སྐབས་དམ་འཛིན་བྱེད་རྒྱུའི་གྲོས་གཞི་འདོན་རྒྱུ་ནི་ཀྲུང་དབྱང་ཆབ་སྲིད་རྒྱུན་ལས་ཨུ་ཡོན་ཞིག་གི་འོས་འགན་དངོས་གནས་དེ་རེད་བསམས།།

༢༠༡༣། ༦། ༡༧།  ཉིན།།

ཟུར་མཆན།

༡ ཀྲུང་དབྱང་ཆབ་སྲིད་རྒྱུན་ལས་ཨ་ཡོན་གྱི་གསལ་བོར་ཤོད་དགོས་པ་གསུམ་ཆ་ཚང་འདི་ནས་གཟིགས། http://tibet.people.com.cn/15245864.html

༢ ཞིས་ཅིན་ཕིན་གྱི་གཏམ་བཤད་རྣམས་ཏང་གི་ཚོགས་ཆེན་སྐབས་བཅོ་བརྒྱད་པར་བཤད་པ་ལས་དྲངས།།

ཤོག་ངོས་འདི་ཐེངས་ ༢༤༢༧ ལ་བཀླགས་འདུག
རིག་པ་འདོན་པ།
སེང་གེ
༢༠༡༣/༠༦/༢༦ ཉིན་འདོན་སྤེལ་བྱས།
འདི་སྐུ་ཞབས་ཡེ་རྡོར་གྱིས་ལན་འདེབས་བྱས་འདུག ཚང་མས་གཟིགས་དང། མི་དམངས་དྲ་བར།།
གནས་ཚང་
༢༠༡༣/༠༦/༢༤ ཉིན་འདོན་སྤེལ་བྱས།
བྱེ་མ་ཁང་གསར་ལགས། ད་ཏང་གིས་ཚུར་སྒོ་བརྡུང་གི་འདུག་གཱ ཆོག་མཆན་སྤྲད་ཟིན་པ་མིན་འགྲོ
བྱེ་མ་ཁང་གསར།
༢༠༡༣/༠༦/༢༢ ཉིན་འདོན་སྤེལ་བྱས།
གནས་ཚང་ངམ་གཞོན་ནུ་དང་བོད་ཀྱི་ལོ་རྒྱུས་ནང་གི་ཉེས་ཅན་པ་དོན་གྲུབ་ལྷ་དར་ལགས། ད་ཚོད་བཟུང་ན་ཡག་གི་རེད། ད་དངོས་གནས་མང་དྲག་སོང།
ཀརྨ་རྡོ་རྗེ།
༢༠༡༣/༠༦/༢༡ ཉིན་འདོན་སྤེལ་བྱས།
ཏང་དང། ཀྲུང་ཧྭ། ཀྲུང་གོ་གསུམ་ལ་ཁྱད་པར་གང་དང་ཡོད་དམ། དྲ་གྲོགས་ཅིག་གིས་གསལ་བཤད་གནང་རོགས་གནོངས།
ཀརྨ་རྡོ་རྗེ།
༢༠༡༣/༠༦/༢༡ ཉིན་འདོན་སྤེལ་བྱས།
ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ ཞེས་པའི་ཀྲུང་ཧྭ་ཞེས་པའོ་དོན་གང་ཡིན་ནམ།
ཀརྨ་རྡོ་རྗེ།
༢༠༡༣/༠༦/༢༡ ཉིན་འདོན་སྤེལ་བྱས།
ཏང་གི་ཚོགས་ཆེན་སྐབས་བཅོ་བརྒྱད་པ་ཞེས་པའི་ཏང་ཟེར་ན་གང་རེད་དམ།
མཐུ་རྩལ་ཐོགས་མེད།
༢༠༡༣/༠༦/༢༡ ཉིན་འདོན་སྤེལ་བྱས།
གཤམ་གྱི་རྒྱ་གཞུང་གི་འདིའི་ནང་ན་པཎ་ཆེན་གོང་མ་དག་གིས་རྒྱ་ནག་གོང་མར་ཕྱག་ཡིག་འདྲ་མིན་སྤྲིངས་ནང་བོད་མི་རིགས་འདི་ལངས་ཡ་མེད་པ་བཟོས་མེད་པར་ཤོག ང་ནི་ཧ་ཅང་ཞེད་སྣང་སྐྱེས། ཤེས་གསལ་ལྟར་ན་པཎ་ཆེན་དགུ་པས་ཕྱག་ཡིག་པེ་ཅིང་ནས་ཕྱི་ལོག་འགྲིམས་མེད་པ་དག་གིས་དགའ་ལྡན་ཕོ་བྲང་སྲིད་གཞུང་ལ་ཡག་པོ་ཞིག་བཤད་ཡོད་ཚོད་མི་འདུག


གསར་འགྱུར་འདི་ལ་གཟིགས་དང།།

༼པན་ཆེན་སྐུ་ཕྲེང་རིམ་བྱུང་གི་མཛད་རྣམ་༽ཞེས་པའི་བོད་ཡིག་གི་པར་གཞིའི་དཔེ་ཚོགས་མི་རིང་བར་དཔེ་སྐྲུན་བྱེད་རྒྱུ་ཡིན་པ།
སྤེལ་དུས། 2013-04-24   ཡོང་ཁུངས། ཀྲུང་གོའི་བོད་ལྗོངས་དྲ་བ།   རྩོམ་སྒྲིག་པ། ཚེ་རྡོར་གྱིས་བསྒྱུར།

མི་རིགས་ཀྱི་ཕུལ་བྱུང་གི་སྲོལ་རྒྱུན་རིག་གནས་སྔོག་འདོན་དང་པན་ཆེ་སྐུ་ཕྲེང་རིམ་བྱུང་གི་རྒྱལ་གཅེས་ཆོས་གཅེས་ཀྱི་མཚར་སྡུག་ལྡན་པའི་གྲུབ་འབྲས་དར་རྒྱས་གོང་འཕེལ་བཏང་ཆེད། སྤྱི་ཟླ་༤པའི་ཟླ་འགོར། བོད་ལྗོངས་སྤྱི་ཚོགས་ཚན་རིག་ཁང་དང་ལྷ་ས་རྣམ་སྲས་འཛུགས་སྐྲུན་ཁེ་ལས་ཚད་ཡོད་ཀུང་སིས༼པན་ཆེན་རིམ་བྱུང་གི་མཛད་རྣམ་༽ཞེས་པའི་བོད་ཡིག་གི་པར་གཞིའི་དཔེ་ཚོགས་རབ་དང་རིམ་པ་དཔེ་སྐྲུན་བྱེད་རྒྱུའི་གན་རྒྱ་འཇོག་ཡོད་པ་རེད།
ཤེས་རྟོགས་བྱུང་བར། དཔེ་ཚོགས་རབ་དང་རིམ་པ་དེ་དག་གི་དཔྱད་གཞི་རྣམས་བཀྲ་ཤིས་ལྷན་པོ་དགོན་གྱིས་མཁོ་འདོན་གནང་བ་དང་བོད་རང་སྐྱོང་ལྗོངས་སྤྱི་ཚོགས་ཚན་རིག་ཁང་གིས་འགན་ཁུར་ནས་ལེགས་སྒྲིག་དང་རྩོམ་སྒྲིག དཔེ་སྐྲུན་བཅས་བྱེད་རྒྱུ་ཡིན་ལ་ལྷ་ས་རྣམ་སྲས་འཛུགས་སྐྲུན་ཁེ་ལས་ཚད་ཡོད་ཀུང་སིས་ལེགས་སྒྲིག་དང་རྩོམ་སྒྲིག དཔེ་སྐྲུན་བཅས་བྱས་པའི་མ་དངུལ་ཆ་ཚང་གཏོང་རྒྱུ་ཡིན་པ་རེད།

ཉིན་ཤས་གོང་། བོད་ལྗོངས་སྤྱི་ཚོགས་ཚན་རིག་ཁང་དང་ལྷ་ས་རྣམ་སྲས་འཛུགས་སྐྲུན་ཁེ་ལས་ཚད་ཡོད་ཀུང་སིས༼པན་ཆེན་རིམ་བྱུང་གི་མཛད་རྣམ༽ཞེས་པའི་བོད་ཡིག་གི་པར་གཞིའི་དཔེ་ཚོགས་རབ་དང་རིམ་པ་དཔེ་སྐྲུན་བྱེད་རྒྱུའི་ཐད་བཞུགས་མོལ་གནང་ཡོད་པ་རེད།
མཐུ་རྩལ་ཐོགས་མེད།
༢༠༡༣/༠༦/༢༡ ཉིན་འདོན་སྤེལ་བྱས།
ཡོན་རྒྱལ་རབས་སྐབས་ནས་རྒྱ་ནག་གིས་འཇིགས་སྐུལ་བཏང་གི་འདུག་གདའ། གཤམ་གྱི་གསར་འགྱུར་འདིར་གཟིགས་རོགས།།


《བོད་ལྗོངས་ཀྱི་ཡོན་རྒྱལ་རབས་སྐབས་ཀྱི་གཞུང་ཕྱོགས་ཡིག་ཚགས》དེ《འཛམ་གླིང་དྲན་ཤེས་མིང་ཐོར》ཚུད་པ།
སྤེལ་དུས། 2013-06-21   ཡོང་ཁུངས། ཀྲུང་གོའི་བོད་ལྗོངས་གསར་འགྱུར་དྲ་བ།   རྩོམ་སྒྲིག་པ།  བསོད་བསྟན་གྱིས་བསྒྱུར།
མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་སྒྲིག་འཛུགས་ཀྱི་གཞུང་ཕྱོགས་དྲ་བའི་ཟླ༦ཚེས༡༩ཉིན་གྱི་གནས་ཚུལ་གཞིར་བཟུང་ན། ཟླ༦ཚེས༡༨ཉིན་ནས་ཚེས༢༡ཉིན་ཧན་གོའི་ཀོང་ཀྲའུ་དུ་སྤེལ་རྒྱུའི་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་སྒྲིག་འཛུགས་ཀྱི་འཛམ་གླིང་དྲན་ཤེས་ལས་གྲྭའི་རྒྱལ་སྤྱིའི་བློ་འདྲིའི་ཨུ་ཡོན་ལྷན་ཁང་གི་ཚོགས་འདུའི་ཐོག་བོད་རང་སྐྱོང་ལྗོངས་ཡིག་ཚགས་ཅུས་ཀྱིས་ཡིག་ཐོག་སྙན་ཞུ་བྱས་པའི《བོད་ལྗོངས་ཀྱི་ཡོན་རྒྱལ་རབས་སྐབས་ཀྱི་གཞུང་ཕྱོགས་ཡིག་ཚགས》དང་ཀོང་ཏུང་ཞིང་ཆེན་གྱི་ཡིག་ཚགས་ཅུས་ཀྱི་དང་ཧྥུ་ཅན་ཞིང་ཆེན་ཡིག་ཚགས་ཅུས་ཀྱི་མཉམ་འབྲེལ་ཐོག་ཡིག་ཐོག་སྙན་ཞུ་བྱས་པའི《ཆའོ་ཕིའི་ཡིག་ཚགས——ཕྱིར་སྡོད་སྤུན་ཟླའི་དངུལ་ཡིག》གཉིས་མཉམ་འབྲེལ་རྒྱལ་ཚོགས་སློབ་གསོ་ཚན་རིག་རིག་གནས་སྒྲིག་འཛུགས་ཀྱི《འཛམ་གླིང་དྲན་ཤེས་མིང་ཐོར》འདེམས་ཐོན་བྱུང་ཡོད་པ་རེད། ད་བར། ཀྲུང་གོའི་ཚད་ལྡན་ཡིག་ཆའི་ཤུལ་བཞག་དགུ《འཛམ་གླིང་དྲན་ཤེས་མིང་ཐོར》ཚུད་ཡོད་པ་རེད།

ཤེས་རྟོགས་བྱུང་བར་གཞིགས་ན། ཐེངས་འདིར་ཁྱོན་ཤུལ་བཞག་གི་ཚད་ལྡན་ཡིག་ཆ༥༤《འཛམ་གླིང་དྲན་ཤེས་མིང་ཐོར》འདེམས་ཐོན་བྱུང་བ་དང་ཁག་སོ་སོར་རྒྱལ་ཁབ༤༠ཙམ་དང་རྒྱལ་སྤྱིའི་སྒྲིག་འཛུགས་གཅིག་ལས་བདམས་ཡོད་པ་རེད། མཉམ་འབྲེལ་རྒྱལ་ཚོགས་ཚན་རིག་སློབ་གསོ་རིག་གནས་སྒྲིག་འཛུགས་ཀྱི་སྤྱི་ཁྱབ་ལས་འཛིན་པ་པུའུ་ཁྰ་ཝ་འབུམ་རབས་པས་ཉིན་དེར་ཁག༥༤རྣམས་ལ་མཆོག་མཆན་གནང་བ་རེད།

ཤེས་རྟོགས་བྱུང་བར་གཞིགས་ན། མིག་སྔར། རྒྱལ་ཁབ༡༠༠ལྷག་ཙམ་གྱི་འཛམ་གླིང་གི་དོན་སྙིང་ལྡན་པའི་ཚད་ལྡན་ཡིག་ཆ་དང་ཚད་ལྡན་ཡིག་ཆ་གཅེས་སྡུས༢༩༩《འཛམ་གླིང་དྲན་ཤེས་མིང་ཐོར》ཚུད་ཡོད་པ་རེད།
གནས་ཚང་
༢༠༡༣/༠༦/༢༡ ཉིན་འདོན་སྤེལ་བྱས།
སྙིང་རྗེ་མིན་གྱི་སྐད་ཆ་མ་རེད། ལོ་རྒྱུས་ངོ་མ་རེད། ད་དྲི་བ་གཅིག་རང་འདུག པཎ་ཆེན་ཏང་ལ་ཞུགས་པའི་རེ་འདུན་མི་ཞུ་བ་དང་གོང་སས་ཞུ་དོན་ཅི་ཡིན་ནམ། གཤིས་ཀར་ཐུག་ཡོད་པ་ཞིག་རེད་དམ།
སེང་གེ་བཟང་པོ།
༢༠༡༣/༠༦/༢༠ ཉིན་འདོན་སྤེལ་བྱས།
གནས་ཚང་ཁྱེད་སྙིང་རྗེ།
གནས་ཚང་
༢༠༡༣/༠༦/༢༠ ཉིན་འདོན་སྤེལ་བྱས།
༸གོང་ས་ཏང་ལ་ཞུགས་པའི་རེ་འདུན་མཁས་དབང་འཇམ་དཔལ་རྒྱ་མཚོས་སྐད་བསྒྱུར་བརྒྱུད་ནས་ཏང་ལ་ཞུས་པ་རེད། ད་ལྟའང་བློ་མཐུན་ཟུར་བ་ཞིག་རེད། མཁྱེན་སོང་ངམ།
རིག་པ་འདོན་པ།
རིག་པ་འདོན་ན་ངེས་པར་དུ་དེབ་སྐྱེལ་བྱེད་དགོས།
འདི་ལ་བསྣུན་ཏེ་དེབ་སྐྱེལ་བྱེད་རོགས།