༸མི་དབང་སྲིད་སྐྱོང་རིན་པོ་ཆེའི་༸སྙན་དྲུང་དུ།

འདོན་སྤེལ། ༢༠༡༣/༠༦/༢༥

ཕྲན་བཀྲ་ཤིས་འཇིགམེད

བདག་ཅག་བོད་འབངས་ཀྱི་མི་ཡི་དབང་པོ་སྲིད་སྐྱོང་ཆེན་པོ་༸བློ་བཟང་སེང་གེ་མཆོག་གི་ཞབས་པད་བདག་གི་སྤྱི་བོར་འཁོད་པའི་དྲུང་དུ། ༸མི་དབང་ཆེན་པོ་གང་ཉིད་དང་གང་གི་ཞབས་འབྲང་པ་འགའ་ཤས་ཀྱིས་མཛད་བྲེལ་གྱི་བར་གསེང་ནས་གུས་འབངས་སྐྱབས་འོག་པ་བདག་རྩད་འཚོལ་གནང་གི་ཡོད་པ་གོ་ཐོས་བྱུང་འཕྲལ་སྲིད་སྐྱོང་རིན་པོ་ཆེས་སྤྱན་གཟིགས་བསྐྱངས་པ་བསོད་ནམས་ཀྱི་བགོ་སྐལ་དུ་བསམས་ཏེ་གང་གི་༸སྙན་དབང་རིན་པོ་ཆེའི་དྲུང་དུ་ངོ་བཅར་ཞུ་དགོས་བྱུང་། ཉེ་བའི་ཆར་སྐྱེ་བོ་གློ་བུར་བ་ཡིད་ལ་བྱེད་པ་ཉུང་བ་འགའ་ཞིག་གིས་གུས་འབངས་ནས་མི་དབང་ཆེན་པོའི་ལྷ་དགོངས་དཀྲུག་ཡོད་ཚུལ་བརྗོད་ཀྱང་ཇི་མི་སྙམ་པར་སྤམ་འཇོག་བྱས་པ་ཡིན། ད་ལྟ་མི་དབང་མཆོག་ནས་ཐུགས་ཚོར་ཆེན་པོ་གནང་གི་ཡོད་སྐད་རྒྱུས་ཅན་འགའ་ཤས་ལས་ཤེས་ཚོར་བྱུང་བས་དེ་ལྟར་ན་མངའ་བདག་༸མི་དབང་ཆེན་པོའི་སྙན་དབང་རིན་པོ་ཆེའི་དྲུང་དུ་སྔ་འགྱོད་ཕྱི་སྡོམ་གྱི་ཞུ་སྙན་ཚིག་གི་མེ་ཏོག་རྣམ་པར་བཀྲ་བ་ཞིག་མ་ཕུལ་ན། མི་དབང་ཆེན་པོའི་བཀའ་བཙན་མཆེ་སྡེར་གྱི་ཀློང་ནས་ཐར་དཀའ་བས་ལུང་ཤར་ལྟ་བུ་མིག་འབྲས་ཀྱང་ཤོར་ཉེན་དུ་མཐོང་སྟེ་ལྷ་དགོངས་དྭངས་པའི་བཟོད་གསོལ་གྱི་ཞུ་བ་འདི་མི་འབུལ་ཐབས་མེད་བྱུང་

            ༸སྙན་དབང་རིན་པོ་ཆེར། གུས་འབངས་ནས་ཉེ་བའི་ཆར་གང་ཉིད་ཀྱི་ཆབ་སྲིད་མཛད་ཕྱོགས་དང་འབྲེལ་བའི་ཐོག་ནས་ཚོ་བ་དང་དངོས་དོན་མཉམ་བསྲེས་ཀྱི་དཔྱད་གླེང་བསམ་འཆར་མཚོན་པའི་རྩོམ་ཡིག་འགའ་ཤས་དྲ་ཐོག་ཏུ་སྤེལ་ཡོད། གང་ཉིད་ཀྱི་ཕྱི་ནང་གསང་གསུམ་གྱི་མཛད་སྤྱོད་གངྒཱའི་ཀློང་གི་བྱེ་མ་དང་མཉམ་པ་མུ་དང་མཐའ་མ་མཆིས་པ་ལས་བདག་གི་བྱིས་བློས་མཐོང་ཐོས་བྱུང་བའི་ཐིགས་པ་ཁ་ཤས་ཤིག་ལས་གྲུབ་པའི་རྩོམ་ཡིག་ཉམ་ཆུང་དེས་དེང་རབས་ཡར་ཐོན་ཅན་གྱི་སྤྱི་ཚོགས་ནང་སྟོང་གསུམ་སྐད་ཀྱིས་ཆོད་པའི་གཙུག་ལག་སློབ་གྲྭ་ཆེན་མོའི་འབུམ་རམས་པའི་ཕྱག་ཁྱེར་ཡོད་པ་༸མི་དབང་རྒྱལ་སྲས་རིན་པོ་ཆེའི་ཐུགས་ནམ་མཁའ་ལྟ་བུ་སྐར་ཚོགས་ཁྲི་འབུམ་གྱིས་བརྒྱན་ཅིང་། རྒྱ་མཚོ་ལྟ་བུ་འབུ་སྲིན་དུང་ཕྱུར་འདུས་པའི་དཀྱེལ་ཆེའི་ལྷ་དགོངས་འཁྱོམ་ཡོང་བསམ་པ་གཉིད་དད་ཆེ་བའི་རྨི་ལམ་དུ་ཡང་མེད། སྐུ་ཉིད་ནི་མང་པོས་བཀའ་བློན་ཁྲི་པར་བཀུར་ཞིང་༸གོང་ས་སྐྱབས་མགོན་ཆེན་པོ་མཆོག་གིས་སྲིད་སྐྱོང་སྟག་བྲག་རིན་པོ་ཆེའི་ཕྱག་ནས་བཞེས་པའི་ཆབ་སྲིད་ཀྱི་སྐུ་དབང་ཡོངས་རྫོགས་གསོལ་སྩལ་གནང་ཡུལ་ཞིག་ཡིན་པས་གུས་འབངས་ལྷ་མི་ཀུན་གྱིས་གུས་བཀུར་ཞུ་ཡུལ་ཡིན་པ་ནི་སྨོས་ཅི་དགོས་ཏེ་ད་བར་༸མི་དབང་སྲིད་སྐྱོང་རིན་པོ་ཆེའི་ཞབས་པད་གཙུག་ཏུ་བཀུར་བཞིན་མཆིས།

            འོན་ཏང་སྐུ་ཉིད་སྲིད་སྐྱོང་སྟག་བྲག་རིན་པོ་ཆེའི་བཞུགས་ཁྲིའི་སྟེང་ཕེབས་ནས་ཡུན་རིང་མ་ཕྱིན་གོང་ནས་གངས་ཅན་སྐྱིད་གཤོངས་གཙོ་གྱུར་ཐོག་བོད་མིའི་གནད་ཡོད་མི་སྣ་འདུས་སྡོད་ཀྱི་སྤྱི་ཚོགས་ནང་ད་ནི་སྲིད་སྐྱོང་རིན་པོ་ཆེ་ནམ་མཁར་འཕུར་ཟིན་འདུག སྲིད་སྐྱོང་རིན་པོ་ཆེས་རང་ཉིད་སྤྲུལ་སྐུ་ཡིན་རབས་ཤོད་ཀྱི་འདུག སྲིད་སྐྱོང་རིན་པོ་ཆེས་རང་ཉིད་སྐུ་དྲག་གསར་པ་ཞིག་ཏུ་འགྱུར་འདོད་གནང་གི་འདུག སྲིད་སྐྱོང་རིན་པོ་ཆེས་དཔུང་སྒྲིག་གི་འདུག སྲིད་སྐྱོང་རིན་པོ་ཆེས་ཨབ་ཕྲུག་གསོ་ཡི་འདུག སྲིད་སྐྱོང་རིན་པོ་ཆེས་རང་གི་སྐུ་ཐང་བཞེང་གི་འདུག སྲིད་སྐྱོང་རིན་པོ་ཆེས་རང་ཉིད་བ་ཕྱུགས་འཚོང་མཁན་ཡིན་པ་རྦད་དེ་བརྗེད་འདུག  ཅེས་སོགས་ཀྱི་ལབ་གླེང་མང་དག་ཅིག་བྱུང་སོང་ཡང་དེ་དག་ནི་ཐེའུ་རང་ལ་དབང་བྱུང་ན། གོ་ཁ་ཐལ་བས་སྒྱོང་བ་དེ་འདྲ་མ་ཡིན་པར། སྦྱིན་བདག་ཕྱི་བལྟས་སློག་པ་དང་། གཡོག་པོ་སྐེད་གཟེར་བྱས་པ་དུས་མཉམ་དུ་ཁེལ་བ་ཡིན་གྱི་རེད་སྙམ་སྟེ་རང་གི་སེམས་པ་རང་གིས་གསོས་ཤིང་ཉན་འཇོག་བྱས་མེད།

            དུས་ཚོད་ནི་སྐར་ཆ་རེ་རེ་བཞིན་འགྲོ་བཞིན་འདུག མི་དབང་མཆོག་སྲིད་ཁྲིར་འཁོད་དེ་ལོ་གཅིག་ཧྲིལ་པོ་འཁོར་བའི་རྗེས་དྲན་མཛད་སྒོ་ཟབ་རྒྱས་ཤིག་ཚོགས་ཟིན་པ་མ་ཟད། ད་ཆ་ལོ་གཉིས་འཁོར་བའི་རྗེས་དྲན་མཛད་སྒོའི་སྟ་གོན་བྱ་རྒྱུར་ཉེ་ཡོད། ཡིན་ནའང་སྲིད་སྐྱོང་མཆོག་གིས་དེ་སྔོན་གལ་ཆེར་ངོས་འཛིན་གནང་བའི་རྩ་དོན་དང་ཤེས་ཡོན་ཐད་འདི་བྱས་འདི་མིན་གྱི་སྲིད་བྱུས་ཁ་གཏིང་ལོན་པ་ཞིག་གསལ་སྟོན་གནང་མ་སོང་། དེ་ལས་ལྡོག་སྟེ་སྤྱི་ཚོགས་ནང་དབུ་རང་གཉིས་ཀྱི་མིང་ཐོག་ནས་རྩ་དོན་ཐོག་ཟང་ཟིང་དུ་གྱུར་སོང་། ཤེས་ཡོན་སྲིད་བྱུས་ཐོག་ལྐོག་ལྐོག་སུད་སུད་མང་པོ་ཞིག་གནང་གི་འདུག བགྲེས་ཡོལ་ཆ་ཚང་ལ་ཕེབས་ཟིན་པའི་༸གོང་ས་མཆོག་ནས་སླར་ཡང་རྩ་དོན་ཐད་བཀའ་སློབ་མང་པོ་ཞིག་ཕེབས་དགོས་བྱུང་སོང་། དངོས་གནས་བྱས་ན་བཀའ་སློབ་དེ་ཚོ་སྲིད་སྐྱོང་རིན་པོ་ཆེས་གནང་དགོས་པ་རེད། ཆིག་སྒྲིལ་ཁ་ལ་འཁྱེར་ནས་རྩ་དོན་ཐོག་ཉ་ཉུང་མཉམ་བསྲེས་མང་པོ་གནང་བས་སྤྱི་ཚོགས་ཟང་ཟིང་དུ་གྱུར་སྐབས་བགྲེས་ཡོལ་ཆ་ཚང་ལ་ཕེབས་ཟིན་པའི་༸གོང་ས་མཆོག་གིས་རྩ་དོན་ཐོག་བཀའ་སློབ་ལམ་སྟོན་ཕེབས་དགོས་བྱུང་བ་གསལ་པོ་རེད། དུས་སྐབས་དེའི་ནང་བརླང་སྤྱོད་ཅན་སྐྱེ་བོ་མི་བསྲུན་པ་འགའ་ཤས་ཀྱིས་བགྲེས་ཡོལ་ལ་ཕེབས་ཟིན་པའི་༸གོང་ས་མཆོག་ནས་རྩ་དོན་ཐོག་ལམ་སྟོན་བསམ་འཆར་ཕེབས་པར་ཟུར་ཟ་འདྲ་མིན་བྱས་ཀྱང་གང་ཉིད་ཀྱིས་གཞིས་ལུས་རྒྱ་ཆེའི་མི་མང་གི་བདེ་སྡུག་ཉག་གཅིག་ལ་དགོངས་ཏེ། བཙན་བྱོལ་ནང་སྐྱིད་དྲགནས་སྐྱིད་ཚོད་མ་ཟིན་མཁན་དོན་དུ་སྤྱི་དོན་ཁ་འཁྱེར་དང་རང་དོན་ཁོག་བཅུག་པ་འགའ་ཤས་ལ་རང་འདོད་གང་ཡོད་བྱེད་མ་འཇུག་པར་བོད་མིའི་འདུས་སྡོད་གང་སར་མི་གཅིག་ལག་གཅིག་ལྟ་བུ་བཀའ་སློབ་ལམ་སྟོན་ཕེབས་དགོས་བྱུང་ཡོད་ཀྱང་། སྲིད་སྐྱོང་མཆོག་གིས་དེ་ཚོར་གཡོལ་ནས་བཞུགས་སོང་སྙམ། ངས་རྩོམ་ཡིག་འདྲ་མིན་འབྲི་དགོས་པའི་སྙིང་ནད་ཆེ་ཤོས་ཀྱང་འདི་རང་ཡིན། ད་ནི་སྲིད་སྐྱོང་སྟག་བྲག་རིན་པོ་ཆེའི་ཡང་སྲིད་སྟག་ལུང་བྲག་གི་རི་ཁྲོད་དུ་ལོག་ཕེབས་པ་ཡིན་ནམ། ཡང་ན་སྲིད་ཁྲིའི་སྟེང་དུ་བཞུགས་ཡོད་དམ་སྙམ། ངའི་མིག་མདུན་དུ་གནས་ཚུལ་འདི་འདྲ་གཅིག་མཇུག་གཉིས་མཐུད་དུ་ལྷག་ཡོང་དུས་ད་ནི་ཀླད་པ་ཞོ་མིན་ན་བཏང་སྙོམས་སུ་འཇོག་ཐབས་མི་འདུག སྔ་མོའི་བོད་ཀྱི་གཏམ་དཔེར། རྐྱང་རྔོ་ཤོར་ན། རི་དྭགས་ཀུན་རྫད། ཅེས་པ་ལྟར་ལོ་རྒྱུས་ཀྱི་ནག་ཐིགས་ཤིག་ཏུ་འགྱུར་ངེས་སུ་མཐོང་སྟེ་སོར་རྩེ་མ་ཁྱུག་ཐབས་མེད་བྱུང་། ང་ཙམ་མིན་པར་མི་མང་པོས་རྒྱ་བོད་དབྱིན་གསུམ་ནང་རྩོམ་ཡིག་མང་དག་ཅིག་སྤེལ་ཡོང་གི་འདུག ཚང་མས་ད་ནི་སྲིད་སྐྱོང་རིན་པོ་ཆེས་བླ་མ་འདོད་ཀྱི་ཡོད་དམ། ཚོགའཁོར་འདོད་ཀྱི་ཡོད། ཤོད་ཚོད་མི་ཐིག་པ་ལྟ་བུ་གཅིག་མཚུངས་སུ་གསུང་ཡོང་གི་འདུག

            མཱོ་ར་མོན་ནི་ཧན (Maura Moynihan)གྱིས།བློ་བཟང་སེང་གེས་རིག་པ་བསྒྲིམས་ཏེ་ཁོང་རང་ཉིད་ཀྱི་ལྷ་སྒྲུང་ཞིག་ཀྱང་བཞེང་སྐྲུན་བྱེད་བཞིན་ཡོད། དེའི་ཁྲོད་ཀྱི་ཁ་ཤས་ཤིག་དེ་སྔོན་གྱི་དམར་ཤོག་ཚོགས་པའི་དུས་སྐབས་ཀྱི་བོད་ཀྱི་ཆབ་སྲིད་རིག་གནས་ཀྱི་ཁྱད་ཆོས་ཡོད་པ་ཞིག་ཡིན། ཁོང་སྒེར་གྱི་ངོ་དེབ་ཐོག་ཏུ་ཁོང་ནི་ཏཱ་ལའི་བླ་མ་དང་གུ་རུ་རིན་པོ་ཆེའི་སྲིད་ཕྱོགས་ཀྱི་སྤྲུལ་” secular emanationཡིན་པའི་ཁྱབ་བསྒྲགས་བྱས་ཡོད། དེ་བཞིན་ཝ་ཤིང་ཏྲོན་གྱི་ཕྱི་འབྲེལ་ལྷན་ཁང་གི་དགོང་ཚོགས་ཐོག་ཁོང་གིས།བོད་ནང་གི་སྒྱུ་རྩལ་བ་མང་པོས་གླུ་གཞས་ཀྱི་ལམ་ནས་ཁོང་གི་འོས་འགྲན་ལ་རྒྱལ་ཁ་ཐོབ་པར་དགའ་བསུ་མཚོན་པར་བྱས་ཡོད་ལ། ཁོང་ཚོས་གླུ་གཞས་དེ་དག་དྲ་ཐོག་ YouTube ཏུ་བཞག་ཡོད་པ་མ་ཟད་གཞས་ཚིག་དབྱིན་ཡིག་ཏུ་བསྒྱུར་ཡོད། མི་ཁ་ཤས་ཀྱིས་ཁོང་ལ་བསྐུར་ཡོང་བའི་ཐང་གའི་ནང་ནམ་རྒྱུན་ཐང་གའི་ནང་དུ་ང་ཚོས་ལྷ་དང་ལྷ་མོའི་སྐུ་བརྙན་བཞེངས་བྲིས་གནང་གི་ཡོད་ཀྱང་། ད་རེཁོང་ཚོས་ཐང་གའི་ནང་ང་གཅིག་པུའི་པར་བཞག་སྟེ་ས་ཆ་གང་སར་བཀྲམ་འདུགཅེས་སོགས་བརྗོད།ཞེས་དང་བོད་ནང་ཉིན་རེ་བཞིན་མང་དུ་འགྲོ་ཡི་ཡོད་པའི་ངོ་རྒོལ་ལས་འགུལ་ཁྲོད་རྐྱེན་འདས་སུ་སོང་བའི་གྲངས་འབོར་དང་། ས་སློག་འཕྲུལ་འཁོར་གནས་མཆོག་ལྷ་སའི་གཙུག་ལག་ཁང་གི་མདུན་དུ་སླེབས་ཏེ་བོད་ཀྱི་སྲོལ་རྒྱུན་རིག་དངོས་ཉིན་རེ་བཞིན་གཏོར་བཤིག་གཏོང་བཞིན་པའི་དུས་སྐབས་འདི་འདྲར། ཁོང་གི་སྐད་ཆ་བཤད་སྟངས་དེ་འདྲ་ནི་མི་རྣམས་ལ་གད་མོ་སློང་བྱེད་ཅིག་རང་རེད། ཅེས་བཤད་འདུག

            ད་དུང་འཇམ་དབྱངས་ནོར་བུས།རྨོངས་དད་རྗེས་འབྲངས་པའི་གཤིས་ཀ་ཞེས་ཀྱང་བརྗོད་རུང་བ་ལྟ་བུ་ཞིག་ནི་བོད་ཀྱི་བླ་མེད་ཀྱི་དབུ་འཁྲིད་གསར་པའི་མཐའ་སྐོར་དུ་མངོན་རྒྱུ་མགོ་བཙུགས་ཟིན་འདུག  ཁོང་ཨ་མི་རི་ཀ་དང་དེ་ལས་གཞན་པའི་ས་ཁུལ་གྱི་བོད་མིའི་ཚོགས་པ་ཁག་ལ་ཕེབས་སྐབས། རླངས་འཁོར་ནག་པོའི་ཕྲེང་བསྟར་དང་། གྱོན་པ་ནག་པོ་གོན་པའི་སྐུ་སྲུང་གིས་སྣེ་དྲངས་ཡོང་གི་འདུག དེ་དག་ནི་སྟོབས་ཆེན་རྒྱལ་ཁབ་ཀྱི་དབུ་འཁྲིད་ཁག་དང་དེ་བཞིན་ནག་ཉེས་ཅན་གྱི་ཚོགས་པ་སྟོབས་ཆེན་ཁག་ལ་འདྲ་ཆགས་པོ་ཡོད་པ་ལས།  རང་གི་ཐེབས་རྩ་ནུབ་ཕྱོགས་ཀྱི་རོགས་དངུལ་ལ་བརྟེན་པའི་སྐྱབས་བཅོལ་བའི་དབུ་ཁྲིད་ཅིག་ལ་འདྲ་ཆགས་པོ་མི་འདུགཅེས་དང་ ཁྲོམ་སྐོར་དང་ཟིང་ཆ་དེ་དག་ཇེ་སྡུག་ལ་འགྲོ་བཞིན་འདུག  བོད་ནང་གི་ས་གནས་གང་སར་ཡོད་པའི་ངལ་རྩོལ་བསྒྱུར་བཀོལ་རྭ་བ་དང་། མནར་གཅོད་ཁང་དུ་ཡོད་པའི་ཆབ་སྲིད་བཙོན་པ། སྙིང་སྟོབས་ཅན་གྱི་སྐུ་ལུས་མེར་སྲེག་གནང་མཁན་བཅས་ང་ཚོའི་འཐབ་རྩོད་ཁྲོད་ཀྱི་དབུ་འཁྲིད་ངོ་མ་གནང་མཁན་རྣམས་ལ་མཚོན་ན། དུས་ཚོད་འདི་ནི་ལེའུ་ཁག་ཤོས་དེ་ཡིན་པར་དོགས་པ་ཡོད་པ་མ་རེད། ཡིན་ན་ཡང་སྲིད་སྐྱོང་དང་། དེ་བཞིན་ང་ཚོ་རང་དབང་ལུང་པར་སྡོད་མཁན་ཚོས་ང་ཚོས་རྩ་དོན་ལ་ཞལ་འདེབས་ཅུང་ཙམ་བྱས་པ་དེ་ནི་དེ་འདྲའི་གལ་ཆེ་མདོག་གི་ཚིག་གིས་འགྲེལ་བཤད་བྱེད་པའི་འོས་བབ་ཡོད་པ་མ་རེད།ཅེས་བཤད་འདུག སྐད་ཆ་འདི་དག་ལ་གཞི་རྩ་ཡོད་པ་མ་རེད། སྐད་ཆ་འདི་ཚོ་ཚང་མ་སྲིད་སྐྱོང་མཆོག་ལ་ཕྲག་དོགས་ཡོད་པ་ཚོས་བཤད་པ་རེད་ཅེས་སྤྱི་ཚོགས་ཀྱི་གནས་བབས་མི་ཤེས་པའི་མི་ཁ་ཤས་ཀྱིས་སྲིད་སྐྱོང་ལ་ཤ་ཚ་མདོག་གིས་ཤོད་བཞིན་པའི་སྐད་ཆ་ཞིག་གིས་མཇུག་སྡོམ་བརྒྱབ་སྟེ་བཞག་དགོས་སམ། མཚམས་འདིར་གསལ་བཤད་ཞུ་རྒྱུར། ང་ཚོས་སྲིད་སྐྱོང་མཆོག་ལ་ཆེ་མཐོང་དང་གུས་བཀུར་དགོས་ཀྱི་མ་རེད་ཅེས་ཤོད་ཀྱི་མེད། ཆེ་མཐོང་དང་གུས་བཀུར་གྱི་ཆེད་དུ་ཕྱག་ལས་གནང་རྒྱུ་རྩ་དོན་དུ་བཟུང་ན་འགྲིག་གི་མི་འདུག་ཞུ་ཡི་ཡོད། ངས་བལྟས་ན་༸མི་དབང་སྲིད་སྐྱོང་མཆོག་ལ་རྒྱུས་མངའ་ཆེ་ཤོས་ཡིན་པའི་ཨ་རིའི་སྦོ་སི་ཌོན་ལ་གནས་སྡོད་བྱེད་མཁན་དང་། གངས་ཅན་སྐྱིད་གཤོངས་ལ་གནས་སྡོད་བྱེད་མཁན་ཞིག་གི་བསམ་བློའི་ཐོག་ནས་བཤད་ན། སྐད་ཆ་འདི་ཚོ་ནི་བསམ་གཞིགས་ཀྱི་རིན་ཐང་ཡོད་པའི་སྤྱི་ཚོགས་ཚན་རིག་གི་སྐད་ཆ་ཞིག་ཡིན་སྲིད། སྐད་ཆ་འདི་ཚོ་ང་ཚོའི་སྲིད་སྐྱོང་གི་ཡོངས་འཛིན་ཡིན་ལ་རྩ་དོན་གྱི་ཡོངས་འཛིན་ཡང་ཡིན་ངེས།

            གཟུགས་མེད་ན་གྲིབ་ནག་ཡོང་དོན་མེད་ཀྱང་དེ་རིང་ཁ་སང་གཟུགས་མི་མངོན་པའི་གྲིབ་ནག་ཅིག་གངས་ཅན་སྐྱིད་གཤོངས་ན་མངོན་རྒྱུ་འདུག་འདི་ནི་ལམ་འགྲོ་རྒྱུག་བཞིན་པའི་གཡོ་བྱུས་ཤིག་རེད། དེང་རབས་ཆབ་སྲིད་ཀྱི་གཟུགས་རིས་ནག་པོ་ཡིན་ཙང་གཟུགས་དང་གྲིབ་ནག་སོ་སོར་སྐྱེ་བོ་རང་ག་བས་དབྱེ་འབྱེད་ཐུབ་ཀྱི་མེད་<པ་འདྲ། ཕ་མ་སྤུན་མཆེད་ཚང་མ་བོད་ནང་ཡོད་པའི་ཡུལ་གྱར་བ་ཞིག་ལ་མཚོན་ན་གཞིས་ལུས་བོད་མི་ཚོས་དཀའ་སྡུག་ག་ཚོད་མྱང་གི་ཡོད་པ་ཚང་མ་བརྙན་འཕྲིན་དང་རླུང་འཕྲིན་སོགས་ཀྱི་བརྒྱུད་ལམ་ཙམ་མ་ཡིན་པར་མིག་མཐོང་ལག་ཟིན་གྱི་མྱོང་བ་ཡོད། འདི་འདྲའི་གང་ཟག་ཅིག་གི་ངོས་ནས་བཤད་ན་རྩ་དོན་འཐབ་རྩོད་ཀྱི་རྒྱལ་ཁ་མ་ལོན་གོང་ནས་དབང་ཆའི་འཐབ་རྩོད་ཀྱི་དར་ཆ་སྒྲེང་ཡོང་བ་མཐོང་སྐབས་སེམས་གཏིང་ནས་ཞེན་པ་ལོག་སྲིད། ༸མི་དབང་སྲིད་སྐྱོང་རིན་པོ་ཆེ་གང་ཉིད་ནི་༸གོང་ས་༸སྐྱབས་མགོན་ཆེན་པོ་མཆོག་ནས་ཐུགས་རེ་ཆེན་པོས་སྲིད་སྐྱོང་གི་མཚན་གསོལ་གནང་ཡུལ་གྱི་སྐྱེ་བོ་དང་པོ་དེ་ཡིན་པས་སྲིད་སྐྱོང་གི་མཚན་གནས་རྗེས་འབྲེལ་ཐོག་ནས་༸གོང་ས་ཆེན་པོར་སྲིད་དོན་སྤྱི་དང་ལྷག་པར་རྩ་དོན་ཐད་ཐུགས་ལྷོད་ལྷོད་བྱས་ཏེ་བཞུགས་རྒྱུ་ཡོད་པ་ཞིག་གནང་དགོས་པ་ནི་ད་ལྟའི་ང་ཚོའི་སྲིད་སྐྱོང་གི་ལས་འགན་ངོ་མ་དེ་རེད། ལས་འགན་ལེགས་གྲུབ་ཀྱི་ཐོག་ནས་རང་ལ་ཆེ་མཐོང་དང་གུས་ཞབས་ཐོབ་པ་ཞིག་དགོས་པ་ལས། ཆེ་མཐོང་དང་གུས་ཞབས་ཀྱི་མཚན་སྙན་ཐོབ་པའི་ཆེད་དུ་ལས་ཀ་བྱེད་པ་ནི་རང་ཉིད་ཕམ་བྱེད་ཀྱི་ལག་ཆ་ངོ་མ་དེ་ཡིན་པ་མཁྱེན་དགོས། འདས་པའི་ལོ་རྒྱུས་ལ་ཕྱི་གཟིགས་གནང་ན། མི་དབང་ཕོ་ལྷ་བ་བསོད་ནམས་སྟོབས་རྒྱས་ཀྱིས་རང་གི་སྙན་གྲགས་དང་དབང་ཐང་ཆེ་རུ་གཏོང་ཆེད་དུ་རྩ་དོན་ཐོག་རྒྱལ་བཙོང་གི་བྱ་བ་བསྒྲུབས་ཡོད། ཁོང་གིས་རང་གི་སྐུ་ཐང་བཞེངས་པ་དང་། རྟོག་བརྗོད་བྲིས་ཡོད་ཀྱང་། དོན་དངོས་ཐོག་ཁོང་ནི་ལོ་རྒྱུས་ནང་མི་ནག་ཅན་ཞིག་ཏུ་གྱུར་ཡོད།

            གང་ཉིད་ནས་ཐག་རིང་པོར་གཟིགས་མི་དགོས་པར་རང་བཙན་འཐབ་རྩོད་ཀྱི་མིང་ཅན་བསྟན་འཛིན་བརྩོན་འགྲུས་ཀྱི་ཉེ་རབས་ཕམ་ཉེས་ཀྱི་ལོ་རྒྱུས་ལ་གཟིགས་དང་། དཔའ་ངར་ལྡན་པའི་རང་བཙན་འཐབ་རྩོད་དེ་རིམ་བཞིན་རང་ཉིད་འཐབ་རྩོད་ལ་བསྒྱུར་ཅིང་། རང་ཉིད་འཐབ་རྩོད་ཀྱིས་རང་ཉིད་ཕམ་ཉེས་བཏང་བའི་གནས་ལུགས་ལ་བསམ་གཞིགས་གནང་དང་། དབྱིན་ཇིའི་མཚན་ཉིད་རིག་པ་བ་ཞིག་གིས། གལ་ཏེ་སྐྱེ་བོ་ཞིག་གིས་གདེང་འཇོག་བྱེད་པ་ལས་གོ་བཙུགས་ཕྱིན། བློ་དོགས་སྐྱེ་བ་ལས་མཇུག་བསྒྲིལ་ངེས་ཡིན་པ་དང་། གལ་ཏེ་བློ་དོགས་སྐྱེ་བ་ལས་གོ་འཛུགས་ཐུབ་ཚེ་མཇུག་འབྲས་ལ་གདེང་འཇོག་ཐུབ་པ་ཡོང་ངེས་ཡིན།ཞེས་བཤད་ཡོད།

            ང་རང་གི་བསམ་ཚུལ་ཞིག་ཞུས་ན་ང་ཚོའི་གཞི་རིམ་སློབ་གྲྭ་ཁག་གི་སློབ་དེབ་མང་པོའི་སྔོན་དུ་བཀོད་ཡོད་པའི་བདག་ཉིད་ཆེན་པོ་གྷན་དྷིའི་གདམས་ངག་ཅིག་ཡོད་པ་དེར་༸མི་དབང་མཆོག་ནས་དགོངས་བཞེས་གནང་ཐུབ་ཚེ་ལྷ་དགོངས་དཀྲུག་གཞིའི་གནད་དོན་མང་པོ་ཞིག་རང་ཡལ་དུ་འགྲོ་ངེས་རེད་སྙམ། བདག་ཉིད་ཆེ་པོས། ངས་ཁྱེད་ལ་གདམས་ངག་གི་སྲུང་བ་ཞིག་སྟེར་གྱིས། ཁྱེད་ལ་དོགཔའམ་ཐེ་ཚོམ་བྱུང་བའི་སྐབས་སམ། རང་འདོད་ཀྱི་བསམ་བློ་ཧ་ཅང་ཤུགས་ཆེ་བའི་སྐབས་སུ་གཤམ་གསལ་གྱི་ཚོད་ལྟ་གྱིས་དང་། ཁྱེད་ཀྱི་མཐོང་མྱོང་བའི་མི་དབུལ་ཤོས་དང་། ནུས་སྟོབས་ཞན་ཤོས་དེའི་གདོང་རིས་ཡིད་ལ་དྲན་པར་བྱས་ཏེ་རང་གི་བསམ་བློར་འཆར་བའི་ལས་དོན་དེས་ཁོ་ལ་ཕན་ཐོགས་ཅི་འདུག དེས་ཁོང་ལ་ཁེ་ཕན་གང་ཡང་འདུག་གམ། དེས་ཁོང་ལ་རང་ཉིད་ཀྱི་ཚེ་སྲོག་དང་ལས་དབང་ཁ་ལོ་བསྒྱུར་བའི་གོ་སྐབས་བསྐྱར་གསོ་བྱེད་ཐུབ་བམ། ཕྱོགས་གཞན་ནས་བཤད་ན། ཟས་སྐོམ་དང་བསམ་བློའི་བཀྲེས་ལྟོགས་ཀྱིས་མནར་བཞིན་པའི་མི་མང་ས་ཡ་དུ་མར་རང་ཐག་རང་གཅོད་ཀྱི་ལམ་སྣེར་ཁྲིད་ཐུབ་བམ། ཞེས་དཔྱད་ན། ཁྱེད་ཀྱི་དོགས་པ་དང་རང་འདོད་ཀྱི་བསམ་པ་རང་ཡལ་དུ་འགྲོ་ངེས་ཡིན།ཞེས་གསུངས་པའི་གདམས་ངག་འདི་སྲིད་སྐྱོང་མཆོག་གཙོ་གྱུར་ཐོག་སྐྱབས་བཅོལ་བོད་མི་ཚང་མས་ཉམས་བཞེས་གནང་ཐུབ་ན་ང་ཚོའི་རང་འདོད་ཀྱི་བསམ་བློ་རང་ཡལ་དུ་འགྲོ་ངེས་སྙམ།

            འདི་འདྲའི་བསམ་གཞིགས་ཀྱི་སྐུལ་སློང་ཞིག་འཁྱེར་ཏེ་ངས་༸མི་དབང་སྲིད་སྐྱོང་རིན་པོ་ཆེའི་སྙན་དབང་དུ་དྲན་བསྐུལ་ཞུ་བཞིན་ཡོད། ༸མི་དབང་ཆེན་པོ་གང་ཉིད་ཀྱི་སྐུ་འགྲམ་དུ་ཡོད་པ་མང་དག་ཅིག་གིས་ངོ་དགའ་སྤྲེལ་ལད་འཁྲབ་ཏེ་དོན་དུ་བསྟོད་པའི་ཚུལ་གྱིས་སྨད་བཞིན་ཡོད་པ་དེ་དག་ལ་གང་ཉིད་ནས་གཟབ་གཟབ་གནང་དགོས། མ་མཐར་ཡང་ཁོང་ཚོའི་གང་བཤད་ལ་ཉན་འཇོག་མ་གནང་རོགས། ངས་འདི་ལྟར་བཤད་དུས་མི་མང་དག་ཅིག་གད་མོ་ཤོར་སྲིད། དོན་དངོས་ཐོག་སྲིད་སྐྱོང་མཆོག་རང་གི་མཐུན་ཕྱོགས་ཚོའི་སྐད་ཆར་ཉན་འཇོག་གནང་རྒྱུ་མང་དྲགས་ཏེ་མངའ་སྡེའི་གཞུང་ནས་གནང་བའི་གློག་གི་ཏོག་དམར་པོ་དེ་འདོགས་ཆེད་ཀྱི་ཕེབས་འཁོར་གང་འདྲ་ཞིག་ཉོ་དགོས་མིན་ཡང་ཐུགས་ཐག་མ་ཆོད་པར་ལུས་ཡོད་པ་ཡོངས་གྲགས་ཡིན། ང་དང་ང་འདྲའི་སྐྱེ་བོ་ཉུང་ཤས་ཤིག་གིས་རྒྱབ་ནས་སྨད་པའི་ཚུལ་གྱིས་བསྟོད་བཞིན་པའི་རིན་ཐང་འདི་ད་ལྟ་མངོན་མི་ཐུབ་ཀྱང་དུས་ཡུན་གང་ཙམ་ཕྱིན་རྗེས་གསལ་པོ་གཟིགས་ཐུབ། སྐབས་དེ་དུས་ད་ལྟ་ང་ཚོས་བརྒྱབ་པའི་བོང་བུའི་སྐད་དེ་བྱ་སྐད་ཡིན་པ་མཁྱེན་ཐུབ་ངེས་ཡིན། ཡིན་ནའང་ད་ལྟའི་ཆར་ང་ཚོའི་བོང་བུའི་སྐད་དེས་༸མི་དབང་མཆོག་ལ་ཐུགས་སུན་ཡོང་གི་ཡོད་ན་ད་ནས་བཟུང་གང་ཉིད་ཀྱི་ལྷ་དགོངས་དཀྲུག་གཞིར་གྱུར་པའི་རྩོམ་ཡིག་མ་སྤེལ་ན་ཆོག དེས་ན་༸མི་དབང་སྲིད་སྐྱོང་རིན་པོ་ཆེའི་སྐུ་མདུན་དུ་སྔོན་བྱས་འགྱོད་བཤགས་དང་། ཕྱིན་ཆད་སྤང་ལེན་བགྱིས་ཏེ་རང་ལྕེ་རང་གིས་གཅོད་པ་དང་། རང་ལག་རང་གིས་གཏུབ་རྒྱུ་ཡིན་ན། དེ་དོན་གསན་ཞིབ་ཀྱི་དགོངས་འཇགས་ཅི་ནས་ཀྱང་ཡོད་པ་མཁྱེན་ཞུར།

ཤོག་ངོས་འདི་ཐེངས་ ༤༡༤༨ ལ་བཀླགས་འདུག
རིག་པ་འདོན་པ།
འཇམ་གཅེས །
༢༠༡༣/༠༦/༢༨ ཉིན་འདོན་སྤེལ་བྱས།
དེང་སང་བཙན་བྱོའི་སྤྱི་ཚོགས་ཆུང་ངུ་འདི་ཡི་ནང་དུ་སོ་སོའི་སྒེར་གྱི་ཁ་ཕོར་ཙམ་ཡང་སྐྱོང་པར་མགོ་བོ་རྨོངས་མཁན་གྱི་དྲ་འབུ་མི་ཉུང་བ་ཞིག་མགོ་འབུར་བཞིན་ཡོད། ཁོང་ཚོས་དུས་རྒྱུན་ལྡན་ཤོད་བཞིན་པ་ནི་སྤྱི་པའི་རྩ་དོན་ཞིག་ཁ་ལ་འཁྱེར་བཞིན་སྒེར་ནད་དང་། ཕྱོགས་རིས་ཞེན་ཁོག་གིས་སྦག་པའི་རང་མདོག་དམར་ཧྲང་མ་སྟོན་ནས་སྐབས་དང་དུས་གང་བྱུང་ལ་འཁྲབ་སྟོན་རེ་བཟོ་བཞིན་ཡོད། ཁོང་ཚོ་ལ་ཤེས་ཡོན་དང་། ཀུན་སྤྱོད་ཀྱི་ཆ་ནས་རང་རྐྱ་འཕེལ་བ་ཞིག་མེད་ཁར་ད་དུང་དམིགས་ཡུལ་ངན་པ་དང་། མཐའ་ན་དགྲ་བོའི་དངུལ་དངོས་ལ་མགོ་བོ་འཁོར་མཁན་ཡང་ཡོད་པ་མི་སྲིད་པ་གང་ཡང་མིན། དཔེ་ན་མི་ངན་བཀྲ་ཤིས་འགྱུར་མེད་ཞེས་པའི་རྫུན་གཏམ་འདི་དཔེ་མཚོན་ཞིག་འཇོག་ཆོག ཁོས་བཤད་རྒྱུར། དེ་སྔར་སྲིད་སྐྱོང་དང་རང་གཞུང་ལ་སྒྲོ་སྐུར་ཅི་རིག་པའི་ལམ་ནས་ངན་སྨྲས་སྣ་ཚོགས་བྱས་པ་དེ་དག་གིས་རྐྱེན་པས་ད་ཆར་སྲིད་སྐྱོང་མཆོག་གིས་ཁོ་ལ་དོ་སྣང་དང་བཙལ་འཚོལ་བྱེད་ཀྱིན་ཡོད་ཚུལ་འུར་ཤོད་འདི་རེད། ངོ་མ་དགོད་ཁ་སློང་བྱེད་ཞིག་རེད། ཡང་ན་ཁོ་རང་གི་དེ་ལྟར་ཡོང་པའི་རེ་སྟོང་ཞིག་འཆང་ནས་དེ་སྔར་འཆར་གཏམ་གང་སར་སྤེལ་ཡོད་པ་དང་། ད་ཆར་ཁོ་རང་གིས་འཆར་གཏམ་དེ་དག་བདག་མེད་དུ་གྱུར་དུས་སྔར་གྱིས་སྟོང་བསམ་དེ་དག་སྡུག་སྐད་ཀྱི་ལམ་ནས་འདིར་ཤོར་བ་འདྲ། དེ་མིན་ཕྱོགས་གང་ཐད་ནས་དཔྱད་རིན་ཡོད་པའི་དཔྱད་རྩོམ་ཞིག་ལ་མ་མཐོང་བས་རེ་ཞིག་དེ་ཙམ་ཡིན་
ཀརྨ་རྡོ་རྗེ།
༢༠༡༣/༠༦/༢༦ ཉིན་འདོན་སྤེལ་བྱས།
འདས་པའི་ལོ་རྒྱུས་ལ་ཕྱི་གཟིགས་གནང་ན། མི་དབང་ཕོ་ལྷ་བ་བསོད་ནམས་སྟོབས་རྒྱས་ཀྱིས་རང་གི་སྙན་གྲགས་དང་དབང་ཐང་ཆེ་རུ་གཏོང་ཆེད་དུ་རྩ་དོན་ཐོག་རྒྱལ་བཙོང་གི་བྱ་བ་བསྒྲུབས་ཡོད། ཁོང་གིས་རང་གི་སྐུ་ཐང་བཞེངས་པ་དང་། རྟོག་བརྗོད་བྲིས་ཡོད་ཀྱང་། དོན་དངོས་ཐོག་ཁོང་ནི་ལོ་རྒྱུས་ནང་མི་ནག་ཅན་ཞིག་ཏུ་གྱུར་ཡོད། ་ཟེར།
གསེར་འབྲུག་སྡེར་ལྔ་
༢༠༡༣/༠༦/༢༦ ཉིན་འདོན་སྤེལ་བྱས།
ཐོ་རངས། སྲིད་སྐྱོང་སེངྒེ་ཚང་གིས་ཁོ་རང་གི་ཕྱག་རོགས་བསྐོ་འཇོག་ཐད་བཅའ་ཁྲིམས་གཞིར་བཟུངས་དབང་ཚད་ཆ་ཚང་ཡོད་རྒྱུ་རེད་ལ། ཁོ་རང་གི་ཕྱོགས་གཏོགས་བསྐོ་གཞག་བྱས་ཡོད་ཀྱང་ཁྱོད་ཀྱི་ཕྱོགས་གཏོགས་མ་བསྐོས་པ་སྙིང་རླུང་ལངས་དགོས་དོན་མི་འདུག་ལ་ཡ་མཚན་དེ་བས་སྐྱེས་དགོས་པ་མ་རེད། རྒྱུ་མཚན། ཁྲི་ཟུར་ཟམ་གདོང་ཚང་གངས་སྐྱིད་ཀྱི་སྲིད་ཁྲིར་ཕེབས་དུས་ཁོ་རང་གི་ཝར་ཎའི་ཨབ་ཕྲུག་རྐྱང་རྐྱང་ཞིག་གངས་སྐྱིད་ཀྱི་ལས་ཁུངས་ཁག་ནང་བརྒྱངས་སོང་ལ། ག་ལེར་ཨབ་ཕྲུག་དེ་ཚོ་གངས་སྐྱིད་ཀྱི་ཐེམ་སྐས་བརྒྱུད་ནས་ནུབ་ཕྱོགས་སུ་བཞུད་ཟིན་པ་ཉུང་ཉུང་གཏན་ནས་མིན། དེས་མི་ཚད་༧རྒྱལ་བ་ཐམས་ཅད་མཁྱེན་པ་ཉིད་ཀྱིས་ཀྱང་སྲིད་དབང་བགྲེས་ཡོལ་ལ་མ་ཕེབས་གོང་ཁོང་དང་ལྟ་སྤྱོད་མི་མཐུན་པའི་དེང་དུས་ཤེས་ཡོན་པ་ཟླ་བ་ནོར་བུ་དང་འཇམ་ནོར་སོགས་ལས་གནས་གཅིག་ཀྱང་བསྐོ་གཞག་གནང་མྱོང་མི་འདུག། སྲིད་སྐྱོང་སེངྒེ་ཚང་ལ་ཡ་མཚན་སྐྱེ་གཞི་མི་འདུག་ལ་དཔེར་ན། ཨ་རི་ལྟ་བུར་ཆ་མཚོན་ན་དམངས་གཙོ་ཚོགས་པར་སྲིད་འཛིན་གྱི་རྒྱལ་ཁ་ཐོབ་ན་སྤྱི་མཐུན་ཚོགས་པའི་རྐུབ་སྟེགས་མང་པོ་ཤོར་འགྲོ་བ་དང་སྤྱི་མཐུན་ཚོགས་པར་སྲིད་འཛིན་གྱི་རྒྱལ་ཁ་ཐོབ་ན་དེ་དེ་བཞིན་དམངས་གཙོ་ཚོགས་པའི་རྐུབ་སྟེགས་མང་དག་ཅིག་ཤོར་འགྲོ་བ་ནི་ཆོས་ཉིད་རེད་ལ་སུས་ཀྱང་ཁང་ར་བྱེད་རྒྱུ་ལྷག་ཡོད་པ་མ་རེད།
དེས་ན་ང་སྲིད་སྐྱོང་སེང་གེ་ཚང་གིས་གསོ་སྐྱོང་གནང་མྱོང་མེད་ཀྱང་སྲིད་སྐྱོང་འདི་པ་བོད་དང་བོད་མི་རིགས་ཀྱི་རྩ་དོན་འཐབ་རྩོད་ཁ་ཆར་བུ་ཡུག་གི་ཁྲོད་ན་བྱོན་པའི་མི་རབས་གསར་པའི་སྙིང་གི་འཕར་ལྡིང་དང་དམངས་གཙོའི་བདེན་རྟགས་ངོ་མ་དེ་ཡིན་པས། དོན་མེད་ཀུ་ཅོ་འདོན་མཁན་དག་ལ་དགའ་བསུ་ནམ་ཡང་མི་ཞུ།
ཆུ་ཐིགས་སྔོན་མོ།
༢༠༡༣/༠༦/༢༦ ཉིན་འདོན་སྤེལ་བྱས།
བཀྲ་ཤིས་འཇིགས་མེད་ལགས་ཀྱིས་དངོས་ཡོད་ཀྱི་སྐད་ཆ་ཞིག་བཤད་འདུག་འདི་དག་ནི་ང་ཚོས་མིག་མཐོང་ཡིན་པས་གསང་དགོས་དོན་ག་ལ་ཡོད་སྲིད་སྐྱོང་མཆོག་གིས་བྱེད་སྟངས་འགའ་ཤས་ཤིག་དངོས་གནས་གད་མོ་ཤོར་བྱེད་འདྲ་ཞིག་རེད་ཅིག་བྱས་ན་ཁག་ཡོད་རྒྱུ་མ་རེད་ད་བར་གོ་གནས་ཤིག་ལ་འདུག་མྱོང་མེད་པས་ཡིན་རྒྱུ་རེད་
ཐོ་རངས།
༢༠༡༣/༠༦/༢༦ ཉིན་འདོན་སྤེལ་བྱས།
བཀྲིས་འཇིགས་མེད་ལགས་བཀྲིན་ཆེ་ཞུ་འདོད་བྱུང་སོང་། རེད་རེད་ཁྱེད་ཀྱི་གསུངས་པ་བཞིན་སྲིད་སྐྱོང་མིངཅན་བློ་སེང་གིས་ཁོང་རང་གི་ཕྱོགས་ལྟོགས་མང་བོ་ཞིག་ལ་གོ་གནས་སྤར་ཡོད། དཔེར་ན་ཕྱི་རྒྱལ་ཁག་ལ་སྐུ་ཚབ་དོན་གཅོས་བསྐོ་རྒྱུ་གཞུང་གི་སྲིད་བཞུ་སྒྲུབ་ནས་ལོ་ངོ་བཅུ་འམ་བཅོ་ལྔ་གང་རུང་ཕྱིན་པ་ཞིག་གམ་ཟུང་དྲུང་ཡན་བསྐོ་དགོས་པ་གཞུང་གི་བཅའ་ཁྲིམས་ནང་གསལ་ཡང་། བློ་སེང་མིང་ཅན་པས་དེ་ལས་རྡོགས་ཏེ་ཁོ་བའི་ཕྱོགས་རྟོགས་གཞུང་ཞབས་མ་ཡིན་པ་གཡུ་དཀར་ཚང་སྐལ་རྡོར་ཨ་རིའི་དོན་གཅོས་ལ་སྐོས་ཡོད།

གསེར་འབྲུག་ཟེར་བ་དེས་བློ་སེང་གི་བསོ་སྐྱོང་བྱས་པའི་ཨག་ཕྲུག་རེད།
༼Ngawang Norbu
སྟག་ཚང་རིག་རྒོད་།༽
བློ་སེང་མིང་ཅན་གྱི་སྐུ་ཚབ་སྐོ་སྟངས་ལ་འདོད་མོས་ཡོད་དམ།
ཚེ་རིང་རྡོ་རྗེ།
༢༠༡༣/༠༦/༢༦ ཉིན་འདོན་སྤེལ་བྱས།
བསམ་ཚུལ་བརྗོད་པའི་སྙིང་སྟོབས་དང་ཀུན་སློང་བཟང་བ་ལེགས་མོད་ཀྱང་། དངོས་ཡོད་གནས་ཚུལ་རང་གི་སྟེང་ནས་ནོར་འཁྲུལ་ཐེར་འདོན་གྱིས་དགག་བཞག་བྱས་པ་ཉུང་ཞིང་། རང་གི་སྣང་ཚུལ་བརྗོད་ཐལ་ཆེ་འདུག ཁྲིམས་ཐོག་ནས་ངོས་ལེན་བཏུབ་པའི་དཔང་རྟགས་མི་འདྲེན་པར་རང་སྣང་གི་བདེན་པ་འདྲ་བརྗོད་ཁུལ་བྱས་ན། ཕ་རོལ་པོས་ངོས་ལེན་བྱ་མི་སྲིད། རབ་ཡིན་ན། ཁྲིམས་གཏུགས་ཀྱི་ཚད་གཞིར་ལོངས་པའི་དཔང་རྟགས་དྲངས་ནས་དགག་སྒྲུབ་བྱ་དགོས། དེ་མིན་ར་སྤུའི་འུར་རྡོ་རང་གི་མགོ་ལ་ཕོག་སྲིད།
གསེར་འབྲུག་སྡེར་ལྔ་
༢༠༡༣/༠༦/༢༦ ཉིན་འདོན་སྤེལ་བྱས།
ཧ་ཧ། ནག་ཁུང་དུ་མཛུབ་མོ་བཙུགས་འདུག། ཁ་སྣ་ལ་ཕོག་ཐུག་སོང་ཡོད་ན་ཕན་པོ་བྱུང་
མ་གཞི་གང་འདྲ་ཞིག་ལ་བདེན་དོན་ཟེར་གྱི་ཡོད་དམ། གང་འདྲ་ཞིག་ལ་སྤྱི་ཚོགས་ཀྱི་གནས་བབས་ཟེར་གྱི་ཡོད། བོད་དང་བོད་མི་རིགས་ཀྱི་བདེན་དོན་འཐབ་རྩོད་ཟེར་གྱི་ཡོད་ན་ནི། འཐབ་རྩོད་ཀྱི་ངོ་བོ་དང་བྱུང་རིམ་ཁ་ཕྱོགས་ནི་ཙི་ཙིའི་རྔ་མ་ལྟར་སྦོམ་ས་ནས་ཕྲ་རུ་ཕྲ་རུ་ཕྱིན་ནས་ད་ཆ་རྔ་མའི་སྤུ་ཡང་བུད་གྲབས་བུད་གྲབས་རེད། སྤྱི་ཚོགས་ཀྱི་གནས་བབས་ནི་དམངས་གཙོའི་ཁ་གཡང་སྒྲོགས་པ་ཙམ་ལས་དམངས་གཙོ་དར་ལ་མ་སྨིན་པས་གཞུང་དང་ལྟ་སྤྱོད་མི་མཐུན་པ་ཚང་མ་དགྲ་རུ་བལྟ་ཞིང་། སྨྲ་བརྗོད་ལ་བཀག་རྒྱ་ནན་པོས་སྟེང་གི་ལྷ་ལ་གནོད་རབས། བར་གྱི་བཙན་ལ་གནོད་རབས། འོག་གི་ཀླུ་ལ་གནོད་རབས་བཤད་དེས་བོད་མི་རིགས་ས་ཡ་རྒལ་བ་དམར་གསོད་བཏང་བའི་རོ་ཐོག་ཏུ་དར་དམར་བསྒྲེངས་ན་ཡང་དགའ་བསུ་ཞུ་བའི་དུས་ལ་སླེབས་འདུག་ལ། ད་དུང་ཏང་དང་རྒྱ་མི་རིགས་ཀྱི་སེམས་ཁམས་ལ་གནོད་པའི་ལས་འགུལ་སྤེལ་མི་རུང་ལ་བོད་མི་རིགས་ཀྱི་ལྷན་སྐྱེས་རང་བཞིན་གྱི་ཐོབ་ཐང་དང་། བོད་མི་རིགས་ཀྱི་ཆབ་སྲིད་ཁེ་དབང་ཡོངས་རྫོགས་རྡོག་རོལ་གཏོང་གིན་གཏོང་གིན་ཏང་གིས་ནམ་ཞིག་གཞིས་འགུགས་ལ་བསྒུག་བཞིན་པ་ནི་བཙན་བྱོལ་སྤྱི་ཚོགས་ཀྱི་གནས་བབས་ངོ་མ་དང་དབུ་མའི་ལམ་གྱི་དགོངས་དོན་ངོ་མའོ།
Ngawang Norbu
༢༠༡༣/༠༦/༢༥ ཉིན་འདོན་སྤེལ་བྱས།
༄༅། །བཀྲ་ཤིས་འཇིགས་མེད་སུ་ཡིན་རུང་ཁ་འཇམ་གཏིང་ནག་ཞིག་རེད་འདུག ཁ་ནས་ཨ་ཞང་ཨ་ཞང་། རྐུབ་ནས་སྡིག་ཞང་སྡིག་ཞང་ཟེར་མཁན་རེད་འདུག རྫབ་དོང་ནང་ལ་སྐྱེས་པའི། །ཅམ་པ་ཧ་ལོའི་མེ་ཏོག །ཁྱེད་རང་སྐྱེ་ལོ་ཡག་ཀྱང་། །ལྷ་ལ་འབུལ་ཉེས་མིན་འདུག །ལས་མེད་འཁྱམ་པོའི་དཀྱིལ་གྱི། །བཀྲ་ཤིས་འཇིགས་མེད་ཟེར་བ། །རྩོམ་ཡིག་ག་ཚོད་བྲིས་ཀྱང་། །ཚ་མེད་ཤ་ཁུ་རེད་འདུག །
མཐུ་རྩལ་ཐོགས་མེད།
༢༠༡༣/༠༦/༢༥ ཉིན་འདོན་སྤེལ་བྱས།
གངས་སྐྱིད་ན་བཀྲ་ཤིས་འཇིགས་མེད་འདི་ཤར་ཕྱོགས་ཁུག་རྟ་ལགས་རེད་ཟེར་གྱི་འདུག ཤར་ཕྱོགས་པ་གདོང་མི་སྟོན་མཁན་ཞིག་མ་རེད། བཀྲ་ཤིས་འཇིགས་མེད་ཀྱིས་གདོང་བསྟན་ནས་ཕེབས་ན་ཡག་པོ་འདུག་གཱ།
ཀུན་དགའ།
༢༠༡༣/༠༦/༢༥ ཉིན་འདོན་སྤེལ་བྱས།
རྩོམ་པ་པོས་དོན་དངོས་ཀྱི་སྐད་ཆ་ཞིག་བཤད་འདུག
ནམ་རྒྱུན་བདེན་དོན་དང་སྤྱི་ཚོགས་ཀྱི་གནས་བབ་མི་མཐོང་པར་ཕྱོགས་ལྷོང་ཁོ་ནར་དབང་བོའི་སྒོ་གཏད་པའི་གསེར་འབྲུག་སྡེར་ལྔ་འམ་གསེར་རྟ་ཚུལ་ཁྲིམས་ཟེར་བ་དེར། ད་རེབ་ཀྱང་ ༼སྲིད་སྐྱོང་རིན་པོ་ཆེས་དཔུང་སྒྲིག་གི་འདུག སྲིད་སྐྱོང་རིན་པོ་ཆེས་ཨབ་ཕྲུག་གསོ་ཡི་འདུག སྲིད་སྐྱོང་རིན་པོ་ཆེས་རང་གི་སྐུ་ཐང་བཞེང་གི་འདུག སྲིད་སྐྱོང་རིན་པོ་ཆེས་རང་ཉིད་བ་ཕྱུགས་འཚོང་མཁན་ཡིན་པ་རྦད་དེ་བརྗེད་འདུག ཅེས་སོགས་ཀྱི་ལབ་གླེང་མང་དག་ཅིག་བྱུང་སོང་ཡང་དེ་དག་ནི་ཐེའུ་རང་ལ་དབང་བྱུང་ན། གོ་ཁ་ཐལ་བས་སྒྱོང་བ་དེ་འདྲ་མ་ཡིན་པར། སྦྱིན་བདག་ཕྱི་བལྟས་སློག་པ་དང་། གཡོག་པོ་སྐེད་གཟེར་བྱས་པ་དུས་མཉམ་དུ་ཁེལ་བ་ཡིན་གྱི་རེད་སྙམ་སྟེ་རང་གི་སེམས་པ་རང་གིས་གསོས་ཤིང་ཉན་འཇོག་བྱས་མེད། ༽ཅེས་པའི་ཚིག་འདི་ཡང་ཕོག་འདུག་ག ཧ་ཧ་ཧ་
སྟག་ཚང་རིག་རྒོད་
༢༠༡༣/༠༦/༢༥ ཉིན་འདོན་སྤེལ་བྱས།
ཧཧཧཧ་ཁ་མཁས་པ་ལ་ནི་ང་ཚོའི་གྲོང་པའི་རྨོ་མོ་སྐད་གྲགས་ཅན་དེ་ཕར་བཞག་རེད་འདུག།་དོན་དངོས་འདི་རེད་ཟེར་བའི་སྐད་ཆ་ནི་ཚིག་གཅིག་ཀྱང་མི་འདུག།་སྲིད་སྐྱོང་ཆོག་གིས་མི་གཞན་གྱི་ཁ་ལ་མ་ཉན་རོགས་ཟེར་ནས་བརྩེ་བ་དང་གུས་བཀུར་ཡོད་མདོག་འདྲ་བྱས་འདུག་པ་ལ་བལྟས་ན་རང་ཉིད་ཀྱིས་བཤད་པའི་སྐད་ཆ་དག་རང་ཉིད་ཀྱིས་དངོས་སུ་ཐོས་ཡོད་པ་འདྲ་བོ་གསུངས་འདུག་ཀྱང་དོན་དངོས་ལྟོ་མེད་ལས་མེད་དུ་གནས་པའི་གངས་ཅན་སྐྱིད་གཤོང་དང་རྡ་སྟེང་དུ་གནས་པའི་འཁྱམ་པོ་དེ་དག་གི་སྐད་ཆ་ལས་མ་འདས།
ད་དུང་ཕྱོགས་གཞན་པཞིག་ནས་རང་སྲོག་ཤོར་རྒྱུའི་ཉེན་ཁ་ཡོད་མདོག་བསྟན་འདུག་པ་ནི་ཁྱོད་ཀྱི་སྤྱོད་པ་ཡོངས་སུ་མཚོན་པའི་སྐད་ཚ་ཞིག་རེད་
ཤ་ཚ་མདོག་དང་གུས་བཀུར་ཡོད་མདོག་བྱས་ནས་གཏིང་གནག་པའི་སེམས་པ་ངོ་མ་དེ་འདི་ཡིན་ཟེར་བ་འདྲ་བོ་ཞིག་བྲིས་འདུག
ལུང་རྟོགས།
༢༠༡༣/༠༦/༢༥ ཉིན་འདོན་སྤེལ་བྱས།
བཀྲ་འཇིགས་ཞེས་པ་འདིས་ཁ་ཉིན་རྩོམ་ཡིག་ཡག་པོ་ཞིག་སྤེལ་སོང་སྙམ་ནས་རྒྱབ་སྐྱོར་བྱས་ཡོད། འོན་ཀྱང་དེ་རིང་གི་བཤད་སྟང་འདི་ལ་སླར་ཡང་སྐྱག་དྲི་ཁ་ཡོང་གི་འདུག འདི་ནི་སྤྱི་སེམས་མ་ཡིན་པར་སྒེར་ནད་ཡིན་པ་གསལ་པོ་རེད། མི་འདིས་གཏམ་ལ་ཆ་འཇོག་མི་འདུག འདིས་སྐད་ཆ་ནི་འུག་པའི་རྫུན་དྲུག་བཤད་པ་ལྟ་བུ་ཞིག་རེད།
འཇིགས་མེད་གེ་སར།
༢༠༡༣/༠༦/༢༥ ཉིན་འདོན་སྤེལ་བྱས།
ཇི་སྐད་དུ། “དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་ད་གྱུར་ཏོ། །ད་ནི་བདག་གིས་ཅི་ནས་ཀྱང༌། །རིགས་དང་མཐུན་པའི་ལས་བརྩམས་ཏེ། །སྐྱོན་མེད་བཙུན་པའི་རིགས་འདི་ལ། །རྙོག་པར་མི་འགྱུར་དེ་ལྟར་བྱ།།” ཞེས་གསུངས་པ་བཞིན། དཔལ་ལྡན་མི་དབང་སྲིད་སྐྱོང་མཆོག་ནས་ཀྱང་འདི་ལྟ་བུའི་དགོངས་པ་བཞེས་ནས་རིགས་དང་མཐུན་པའི་ལས་བརྩམ་རྒྱུ་ནི་གནད་ཀྱི་དམ་པ་ཡིན། བར་ལམ་ནས་སྲིད་སྐྱོང་མཆོག་གི་ཕྱག་ལས་གནང་སྟངས་ཐད་ལབ་གླེང་ཅི་ཙམ་བྱུང་བ་ཐམས་ཅད། གང་ཟག་སྒེར་ལ་དགའ་མི་དགའ་ལས་བྱུང་བ་མིན་པར། རིགས་དང་མི་མཐུན་པའི་ལས་བརྩམས་པ་འབའ་ཞིག་ལས་བྱུང་བ་ཡིན།
བཀྲ་ཤིས་འཇིགས་མེད་ལགས། སྒང་བ་བོད་ཀྱི་གཏམ་དཔེར་”ཤ་ཚའི་ཁ་ལ་གཏམ་སྙན་མེད།”ཅེས་པ་ལྟར་སྐྱོན་དང་ནོར་འཁྲུལ་ཡོད་སར་གསལ་འདེབས་བྱས་ནས་ལེགས་པའི་ལམ་ལ་འཁྲིད་རྒྱུ་ནི་རྣམ་དཔྱོད་ཅན་གྱི་བྱ་སྟངས་ཡིན་པས། དགོངས་སེལ་ཞུ་དགོས་པའི་གནད་དོན་འདི་འདྲ་གཏན་ནས་མེད། ལྷག་པར་དུ་ཁྲིམས་ལུགས་ལ་སློབ་སྦྱོང་གནང་མྱོང་མཁན་དང། གྲགས་ཅན་མཐོ་སློབ་ནས་འབུམ་རམས་པའི་ཕྱག་ཁྱེར་བསྣམས་ཡོང་མཁན། མང་གཙོའི་རིང་ལུགས་ལ་དགའ་ཞེན་དང་གུ་ཡངས་ཀྱི་ལྟ་བ་ཡོད་མཁན་གཞོན་སྐྱེས་དབུ་ཁྲིད་འདི་འདྲ་ཞིག་གིས། མི་རིགས་ཀྱི་གནད་དོན་ཐད་རྩོམ་ཡིག་སྤེལ་བར་ཐུགས་རྗེ་ཆེ་མ་གསུངས་ནའང་ཚ་འདེད་ག་ལ་གཏོང་། མ་གཞི་ཁོང་མཛད་འཕྲིན་ཆེན་པོ་ཡིན་པས་བོད་ཡིག་གི་རྩོམ་འདི་ཚོར་གཟིགས་ཁོམ་ཡང་ཡོད་ཀྱི་མ་རེད།
ང་ཚོ་ནི་མང་གཙོའི་ལམ་ལུགས་ལ་ཕྱོགས་པའི་མི་རིགས་ཤིག་ཡིན་ལ། དཔལ་ལྡན་སྲིད་སྐྱོང་ནི་༸གོང་ས་སྐྱབས་མགོན་ཆེན་པོ་མཆོག་དང་རང་གཞུང་གི་གཟིགས་སྐྱོང་འོག་འཚར་ལོངས་བྱུང་བའི་བོད་ཕྲུག་ཅིག་ཡིན་པས། ཁོང་གིས་མང་གཙོ་དང་ཁྲིམས་ལུགས་ཐོག་སློབ་སྦྱོང་གནང་གནང་ནས། མཐའ་མ་དེར་རྩོམ་ཡིག་སྤེལ་མཁན་ཞིག་ལ་ཚ་འདེད་གཏོང་རྒྱུར་དབུ་འཁོར་བཞུགས་ན་ག་ནས་འགྲིག གནས་ཚུལ་འདི་འདྲ་ཞིག་ཡོད་ཀྱི་མ་རེད། ཁོ་བོས་ནི་གཏན་ནས་མི་སེམས། གལ་ཏེ་གནས་ཚུལ་འདི་འདྲ་ཞིག་ཡོད་ན་དེ་ནི་སྐབས་འཚོལ་བ་ཚོས་སྲིད་སྐྱོང་མཆོག་ལ་ཕྲ་བཏབ་པ་ལས་འབྱུང་ངེས་པ་ལས། རྣམ་དཔྱོད་ཅན་གྱི་དབུ་ཁྲིད་ཅིག་གིས་དགོངས་པ་འདི་འདྲ་ག་ནས་བཞེས།
བཀྲ་ཤིས་འཇིགས་མེད་ལགས། ལྟོ་གྲོད་པ་གང་གི་ཆེད་དུ་ཤི་དགོས་བྱུང་ན་ཐབས་སྡུག་རེད། འོན་ཀྱང་ལྟ་གྲུབ་ཀྱི་ཆེད་དུ་འཆི་ཐུབ་པའི་སྤོབས་པ་དགོས་རྒྱུ་ནི་མིའི་རིགས་ཀྱི་གཟི་བརྗིད་རེད་ལ། ལྷག་པར་དུ་རང་ཅག་ཤར་ཕྱོགས་པ་ཚོའི་ལ་རྒྱ་རེད། དེར་བརྟེན་བདེན་པའི་ལས་བརྩམ་རྒྱུ་མཚམས་མ་འཇོག དེ་མཚམས་བཞག་ན་གསོན་ནའང་ཅི་ཕན། བདེན་ཁ་བསྡར་མ་ཐུབ་ན་མི་དང་དུད་འགྲོར་ཅི་ཁྱད། དེ་འདྲ་མ་རེད་དམ་དྲ་གྲོགས་ཚོ།
གསེར་འབྲུག་སྡེར་ལྔ་
༢༠༡༣/༠༦/༢༥ ཉིན་འདོན་སྤེལ་བྱས།
ཡང་ཤར་ཁུག་གཉིས་པ་ཞིག་སླེབས་འདུག་ལ་སྲིད་སྐྱོང་ལ་སློབ་སྟོན་ཡིན་མདོག་གིས་ནད་རྙིང་སློང་བཞིན་པ་དེ་རེད། ད་དུང་འུར་གཏམ་གྱིས་ཁེངས་ཏེས་ལུང་ཤར་ལྟ་བུ་མིག་འབྲས་ཤོར་ཉེན་འདུག་ཟེར། ཧ་ཧ། དུས་རབས་འདིར་དོན་མེད་མིག་འབྲས་འཕྱུང་མཁན་ཞིག་མེད་ཚོད་རེད། ཡང་ན་སྲིད་སྐྱོང་སེང་གེ་ཚང་འཇིགས་སྐུལ་རིང་ལུགས་པར་བསྒྲུབ་རྩིས་མིན་ནམ།
རིག་པ་འདོན་པ།
རིག་པ་འདོན་ན་ངེས་པར་དུ་དེབ་སྐྱེལ་བྱེད་དགོས།
འདི་ལ་བསྣུན་ཏེ་དེབ་སྐྱེལ་བྱེད་རོགས།