རྨིས་མ་མྱོང་བའི་རྨི་ལམ་ཞིག་གི་ཟིན་ཐོ།

འདོན་སྤེལ། ༢༠༡༣/༠༧/༢༨

སྐྱིད་བྱམས་བསྟན་འཛིན་དགའ་བ།

དུས་རབས་འདིའི་དཔལ་འབྱོར་གྱི་འཁྲུག་ཆའི་རྗེས་སུ་སྙེག་བཞིན་པའི་སོག་ཡུལ་གྱི་རྒྱལ་ས་ཨོ་ལན་པཱ་ཐུར་དུ་འཚོགས་བཞིན་པའི་རྒྱལ་སྤྱིའི་བོད་རིག་པའི་ཚོགས་འདུར་རྒྱལ་ཁབ་མི་འདྲ་བ་སུམ་ཅུ་ལྷག་ཙམ་ནས་ཕེབས་པའི་ཚོགས་ཞུགས་པ་མི་གྲངས་བརྒྱ་ཕྲག་བཞི་ཙམ་བརྒལ་བ་དང་ལྷན་དུ་མཉམ་ཞུགས་བྱ་རྒྱུའི་སྐལ་བཟང་གི་གོ་སྐབས་བསོད་ནམས་ཀྱི་གོ་སྐལ་དུ་སྨིན་པ་འདི་ནི་ང་ལ་མཚོན་ན་དེ་སྔོན་རྨིས་མ་མྱོང་བའི་རྨི་ལམ་ཞིག་ལ་རོལ་མྱོང་བྱ་རྒྱུ་བྱུང་བ་དང་གཉིས་སུ་མ་མཆིས་པས་དགའ་བ་ལྷག་པར་མི་འཕེལ་བ་ག་ལ་སྲིད།

འོན་ཀྱང་རོལ་ཆ་དཀྲོལ་རྒྱུར་དེ་ཙམ་བྱང་གོམས་མི་ལྡན་པའི་མི་ཞིག་ལ་མཚོན་ན། མི་ཚོགས་ཁྲི་སྟོང་<མང་པོའི་མདུན་སར་རོལ་ཆ་མ་དཀྲོལ་བའི་སྔ་རོལ་དུ། བློ་ངོར་ད་རེས་རོལ་མོ་འདི་དག་གིས་སྐད་གང་འདྲ་ཞིག་བརྒྱབ་ཡོང་ངམ། གལ་སྲིད་ཡག་པོ་ཞིག་མ་བརྒྱབ་ན། ཞབས་འདྲེན་ཞུས་སོང་སྙམ་ནས་ཐ་ན་དཀོན་མཆོག་ལ་ལམ་ལྷོང་ཡོང་བའི་གསོལ་འདེབས་ཀྱང་ཞུ་ཡི་ཡོད་པ་བཞིན། ང་ཡང་བྱང་གོམས་དེ་ཙམ་མི་ལྡན་པའི་རོལ་ཆ་པ་དེ་དང་མཚུངས་པས། དེ་རིང་གི་དགའ་སྤོབས་འདིའི་སྔ་རོལ་དུ་སེམས་འཚབ་མི་ཉུང་བ་ཞིག་གི་ལྕགས་ཚན་གྱིས་ལན་མང་བྲབས་ཏེ་ང་རང་ལྕགས་ཚ་བའི་སྒང་གི་གྲོག་མ་བཞིན་བག་ཡངས་ཀྱི་འཚོ་བར་རོལ་སྐལ་ཞིག་ག་ལ་མཆིས།

དེའི་རྒྱུ་མཚན་ཡང་ཤེས་སླ་སྟེ་གཅིག་ནས་ཚོགས་འདུ་འདི་སྤྱིར་བཏང་གི་ཚོགས་འདུ་ཞིག་མིན་པ་དང་། གཉིས་ནས་ཚོགས་ཞུགས་པའི་ཁྲོད་དུ་དགེ་བའི་བཤེས་གཉེན་མི་ཉུང་བ་ཞིག་ཕེབས་ཞུགས་གནང་གི་ཡོད་པ་མ་ཟད། བོད་ནང་ནས་ཀྱང་མཁས་དབང་མི་ཉུང་བ་ཞིག་ཚོགས་ཞུགས་གནང་གི་ཡོད་པ་གོ་ཐོས་བྱུང་བས། ཁོ་ཚོའི་སྙན་པ་འཕེལ་བའི་གྲོགས་སུ་འགྱུར་དཀའ་རུང་། ཞབས་འདྲེན་པའི་བྱེད་པོར་མི་འགྱུར་བ་ཞིག་ཅིས་ཀྱང་བྱ་དགོས་སྙམ་སྟེ། དཔེ་ཀློག་གི་བྱ་བར་སྔར་ལས་ཀྱང་དུས་ཚོད་མང་དུ་བཏང་བ་མ་ཟད། སྔར་ལས་ཞིབ་ཚགས་ཀྱིས་ལྟ་ཀློག་མི་བྱེད་ཀ་མེད་དུ་གྱུར་བ་དེ་ནི་ད་གཟོད་ཆར་པ་ཆུ་གྲོགས་དང་ཉི་མ་མེ་གྲོགས་ཀྱི་དཔེ་ཟླར་མཐོང་

དུས་ཡུན་སྐར་མ་སུམ་ཅུ་ཙམ་ལས་མེད་པའི་གཏམ་བཤད་དེས་ཉན་པ་པོས་བརྗོད་དོན་ཆ་ཚང་བ་ཞིག་གོ་མིན་ཆ་མ་འཚལ་བས། ཞིབ་འཇུག་གི་གྲུབ་དོན་དུ་གྱུར་བའི་རྩོམ་ཤོག་དེ་ནི་གཏམ་བཤད་གྲུབ་རྗེས་ཙམ་དུ་མ་ཟད། དུས་ནམ་གྱི་ཚེ་ཡང་ལྟ་ཀློག་བྱེད་པོ་མཆིས་སོ་ཅིག་གིས་མིག་ལམ་དུ་རེག་ཐུབ་པ་ཞིག་ཡིན་པར་བརྟེན། ངས་གཏམ་བཤད་ལས་ཀྱང་རྩོམ་ཤོག་དེ་གལ་ཆེ་བར་བཟུང་སྟེ་ནུས་ཤུགས་འདང་ངེས་ཤིག་རྩོམ་ཤོག་དེའི་ཐོག་སྤུངས་པ་མ་ཟད། རྩོམ་ཤོག་དེ་རྒྱལ་སྤྱིའི་བོད་རིག་པའི་དུས་དེབ་སྟེང་དུ་འགོད་ཐུབ་ན་མང་པོ་ཞིག་ལ་ཕན་ཐོགས་ཡོང་ངེས་པ་མ་ཟད། དེ་ནི་ལམ་གྲོན་གྱི་རིན་དོད་དུ་ཡང་བསམས་ཏེ་ཡིད་ཆེས་དང་སྤོབས་པའི་ངང་ནས་དེ་རིང་གི་སོག་ཡུལ་ན་འཚོགས་བཞིན་པའི་ཚོགས་འདུར་མཉམ་ཞུགས་བྱས།

དེ་ལྟར་ནའང་རྒྱུན་པར་རྒྱང་ནས་བལྟས་པ་དང་ཉེ་སར་བཅར་ནས་བལྟས་པ་གཉིས་ལ་ཁྱད་པར་ཆེན་པོ་ཡོད་པ་བཞིན་དངོས་སུ་ཚོགས་འདུར་ཞུགས་དུས་ཀྱི་ངའི་སེམས་ཁམས་ནི་ཚོགས་འདུར་མ་ཞུགས་གོང་གི་སེམས་ཁམས་ལས། ཡིད་ཆེས་ཇེ་བརྟན་དུ་གྱུར་བ་མ་ཟད། གཏམ་བཤད་ཀྱི་བློ་སྤོབས་ཀྱང་སྔར་ལས་གོམ་པ་ཁ་ཤས་ཤིག་གི་མདུན་ན་སླེབས་ཡོད་པ་ཚོར། དེའི་རྒྱུ་མཚན་ཡང་སྣང་ངོར་རྫིག་ཉམས་དང་མཛེས་ཉམས་དོད་པའི་ཕྱི་གླིང་པ་དེ་དག་གིས་ངག་ནས་བརྗོད་རྒྱུ་དེ་བོད་པའི་ཆོས་དང་རིག་གཞུང་ཡིན་པས་རེད།

འོན་ཀྱང་ངོ་མཚར་སྐྱེ་འོས་པ་ཞིག་ལ་ཚོགས་འདུར་མཉམ་ཞུགས་གནང་མཁན་གྱི་ཕྱི་གླིང་པ་མང་ཆེ་བས་བོད་སྐད་ཤེས་པ་མ་ཟད། འགའ་ཞིག་གིས་བོད་སྐད་ཆུ་རྒྱུག་ཆུ་རྒྱུག་བཞིན་ཐོགས་མེད་དུ་སྐྱོན་གྱི་ཡོད་པས། ཁོ་ཚོའི་མདུན་སར་བོད་པ་ཞིག་གིས་བོད་སྐད་དང་བོད་ཡིག་ཡག་པོ་ཞིག་མི་ཤེས་ཟེར་ན་ངོ་མ་ངོ་ཚའི་འཁུར་གྱི་བཞིན་རས་ཀུ་ཤུ་ལྟར་མི་འགྱུར་བའི་རང་དབང་ཞིག་གཏན་ནས་མི་འདུག་སྙམ།

ལྷག་པར་དུ་ཕྱི་གླིང་པ་དེ་ཚོ་མང་ཆེ་བར་ཉམས་ཞིབ་ཀྱི་ཁྱད་ཆོས་ཤིག་ཡོད་པ་ནི་གཅིག་ནས་ས་གནས་ས་ཐོག་ལ་དངོས་སུ་བཅར་ནས་ཉམས་ཞིབ་གནང་ཡོད་པ་མ་ཟད། ཉམས་ཞིབ་བྱེད་སྟངས་ཀྱི་རྣམ་པ་ཡང་ཧ་ཅང་ཞིབ་ཚགས་ཀྱི་རང་བཞིན་དང་། གཤིབ་བསྡུར་གྱི་རང་བཞིན། བཅར་འདྲིའི་རང་བཞིན་སོགས་མདོར་ན་གྲུབ་དོན་དཔྱད་ཐབས་ཀྱི་འཇུག་སྒོ་མི་འདྲ་བ་སྣ་ཚོགས་ཤིག་ཡོད་པ་དེ་རེད།

དེ་ལྟ་བུའི་ཡུལ་ལ་དཔྱད་ཐབས་ཀྱི་རིག་པ་དེ་དག་ནི་མིག་དཔེར་འོས་པ་མ་ཟད། ཁོ་ཚོའི་སྐད་ཆ་བཤད་རྩལ་གྱི་ནུས་པ་དེ་དག་ཀྱང་ལྷན་སྐྱེས་ནས་རང་ཆས་སུ་ཡོད་པའི་སྣང་བ་ཞིག་སྟེར་འོང་བ་ལས་གློ་བུར་དུ་གྲ་སྒྲིག་བྱས་པའི་སྣང་བ་ཞིག་གཏན་ནས་མི་སྟེར་བས། སྐད་ཆ་བཤད་རྩལ་གྱི་བྱང་ཆའི་ཐད་ང་ནི་ཁོ་ཚོའི་མདུན་སར་ད་དུང་བྱིས་པ་ཆུང་ཆུང་ཞིག་ཡིན་པའི་སྣང་བ་འགོག་མེད་དུ་འཆར།

དེ་ལས་ཡ་མཚན་པ་ཞིག་ལ་ཚོགས་འདུ་འདིར་ཚོགས་ཐོག་ཏུ་བོད་རྒྱའི་གནད་དོན་སྐོར་གླེང་སློང་བྱས་ཚེ་རྒྱ་རིགས་ཚོགས་ཞུགས་པ་དེ་དག་ལ་སེམས་ཆུང་གང་ཞིག་གིས་བསྐུལ་བ་མ་ཤེས་པར་ཁོ་ཚོའི་ངོ་གདོང་ལ་དམར་མདངས་ཀྱིས་ཁྱབ་འགྲོ་བ་མ་ཟད། མཚམས་རེ་གཏམ་བཤད་ལ་མི་ཉན་པའམ། ཡང་ན་ཕྱི་གཡོལ་བྱེད་པ། དེ་མིན་བོད་རྒྱའི་སྐོར་གླེང་སློང་བྱ་རྒྱུ་ཡིན་པ་ཤེས་ཚེ་ཐོག་མ་ཉིད་ནས་མཉམ་ཞུགས་མི་བྱེད་པའི་རྣམ་འགྱུར་དེ་ནི་ཟུར་བལྟས་ལེབ་མཐོང་གི་དཔེ་ལྟར་གྱུར་འདུག

འོན་ཀྱང་དེ་ནི་ལྐུགས་པས་ལྷ་མཐོང་བ་ལྟར་ཧ་ལས་དགོས་པའི་རྒྱུ་རྐྱེན་ཞིག་གང་ཡང་མིན་ཏེ། དཔེར་ན་རྒྱལ་ཞེན་གྱི་སློབ་གསོའི་ཆར་ཆུ་མ་ཕོག་པའི་མི་སྣས་ཀྱང་རྒྱལ་ཞེན་གྱི་དབྱར་རྔ་སྒྲོག་དུས། ཆུང་དུས་ནས་མི་རིགས་རིང་ལུགས་ཀྱི་རྒྱལ་ཞེན་སློབ་གསོའི་ཆར་ཆུའི་འོག་ནས་འཚར་ལོངས་བྱུང་བའི་བྱིས་པ་དེ་དག་གི་རྣམ་འགྱུར་ལ་ཧ་ལས་དོན་གང་ཡང་མེད་ལ་དེ་ནི་བཟོད་བསྒོམ་བྱེད་ཐུབ་པ་ཞིག་ཀྱང་རེད། འོན་ཀྱང་གནད་དོན་ཞིག་ཤེས་དགོས་པ་དེ་ནི་བདག་ཉིད་ཆེན་པོ་གྷན་དྷིས་རྫ་མ་མདེའུ་ལས་སྲུང་སྐྱོབ་བྱ་རྒྱུ་དེ། རྫ་མ་མདེའུ་ལས་རྒྱང་རིང་དུ་འཇོག་རྒྱུ་དེ་མིན་པར། དེ་ནི་རྫ་མ་བསྲེགས་ནས་བརྟན་པོར་བཟོ་དགོས་པར་གསུངས་ཡོད།

དཔེ་འདི་བཞིན་དུ་བོད་རྒྱའི་གནད་དོན་ཡང་དེ་དང་མཚུངས་པས་ཕན་ཚུན་གླེང་སློང་གི་ལམ་ནས་བདེན་དོན་གང་ཡིན་དབྱེ་ཞིབ་ཀྱིས་འགལ་ཟླ་ཡོད་པ་ནས་མེད་པར་བཟོ་དགོས་པ་ལས། བགྲོ་གླེང་གི་བྱ་བར་མ་ཞུགས་པའི་གཡོལ་ཐབས་དེས་དུས་ནམ་གྱི་ཚེ་ཡང་སེམས་ནང་གི་ངོ་གནོང་དེ་དག་དབྱར་མཚོའི་རླབས་བཞིན་འཇགས་ཐབས་བྲལ་བས་དཀའ་ངལ་དེ་ལས་དུས་ནམ་ཡང་གྲོལ་མི་ཐུབ།

དེ་བས་ན་དོན་དངོས་ལ་གཡོལ་ཐབས་བྱེད་པ་ནི་དཀའ་ངལ་གཙང་སེལ་ཐུབ་བྱེད་ཀྱི་ཐབས་ལམ་ཞིག་མིན་པར་དེ་ལས་ལྡོག་སྟེ་ཕན་ཚུན་དབར་གྱི་འབྲེལ་ལམ་བཟང་ས་ནས་ཛ་དྲག་ཏུ་གཏོང་བྱེད་ཀྱི་ལམ་ནོར་ཞིག་རེད་སྙམ། གནད་དོན་འདི་ཚོར་བསམ་ཚེ་ཚོགས་འདུ་འདི་ནི་ངོ་མ་བློ་བསྐྱེད་དང་འཁྲུག་ཆ་གཉིས་ཀ་ཡོད་པ་ཞིག་རེད།

ཚོགས་འདུ་འདིར་དམིགས་བསལ་གྱི་ཁྱད་ཆོས་ཤིག་ཡོད་པ་ནི་དེ་སྔོན་ལོ་རྒྱུས་ལ་སློབ་སྦྱོང་བྱེད་མྱོང་ཡང་། དངོས་སུ་མཐོང་མ་མྱོང་བའི་ཆིངས་ཡིག་གི་མ་ཟིན་ཡིག་ཆ་མང་པོ་ཞིག་མཐོང་ཐུབ་པ་མ་ཟད། མ་ཟིན་ཡིག་ཆ་དེ་དག་ས་གནས་གང་ཞིག་ན་ཉར་ཚགས་བྱས་མིན་དང་། བརྒྱུད་ལམ་གང་ཞིག་ནས་རག་མིན།  དེ་མིན་ས་ཁྲ་མི་འདྲ་བའི་པར་རིགས་དང་། ལྷག་པར་དུ་ས་འོག་ནས་གསར་རྙེད་བྱུང་བའི་དངོས་རྫས་དང་དཔེ་ཆའི་རིགས་སོགས་མི་འདྲ་བ་མང་པོའི་འདྲ་པར་ཡང་མཐོང་ཐུབ། མཐོང་ཐོས་གསར་པ་དེ་དག་ནི་འབྱུང་འགྱུར་གྱི་ཉམས་ཞིབ་ཀྱི་རྒྱུ་ཆའི་ཁ་ཕྱོགས་ལ་སྒོ་མོ་ཞིག་གསར་དུ་ཕྱེ་བ་དང་འདྲ་བས་དམིགས་བསལ་གྱི་ཁེ་ཕན་དང་ཁྱད་ཆོས་སུ་མཐོང་

འོན་ཀྱང་བློ་ཕམ་སྐྱེ་འོས་པ་ཞིག་ལ་མི་རྒྱུ་གཉིས་ཀྱི་བགྲོ་གྲོན་བཏང་བའི་ཉམས་ཞིབ་ཀྱི་གྲུབ་དོན་དུ་གྱུར་བའི་རྩོམ་ཤོག་ཡོངས་རྫོགས་མཉམ་ཞུགས་བྱེད་མཁན་གྱི་མི་སྣའི་ར་བ་ལས་བརྒལ་ཏེ་ལྟ་ཀློག་ལ་དགའ་བའི་སྐྱེ་བོ་ཡོད་དོ་ཅོག་གི་མིག་ལམ་དུ་བཤམས་སྟོན་མ་ཐུབ་པའི་གྱོང་གུད་དེ་ཧིན་སྒོར་གྱི་དབང་དུ་བྱས་ཚེ་ཧིན་སྒོར་ས་ཡ་མང་པོ་གྱོང་གུད་ཅིག་རེད་སྙམ། ལྷག་པར་དུ་བློ་མིག་ཁབ་རྩེ་ལས་རྣོ་བའི་ཕྱི་གླིང་པ་དེ་དག་གིས་བྲིས་པའི་ཉམས་ཞིབ་ཀྱི་གྲུབ་དོན་དེ་དག་བསྡུ་རུབ་ཀྱི་ལམ་ནས་ཉར་ཚགས་མི་ཐུབ་པ་དེ་ནི་དེ་བས་ཀྱང་ཕངས་སེམས་སྐྱེ་འོས་པ་ཞིག་རེད།

ཨ་ཅང་ཅང་གནད་དོན་འདིའི་ཐོག་ཚོགས་འདུ་གོ་སྒྲིག་པས་ཉ་མོ་མ་ཟིན་པ་མ་གཏོགས། མཚོ་མཐའ་མ་བསྐོར་བ་ཡིན་གྱི་མ་རེད། གང་ལགས་ཤེས་ན་ཚོགས་འདུ་གོ་སྒྲིིག་པར་དཔལ་འབྱོར་གྱི་དཀའ་ངལ་ཡོད་པ་ཕྱི་གསལ་ནང་གསལ་ཡིན་པ་མ་ཟད། རྒྱལ་སྤྱིའི་བོད་རིག་པའི་ཚོགས་འདུའི་རྩོམ་ཤོག་གི་ནང་ནས་ཀྱང་དྲག་འདེམས་ཀྱིས་ཕྱག་དེབ་གཅིག་ཙམ་ལས་འདོན་ལམ་མེད་པའི་རྒྱབ་ལྗོངས་ཡང་དཔལ་འབྱོར་རང་ལ་ཐུག་ཡོད་པ་ནམ་ལངས་ཉི་ཤར་གྱི་དཔེ་ལྟར་རེད།

འོན་ཀྱང་གནད་དོན་འདི་ནི་མུ་མཐུད་ནས་སྣང་མེད་དུ་གཏན་ནས་བསྐྱུར་མི་རུང་བ་ཞིག་སྟེ། དཔེར་ན་ཞིང་པས་དཔྱིད་དུས་ཚ་དྲོད་འཕེལ་དུས་སུ་ཞིང་ཁ་རྨོས་ཤིང་། དབྱར་གོ་ཚུགས་དུས་ཞིང་ཁ་བཏབ་སྟེ། རིམ་བཞིན་ཆར་ཆུའི་རབ་འདེགས་ཀྱི་འོག་ནས་གཅེས་སྐྱོང་ལེགས་པར་བྱས་ཏེ། སྟོན་དུས་སུ་འབྲས་བུ་ལེན་ཆོག་ཆོག་བཟོས་པ་དང་གཉིས་སུ་མ་མཆིས་པས། གནད་དོན་འདི་ལ་སྣང་ཆུང་བྱས་པ་ནི་རྣམ་དཔྱོད་ཅན་གྱི་སྐྱེས་བུའི་དགོངས་པ་བཞེས་སྟངས་ཤིག་མིན་པར་སྙམ།

དེ་བས་ན་ཚོགས་འདུ་གོ་སྒྲིག་པས་རྩོམ་ཡིག་ཡོངས་རྫོགས་བསྡུ་རུབ་ཀྱིས་དུས་དེབ་ཀྱི་ངོ་བོར་འདོན་སྤེལ་དང་ཉར་ཚགས་དཀའ་རུང་། རྩོམ་ཡིག་འདི་དག་བོད་པའི་ཆོས་དང་རིག་གཞུང་དང་འབྲེལ་བའི་གནད་དོན་ཤ་སྟག་ཡིན་སྟབས། བཙན་བྱོལ་གཞུང་གི་ཚན་པ་གང་རུང་ཞིག་ནས་འགན་ཁུར་བཞེས་ཏེ་ཉར་ཚགས་ཐུབ་ན་རྩོམ་ཡིག་འདི་དག་བསམ་ཚུལ་ཙམ་དང་ལྟ་ཚུལ་ཙམ་ལས་བརྒལ་ཏེ། ཞིབ་འཇུག་གི་གྲུབ་དོན་ཞིག་ཡིན་པས། རྩོམ་ཡིག་འདི་དག་ལ་ལྟ་ཀློག་བྱས་པ་ནི་འཆར་སྣང་ཙམ་དང་རྟོགས་སྒྲུང་གི་ངོ་བོར་གནས་པའི་རྩོམ་ཡིག་བརྒྱ་ཕྲག་ཀློག་པ་ལས་ཀྱང་རིན་ཐང་ཆེ་ལ་བློ་བསྐྱེད་ཆེ་བས། སྤྱིར་བཏང་གི་དེབ་རིགས་པར་སྐྲུན་བྱེད་པ་ལས་རིན་ཐང་བླ་ལྷག་ཏུ་ལྡན་ཡོད།

ལྷག་པར་དུ་རྩོམ་ཡིག་དེ་དག་ལས་རིགས་འགའ་ཞིག་ནི་རྒྱུ་ཆ་ཧ་ཅང་འཚོལ་རྙེད་དཀའ་བའི་རིགས་ཡིན་པས་གནད་དོན་དེ་ཚོའི་ཐོག་བོད་པ་ཞིག་གིས་ཉམས་ཞིབ་བྱ་དགོས་ཚེ་ཕྱི་རྒྱལ་པ་དེ་དག་གིས་རྒྱུ་ཆ་རྐང་གཅིག་གི་དོན་དུ་ལ་ལུང་མང་པོའི་དཀའ་སྤྱད་སྡུག་རུས་བསྟེན་ཐུབ་པ་བཞིན་ང་ཚོའི་སྡུག་རུས་ཀྱི་འཁྱོལ་མིན་ནི་ད་དུང་དོགས་པའི་གནས་ཤིག་རེད།

དེ་བས་ན་དཀའ་ལས་རྒྱག་མི་དགོས་པར་སྟོན་འབྲས་ལ་ལོངས་སྤྱོད་བྱེད་རྒྱུ་དེ་ནི་ས་པཎ་གྱིས་མཁས་པ་ཡོན་ཏན་དཔག་མེད་ཀྱང་ཞེས་པའི་སློབ་གསོ་དང་མཐུན་པ་མ་ཟད། དོན་དངོས་རྣམ་དཔྱོད་ལྡན་པའི་སྐྱེས་བུའི་སྤྱོད་ཡུལ་ཞིག་ཀྱང་ཡིན་པས་གནད་དོན་འདིའི་ཐོག་དགོངས་བཞེས་དང་བགྲོ་གླེང་གནང་གལ་ཆེ་བར་མཐོང་། དེ་ལྟར་མཐོང་ཚུལ་དང་བསམ་ཚུལ་ཞིག་གི་ཀློང་ནས་ཚོགས་འདུ་འདི་ཇི་ལྟར་གོ་ཚུགས་པ་དང་། མཇུག་བསྒྲིལ་བ་ཡང་མི་ཤེས་པའི་དེ་རིང་ངས་སླར་ཡང་རྨིས་མ་མྱོང་བའི་རྨི་ལམ་གཞན་ཞིག་ལ་རེ་སྒུག་བྱེད་བཞིན་མཆིས་སོ།།

སོག་ཡུལ་གྱི་རྒྱལ་ས་ཨོ་ལན་པཱ་ཐུར་ནས་ཕྱི་ལོ་ ༢༠༡༣ ཟླ་བ་ ༧ ཚེས་ ༢༧

ཉིན་ཤར་མར་བྲིས་པ་དགེའོ།།

ཤོག་ངོས་འདི་ཐེངས་ ༢༣༣༩ ལ་བཀླགས་འདུག
རིག་པ་འདོན་པ།
གཅན་བཟོད་<རྒྱམ།
༢༠༡༣/༠༧/༢༨ ཉིན་འདོན་སྤེལ་བྱས།
མྱོང་ཚོར་དངོས་བྲིས་འདི་ཧ་ཅང་ཡག་པོ་འདུག ཚོགས་བཅར་པའི་རྩོམ་ཡིག་གམ་གཏམ་བཤད་མ་ཟིན་རེག་ཐབས་ངས་ཀྱང་མང་པོ་བྱས་པ་ཡིན། རྗེས་ནས་མི་མང་པོར་དེའི་སྐོར་སྐད་དྲིས་པ་ཡིན། དེ་བྱེད་སྟངས་ཤིག་ཡིན་ས་མ་རེད། ཚོགས་གཙོ་རྙིང་པས་ཟེར་ན། ཐེངས་འདིའི་ཚོགས་བཅར་བའི་རྩོམ་ཡིག་དེབ་གཟུགས་སུ་སྐྲུན་རྒྱུ་དང་། ཚོགས་བཅར་པ་ཚོར་མུ་མཐུད་ནས་འབྲེལ་བ་བྱས་ཏེ་ཁོང་ཚོའི་རྩོམ་ཡིག་རྣམས་ཁ་འཐོར་དུ་མི་འགྲོ་བར་སྙིང་བསྡུས་རེལམ་དེབ་གཟུགས་སུ་སྐྲུན་རྒྱུ་དང་། དེ་མིན་དྲ་རྒྱ་གསར་གསར་བཟོས་ཀྱིས་དེའི་ཐོག་ཏུ་འགོར་པར་འབད་བརྩོན་བྱ་རྒྱུ་དང་། སྔར་ཡོད་དྲ་རྒྱ་ལས་གཞན་པ་ཞིག་བཟོས་གྲུབ་ཡོད་སྐོར་བརྗོད་སོང་སྙམ།
བོད་རིག་པའི་ཞིབ་འཇུག་གི་དེབ་ཕྲེངས་བོད་དབྱིན་རྒྱ་ཡིག་ཧྥ་ཡིན། འཇར་མན་སོགས་སུ་དཔར་དུ་བཏབ་ཡོད་ཅིང་། གངས་སྐྱིད་དཔེ་མཛོད་དུའང་དབྱིན་ཡིག་སྡེ་ཙན་དུ་མང་པོ་འདུག་པ་ངས་ཉིས་༢༠༠༦ ལོར་འགའ་རེར་མཇལ་མྱོང་

ཚོགས་བཅར་བའི་རྩོམ་ཡིག་རྣམས་ཕལ་ཆེར་ཚོགས་པར་དབང་བ་ཡིན་ནམ་སྙམ།
རིག་པ་འདོན་པ།
རིག་པ་འདོན་ན་ངེས་པར་དུ་དེབ་སྐྱེལ་བྱེད་དགོས།
འདི་ལ་བསྣུན་ཏེ་དེབ་སྐྱེལ་བྱེད་རོགས།