རྒྱ་གུང་ཁྲན་ལ་མགོ་འབུལ་ལུས་འབུལ་བྱེད་མཁན་ཆཊ་སོང་

འདོན་སྤེལ། ༢༠༡༠/༠༩/༡༧

ཁྱེད་རང་ཚོའི་ལམ་ནོར་ཡོད་པ་མ་རེད། ང་ཚོ་ཆོས་པ་རེད། ལམ་ལུགས་ཉམས་ལེན་བྱེད་མཁན་རེད། བླ་མ་གལ་ཆེ་འམ་ཆོས་སྐྱོང་གལ་ཆེ། ལམ་རིམ་ཆེན་མོ་དང་བཀའ་སྡེ་སྣོད་གསུམ་ལ་ཞིབ་གཟིགས་གནོང་དང་། དགེ་ལུགས་པའི་སྲུང་མ་མགོན་ཆོས་གཉིས་རེད། དེའི་ནང་ནས་ཀྱང་དམ་ཆེན་ཆོས་རྒྱལ་རེད། ངས་སྔོན་མ་ནས་བཤད་པ་ལྟར། དམ་ཅན་ཆོས་རྒྱལ་གཤེགས་སོང་ཟེར་བའི་སྐད་ཆ་ཞིག་བྱུང་སྐབས། སྲུང་མ་གསར་པ་ཞིག་འཚོལ་དགོས་པ་རེད་མ་གཏོགས་གཞན་དམ་ཅན་ཆོས་རྒྱལ་གྱིས་མ་ཐུབ་པ་གཅིག་ཀྱང་ཡོད་པ་མ་རེད།

དེ་རིང་ཞོགས་པའི་ཆུ་ཚོད་ སྟེང་བཙན་བྱོལ་བོད་གཞུང་གི་དམངས་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་དགའ་ལྡན་ཁྲི་རིན་པོ་ཆེཤར་བྱང་ཆོས་རྗེ་རྣམ་གཉིས། གྲྭ་ཚང་ཁག་གི་མཁན་ལས་ཟུར་རྣམ་པ་བཅས་ཀྱི་ཕེབས་བསུའི་དབུས་སྤྱི་ནོར་༧གོང་ས་མཆོག་སེར་སྨད་ཐོས་བསམ་ནོར་གླིང་གྲྭ་ཚང་གི་གཙུག་ལག་ཁང་མདུན་ཐང་དུ་ཆིབས་སྒྱུར་བསྐྱངས་ཏེ། སེ་ར་བྱེས་སྨད་གཉིས་དང་རྣམ་གྲོལ་གླིང་ བཀྲ་ཤིས་ལྷུན་པོ། དཔལ་ལྡན་རྒྱུད་སྨད་གྲྭ་ཚང་སོགས་སྦེལ་ཀོབ་ཉེ་འཁོར་གྱི་དགོན་སྡེ་ཁག་གི་དགེ་འདུན་འདུས་པ་རྒྱ་མཚོ་དང་སྦེལ་ཀོབ་བོད་མིའི་གཞིས་སྒར་གསར་རྙིང་གཉིས་དང་ཧོནསོར་རབ་རྒྱས་གླིང་ དེ་བཞིན་མེ་སོར་ཁྱབ་ཁོངས་ཀྱི་བོད་མི་ཁ་ཐོར་སོགས་སེར་སྐྱ་མི་དམངས་ཉིས་ཁྲི་ཉེ་ར་སྒྲོལ་དཀར་ཡིད་བཞིན་འཁོར་ལོའི་ཚེ་དབང་བསྐུར་ཡོད། དེའི་རྗེས་གཙུག་ལག་ཁང་གི་བཞུགས་ཁྲིར་ཞབས་སོར་བཀོད་དེ་བོད་གཞུང་དམངས་ཡོངས་ནས་བརྟན་བཞུགས་འདེགས་འབུལ་ཞུས་ཤིང་། ཉིན་རྒྱབ་སེར་སྨད་གྲྭ་ཚང་གི་གཞུང་ཆེན་རྩོད་རྒྱུག་དམ་འཇོག་གི་ཚོགས་དབུར་ཕེབས་ཏེ་གསུང་བཤད་གནང་ཡོད། ཕྱི་དྲོ་དོལ་རྒྱལ་གྱི་རྙོག་གླེང་འོག་སྦོམ་ར་ཁང་ཚན་ནས་ཟུར་དུ་བུད་པའི་སྤོ་འབོར་ཁང་ཚན་གསར་བཞེངས་ཀྱི་རྡོ་རིང་སྒོ་འབྱེད་རབ་གནས་དང་། རྟེན་འབྲེལ་གྱི་ལྗོངས་ཤིང་འདེབས་འཛུགས་གནང་སོང་།  

 

ཚེ་དབང་དངོས་གཞིའི་ཐོག་མར་མི་དམངས་ལ་ནང་ཆོས་ངོ་སྤྲོད་དང་འབྲེལ་དོལ་རྒྱལ་སྐོར་ལ་གསུང་བཤད་གནང་དོན། སྤྱིར་ཆོས་བཤད་བྱེད་སྐབས་ཆོས་དད་ཡོད་མེད་སུ་ཡིན་རུང་འགྲིག་མོད། བླ་སློབ་ཀྱི་འདུ་ཤེས་ཐོག་ནས་ཆོས་ཞུ་མཁན་ཡིན་ན་དམ་ཚིག་གཙང་མ་དགོས་པ་རེད། དོལ་རྒྱལ་སྐོར་ལ། ཐོག་མ་ང་རང་གིས་ཀྱང་བསྟེན་པ་རེད། ཕྱིས་སུ་རིམ་གྱིས་དངོས་ཡོད་གནས་ཚུལ་རྟོགས་ཡོང་སྐབས། ༧གོང་ས་ལྔ་བ་ཆེན་པོའི་གསུང་ཡོངས་གྲགས་པོད་༼ ད ༽ བའི་ནང་། དམ་མིན་དམ་རྫུ་གྲགས་པ་རྒྱལ་མཚན་ཞེས། སྨོན་ལམ་ལོག་པའི་དམ་སྲི་འབྱུང་བོ་འདིས། །བསྟན་དང་འགྲོ་བ་ཀུན་ལ་འཚེ་བྱས་ན། །མགོན་སྐྱབས་དཔུང་གཉེན་མ་མཛད་ཐལ་བར་སློག །ཅེས་རྒྱུ་སྨོན་ལམ་ལོག་པ་དང་། ངོ་བོ་དམ་སྲི་འབྱུང་བོ། བྱེད་ལས་བསྟན་དང་འགྲོ་བར་འཚེ་བ་བྱེད་མཁན་དུ་བསྟན་ཡོད། དགེ་ལུགས་ནང་མང་ཆེ་དགག་པ་བསྐྱོན་གྱི་ཡོད་ཀྱང་། ཕ་བོང་ཁ་བ་ནས་དར་སྲོལ་ཆེན་པོ་བྱུང་བ་རེད། སྤྱིར་ཕ་བོང་ཁ་བ་དགེ་ལུགས་པའི་བསྟན་པའི་བདག་པོ་ཞིག་ཆགས་ཡོད་ཀྱང་། དོན་དག་ཁ་ཤས་ཐོག་ནོར་འཁྲུལ་བྱུང་ཡོད། སྐུ་མདུན་སྐུ་གོང་མས་དོལ་རྒྱལ་དམ་དྲག་བྱེད་བཞིན་དུ་སྐུ་གོང་མ་དགོངས་པ་རྫོགས་མ་ཐག དོལ་རྒྱལ་དར་སྤེལ་ཆེན་པོ་བྱས་པ་དེ་ནོར་འཁྲུལ་རེད།

 

ཡང་རིགས་ཁག་ཅིག་གིས་༧རྒྱལ་བ་རིན་པོ་ཆེའི་བཀའ་རེད་ཟེར་བ་དེ་འགྲིག་གི་ཡོད་པ་མ་རེད། ངས་དེ་ལྟར་བྱེད་དགོས་པའི་རྒྱུ་མཚན་དང་དགོས་པ། ལོ་རྒྱུས། སྔོན་བྱོན་དམ་པ་ཚོས་གང་འདྲ་གནང་འདུག དེ་དག་ཕྱོགས་ཚང་མ་རྟོགས་པར་བྱས་ཏེ། གཡག་ཞར་གྱིས་རྩ་ཟོས་པ་ལྟར་མ་ཡིན་པར་བརྟག་དཔྱད་བྱས་ན། ངས་དམ་དྲག་བྱས་པའི་རྒྱུ་མཚན་ཧ་གོ་ཡོང་གི་རེད། དེང་སྐབས་རྒྱ་གུང་ཁྲན་གྱིས་བོད་ནང་གི་དོལ་རྒྱལ་བསྟེན་མཁན་ཚོར་ཞེ་དྲག་རྒྱབ་སྐྱོར་བྱེད་ཀྱི་འདུག དགོན་པ་རེ་ཟུང་ལ་གསར་དུ་བསྟེན་དགོས་པའི་སྐུལ་མ་བྱེད་ཀྱི་འདུག དེ་རིང་ཕར་ཕྱོགས་ནས་རྩོད་པ་རྩོད་ཀྱི་ཡོད་མདོག་མདོག་གིས་སྐད་རྒྱག་གི་འདུག སྤྱིར་རྩོད་པ་བརྒྱབ་པ་ཡག་པོ་རེད་དེ་ཕར་ཕྱོགས་ནས་སྐད་བརྒྱབ་ན་ངས་ཀྱང་ཅིག་མ་ལབ་ན་འགྲིག་གི་མ་རེད། ཁྱེད་ཚོ་སེར་སྨད་གྲྭ་ཚང་ལ་དཀའ་ངལ་ཞེ་དྲག་འཕྲད་པ་རེད། གཙོ་བོ་སྤོམ་ར་ཁང་ཚན་གྱི་དོལ་རྒྱལ་བསྟེན་མཁན་ཚོས་མཁྲེགས་པོ་བྱས་ཏེ། མི་གསོད་པ་དང་ཉེས་རྡུང་གཏོང་བ། རྒྱ་གུང་ཁྲན་ལ་མགོ་འབུལ་ལུས་འབུལ་བྱེད་མཁན་ཞིག་ཆགས་སོང་། སྨོན་ལམ་ལོག་པའི་དམ་སྲི། རྒྱ་འདྲེ་ངོ་མ་དེ་ཆགས་སོང་། དེ་དག་གིས་མ་ཤེས་པ་རེད། ཤེས་བཞིན་དུ་སོ་སོས་དང་ལེན་བྱས་པ་ཡིན་ན་ང་ལ་བཤད་རྒྱུ་གང་ཡང་མེད། ཆོས་ལུགས་དད་མོས་རང་དབང་རེད། ཆོས་གང་བྱེད་རྒྱུ་དང་ལྷ་གང་བསྟེན་རྒྱུ་རང་དབང་རེད། འོན་ཀྱང་དེ་དག་གི་ཁུངས་ལུང་གང་འདྲ་ཡིན་པ་བཤད་དགོས་པ་ང་རང་གི་ལས་འགན་རེད། ཉན་དང་མི་ཉན་སོ་སོས་བསམ་བློ་གཏོང་དགོས། ཞེས་བཀའ་ནན་བསྩལ་སོང་

 

ཚེ་དབང་གྲུབ་རྗེས་གཙུག་ལག་ཁང་གི་བཞུགས་ཁྲིར་ཞབས་སོར་བཀོད་ཅིང་། དགའ་ལྡན་ཁྲི་རིན་པོ་ཆེ་མཆོག་གིས་མཎྜལ་ལྗགས་བཤད་དང་། བཀའ་བློན་ཁྲི་པ་མཆོག་དང་བོད་མི་མང་སྤྱི་འཐུས་ཚོགས་གཙོ་རྣམ་གཉིས་ཀྱིས་མཎྜལ་ཚོམ་བུ་འདེགས་འབུལ་ཞུས། སྐབས་དེར་༧གོང་ས་མཆོག་གིས་ཇི་སྲིད་ནམ་མཁའ་གནས་པ་དང་  །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ནས། །འགྲོ་བའི་སྡུག་བསྔལ་སེལ་བར་ཤོག །ཅེས་པ་འདི་ངའི་ཉམས་ལེན་གཅིག་རེད། ངས་རྟག་པར་སྨོན་ལམ་རྒྱག་གི་ཡོད། ཁྱེད་ཅག་གི་སེམས་བདེ་མོ་བྱོས། བརྟན་བཞུགས་རྒྱུན་དུ་འབུལ་བཞིན་ཡོད་པ་རེད། གཙོ་བོ་དེ་རིང་འདིར་ས་དགེ་བཀའ་རྙིང་བོན་དང་བཅས་པའི་དབུ་ཁྲིད་རྣམ་པ་དང་དགེ་འདུན་འདས་པ་རྒྱ་མཚོས་ལྷག་བསམ་རྣམ་དག དད་དམ་གཡོ་བ་མེད་པའི་ཐོག་ནས་སྨོན་ལམ་རྒྱག་གིན་ཡོད་སྟབས། ཐུགས་སྨོན་བདེན་ཚིག་ཅིག་ཏན་ཏན་ཡོང་གི་རེད། ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་སོང་  

 

ཉིན་རྒྱབ་༧གོང་ས་མཆོག་སེར་སྨད་གྲྭ་ཚང་གི་གཞུང་ཆེན་རྩོད་རྒྱུགས་དམ་འཇོག་གི་ཚོགས་དབུར་ཕེབས་ཏེ། ཆུ་ཚོད་གཉིས་ལྷག་རིང་དགེ་འདུན་པ་རྣམས་ཀྱི་གཞུང་ཆེན་རྩོད་རྒྱུགས་ལ་གསན་གཟིགས་གནང་མཐར་གསུང་བཤད་གནང་དོན། འཛམ་གླིང་དུ་ནང་པ་ས་ཡ་སུམ་བརྒྱ་བཞི་རྒྱ་ཞིག་ཡོད་ལ། དེའི་ནང་ནཱ་ལེན་ཊའི་ཆོས་རྒྱུད་དྲི་མ་མེད་པ་འཛིན་མཁན་བོད་མི་ས་ཡ་དྲུག་མ་གཏོགས་མེད། དེའི་ནང་ནས་ཀྱང་བཏགས་དོན་བཙལ་ཏེ་མཛུབ་མོ་བཙུགས་པ་ཡིན་ན། འདིར་ཡོད་པའི་ཁྱེད་ཅག་རེད། ངས་འཛམ་གླིང་ཐོག་ནང་ཆོས་ངོ་སྤྲོད་བྱེད་སྐབས། བོད་གངས་ཅན་ལྗོངས་ཀྱི་ནང་ཆོས་དེ་དཔལ་ནཱ་ལེན་ཊའི་ཆོས་རྒྱུད་དྲི་མ་མེད་པ་ཡིན་ཞེས་སྤོབས་པ་ཆེན་པོས་བཤད་བསྡད་པ་དེའི་མ་རྩ་ཁྱེད་རང་ཚོ་རེད། ད་བར་སློབ་སྦྱོང་བྱས་པ་ཡག་ཐག་ཆོད་རེད། ད་དུང་ཡང་ཤུགས་རྒྱག་དགོས་པ་རེད། སྔོན་མ་ང་འབྲས་སྤུངས་ཕོ་བྲང་དུ་བསྡད་སྐབས། མཚན་ལ་མངོན་རྟོགས་རྒྱན་དང་དབུ་མ་འཇུག་པ། མཛོད་རྩ་སོགས་བློ་ལ་སྐྱོར་མཁན་མང་པོ་ཡོད། དེ་བཞིན་སེ་ར་ནས་ཀྱང་ལེགས་བཤད་སྙིང་བོ་སྐྱོར་མཁན་གོ་མྱོང་། ཕྱིས་སུ་དེ་འདྲ་གོ་རྒྱུ་མི་འདུག གྲྭ་སའི་སློབ་གཉེར་སྡུག་ཏུ་ཕྱིན་ཏེ་ལྷོད་གཡེང་ཤོར་ན་ཁྱོན་ནས་ཡག་པོ་མ་རེད། མཐུན་རྐྱེན་ཡག་ཏུ་ཕྱིན་ཞིང་། སློབ་གཉེར་གྱི་སྤུས་ཀ་ཞན་དུ་ཕྱིན་ན་ཉམས་གསོ་བྱ་ཁག་པོ་རེད། འདིའི་ཐད་གཙོ་བོ་མཁན་པོ་ཚོས་འགན་བཞེས་དགོས་པ་རེད། འཛེམ་ཟོན་སྤངས་ཏེ་འགན་ལེན་དགོས། མཁན་ཐོག་རིང་ཟོག་པོ་བྱས་བསྡད་ནས་རྗེས་སུ་མཁན་པོ་འཁྱོལ་སྐབས། གྲྭ་དམངས་ཚོས་མཁན་པོ་ཁོང་ཡག་པོ་ཡོད། ང་ཚོར་ཚ་འདེད་བཏང་མ་སོང་ཟེར་བའི་མིང་གི་དོན་དུ་འཛེམ་ཟོན་བྱས་བསྡད་ན་ནོར་འཁྲུལ་ཆེན་པོ་རེད། སངས་རྒྱས་ཀྱི་བསྟན་པ་སྤྱི་དང་། ཡང་སྒོས་འཇམ་མགོན་བླ་མའི་བསྟན་པ་ལ་ཁྱད་གསོད་བྱས་པ་རེད། དགེ་རྒན་ཚོ་ཡང་དེ་དེ་བཞིན་རེད། འདི་དོན་ཚན་གཅིག་ཡིན། ཞེས་གསུངས་སོང་

 

ཕྱི་དྲོའི་ཆུ་ཚོད་ ༥ སྟེང་སྤོ་འབོར་ཁང་ཚན་དུ་ཞབས་སོར་བཀོད་སྐབས་བཀའ་སློབ་གནང་དོན། དགའ་ལྡན་ཕོ་བྲང་གི་བཀའ་དྲིན་ལོ་ངོ་བརྒྱ་ཕྲག་རིང་རྒྱུན་བསྐྱངས་པ་ངོས་ཟིན་ཐོག དགའ་ལྡན་ཕོ་བྲང་གི་ཁྱབ་ཁོངས་འོག་བློ་གཅིག་སེམས་གཅིག་གིས་འགྲོ་རྒྱུ་ཡིན་ཟེར་ནས་ཁྱེད་རང་ཚོས་ཁང་ཚན་གསར་པ་བཙུགས་པ་རེད། ཡག་པོ་ཞེ་དྲག་རེད་བཀྲ་ཤིས་བདེ་ལེགས་ཟེར་རྒྱུ་ཡིན། དོལ་རྒྱལ་སྐོར་ལ་ཚང་མས་ཤེས་གསལ་རེད། ༧གོང་ས་ལྔ་བ་ཆེན་པོས་ཐག་གིས་བཅད་པ་རེད། ཁོང་གི་རྟོགས་པ་དང་མཉམ་པ་ཞིག་མིན་ན་སུ་གཅིག་གིས་ཀྱང་བཀའ་རྩིས་མེད་གཏོང་ཐུབ་ཡོད་པ་མ་རེད། དེ་སྔ་བྱང་རྩེ་དང་སེར་སྨད་གཉིས་ལ་དཀའ་ངལ་ཞེ་དྲག་ཕྲད་སོང་། འདིར་ཡོད་པའི་ཁྱེད་རང་ཚོའི་ལམ་ནོར་ཡོད་པ་མ་རེད། ང་ཚོ་ཆོས་པ་རེད། ལམ་ལུགས་ཉམས་ལེན་བྱེད་མཁན་རེད། བླ་མ་གལ་ཆེ་འམ་ཆོས་སྐྱོང་གལ་ཆེ། ལམ་རིམ་ཆེན་མོ་དང་བཀའ་སྡེ་སྣོད་གསུམ་ལ་ཞིབ་གཟིགས་གནོང་དང་། དགེ་ལུགས་པའི་སྲུང་མ་མགོན་ཆོས་གཉིས་རེད། དེའི་ནང་ནས་ཀྱང་དམ་ཆེན་ཆོས་རྒྱལ་རེད། ངས་སྔོན་མ་ནས་བཤད་པ་ལྟར། དམ་ཅན་ཆོས་རྒྱལ་གཤེགས་སོང་ཟེར་བའི་སྐད་ཆ་ཞིག་བྱུང་སྐབས། སྲུང་མ་གསར་པ་ཞིག་འཚོལ་དགོས་པ་རེད་མ་གཏོགས་གཞན་དམ་ཅན་ཆོས་རྒྱལ་གྱིས་མ་ཐུབ་པ་གཅིག་ཀྱང་ཡོད་པ་མ་རེད། ཅེས་གསུངས་སོང་

༼ གསར་འགོད་པ་དོན་འགྲུབ་བཀྲ་ཤིས་ཀྱིས་སེ་ར་ཐེག་ཆེན་གླིང་ནས་སྤེལ ༽

ཤོག་ངོས་འདི་ཐེངས་ ༢༣༠༡ ལ་བཀླགས་འདུག
རིག་པ་འདོན་པ།
ཤུགས་ལྡན།
༢༠༡༠/༠༩/༠༤ ཉིན་འདོན་སྤེལ་བྱས།
༄༅། །དགེ་ལུགས་ཀྱི་ཕྱོགས་ནས་དོལ་རྒྱལ་སྲུང་མར་མངའ་སྲོལ་མཛད་མཁན་རྒྱལ་མཆོག་ལྔ་པ་ཡིན་པའི་ཕྱིར་ཏེ། ལྷ་ས་གྲོང་ཁྱེར་གྱི་ལྷོ་ངོས་སུ་ཡོད་པའི་རྡོ་རྗེ་ཤུགས་ལྡན་གྱི་གནས་གཞི་མགོན་ཁང་སྤྲོ་བདེ་ཁང་གསར་གསར་སྐྲུན་གནང་མཁན་རྒྱལ་མཆོག་ལྔ་པ་ཆེན་པོ་ཡིན་ཏེ།
ཇི་སྐད་དུ། དུང་དཀར་ཚིག་མཛོད་ཆེན་མོ་ལས།
ལྷ་ས་གྲོང་ཁུལ་རྙིང་པའི་ལྷོ་ངོས་སུ་རྒྱལ་ཁ་ལམ་གྲོང་ལྷན་ཁོངས་ཡོད་པའི་སྤྲོ་བདེ་ཁང་གསར་ནི་དུ་རབས་བཅུ་བདུན་པའི་ནང་ཏཱ་ལའི་བླ་མ་སྐུ་ཕྲེང་ལྔ་པས་གཟིམ་ཁང་སྤྲུལ་སྐུ་གྲགས་པ་རྒྱལ་མཚན་དྲེགས་པར་བཞེངས་པ་རྡོ་རྗེ་ཤུགས་ལྡན་གྱི་རྟེན་མཁར་དུ་གསར་སྐྲུན་གནང་བའི་བདག་འཛིན་དབང་ཆ་ལྷོ་ཁ་རི་བོ་ཆོས་གླིང་གི་བླ་མ་དོན་གྲུབ་རྒྱ་མཚོར་གནང་བ་ནས་བཟུང་རི་བོ་ཆོས་གླིང་དགོན་ནས་བདག་འཛིན་གྱིས་རྒྱུན་དུ་བསྐང་གསོ་བ་མི་གཅིག་ཡོད་པ་དང་། རྡོ་རྗེ་ཤུགས་ལྡན་སྐུ་གསོལ་བྱེད་ཅིང་། དེའི་ཕྱི་སྒོའི་འགྲམ་གྱི་ཤར་ངོས་སུ་ཡོད་པའི་སྨོན་སྐྱིད་ཁང་གསར་ཞེས་པ་དེ་ཡང་རི་བོ་ཆོས་གླིང་ནས་བདག་པོ་བྱེད་པ་དེར་བཙན་རྒོད་ཁ་ཆེ་དམར་པོ་སོགས་ཁོས་ཞུགས་བྱེད་ཀྱི་ཡོད།
སྤྲོ་བདེ་ཁང་གསར་གྱི་འདུ་ཁང་གི་རྒྱལ་སྒོའི་སྟེང་རྒྱ་ཡིག་གི་བན་ཞིག་ཡོད་པ་དེ་ཆིང་རྒྱལ་རབས་ཀྱི་གོང་མ་ཏཱ་ཀོང་སྐབས་བོད་བཞུགས་ཨམ་བན་ནས་གོང་མར་སྙན་ཞུ་ཕུལ་ཏེ་བཀའ་འཁྲོལ་བྱུང་བ་བཞིན་ཏཱ་ལའི་བླ་མ་སྐུ་ཕྲེང་བཅུ་གཅིག་པ་དང་ཨམ་བན་གཉིས་གཙོ་བཞུགས་ཀྱིས་གནས་ཆུང་སྐུ་བརྟེན་དང་སྤྲོ་བདེ་ཁང་གསར་གྱི་ཆོས་རྗེ་སོ་སོར་ཨམ་བན་ནས་བན་རེ་གནང་ཚུལ་ཏཱ་ལའི་བླ་མ་སྐུ་ཕྲེང་བཅུ་གཅིག་པའི་རྣམ་ཐར་ནང་གསལ། ཞེས་གསུངས་པའི་ཕྱིར།
གཟུ་གནས་བློ་ལྡན།
༢༠༡༠/༠༩/༠༣ ཉིན་འདོན་སྤེལ་བྱས།
༧གོང་ས་ལྔ་བ་ཆེན་པོའི་གསུང་ཡོངས་གྲགས་པོད་༼ ཏ ༽ བའི་ནང་། ཞེས་པ་འདི་ནོར་འདུག པོད་ (ཏ་) པ་མ་རེད། པོད་(ད་) པ་རེད། མྱུར་དུ་བཅོས་རོགས་ཞུ།
ཤྰ་རིའི་བུ།
༢༠༡༠/༠༩/༠༣ ཉིན་འདོན་སྤེལ་བྱས།
གོང་ས་མཆོག་གིས་གསུང་བཞིན་ལམ་ནོར་མེད་འདྲ་ཡང་དེང་སང་དངུལ་ཁུག་རེད་ད།
ཤེལ་དཀར་བློ་བཟང་
༢༠༡༠/༠༩/༠༢ ཉིན་འདོན་སྤེལ་བྱས།
kalsang lak.
སོ་སོས་དཔྱད་པའི་ངེས་ཤེས་ཕུ་ཐག་ཆོད་པ་མ་བརྙེད་ཀྱང་།།
སྔོན་བྱོན་མཁས་པའི་ལུང་རིག་དང་སྦྱར་རྗེས་དཔག་རྣམ་གསུམ་གྱིས།།
མེད་མིན་ཡོད་མིན་ཡོད་མེད་མ་ཡིན་ཡོད་མེད་ལས་གཞན་དུ།།
བརྟག་པར་མི་ནུས་ཟབ་ཆོས་དེ་ལ་བློ་ཕྱོགས་དེ་ཡང་མཚར།།
kalsang
༢༠༡༠/༠༩/༠༢ ཉིན་འདོན་སྤེལ་བྱས།
ཤེས་དཀར་བློ་བཟང་ལགས།།
སོ་སོས་དཔྱད་པའི་ངེས་པ་མ་རྙེད་པར།།
ཟེར་སྒྲོས་བཏུས་པའི་ལུང་གིས་རྨོངས་མི་སེལ།།
གཉིས་སྣང་བཅས་པ་རིག་པས་བརྟོལ་བ་ན།།
བདེན་མེད་མཐོང་བས་ལམ་གྱི་སྣང་བ་གསལ།།
ཤེལ་དཀར་བློ་བཟང་
༢༠༡༠/༠༩/༠༢ ཉིན་འདོན་སྤེལ་བྱས།
དཔལ་ལྡན་ཟླ་བ་གྲགས་པས།

གང་ཚེ་རང་དབང་འཇུག་ཅིང་མཐུན་གནས་པ།།
གལ་ཏེ་འདི་དག་འཛིན་པར་མི་བྱེད་ན།།
གཡང་སར་ལྷུང་བས་གཞན་དབང་འཇུག་འགྱུར་བ།།
དེ་ལས་ཕྱི་ནང་གང་གིས་སློང་བར་འགྱུར།།
ཇི་སྐད་གསུངས་པ་བཞིན་ད་ལྟ་༸མགོན་པོ་མཆོག་༸སྐུ་འཚོ་བཞུགས་ཀྱི་བསྐལ་བཟང་དུས་བཟང་འདིར་ང་ཚོ་སྐྱབས་འོག་པ་ཚང་མས་བླང་དོར་སྤང་ལེན་ཚུལ་བཞིན་མ་བྱས་ཚེ། འབྱུང་འགྱུར་རྣམ་སྨིན་ཉེ་འབྲས་རང་ཐོག་ཏུ་སྨིན་དུས་ལྷ་མིན་འདྲེ་མིན་སུ་ཞིག་གིས་སློང་བར་འགྱུར་ཏེ་མི་འགྱུར་རོ།།
དོན་འགྲུབ་བཀྲ་ཤིས།
༢༠༡༠/༠༩/༠༢ ཉིན་འདོན་སྤེལ་བྱས།
འདྲེ་རིག་ལྡན་དང་། སྣང་རྒྱལ་བཤེར་དགེ ཤེལ་དཀར་བློ་བཟང་གསུམ་ནས་གོང་གི་གསར་འགྱུར་ནང་གི་ཡིག་ནོར་ཁག་ཅིག་ངོས་འཛིན་གནང་བ་ལྟར་བཟོ་བཅོས་བྱས་ཡོད། ཐུགས་རྗེ་ཆེ།
མཐའ་མཚམས་ཀྱི་ཕོ་ཉ།
༢༠༡༠/༠༩/༠༢ ཉིན་འདོན་སྤེལ་བྱས།
སྤོ་འབོར་ཁང་ཚན་གསར་པ་ལེགས་གྲུབ་ཡོང་བའི་སྨོན་འདུན་དང་རྒྱབ་སྐྱོར་ཡོད།
ད་ཕྱིན་ཆད་གྲྭ་རྒྱུན་རེ་ཡོད་ན་སྤོ་འབོར་ཁང་ཚན་གཏོང་གིན་ཡིན་ཁྱེད་ཚོ་སེམས་ཤུགས་མ་ཆགས།
སྤོ་འབོར་ཁང་ཚན་གྱི་སྣེཁྲིད་ཡོངས་ལ་ཐུགས་རྗེ་ཆེ་ཞུ།
ཁ་བ་ནག་པོ།
༢༠༡༠/༠༩/༠༢ ཉིན་འདོན་སྤེལ་བྱས།
གོང་ས་ཡིད་བཞིན་ནོར་བུའི་སྐུའི་གཟི་མདངས་མཇལ་ནས་སེམས་ཁོང་དྲོད་ཀྱིས་ཁེངས་སོང་། ད་ང་ཚོས་ཁོང་གི་སྐུའི་འཕྲོད་བསྟེན་ལ་དོ་སྣང་ཆེན་པོ་བྱེད་དགོས་པའི་དུས་རེད་མ་གཏོགས། ཁོང་གིས་མར་མི་དམངས་ལ་གནང་བའི་ཆབ་སྲིད་ཀྱི་ལས་འགན་འདི་ཡར་ཁོང་གི་སྐུ་ཕྲག་ལ་མི་འགེལ་རྒྱུ་མཁྱེན།
ལྷ་ལུང་
༢༠༡༠/༠༩/༠༢ ཉིན་འདོན་སྤེལ་བྱས།
གནས་ཆུང་དམིགས་བསལ་ཡིན་ནམ་
ལྷ་ལུང་
༢༠༡༠/༠༩/༠༢ ཉིན་འདོན་སྤེལ་བྱས།
འདོད་ན་བཙན་གྱིས་འགོག་པའི་དོན་ཡང་མེད་། མི་འདོད་ནན་གྱིསབསྐུལ་བའི་དོན་ཡང་མེད་
ཀརྨ་རྡོ་རྗེ།
༢༠༡༠/༠༩/༠༢ ཉིན་འདོན་སྤེལ་བྱས།
དམ་མིན་དམ་རྫུ་གྲགས་པ་རྒྱལ་མཚན་ཞེས། །
སྨོན་ལམ་ལོག་པའི་དམ་སྲི་འབྱུང་བོ་འདིས། །
བསྟན་དང་འགྲོ་བ་ཀུན་ལ་འཚེ་བྱས་ན། །
མགོན་སྐྱབས་དཔུང་གཉེན་མ་མཛད་ཐལ་བར་སློག །

སྤྲུལ་སྐུ་གྲགས་པ་རྒྱལ་མཚན་འདྲེ་རུ་སྐྱེས། །
སྨོན་ལམ་ལོག་པ་ཐམས་ཅད་འདྲེ་དེར་དགའ། །
བསྟན་དང་འགྲོ་བར་གནོད་པ་ཀུན་གྱིས་མཐོང་། །
འགྲོ་ས་འདུག་ས་མེད་པ་རང་གིས་བཟོས། །

རིག་པ་འདོན་པ།
རིག་པ་འདོན་ན་ངེས་པར་དུ་དེབ་སྐྱེལ་བྱེད་དགོས།
འདི་ལ་བསྣུན་ཏེ་དེབ་སྐྱེལ་བྱེད་རོགས།