ལྐོག་ཟ་བྱེད་མཁན་འདི་ལྟར་འཇོག་ན་རྒྱ་གར་གཞུང་ལ་གཏུག་རྒྱུ་ཡིན་ཟེར།

འདོན་སྤེལ། ༢༠༡༣/༠༦/༡༢

ཨ་རི་ནཱ་ཅལ་འབུམ་སྡེ་ལ་ས་གནས་གཞིས་མགོ་བཀྲ་ཤིས་ནོར་བུ་དང་བསྟན་འཛིན་སྒང་མཉམ་འབྲེལ་དྲུང་ཆེ་བསྟན་འཛིན་རིག་བཟང་གཉིས་ཀྱིས། རྒྱ་གར་གཞུང་གིས་བོད་རིགས་ཕྲུ་གུའི་འཚོ་སྣོན་ཆེད་སྤྲོད་བཞིན་པའི་ཧིན་སྒོར་འབུམ་ ༢ ལྷག་སྒེར་ཟ་བྱས་ཡོད་པ་ར་འཕྲོད་བྱུང་འདུག

ཨ་རི་ནཱ་ཅལ་འབུམ་སྡེ་ལ་ས་གནས་གཞིས་མགོ་བཀྲ་ཤིས་ནོར་བུ་དང་བསྟན་འཛིན་སྒང་ས་གནས་མཉམ་འབྲེལ་དྲུང་ཆེ་བསྟན་འཛིན་རིག་བཟང་གཉིས་ཀྱིས། བསྟན་འཛིན་སྒང་སྣ་འཛོམས་བདེ་དོན་མཐུན་ཚོགས་ (Tenzingang Multipurpose Welfare Society) ཞེས་པའི་ཚོགས་པའི་ཐམ་ག་དང་དངུལ་འཛིན། ཚོགས་པའི་རྩིས་ཁྲ་བཅས་རྫུན་བཟོ་བྱས་ཏེ། ལོ་ལྟར་རྒྱ་གར་གཞུང་གིས་ས་གནས་ཀྱི་ཕྲུ་གུ་རང་ལོ་ ༥ མན་ལ་འཚོ་སྣོན་དུ་སྤྲོད་བཞིན་པའི་རོགས་དངུལ་ཧིན་སྒོར་འབུམ་ ༢ ལྷག་སྒེར་སྤྱོད་བྱས་ཡོད་འདུག ༢༠༡༠ ལོ་དང་ ༢༠༡༡ ལོ་བཅས་སུ་རྒྱ་གར་གཞུང་གིས་རྩིས་ཞིབ་ལས་བྱེད་ས་གནས་སུ་འབྱོར་ཏེ་ཤེས་རྟོགས་བྱུང་བ་དང་། འདི་ལོའི་ཕྱི་ཟླ་ ༥ ཚེས་ ༡༧ ཉིན་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་རྣམ་གཉིས་འབུམ་སྡེ་ལར་གཞུང་འབྲེལ་ཕྱོགས་སྐྱོད་སྐབས། ས་གནས་མི་མང་གིས་གཞིས་མགོ་བཀྲ་ཤིས་ནོར་བུ་དང་བསྟན་འཛིན་རིག་བཟང་གཉིས་ཀྱིས་ཚོགས་པའི་ཐམ་ག་དང་དངུལ་འཛིན། རྩིས་ཁྲ་དང་བཅས་པ་རྫུན་བཟོ་བྱས་པའི་བདེན་དཔང་ར་སྤྲོད་བྱས་ཡོད་འདུག སྐབས་དེར་ནང་སྲིད་བཀའ་བློན་དང་དྲུང་ཆེ་གཉིས་ཀྱིས་ལས་བྱེད་དོ་བདག་གཉིས་འབོད་འགུག་གིས་སྐད་ཆ་དྲིས་སྐབས་ངོས་ལེན་བྱས་ཡོད་པ་དང་། ཉེ་ལམ་ནང་སྲིད་ལས་ཁུངས་ཀྱིས་བཀའ་ཤག་ལ་སྙན་སེང་ཞུས་རྗེས། གཞིས་མགོ་བཀྲ་ཤིས་ནོར་བུ་ཕྱིར་ནང་སྲིད་ལས་ཁུངས་ལ་གནས་སྤོར་གྱིས་གནས་རིམ་གཅིག་མར་ཕབ་སྟེ་ཧིན་སྒོར་ ༢༥༠༠༠ ཉེས་ཆད་དང་། བསྟན་འཛིན་རིག་བཟང་ལ་ཧིན་སྒོར་ ༥༠༠༠༠ བཅས་ཀྱི་ཉེས་ཆད་བཏང་ཡོད་འདུག

ཕྱི་ཚེས་ ༧ ཉིན་གྱི་སྔ་དྲོར་ཨ་རི་ནཱ་ཅལ་བསྟན་འཛིན་སྒང་གཞིས་གྲོང་གཉིས་པའི་བློ་བཟང་རྒྱལ་མཚན་ལགས་འདི་ག་གསར་ཁང་ལ་བཅར་ཏེ། གཞིས་མགོ་བཀྲ་ཤིས་ནོར་བུ་དང་མཉམ་དྲུང་བསྟན་འཛིན་རིག་བཟང་གཉིས་ཀྱིས་ཚོགས་པ་དེབ་སྐྱེལ་གྱི་ཡིག་ཆ་རྫུན་བཟོ་བྱས་པའི་ཁུངས་སྐྱེལ་ཡིག་ཆ་དང་། ཨ་རུ་ནཱ་ཅལ་སྤྱི་ཚོགས་བདེ་དོན་ལྷན་ཁང་(ARUNACHAL PRADESH STATE SOCIAL WELFARE BOARD) ནས་དངུལ་ག་ཚོད་བླངས་མིན་གྱི་ཁུངས་སྐྱེལ་ཡིག་ཆ་བཅས་མཉམ་འཁྱེར་གྱིས། ཕྱི་ལོ་ ༢༠༠༧ ལོ་ནས་བཟུང་རྒྱ་གར་སྤྱི་ཚོགས་བདེ་དོན་ཚོགས་པས་ས་གནས་ཀྱི་བྱིས་པའི་འཚོ་སྣོན་ཧིན་སྒོར་འབུམ་ ༢ ལྷག་ལྐོག་ཟ་བྱས་པ། གནས་ཚུལ་དེ་ཐོག་མར་ཕྱི་ལོ་ ༢༠༡༠ དང་ ༢༠༡༡ ལོར་རྒྱ་གར་གཞུང་གི་རྩིས་ཞིབ་ལས་བྱེད་ས་གནས་སུ་ཡོང་སྐབས། ཁོང་ཚོ་ལས་བྱེད་ནང་ཁུལ་མཐུན་གྱི་མེད་པའི་གནས་ཚུལ་བྱུང་ཡོད་པ་དང་། རིམ་གྱིས་ས་གནས་མང་ཚོགས་ཀྱིས་ཧ་གོ་ཡོད་པ་བཅས་ལ་བརྟེན་ཏེ། ཁོང་ལ་ལས་བྱེད་ཅིག་བརྒྱུད་བཀྲ་ཤིས་ནོར་བུ་དང་བསྟན་འཛིན་རིག་བཟང་གཉིས་ཀྱི་ལས་ཁུངས་དང་ཐམ་ག དངུལ་ཁང་འཛིན་བྱང་། དེབ་སྐྱེལ་ས་ཡིག་རྫུན་བཟོ་བྱས་པ་བཅས་ཀྱི་དཔང་རྟགས་ཡིག་ཆ་ཞིག་རག་རྗེས། ཁོས་རྒྱ་གར་གནས་ཚུལ་མཁོ་སྤྲོད་ (Right To Information) ལས་ཁུངས་ལ་སྙན་ཞུ་ཕུལ་ཏེ། མཐར་ཁོ་རང་གཉིས་ཀྱིས་ཁྱོན་ཧིན་སྒོར་ ༢།༥༠༧༢༨ སྒེར་ཟ་བྱས་ཡོད་པ་ར་འཕྲོད་ཡོད་སྐོར་ངོ་སྤྲོད་གནང་སོང་ 

ཁོང་ལ་བཀྲ་ཤིས་ནོར་བུ་དང་བསྟན་འཛིན་རིག་བཟང་གཉིས་ཀྱིས་ཚོགས་པ་རྫུན་བཟོ་བྱས་པའི་བདེན་དབང་ག་རེ་ཡོད་མེད་དྲིས་པར་ཁོང་གིས། སྤྱིར་བཏང་བསྟན་འཛིན་སྒང་དུ་ཁྲིམས་མཐུན་དེབ་སྐྱེལ་ཡོད་པའི་ཚོཊ་པ་རྒྱུད་སྟོད་མཉམ་འབྲེལ་མཐུན་ཚོགས་ (Gyedo TrantricCooperative Society) དང་། བསྟན་འཛིན་སྒང་མཉམ་འབྲེལ་མཐུན་ཚོགས་ (Tenzingang Multipurpose cooperative society) གཉིས་ལས་ཡོད་མ་རེད། ལོ་ཤས་གོང་ཁོ་རང་གཉིས་ཀྱིས་བསྟན་འཛིན་སྒང་ས་གནས་བདེ་དོན་ཚོགས་པ་ (Tenzingang Multipurpose Welfare Society) ཞེས་པ་ཞིག་རྫུན་བཟོ་བྱས་ཏེ། ཚོགས་པ་དེའི་མིང་ཐོག་ནས་དངུལ་བླངས་འདུག ང་ཚོའི་ས་གནས་ལ་ཚོགས་པ་དེ་འདྲ་ཞིག་མེད་པ་ངས་གསལ་བོར་ཞུ་ཐུབ་ཀྱི་ཡོད། དེབ་སྐྱེལ་ཡིག་ཆ་དེ་ཡང་བསྟན་འཛིན་རིག་བཟང་གིས་ཡི་གེ་བྲིས་ཏེ། དེ་སྔོན་གྱི་མཉམ་འབྲེལ་ཚོགས་གཙོ་ཕུན་ཚོགས་ཆོས་རྒྱལ་གྱིས་དངུལ་ཁང་གི་འཛིན་བྱང་བཟོ་ཆོག་པའི་ཆོག་མཆན་རྒྱབ་གཉེར་སྤྲད་དེ། ༢༠༠༦ ཟླ་ ༡༠ ཚེས་ ༢༠ ཉིན་ནས་ལོ་ ༤ རིང་ཚོགས་པ་དེས་ལས་ཀ་ཡག་པོ་བྱས་ཡོད་ཚུལ་བྲིས་འདུག 

སྙན་ཞུ་དང་ཚོགས་པའི་ཐམ་ག་བརྒྱུད་དངུལ་ལེན་ཐབས་སུ་ཕུན་ཚོགས་ཆོས་རྒྱལ་དང་སེ་ཡཱ། ཐུབ་བསྟན། བྱམས་པ་ཤེས་རབ། བློ་བཟང་ཡེ་ཤེས་བཅས་ཡི་གེ་ཤེས་མི་ཤེས་མང་པོ་ཞིག་གི་མཚན་རྟགས་བརྒྱབ་འདུག དེའི་ཐད་ཉེ་ཆར་ནང་སྲིད་བཀའ་བློན་དང་དྲུང་ཆེ་གཉིས་ས་གནས་སུ་ཕེབས་སྐབས། མི་སྣ་དེ་དག་གིས་མཚན་རྟགས་རྫུན་མ་ཡིན་པ་ར་འཕྲོད་གསལ་བོ་བྱུང་ཡོད་པ་རེད། སྔར་ལོའི་ཕྱི་ཟླ་ ༣ ཚེས་ ༡༢ ཉིན་ངས་རྒྱ་གར་གྱི་ (Right to Information)ལས་ཁུངས་ལ་སྙན་ཞུ་ཕུལ་བ་བཞིན་ད་ལོའི་ཕྱི་ཟླ་ ༡ ཚེས་ ༡༧ ཉིན་ང་ལ་གནས་ཚུལ་སྤྲད་པའི་ནང་། ༢༠༠༥ ནས་  ༢༠༠༧ ལོའི་བར་ཁྱོན་བསྡོམས་ཧིན་སྒོར་ ༢༥༠༧༢༨ ཙམ་ཁོ་རང་གཉིས་ཀྱིས་བླངས་འདུག ཅེས་བརྗོད་བྱུང་ 

ཡང་ཁོང་ལ་ནང་སྲིད་བཀའ་བློན་དང་དྲུང་ཆེ་རྣམ་གཉིས་ས་གནས་སུ་ཕེབས་སྐབས་ག་རེ་གསུངས་ཡོད་མེད་དྲིས་པར། ཁོང་གིས། ཟླ་སྔོན་མའི་ཕྱི་ཚེས་ ༡༧ ཉིན་ནང་སྲིད་བཀའ་བློན་མཆོག་དང་དྲུང་ཆེ་རྣམ་གཉིས་ས་གནས་ལ་ཡོང་སྟེ། བསྟན་འཛིན་སྒང་དུ་ཚོགས་འདུ་ཚོགས་སོང་། སྐབས་དེར་བཀྲ་ཤིས་ནོར་བུ་དང་བསྟན་འཛིན་རིག་བཟང་གཉིས་སྐད་བཏང་ཡོད་པ་རེད། ཉིན་དེར་ངས་གནས་ཚུལ་འདིའི་སྐོར་ཆ་ཚང་སྙན་སེང་ཞུས་པ་ཡིན། ཚེས་ ༡༨ ཉིན་འབུམ་སྡེ་ལར་ཁེ་ན་ཌར་འགྲོ་ཕྱོགས་སྐོར་གྱི་ཚོགས་འདུ་གྲུབ་རྗེས། བཀྲ་ཤིས་ནོར་བུ་མི་མང་ནང་ཡར་ལངས་ཏེ་ཁོང་གིས་ད་ལྟའི་བར་ས་གནས་སུ་ལས་ཀ་ཡག་པོ་བྱས་ཡོད་ཚུལ་དང་། མི་ལ་ནོར་འཁྲུལ་ཏོག་ཙམ་ཡོང་སྲིད་སྟབས། དགོངས་དག་ཞུས་པ་ཡིན་ཞེས་བཤད་བྱུང་། སྐབས་དེར་བཀའ་བློན་མཆོག་གིས། བཀྲ་ཤིས་ནོར་བུ་ཁྱེད་རང་ངོ་ཚ་རྒྱུ་མི་འདུག ཁྱོད་རང་གིས་བྱ་སྤྱོད་དེ་ནོར་བ་ཙམ་མ་རེད། བྱེད་སྟངས་དེ་ཇག་པ་དང་གཅིག་པ་རེད་ཅེས་གསུངས་སོང་། ཉིན་དེར་ང་དང་བཟང་པོ་གཉིས་ཀྱིས་སྙན་ཞུ་ཕུལ་ཏེ། ཐེངས་འདིར་སྤྱི་རྒྱུ་སྒེར་ཟ་བྱས་པའི་དཔང་རྟགས་ཆ་ཚང་རག་ཡོད་པ་རེད། ད་དུང་ཁུངས་སྐྱེལ་མེད་པའི་ལས་ཀ་ག་ཚོད་བྱས་ཡོད་མེད་ང་ཚོས་བཤད་ཐུབ་ཀྱི་མེད་སྟབས། ཐེངས་འདིར་ཁོང་གཉིས་ལས་གནས་ནས་ཕྱིར་འཕུད་གཏོང་དགོས་པའི་རེ་སྐུལ་ཞུས་ཡོད། ཡིན་ནའང་། བློ་ཕམ་ཆེ་ཤོས་ནང་སྲིད་ལས་ཁུངས་ཀྱིས་བཀྲ་ཤིས་ནོར་བུ་ས་གནས་ནས་གནས་སྤོར་གྱིས་ནང་སྲིད་ལས་ཁུངས་ནང་མུ་མཐུད་ལས་ཀ་བྱས་བཅུག་འདུག བསྟན་འཛིན་རིག་བཟང་ཡང་གནས་ཚུལ་གང་ཡང་མ་བྱུང་མདོག་མདོག་གིས་ལས་གནས་ཐོག་རང་འཇགས་བསྡད་ཡོད་པ་རེད། ང་ཚོའི་ངོས་ནས་ད་ལྟའི་བར་བོད་མིའི་སྒྲིག་འཛུགས་ལ་འབྲེལ་བ་བྱས་ཏེ་གནས་ཚུལ་ཆ་ཚང་ཞུས་ཡོད། གལ་སྲིད་ཁོ་རང་གཉིས་འདི་ལྟར་འཇོག་རྒྱུ་ཡིན་ན། ཐེངས་འདིའི་དངུལ་དེ་རྒྱ་གར་གཞུང་གི་དངུལ་ཡིན་སྟབས། ང་ཚོའི་རྒྱ་གར་གཞུང་གི་ཆེས་མཐོའི་ཁྲིམས་ཁང་ལ་བསྐྱལ་རྒྱུ་ཡིན། ཞེས་བརྗོད་བྱུང་

ཕྱི་ཚེས་ ༧ ཉིན་གྱི་ཕྱི་དྲོར་གསར་འགོད་པས་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་རྒྱལ་ལཊ་སུ་ཐེངས་འདིའི་གནས་ཚུལ་ཐད་བཅར་འདྲི་བྱས་པར་ཁོང་གིས། འབུམ་སྡེ་ལར་བྱུང་བའི་གནས་ཚུལ་དེ་དངོས་ཡོད་རེད། བྱུང་རིམ་གྱི་ཐད་ནས་དེ་སྔོན་ནས་བཟུང་རྒྱ་གར་དབུས་སྤྱི་ཚོགས་བདེ་དོན་ལྷན་ཁང་(Center Social Welfare Board) བརྒྱུད་ལོ་ལྟར་ས་གནས་ཀྱི་རང་ལོ་ ༥ མན་གྱི་བྱིས་པ་ཚོར་ཟས་བཅུད་མཁོ་སྤྲོད་ཆེད། ལོ་ལྟར་དངུལ་ཏོག་ཙམ་ཞིག་གསོལ་རས་གནང་གི་ཡོད་པ་རེད། བར་ལམ་བསྟན་འཛིན་སྒང་མཉམ་འབྲེལ་དེབ་སྐྱེལ་ཡོད་པའི་ཚོགས་པ་ཡིན་སྟབས། ༢༠༠༢ ལོ་ཡས་མས་ནས་བཟུང་ལོ་ལྟར་ཧིན་སྒོར་འབུམ་ ༢ ཡས་མས་འབྱོར་གྱི་ཡོད་པ་རེད། ༢༠༠༤ ལོ་ཡས་མས་སུ་རྒྱ་གར་གཞུང་གིས་མཉམ་འབྲེལ་གྱི་དེབ་སྐྱེལ་དེ་ཚོང་ལས་ཀྱི་རྣམ་པ་འདུག ཁོང་ཚོའི་དངུལ་དེ་མི་མང་གི་བདེ་སྡུག་ཆེད་སྤྲོད་ཀྱི་ཡོད་སྟབས། ཚོང་དང་འབྲེལ་བའི་ཚོགས་པར་སྤྲད་ན་ཏག་ཏག་བསྡད་ཀྱི་མི་འདུག་ཅེས་བཀའ་གནང་འདུག དངོས་ནས་བྱས་ན་གནས་སྟངས་དེར་ས་གནས་མཉམ་འབྲེལ་དང་མཉམ་འབྲེལ་འགན་འཛིན་ལྷན་ཚོགས། ས་གནས་མགོ་འཛིན་བཅས་ཀྱིས་གྲོས་བསྡུར་བྱས་ཏེ། ཚོགས་པ་གསར་བ་དེབ་སྐྱེལ་ཇི་ལྟར་བྱེད་མིན་ཐོག ཁྲིམས་ཀྱི་འགྲོ་ལུགས་དང་མཐུན་པ་ཞིག་བཟོ་དགོས་ཀྱི་ཡོད་པ་རེད། འབུམ་སྡེ་ལར་ལས་ཀ་བྱེད་མཁན་བཀྲ་ཤིས་ནོར་བུ་ལ་མཚོན་ན་ས་གནས་ཀྱི་ལས་དྲུང་རེད། ལས་ཀ་བྱས་ཏེ་ལོ་གང་འཚམ་སོང་ཡོད་པ་མ་ཟད། ལས་བྱེད་རྩེ་ཕུད་ཀྱི་རྟགས་མ་རག་མྱོང་བའི་མི་ཞིག་ཆགས་ཡོད། ཁོང་གིས་བསྟན་འཛིན་སྒང་མཉམ་འབྲེལ་འགན་འཛིན་ལྷན་ཚོགས་ཀྱི་འགྲོ་སྟངས་གསལ་བོ་ཤེས་ཀྱི་མེད་སྟབས། ཁོང་ལ་རོགས་པ་གནང་རོགས་ཞེས་བཤད་འདུག  སྐབས་དེ་དག་ཏུ་ཁོས་གཞུང་ཞབས་ཞིག་ཡིན་པའི་ཆ་ནས་གཞུང་གི་སྒྲིག་འཛུཊ་ཀྱི་འགྲོ་སྟངས་དང་། ལས་བྱེད་ཀྱི་སྒྲིག་གཞི་གཞིར་བཟུང་ཆོག་དང་མི་ཆོག་མང་པོ་ཡོད་ཀྱང་། ངས་བྱས་ཆོག་གི་རེད་དམ་མ་རེད་ཅེས་ལས་ཁུངས་ལ་བཀའ་འདྲི་སོགས་རྩ་བ་ནས་མ་ཞུས་པར། སྔོན་མ་བོད་རིགས་མཉམ་འབྲེལ་མཐུན་ཚོགས་ (Multipurpose Tibetan Cooperative Society) ཀྱི་མིང་དེ་ཡོང་གི་མེད་སྟབས། བོད་རིགས་བདེ་དོན་ཚོགས་པ་ (Multipurpose Tibetan Welfare Society) ཞེས་པ་ཞིག་དེབ་སྐྱེལ་བྱས་ན་ཡག་པོ་ཡོད་པ་རེད་ཅེས་རྒྱ་གར་གཞུང་གི་ལས་བྱེད་ཚོས་ལམ་སྟོན་བྱས་ཡོང་སྐབས། བསྟན་འཛིན་སྒང་གི་མཉམ་འབྲེལ་དྲུང་ཆེ་དང་འགན་འཛིན་ལྷན་ཚོགས་ཀྱི་ཚོགས་མི་ཁག་ཅིག་གིས་ཁོང་ལ་རེ་སྐུལ་ཞུས་འདུག ལས་ཀ་དེའི་རིགས་ཁྲིམས་སྒྲིག་དང་འགྲོ་ལུགས་ལ་མཐུན་དགོས་པ་རེད། སྔོན་ལ་འགན་འཛིན་ལྷན་ཚོགས་ཀྱིས་རྒྱ་གར་གཞུང་ལ་སྙན་སེང་དང་ཚོགས་པ་དེབ་སྐྱེལ་དགོས་པའི་རྒྱུ་མཚན་ཐད་འགན་འཛིན་ལྷན་ཚོགས་རང་གིས་གྲོས་ཆོད་འཇོག་དགོས་པ་ཞིག་ཆགས་ཡོད། ཡིན་ནའང་གྲོས་ཆོད་དེར་འགན་འཛིན་ལྷན་ཚོགས་ཀྱི་མི་མེད་པར་ཁོང་ཚོ་རང་གིས་འགན་འཛིན་ལྷན་ཚོགས་ཀྱི་མིང་ཐོག་ནས་ཡི་གེ་བཟོས། མཚན་རྟགས་རྫུན་མ་བརྒྱབ་འདུག བྱེད་སྟངས་དེ་ཁྲིམས་སྒྲིག་གཞི་དང་མ་མཐུན་པ། རྒྱ་གར་གྱི་ཡུལ་ཁྲིམས་དང་འགལ་བ། བོད་གཞུང་དང་༸སྐྱབས་མགོན་རིན་པོ་ཆེར་མཚན་ཤས་འགྲོ་བའི་ལས་ཀ་ཐབས་རྡུགས་ཤིག་བྱུང་བ་རེད། ཚོགས་པ་གསར་བ་དེབ་སྐྱེལ་བྱས་ཚར་རྗེས་ལོ་གཅིག་དང་གཉིས་རིང་དངུལ་མུ་མཐུད་བསླེབས་འདུག དངུལ་བསླེབས་རྗེས་མཉམ་འབྲེལ་གྱི་རྩིས་ཁོངས་ནང་དང་། འགྲོ་སོང་གཏོང་དགོས་པའི་རིགས་དེ་འགན་འཛིན་ལྷན་ཚོགས་ལ་བཀའ་འཁྲོལ་བཅས་ལམ་ལུགས་ཀྱི་འགྲོ་སྟངས་ལྟར་མ་བྱས་པར། དངུལ་རག་པ་དེ་ཁོ་རང་གཉིས་ཀྱི་མིང་ཐོག་ཏུ་རྩིས་འགོད་དང་དངུལ་བཅུག་རྗེས་འགྲོ་སོང་དེ་ལས་གཏོང་རྐྱང་བྱས་འདུག འགྲོ་སོང་དེ་གཞུང་གི་འགྲོ་སོང་ཡིན་མིན་ཁ་གསལ་གང་ཡང་མི་འདུག ཧིན་སྒོར་ཁྲི་ ༧ དང་ ༨ ཞིག་གིས་ལག་ཁྱེར་གློག་ཀླད་དང་ཁ་པར་ཉོས་པ་དེ་འདྲ་འདུག དེའི་རིགས་ང་ཚོས་ཞིབ་འཇུག་བྱས་ཏེ་མཉམ་འབྲེལ་ནང་ཕྱིར་སློག་བྱེད་དགོས་པ་རེད་ཅེས་ཞུས་ཡོད། མཉམ་འབྲེལ་གྱི་རྒྱུ་ཅ་ལག་ཚང་མ་རྩིས་ཁྲའི་ལམ་ནས་བཏོན་ཡོང་གི་རེད། དངུལ་འཇལ་དགོས་པའི་རིགས་ཆ་ཚང་མཉམ་དྲུང་རང་གི་མིང་ཐོག་ཏུ་དངུལ་འཛིན་(cheque) ཞུས་ཡོད། ཅེས་གསུངས་བྱུང་

མཇུག་ཏུ་དྲུང་ཆེ་ལགས་སུ་ཁོང་གཉིས་ལས་ནག་ཉེས་གཙོ་བོ་སུ་ལ་ཡོད་མེད་དྲིས་པར། ཁོང་གིས། བཀྲ་ཤིས་ནོར་བུའི་སྐྱོན་ཆ་གང་རེད་ཅེ་ན། ལས་ཀ་བྱེད་མཁན་མཉམ་འབྲེལ་དྲུང་ཆེ་རེད། ཁོ་དང་མཉམ་དུ་རྩིས་ཁོངས་བྱས་པ་དང་ཡིག་ཆ་བཟོས་པ། དངུལ་ཆ་ཚང་བེད་སྤྱོད་བཏང་རྗེས་རྒྱ་གར་གྱི་སེ་ཨེ་ (CA) རྩིས་ཞིབ་ལ་དངུལ་བེད་སྤྱོད་བཏང་བའི་རྩིས་ཁྲ་གཏོང་དགོས་ཀྱང་། རྩིས་ཁྲ་དངུལ་སྤྲད་དེ་བཟོ་བཅུག་པ་སོཊ་འགལ་འཛོལ་ཆེན་པོ་བྱུང་བ་རེད། བར་ལམ་ང་ཚོ་ལས་གཞི་གཞན་ཞིག་གི་ཆེད་ས་གནས་སུ་ཕྱིན་པ་དང་མཉམ་དུ་ཞིབ་འཇུག་བྱེད་སྐབས། རྩིས་ཞིབ་སྙན་ཐོའི་ནང་གསལ་བསྡད་འདུག སྐབས་དེར་ང་ཚོས་དོ་བདག་གཉིས་ཚུར་སྐད་བཏང་སྟེ་གསལ་བཤད་ཀྱི་གོ་སྐབས་ཆ་ཚང་སྤྲད་རྗེས་གསལ་བོ་ཆགས་པ་རེད། གནས་ཚུལ་དེའི་ཐོག་གཞུང་གིས་བཀའ་ཆད་ག་རེ་བཏང་བ་ངོས་ལེན་ཞུ་རྒྱུ་ཡིན་ཞེས་ཁས་ལེན་ཞུས་སོང་། དེའི་རྗེས་ང་ཚོས་ཞིབ་འཇུག་བྱས་པའི་གནས་སྟངས་བཀའ་ཤག་ལ་ཞུས་པ་ལྟར། བཀའ་ཤག་གིས་ང་ཚོའི་ཞིབ་འཇུག་སྙན་ཐོ་དང་བཀའ་ཤག་གི་ཕྱག་བྲིས་འདེམས་བསྐོ་ལྷན་ཁང་ལ་བཏང་སྟེ། ལས་དྲུང་བཀྲ་ཤིས་ནོར་བུ་གནས་ཚུལ་ཐག་གཅོད་མ་བྱུང་བར་ལས་ཀ་མཚམས་འཇོག་གིས་ཞོགས་པ་ཆུ་ཚོད་ ༩ པར་འབྱོར་ཐོ་དང་། དགོང་དྲོའི་ཆུ་ཚོད་ ༥ བར་ཐོན་ཐོ་འགོད་ཀྱི་ཡོད་པ་རེད། ཁོང་ནང་སྲིད་ལས་ཁུངས་ལ་གནས་སྤོར་གྱིས་གནས་རིམ་གཅིག་མར་ཕབ་པ་མ་ཟད། ཕབ་ཟིན་པའི་གནས་རིམ་དེའི་གྲལ་མཐར་འཇོག་རྒྱུ་དང་། ཧིན་སྒོར་ ༢༥༠༠༠ གི་ཉེས་ཆད་བཏང་ཡོད། བསྟན་འཛིན་རིག་བཟང་མི་མང་གིས་བདམས་པའི་མཉམ་འབྲེལ་དྲུང་ཆེ་ཆགས་ཡོད་སྟབས། ཁོ་རང་ལ་ང་ཚོས་ཧིན་སྒོར་ ༥༠༠༠༠ ཉེས་པ་བཏང་ཡོད། མུ་མཐུད་མཉམ་འབྲེལ་དྲུང་ཆེར་འཇོག་མིན་མཉམ་འབྲེལ་རང་གིས་ཐག་གཅོད་བྱ་དགོས་ཞེས་ང་ཚོར་བཅད་ཁྲ་བཏང་བ་དེ་མཉམ་འབྲེལ་ཚོགས་གཙོར་བཏང་ཡོད། ཉེ་ཆར་ཚོགས་གཙོས་མི་གཉིས་ས་གནས་སུ་ཁོང་ལ་ཞིབ་འཇུག་བྱེད་དུ་བཏང་འདུག མཐའ་མར་སྤྱི་མཐུན་མཉམ་འབྲེལ་དྲུང་ཆེར་འཇོག་མིན་གྱི་འགན་དབང་ཆ་ཚང་ཁོང་ཚོར་སྤྲད། ཧིན་སྒོར་ཁྲི་ ༥ ཉེས་ཆད་དེ་མཉམ་འབྲེལ་གྱི་རྩིས་ཁོངས་སུ་འཇོག་དགོས་པའི་ལམ་སྟོན་གནང་ཡོད། ཅེས་བརྗོད་བྱུང་ 

གསར་འགོད་པ། དོན་གོ

ཤོག་ངོས་འདི་ཐེངས་ ༤༩༠༤ ལ་བཀླགས་འདུག
རིག་པ་འདོན་པ།
ནོར།
༢༠༡༣/༠༦/༡༥ ཉིན་འདོན་སྤེལ་བྱས།
དུང་གསལ་འདེབས་བྱེད་རྒྱུ་ཞིག་ལ། གོ་ཐོས་ལྟར་ན་མཉམ་འབྲེལ་དྲུང་ཆེ་བསྟན་འཛིན་རིག་བཟང་ནི། དེ་སྔོན་བསྟན་འཛིན་སྒང་དུ་བུད་མེད་ཅིག་གི་སྐྲ་བྲེགས་ལུས་གཤེར་བུར་ཕུད་མཁན་དེ་སྡེ་བའི་སྲམ་མདོར་ཁྲིད་དེ་མི་སྤྱོད་ལས་འདས་པའི་མནར་གཅོད་གཏོང་མཁན་གྱི་ཨ་ཅག་སྨྱོན་པ་མ་དེའི་མང་པོ(སྤུན་རྒྱ་པུ)་ཆུང་བ་དེ་རེད་འདུག ཁྱིམ་ཚང་འདི་བ་ཚང་ནི་རྒྱུད་བཙོག་སྤྱོད་ངན་ལྟོས་ངན་ཏག་ཏག་ཡིན་ས་རེད།
ཀརྨ་རྡོ་རྗེ།
༢༠༡༣/༠༦/༡༤ ཉིན་འདོན་སྤེལ་བྱས།
བོད་མིའི་སྒྲིག་འཛུགས་ལས་བྱེད་ཅིག་གིས། སྒོར་འབུམ་གཅིག་༼སྒོར་༡༠༠ ༠༠༠༽ལྐོག་ས་བྱས་པ་དང་། རྒྱ་གཞུང་གི་ལས་བྱེད་ཅིག་གིས་༼སྒོར་༡༠༠༠ ༠༠༠༽སྒོར་ས་ཡ་ཅིག་སྒེར་བྱས་གཉིས་གཅིག་པ་ཆགས་འགྲོ་བ་ལྟ་བུ་མིན་ནམ། ད་གཟབ་གཟབ་གྱིས། ལས་བྱེད་གཡོག་པོ་ཚོས།
ད་དུང་སྐོག་ཟ་རུལ་སུངས་མང་པོ་ལྐོག་ཏུ་སྦས་ཡོད་པ་འགའ་ཤས་ངས་ཀྱང་ཤེས་བགྱིད་ཡོད། ཁྱེད་རྐུ་མཁན་ཚོ་ངོ་མི་ཚ་ཡང་། ང་ཤོད་མཁན་ཡང་ངོ་ཚ་བགྱིད་འདུག་པས། ད་དེ་རིང་དེ་ཙམ་གྱིས་འཐུས་པར་བྱས་སོ།།
ཀརྨ་རྡོ་རྗེ།
༢༠༡༣/༠༦/༡༤ ཉིན་འདོན་སྤེལ་བྱས།
རྐུན་མ་འདི་གཉིས་ད་དུང་གཞུང་ཞབས་སུ་བཞག་པ་ནི་བློ་ཕམ་སྐྱེ་དགོས་པ་ཞིག་རེད། ་ཟེར།
མཉམ་ཞུགས
༢༠༡༣/༠༦/༡༤ ཉིན་འདོན་སྤེལ་བྱས།
ནང་སྲིད་བཀའ་བློན་གྱིས་“ བཀྲ་ཤིས་ནོར་བུ་ཁྱེད་རང་ངོ་ཚ་རྒྱུ་མི་འདུག ཁྱོད་རང་གིས་བྱ་སྤྱོད་དེ་ནོར་བ་ཙམ་མ་རེད། བྱེད་སྟངས་དེ་ཇག་པ་དང་གཅིག་པ་རེད་ཅེས་གསུངས་སོང་།”ཞེས་གསུངས་པ་དང་། ཡང་ནང་སྲིད་དྲུང་ཆེ་མཆོག་གིས་ “བྱེད་སྟངས་དེ་ཁྲིམས་སྒྲིག་གཞི་དང་མ་མཐུན་པ། རྒྱ་གར་གྱི་ཡུལ་ཁྲིམས་དང་འགལ་བ། བོད་གཞུང་དང་༸སྐྱབས་མགོན་རིན་པོ་ཆེར་མཚན་ཤས་འགྲོ་བའི་ལས་ཀ་ཐབས་རྡུགས་ཤིག་བྱུང་བ་རེད། ”ཞེས་གསུངས་པ་རྣམས་ཁ་ཞེ་མེད་ཀྱི་ཐོག་ནས་གསུངས་པ་ཞིག་ཁྱོན་ནས་མ་རེད་བསམ་གྱི་འདུག གལ་ཏེ་ཁ་ཞེ་མེད་ཡིན་པ་ཡིན་ན། ནང་སྲིད་བཀའ་བློན་དང་དྲུང་ཆེ་གཉིས་ནས་ག་རེ་བྱས་ནས་ཇག་པ་ངོ་ཚ་མེད་མཁན་དང་། རྒྱ་གར་གྱི་ཁྲིམས་འགལ་བ། བོད་གཞུང་གི་ཞབས་འདྲེན་པ། སྐྱབས་མགོན་རིན་པོ་ཆེ་ལ་མཚན་ཤས་བྱེད་མཁན་མུ་མཐུད་ནས་ནང་སྲིད་ཀྱི་གཞུང་ཞབས་པའི་གོ་སྐབས་སྤྲོད་དོན་ཅི་ཡིན།
འདི་ལྟར་བྱས་པ་ཡིན་ན་ང་ཚོའི་བཙན་བྱོལ་སྒྲིགས་འཛུགས་འདི་བཞིན་ཇག་པ་དང་ཁྲེལ་མེད་ལ་གོ་སྐབས་སྤྲོད་པའི་གཞུང་ཞིག་དང་། ཁྲིམས་འགལ་བ་དང་།བོད་གཞུང་གི་ཞབས་འདྲེན་པ།གོང་༸ས་མཆོག་ལ་མཚན་ཤས་བྱེད་མཁན་རྣམས་སྲུང་སྐྱོབས་བྱེད་པའི་གཞུང་ཞིག་ཆགས་པ་མ་ཡིན་ནམ།བོད་ནང་དུ་རང་གི་གཅེས་པའི་ལུས་སྲོག་ཡོངས་རྫོགས་ཕོངས་མེད་དུ་བཏང་དང་གཏོང་བཞིན་པའི་དཔའ་བོ་དཔའ་མོ་རྣམས་ཀྱི་རྣམ་ཤེས་དང་འཚོ་བཞུགས་དཔའ་པོ་དཔའ་མོ་རྣམས་ཀྱི་གོ་ཚེ་ཧ་ཅང་ཡིད་ཕངས་པ་སྐྱུགས་སྤྲོ་བའི་ལས་ཞིག་མ་རེད་དམ། དེ་འདྲའི་ཐག་གཅོད་དེ་དངོས་གནས་ཡ་མཚན་རེད། དོགས་པ་ཆེན་པོ་འདུག དོགས་པ་མ་ཟ་རང་ཟ་རེད།
ནོར།
༢༠༡༣/༠༦/༡༣ ཉིན་འདོན་སྤེལ་བྱས།
ད་ནི་ཅི་བྱ། བོད་མི་མང་གིས་བདམས་པའི་སྤྱི་འཐུས་ནང་དུའང་རྐུན་མ་ཡོད་པ་རེད། རྐུས་བྱེད་ཞོར་ད་དུང་ལག་པ་ཐལ་མོ་སྦྱར་ཏེ་རྒྱལ་བ་རིན་པོ་ཆེ་ཡི་བཀའ་དགོངས་སྒྲུབ་རྒྱུ་ཡིན་ཞེས་བོད་ཀྱི་དྲ་བརྙན་བརྒྱུད་དེ་མི་མང་ལ་ཟློས་གར་འཁྲབ་བསྡད་ཡོད་རེད།
གཞུང་གིས་བདམས་པའི་གཞུང་ཞབས་ལས་བྱེད་ནང་དུའང་རྐུན་མ་ཡོད་པ་རེད། རྐུས་ལྷིང་ལ་མ་བུད་སྔོན་ལ་ལས་བྱེད་རྩེ་ཕུད་ཀྱི་རྟགས་མ་ཕུལ་བ་རེད། རྐུས་ལྷིང་ལ་བུད་གནས་རིམ་གཅིག་ཕབ་ཏེ་ས་གནས་དབུས་ལ་གདན་འདྲེན་ཞུས་པ་རེད། ད་འགྲོ་སྟངས་ལས་སྟངས་འདི་ག་འདྲ་ཞིག་ཏུ་འགྲོ་གི་ཡོད་མེད་ཀྱང་དངོས་གནས་ཤེས་ཀྱི་མི་འདུག རྐུན་མ་དཔའ་དར་རང་རེད།
ནོར།
༢༠༡༣/༠༦/༡༣ ཉིན་འདོན་སྤེལ་བྱས།
ད་དུང་བཤད་རྒྱུ་ཞིག་ལ། ནང་སྲིད་དྲུང་ཆེ་ཡིས་གསར་ལམ་ཁག་ཏུ་ནམ་རྒྱུན་དོན་དངོས་བག་སྟེ་ཡག་བཤད་རྫུན་བཤད་ཐེངས་གཅིག་མ་ཡིན་པར་ཐེངས་འགར་བཤད་སོང་། དེ་ཁྱོན་ནས་ཡག་པོ་མི་འདུག སྤྱིར་ཡིན་ན་བློ་གཞུང་ལ་དཀར་དགོས་པ་རེད། ཤ་དམངས་ལ་ཚ་དགོས་རེད། དེ་ལྟར་མ་བྱས་པར་ངའི་ངོ་ཤེས། ངའི་གྲོགས་པོ། ངའི་ཤ་ཉེ། ངའི་ཁ་ལ་ཉན་མཁན། སོགས་སུ་ཞེན་ཆགས་དང་ཕྱོགས་སུ་ལྷུང་ན་ལས་རྒྱུ་འབྲས་ལ་རན་གི་མ་རེད། དེང་སྐབས་བོད་མི་མང་ལ་སྔོན་ཆད་ལྟར་མགོ་གཡོགས་ལས་སླ་བོ་ཡོད་པ་མ་རེད། གནས་སྐབས་རིང་འཚེར་སྣང་དབང་གིས་ཅང་མ་བཤད་པར་བསྡད་ཡོད་པ་རེད་མ་གཏོགས། སེམས་ནས་རྫུན་བཤད་ཀྱིན་ཡོད་མེད་སྣོག་རྒྱག་གི་ཡོད་མེད་གསལ་བོ་ཤེས་ཀྱི་ཡོད་པ་རེད། དེ་ཐུགས་ལ་འཛིན་རོགས་ཞུ།
ནོར།
༢༠༡༣/༠༦/༡༣ ཉིན་འདོན་སྤེལ་བྱས།
ངས་ནི་འདི་ལྟར་འཆར་སྣང་སྒོམ་གྱིན་ཡོད། ལས་དྲུང་ནོར་བུ་ཚེ་རིང་གིས་ལས་དྲུང་ཆུང་ཆུང་ཞིག་ནས་བྱིས་པ་ཆུང་ཆུང་ཚོའི་མགྲིན་པ་བགག་ཏེ་ཧིན་སྒོར་འབུམ་ཟས་སོང་། ལས་རིམ་གཅིག་མར་ཕབ་ཀྱང་རྗེས་མ་ག་ལེར་ཁེན་ས་དག་ལ་ཁེན་འཐེན་མཁན་དག་གིས་འཐེན་ནས་རིམ་པས་ཡར་འཛེགས་རྒྱུ་ནི་ཆོས་ཉིད། མ་འོངས་པར་ལོ་༡༥ རྗེས་སུ་ཁོ་ཧ་ལམ་ད་ལྟའི་ནང་སྲིད་དྲུང་ཆེའི་རྐུབ་སྟེགས་སུ་བསྡོད་ཐུབ་ངེས། ཁོས་འབུམ་ཉིས་བརྒྱ་ཟ་མི་ཐུབ་རུང་འབུམ་ཉི་ཤུ་ཟ་ཐག་ཆོད་ཡིན། བྱིས་པ་ཆུང་ཆུང་མགྲིན་པ་སྒོག་ཐུབ་མཁན་ཞིག་གིས་མི་མང་དཀྱུས་མའི་མགོ་རྡུང་རྒྱུར་འཚེར་སྣང་སྐྱེས་མི་སྲིད་པ་ནི་ཟུར་བལྟས་ལེབ་མཐོང་རེད། དེ་དུས་ཁོའི་རྐང་པ་གཉིས་དྲུང་ཆེ་ཆུང་གི་པང་ལ་བཙུགས་ཡོད་ངེས། ཁོའི་ལག་པ་གཉིས་བཀའ་ཤག་ལྷན་རྒྱས་ཀྱི་ཕྲག་པར་ཁེན་ཡོད་སྲིད། དེ་དུས་ཁོས་ཇི་ལྟར་ཟས་ཀྱང་ཁོ་ལ་སྐུ་ངོ་ཞེས་པའི་མཚད་བསྟོད་ཅིག་ལས་རྐུན་མ་ཞེས་པའི་ཁྲིམས་ཆད་ཅིག་ཡོང་ཐབས་ག་ལ་ཡོད། དེར་མ་ཟད། སྐབས་དེར་ཁོས་རང་ཉིད་ཀྱི་མཐུ་འོག་གི་ལས་དྲུང་ཆུང་ཆུང་གི་རྐུས་རྒྱབ་ལག་པས་སྐྱོར་དེ་རིང་ཁོ་རང་ཉིད་སུ་ཞིག་གིས་སྐྱོར་གྱིན་པ་དེ་ལས་ཀྱང་ལྡབ་འགྱུར་གྱིས་ཡག་ཐག་ཆོད་ཅིག་སྐྱོར་ངོས་ཡིན། འདི་ལྟར་འཁོར་གསུམ་སྐོར་བའི་མཐའ་མར། གྱོང་སུ་ལ་རག་རྒྱུ་ཡིན་ནམ། གཞུང་ག་འདྲ་ཆགས་རྒྱུ་ཡིན་ནམ།
ཉེར་གཅིག་པའི་ཅོང་བརྡ།
༢༠༡༣/༠༦/༡༣ ཉིན་འདོན་སྤེལ་བྱས།
རྐུན་མ་འདི་གཉིས་ད་དུང་གཞུང་ཞབས་སུ་བཞག་པ་ནི་བློ་ཕམ་སྐྱེ་དགོས་པ་ཞིག་རེད།
བཙན་བྱོལ་ཁྲིམས་ཞིབ་ཁང་དེ་སྒོ་རྒྱབ་ན་ཡག་པོ་རེད། གང་ལ་ཟེར་ན། ཁྲིམས་ཞིབ་ཁང་གིས་ལྐོག་ཟ་རུལ་སོང་ལ་ཉེས་ཆད་གཅོད་མི་ཐུབ་ན། ཁྲིམས་ཞིབ་ཁང་གི་ག་རེ་ཕན་ཐོགས་གི་རེད། ཁྲིམས་ཞིབ་ཁང་དང་སྒྲིག་འཛུགས། ལྐུག་ཟ་རུལ་སོང་རྣམས་བར་འབྲེལ་བ་ཡག་པོ་ཡོད་པའི་རྟགས་མངོན་འདུག། བཙན་བྱོལ་གཞུང་ནང་སྔོན་མ་ནས་ད་ལྟ་བར་ལྐོག་ཟ་རུལ་སོང་རྒྱུན་ཆད་མ་མྱོང་། རྗེས་ཕྱོགས་ཀྱང་རྒྱུན་ཆད་གི་མ་རེད།
nyimowa
༢༠༡༣/༠༦/༡༣ ཉིན་འདོན་སྤེལ་བྱས།
དེ་ལྟ་བུའི་གནས་ཚུལ་མང་པོ་ཡོད་པ་ཤེས་གསལ་རེད། གང་ཡིན་ཟེར་ན་རང་ཉིད་ལ་གླ་ཕོག་མང་ཉུང་ག་འདྲ་ཡོད་མེད་ཚང་མས་མཁྱེན་གསལ་བཞིན་ང་ཚོ་བོད་པའི་མཐོ་རིམ་དཔོན་པོ་ཚོའི་རྒྱུ་དངོས་ཁང་ཁྱིམ་དེ་རྣམས་ལ་གཟིགས་ན་<ལམ་སང་མཁྱེན་ཐུབ། ལྐོག་ཟ་གནང་མཁས་བ་དང་མ་མཁས་བ་སོགས་མང་པོ་ཡོད། ད་དུང་དགོན་པའི་ནང་དུ་ལྐོག་ཟ་གནང་མཁན་དེ་ཚོ་ནི་ཆེད་མཁས་པའི་ནང་གི་མཁས་པ་རེད།
སྐར་ཁྲི་བཙན།
༢༠༡༣/༠༦/༡༣ ཉིན་འདོན་སྤེལ་བྱས།
ངས་ལྟས་ན་འདི་གཅིག་པོའི་ཚད་རྒྱུ་མ་རེད། ད་དུང་འདི་ལྟ་བའི་ལྟས་ངན་མང་རྒྱུ་རེད་ཡ།
ཀརྨ་རྡོ་རྗེ།
༢༠༡༣/༠༦/༡༣ ཉིན་འདོན་སྤེལ་བྱས།
གསལ་ལེ་རྒྱལ།
༢༠༡༣/༠༦/༡༢ ཉིན་འདོན་སྤེལ་བྱས།
རྣམ་པ་གཉིས་ཀའི་སྐུ་པར་ལ་མཇལ་རྒྱུ་བྱུང་ན་ཅི་མ་རུང་། དད་པ་སྐྱེས་ཀི་ཡ། རིག་གཞུང་རྒྱུད་འཛིན་པ་རེད། ་ཟེར།
མྱི་རྐྱང་སྨྱོན་པ།
༢༠༡༣/༠༦/༡༣ ཉིན་འདོན་སྤེལ་བྱས།
གནས་ཚུལ་འདི་རིགས་སྤྱིར་བཏང་རྒྱུན་ལྡན་ལྟ་བུ་ཞིག་ཏུ་མཐོང་མོད། ཤེས་བཞིན་འདི་གར་རང་དགར་ཉེས་ཆད་བག་ཙམ་གྱིས་འཐུས་པར་བྱས་ཏེ་རང་སོར་བཞག་པ་ནི་བྱེད་སྟངས་མ་ཤེས་པའི་བཟོ་ཞིག་འདུག
བྱེད་སྟངས་འདིའི་ཐོག་ནས་ངའི་རྒྱ་ནག་གི་གློག་བརྙན་འདེད་འཛིན་ཞེས་པ་ཞིག་དྲན་ཡོང་གིན་འདུག གསང་བ་འདིའི་རྒྱབ་ལོགས་སུ་འདི་ལས་ཀྱང་འཇིགས་རུང་གི་རྣམ་པ་ཞིག་མེད་དམ་སྙམ་ན་ཞེད་ནི་ཞིག་རེད།
མི་འདི་རིགས་ངན་པ་རྒྱ་ཡན་དུ་བཏང་ན་གཞུག་ཕྱོགས་འདི་ལས་ཡ་མཚན་པ་མང་དག་ཅིག་མཐོང་ངེས་སོ།།
ལས་ཀྱི་སྣེ་མོ་བར་གཏོགས་པའི་སྐུ་ཞབས་རྣམ་པ། འུ་ཅག་གི་ཚོགས་སྤྱི་ཆུང་ཆུང་འདིའི་ནང་ལའང་བཤིགས་མི་སྤོབས་པའི་གསང་བ་མང་དག་ཅིག་བདོག་པ་འུ་རེད།
སེམས་དཀར།
༢༠༡༣/༠༦/༡༢ ཉིན་འདོན་སྤེལ་བྱས།
ངས་བསམ་ན།   གནད་དོན་འདིའི་རྒྱབ་ལོག་ན་ད་དུང་འགུལ་མི་ཉན་པའི་གསང་བ་མང་པོ་ཞིག་ཡོད་པའི་རྟགས་རེད།   གལ་ཏེ་མེད་ན།   བློ་སེང་གིས།   ཉེས་ཅན་པ་དེ་གཉིས་མུ་མཐུད་དུ་གཞུང་གི་ལས་ཀ་ལས་བཅུག་དོན་ཡོད་མ་རེད།   འདི་གནད་དོན་ཆེན་པོ་ཞིག་རེད།   
གལ་ཏེ་ཉེས་ཅན་པ་དེ་གཉིས་ལས་གནས་ནས་ཕྱིར་འབུད་དང་ཉེས་ཆད་ཆེན་པོ་བཅད་པ་ཡིན་ན།   དེའི་རྗེས་སུ་གཉན་པོ་གསང་བ་མང་པོ་ཞིག་དབྱར་དུས་ཀྱི་ཤ་མོ་ལྟར་གཅིག་རྗེས་གཉིས་མཐུད་དུ་བརྡོལ་རྒྱུ་ཡིན་པ་གོར་མ་ཆག
དེར་བརྟེན་ཉེས་ཆད་ཡང་མོ་ཞིག་བཅད་ནས་གཞུང་གི་ལས་ཀ་སོར་བཞག་བྱས་ཡོད་རེད།   ངོ་མ་བློ་ཕམ་གྱི་གནས་རེད།   ང་ཚོ་ད་དུང་འདི་ལྟར་ག་ཚོད་ཅིག་ལ་འགྲོ་རྒྱུ་ཡིན་ནམ།
ཧོར་བུ་ཡེ་ཤེས
༢༠༡༣/༠༦/༡༢ ཉིན་འདོན་སྤེལ་བྱས།
མི་དེ་གཉིས་ཅི་ཡིན་རུང་མི་མང་གི་སྒོར་མོ་ལྐོག་ཟ་བྱས་པ་ཡིན་པའི་སྲིད་སྐྱོང་མཆོག་གིས་ཁོ་གཉིས་མུ་མཐུད་ལས་སྣེ་སུ་བཞག་པ་དེ་ནོར་བ་ཡིན །རྩ་ནས་འཇོག་མི་ཆོག །ཅི་མགྱོགས་སྒོར་མོ་ཐམས་ཅད་ཚུར་ལེན་པ་མ་ཟད །རབ་བྱུང་ན་བཙན་དུ་བཅུག་དགོས་།དེ་མ་བྱུང་ཡང་ལས་སྣེ་ནས་ཕྱི་ལོག་གཏོང་དགོས །ང་ཚོ་བོད་མི་ལ་མི་དེ་འདྲ་རྩ་ནས་དགོས་པ་མེད །མི་དེ་ཚོས་སྒོར་མོའི་དོན་དུ་ཅི་ཡང་བྱ་སྲིད།
Ngawang Norbu
༢༠༡༣/༠༦/༡༢ ཉིན་འདོན་སྤེལ་བྱས།
༄༅། །ལྐོག་ཟ་རུལ་སོང་བྱེད་མཁན་རྒྱ་གར་དཔོན་རིགས་ནང་བློན་ཆེན་ཡིན་ཀྱང་ཁར་ཏུག་བཙོན་ཁང་ནང་བཏང་གི་འདུག་མ་རྟོགས་གནས་སྤོར་གྱི་གཞུང་ལས་ནང་རང་ཅག་འཇོག་གི་མིན་འདུག སོང་ཙང་བོད་གཞུང་ཁྲིམས་ཞིབ་ལྷན་ཁང་ནས་དྲང་ལྡན་ཐོག་ནག་ཉེས་ཆེ་ཆུང་ལ་ཞིགས་པའི་ཁྲིམས་བཅད་ནན་པོ་གནང་དགོས་ངེས་རེད་བསམ་གྱི་འདུག
ཤོག་གྲངས་: [༡] [རྗེས་མ།]
རིག་པ་འདོན་པ།
རིག་པ་འདོན་ན་ངེས་པར་དུ་དེབ་སྐྱེལ་བྱེད་དགོས།
འདི་ལ་བསྣུན་ཏེ་དེབ་སྐྱེལ་བྱེད་རོགས།