དམངས་གཙོའི་གཞི་རྩའི་གྲུབ་ཆ་གལ་ཆེན་ཞིག་ནི་འཇིཊ་ཞུམ་བྲལ་བའི་རང་དབང་ཡིན།

འདོན་སྤེལ། ༢༠༡༣/༠༦/༡༤

ད་ལོའི་དྲུག་བཞིའི་དུས་དྲན་སྐབས་དང་བསྟུན་ཏེཨེ་ཤ་ཡཱ་གཟའ་དེབ་ཀྱིས་ ༡༩༨༩ ལོའི་དྲུག་བཞི་སློབ་མའི་ཡར་ལངས་ལས་འགུལ་གྱི་དབུ་ཁྲིད་གཙོ་བོ་སྐུ་ཞབས་ཝང་ཏན་ལགས་སུ་རྒྱ་ནག་གི་དམངས་གཙོའི་སྐོར་བཅར་འདྲི་བྱས་ཡོད་པ་ཞིག་འདིར་བོད་བསྒྱུར་ཞུས་ཡོད།

སྐུ་ཞབས་ཝང་ཏན་ལགས་ནི་རྒྱ་ནག་དམངས་གཙོའི་ལས་འགུལ་གྱི་མི་སྣ་གཙོ་གྲས་དང་དྲུག་བཞི་སློབ་མའི་ཡར་ལངས་ལས་འགུལ་གྱི་དབུ་འཁྲིད་མཁན་ཡིན། དྲུག་བཞིའི་ཡར་སྔོན་དུའང་ཁོང་གིས་ཧུའུ་ཡའོ་པང་ལ་མྱ་ངན་གྱི་ལས་འགུལ་རྩ་འཛུགས་དང་དམངས་གཙོར་རྒྱབ་སྐྱོར་གྱི་རྩོམ་ཡིག་སོགས་སྤེལ་ཏེ།  རྒྱ་ནག་གི་དམངས་གཙོའི་ལས་འགུལ་ཐད་ལ་དངོས་ཤུགས་བརྒྱུད་གསུམ་ནས་ནུས་བ་བཏོན་ཡོད་པ་རེད། དྲུག་བཞིའི་རྗེས་སུ་ཁོ་རང་ཐེངས་མང་རྒྱ་གཞུང་གི་འཇུ་བཟུང་བཙོན་འཇུག་འོག་ཚུད་དེ་མནར་གཅོད་མྱངས་ཡོད། རྗེས་སུ་ཨ་རིར་བཙན་བྱོལ་དུ་འབྱོར་རྗེས་ཧཱ་ཝར་ཌི་གཙུག་ལག་སློབ་གྲྭ་ཆེན་མོར་ལོ་རྒྱུས་རིག་པའི་འབུམ་རམས་པ་སློབ་ཐོན་དང་། ཐེ་ཝན་རྒྱལ་གཉེར་ཁྲུན་ཀོང་སློབ་ཆེན་དང་རྒྱལ་གཉེར་ཆིན་ཧྭ་སློབ་ཆེན། ཏུང་ཝུའུ་སློབ་ཆེན་བཅས་སུ་གདན་ཞུའི་དགེ་རྒན་ཆེན་མོའི་ཕྱག་ལས་གནང་མྱོངས་ཡོད་འདུག 

དྲི་བ།  ཧུང་ཀོང་གྲོང་ཁྱེར་རྒྱལ་གཅེས་དམངས་གཙོ་མཉམ་འབྲེལ་ལས་འགུལ་ཚོགས་པས་ད་ལོའི་ཝེ་ཡཱོན་མར་མེ་མཚན་འཛོམས་ཀྱི་བརྗོད་གཞི་ནི་ ཧུང་ཀོང་སྙིང་སྟོབས། རྒྱལ་གཅེས་དམངས་གཅེས།༽ཞེས་པ་དེ་རེད།  ཁྱེད་རང་གིས་༼རྒྱལ་གཅེས༽ ཞེས་པའི་ཡིག་འབྲུ་དེ་གཉིས་ལ་གོ་བ་ཇི་ལྟར་ལེན་གྱི་ཡོད།

ལན།  རྒྱལ་གཅེས་ཞེས་པ་ལ་གཞི་རྩའི་ནང་དོན་གཉིས་ཡོད།  གཅིག་ནི་མཉམ་ཞུགས་རེད། གལ་སྲིད་ཁྱེད་ལ་དེ་ལྟབུའི་རྒྱལ་ཁབ་ཅིག་ཡོད་ཚེ། ཁྱེད་རང་དེའི་ལས་དོན་ཁྲོད་མཉམ་ཞུགས་བྱེད་དགོས། རང་ཉིད་ཀྱི་རྒྱལ་ཁབ་ཏུ་བརྩིས་ཏེ་སོ་སོའི་བསམ་བློའི་འདུ་ཤེས་ཀྱང་དེའི་ལས་དོན་ཁྲོད་མཉམ་ཞུགས་བྱེད་དགོས། གཞན་གཅིག་ནི་ཐེར་འདོན་རེད། ཁྱེད་རང་དངོས་གནས་རྒྱལ་ཁབ་དེ་ལ་དགའ་བ་ཡིན་ན། ངེས་པར་དུ་སྐྱོན་བརྗོད་ཐེར་འདོད་བྱེད་དགོས། སྐྱོན་ཐེར་འདོན་བྱས་ན་ད་གཟོད་ཡར་རྒྱས་མདུན་སྐྱོད་ཡོད་པ་རེད། དེར་བརྟེན།  དོན་དངོས་ཀྱི་རྒྱལ་གཅེས་པ་ཚང་མ་ནི་སྐྱོན་བརྗོད་ཐེར་འདོན་བྱེད་མཁན་དག་ཡིན།  ལྟ་སྤྱོད་ཡན་གར་བ་བརྗོད་མཁན་དག་ཡིན།  སྲིད་གཞུང་གི་ཕྱོགས་ནས་ལངས་ཏེ་སྐད་ཆ་ཡག་བཤད་རྒྱག་མཁན་ཚང་མ་ནི་དོན་དངོས་ཀྱི་རྒྱལ་གཅེས་བ་མིན།

དྲི་བ། གྱ་བརྒྱད་ལོའི་མི་རབས་ཀྱི་ཚབ་མཚོན་མི་སྣ་ཞིག་ཡིན་པའི་ངོས་ཐད་ནས། ཁྱེད་རང་ཉིད་ཀྱི་རྒྱ་ནག་(ཀྲུང་གོ)རྨི་ལམ་ག་རེ་ཡིན།

ལན།  ཐོག་མར་ང་རང་རྒྱ་ནག་རྨི་ལམ་ཞེས་པའི་ཚིག་དེ་སྤྱོད་རྒྱུར་མོས་མཐུན་མེད། ངས་བསམ་ན་གཞུང་འཛིན་སྐྱོང་བྱེད་མཁན་ཞིག་གི་ངོས་ཐད་ནས་བཤད་ན།  རྒྱ་གཞུང་གུང་བྲན་ཏང་གིས་རྒྱ་ནག་ལ་ལོ་བཅུ་ཕྲག་འགའི་རིང་དབང་སྒྱུར་བྱས་པ་རེད། ད་ལྟ་ད་དུང་རྨི་ལམ་རྨིས་སྡོད་དགོས་ཀྱི་ཡོད་ན།  དེ་ལ་ཅི་ཞིག་གི་ཚོགས་པ་ཟེར་དགོས་པ་རེད།  སྤྱིར་ང་རང་ངོས་ནས་ནམ་རྒྱུན་རྒྱ་ནག་གི་དམིགས་འདུན་ཞེས་བརྗོད་རྒྱུ་ཡིན། ངའི་དམིགས་འདུན་ནི་ཡིག་འབྲུ་བརྒྱད་དེ་༼རང་དབང་དྲང་སྙོམས། བརྟན་བརླིང་འབྱོར་ལྡན།༽ ཡིན།  དེ་ནི་ང་ཚོ་དང་གུང་བྲན་ཏང་གཅིག་མཐུན་དང་འགལ་བའི་ཆ་གཉིས་ཀ་ཡོད་པའི་གནས་ཤིག་ཡིན། ངས་བསམ་ན་ང་ཚོ་དང་གུང་བྲན་ཏང་བར་གཅིག་མཐུན་རྩ་བ་ནས་མེད་པ་ཞིག་མ་རེད།  གཅིག་མཐུན་གྱི་ཆ་ནི་འབྱོར་ལྡན་བརྟན་བརླིང་རེད། ང་ཚོར་ཡང་རྒྱ་ནག་སྟོབས་འབྱོར་ལྡན་ཞིང་བརྟན་བརླིང་ཡོང་རྒྱུའི་རེ་བ་ཡོད།

ཡིན་ནའང་ ང་ཚོའི་བར་གྱི་འགལ་བའི་ཆ་ནི་རང་དབང་དང་དྲང་སྙོམས་རེད།  གུང་བྲན་ཏང་ལ་མཚོན་ནས་བཤད་ན། རང་དབང་ཡོད་ཚེ་བརྟན་བརླིང་ཡོང་མི་སྲིད་པ་དང་ དྲང་སྙོམས་བྱས་ཚེ་འབྱོར་ལྡན་ཆགས་མི་ཐུབ་པར་ངོས་འཛིན་བྱེད་ཀྱི་ཡོད། རྒྱུ་མཚན་ནི་དེ་རིང་གི་རྒྱ་ནག་དཔལ་འབྱོར་གྱི་དར་རྒྱས་ནི་དྲང་སྙོམས་མ་ཡིན་པའི་རྨང་གཞིའི་སྟེང་བཙུགས་ཡོད་པས་རེད།  ཡིན་ནའང་ ང་ཚོའི་ངོས་འཛིན་ནི་ངེས་པར་དུ་འབྱོར་ལྡན་དྲང་སྙོམས་དང་རང་དབང་བརྟན་བརླིང་གི་སྤྱི་ཚོགས་ཤིག་འཛུགས་དགོས་ངེས་སུ་མཐོང་གི་ཡོད། དེ་ནི་ངའི་རྨི་ལམ་མ་ཡིན་པར་ངས་སྙེགས་ཀྱིན་པའི་དམིགས་འདུན་ཡིན།  ང་ཚོས་གོམ་པ་རེ་རེ་བཞིན་མངོན་འགྱུར་གྱིས་ལས་དོན་ལ་སྐུལ་དེད་གཏོང་ཐུབ་པའི་རེ་བ་འཆིང་གི་ཡོད། 

དྲི་བ། རྒྱ་ནག་རང་དབང་དྲང་སྙོམས་ཀྱི་དམངས་གཙོ་ཅན་དུ་མངོན་འགྱུར་གྱི་བརྒྱུད་རིམ་ཁྲོད། ཧུང་ཀོང་ནི་རྒྱ་ནག་སྐམ་ས་དང་འབྲེལ་མེད་ལོགས་གནས་ཤིག་ཡིན་ནམ།  

ལན། རྒྱ་ནག་འདི་འདྲའི་རྒྱལ་ཁབ་ཆེན་པོ་ཞིག་དམངས་གཙོ་ཅན་དུ་མངོན་འགྱུར་བྱ་རྒྱུ་དེ་ནི།  འཛམ་གླིང་ཡོངས་དང་འབྲལ་ཐབས་མེད་པ་ཞིག་ཡིན།   ཧུང་ཀོང་དང་ཐེ་ཝན་ཚུད་པའི་འཛམ་གླིང་ཡོངས་ལ་རྒྱ་ནག་དམངས་གཙོ་ཅན་དུ་མངོན་འགྱུར་བྱ་རྒྱུའི་འགན་ཡོད། རྒྱུ་མཚན་ནི་དམངས་གཙོ་མི་ལྡན་པའི་རྒྱ་ནག་གིས་ཧུང་ཀོང་དང་ཐེ་ཝན་ལ་གནོད་པ་མ་ཟད།  འཛམ་གླིང་སྤྱི་ཡོངས་ཀྱི་ཞི་བདེ་དང་ཁེ་ཕན་ལའང་གནོན་གྱི་ཡོད།    

དྲི་བ།  ཁྱེད་ཀྱིས་ད་ལྟའི་ཧུང་ཀོང་གི་དམངས་གཙོ་དང་རང་དབང་གི་གནས་ཚད་ལ་གདེང་འཇོག་ག་འདྲ་ཞིག་གནང་གི་ཡོད།

ལན། ད་ལྟའི་ཆར་ཧུང་ཀོང་གི་རང་དབང་དམངས་གཙོ་ལ་ལྷད་སྐྱོན་ཆེན་པོ་ཐེབས་ཡོད།  མི་འགའ་ཤས་ཀྱིས་རྟ་སྔར་བཞིན་རྒྱུགས་ཐུབ་ཀྱི་འདུག བྲོ་སྔར་བཞིན་འཁྲབ་ཐུབ་ཀྱི་འདུག མི་དམངས་ཀྱིས་ངོ་རྒོལ་ཁྲོམ་སྐོར་སྔར་བཞིན་བྱེད་ཆོག་གི་འདུག  དེར་བརྟེན་ཧུང་ཀོང་གི་རང་དབང་དམངས་གཙོ་ལ་ལྷད་སྐྱོན་ཐེབས་མི་འདུག་བརྗོད་ཀྱི་ཡོད།  ངའི་བསམ་ན་སྐད་ཆ་དེའི་རིགས་བཤད་མཁན་དག་ནི་དམངས་གཙོའི་སྐོར་ལ་མ་མཐའི་རྨང་གཞིའི་གོ་རྟོགས་ཙམ་ཡང་མི་འདུག དམངས་གཙོའི་རྩ་བའི་གྲུབ་ཆ་གལ་ཆེ་ཤོས་གཅིག་ནི་འཇིགས་ཞུམ་བྲལ་བའི་རང་དབང་ཡིན། དེ་འདྲའི་རང་དབང་དེ་ཧུང་ཀོང་ནང་སྔར་ནས་མེད་པར་གྱུར་ཚར་བ་རེད། ལས་ཀ་ག་རེ་སྒྲུབ་པ་ཡིན་ནའང་མི་མང་པོ་ཞིག་ལ་སེམས་ཁྲལ་ཡོང་གི་ཡོད། རྒྱ་ནག་སྐམ་སའི་མི་འདོད་པའི་རྣམ་འགྱུར་ལ་སྐྲག་སྣང་ཡོང་གི་ཡོད།  དེ་ལྟ་བུའི་ནང་སེམས་ཀྱི་འཇིགས་སྣང་གིས་དམངས་གཙོའི་རྨང་གཞི་ཤུལ་མེད་གཏོང་བཞིན་ཡོད།  འོས་འདེམས་ཀྱི་ལམ་ལུགས་ཡོད་པ་ཡིན་ན་འདྲ།  སྨྲ་བརྗོད་རང་དབང་ཙམ་ཡོད་པ་ཡིན་ན་འདྲ། གལ་སྲིད་མི་དམངས་ཀྱི་སེམས་ནང་དུ་རང་མཐོང་བརླགས་ཏེ་བྲན་གཤིས་འབུས་མགོ་བརྩམས་ཤིང་  རང་ཉིད་ཀྱིས་སོ་སོར་གཅིན་སྡོམ་བྱས་ཏེ་འཇིགས་སྣང་བག་འཁུམ་ཡོང་བཞིན་པ་དེ་ནི་རང་དབང་དམངས་གཙོའི་རྨང་གཞི་བརླགས་ཟིན་པའི་མངོན་རྟགས་རེད།   

དྲི་བ། རྒྱ་ནག་དམངས་གཙོ་ཅན་དུ་མངོན་འགྱུར་གྱི་གོ་རིམ་ཁྲོད། ཧུང་ཀོང་ལ་ས་གནས་ཀྱི་དམིགས་བསལ་ཁྱད་ཆོས་ཤིག་མཐོང་གི་འདུག་གམ།

ལན།  ཝེ་ཡཱོན་མཚན་འཛོམས་ནི་ཧུང་ཀོང་གི་དམིགས་བསལ་ཁྱད་ཆོས་ཆེན་པོ་ཞིག་ཡིན། ལོ་ལྟར་དྲུག་པའི་ཚེས་ལྔ་ཉིན་གྱི་ནེའུ་ཡོག་དུས་བབ་སྟེང་དུའང་ཤུགས་ཆེན་པོས་གནས་ཚུལ་སྤེལ་གྱིན་ཡོད་ལ། དེ་ནི་ནེའུ་ཡོག་དུས་བབ་ལ་མཚོན་ན་སྲོལ་རྒྱུན་ལྟ་བུ་ཞིག་ཏུ་གྱུར་ཡོད། གནས་ཚུལ་འདིའི་ཐད་ནས་ཀྱང་འཛམ་གླིང་ཧྲིལ་པོས་ལོ་ལྟར་ཧུང་ཀོང་གི་ཝེ་ཡཱོན་མཚན་འཛོམས་ལ་མིག་གཅེར་བཞིན་ཡོད་པ་རྟོགས་ཐུབ།

དེར་བརྟེན། ངས་ཝེ་ཡཱོན་མཚན་འཛོམས་ནི་ཧུང་ཀོང་གི་ཚབ་མཚོན་ཞིག་དང་ཧུང་ཀོང་གི་སྣང་བརྙན་ཞིག་ཏུ་གྱུར་ཡོད་ཅེས་ནན་བརྗོད་བྱེད་བཞིན་ཡོད།  དེ་ནི་ཧུང་ཀོང་ཁོ་ནར་ཡོད་པའི་དམིགས་བསལ་ཁྱད་ཆོས་ཤིག་ཡིན།  རྒྱ་ནག་གི་ད་ལྟའི་ཡ་ང་བའི་གནས་སྟངས་འདིའི་འོག་ཏུའང་  རྒྱ་ནག་གི་ཆ་ཤས་ཤིག་ཡིན་པའི་མིང་ཐོག་ནས་ཧུང་ཀོང་དུ་སྔར་བཞིན་དྲུག་བཞིའི་ལས་འགུལ་ལ་རྗེས་དྲན་བྱེད་ཐུབ་ཀྱིན་ཡོད་ལ།  དྲུག་བཞིའི་གཞི་རྩའི་རིན་ཐང་གི་སྣང་བརྙན་མུ་མཐུད་རྒྱུན་འཁྱོངས་བྱེད་བཞིན་ཡོད།  དེ་ནི་རྒྱ་ནག་གི་ས་ཁུལ་གཞན་གང་དུའང་གཏན་ནས་སྒྲུབ་མི་ཐུབ་པ་ཞིག་ཡིན།   

དྲི་བ། ཝེ་ཝན་གྱི་འདས་པའི་ཉམས་མྱོང་ལ་བལྟས་པ་ཡིན་ན། ཐེ་ཝན་ལ་ཧུང་ཀོང་ནང་བཞིན་ས་གནས་རང་བཞིན་དཔུང་ཤོག་འདུག་གམ།

ལན། ཐེ་ཝན་གྱི་ས་ཁོངས་རང་བདག་གི་ངོས་ཤེས་ནི་ཧུང་ཀོང་དང་བསྡུར་ན་ལོ་རྒྱུས་ཀྱི་གཞི་རྩ་ཆེན་པོ་དང་བག་ཆགས་ཧ་ཅང་གཏིང་ཟབ་མོ་ཡོད།  རྒྱ་ནག་སྐམ་སའི་དམངས་གཙོའི་གནས་བབ་ཐད་ཐེ་ཝན་ལ་ཧུང་ཀོང་ནང་བཞིན་གྱི་སེམས་ཁུར་ཀྱང་ཡོད་པ་མ་རེད།  རྒྱ་ནག་སྐམ་སའི་དམངས་གཙོའི་ཐད་དོ་ཁུར་མངོན་གསལ་མེད་པ་དེ་ནི་ངས་བསམ་ན་གཙོ་བོ་ལོ་རྒྱུས་ཀྱི་རྒྱུ་རྐྱེན་དབང་གིས་རེད།   ཡིན་ནའང་ ད་ལྟའི་ཆར་རྣམ་པ་དེ་ག་ལེར་འགྱུར་བ་ཐེབས་བཞིན་འདུག  ཉེ་ཆར་ཐེ་ཝན་ཀྱི་ཤེས་ལྡན་པའི་སྡེ་ཁག་གིས་༼རང་དབང་མིའི་བསྒྲགས་གཏམ༽འདོན་སྤེལ་བྱས་ཡོད་ལ།  དམངས་གཙོ་ཡར་ཐོན་ཚོགས་པས་ཀྱང་༼མཚོ་འགག་གི་འགྲོ་བ་མིའི་ཐོབ་ཐང་གི་གྲོས་ཆོད་ཡིག་ཆ༽གསལ་བསྒྲགས་བྱས་ཡོད།  ད་ལྟ་མཐོང་ཐུབ་པ་ནི་ཐེ་ཝན་ནང་དུ་ཡིན་ནའང་རྒྱ་ནག་དམངས་གཙོ་ཅན་དུ་བཅོས་བསྒྱུར་ལ་དོ་ཁུར་གྱི་མགོ་འབུས་བཞིན་པའི་སྒང་རེད། གནད་དེ་ལ་ཧུང་ཀོང་གིས་ཀྱང་ཉམས་མྱོང་ལེན་ཆོག་པ་ཞིག་རེད།

དྲི་བ། ཞིས་ལི་གཉིས་མགོ་ཁྲིད་མ་ཆགས་པའི་སྔོན་དེར་དྲུག་བཞི་དཀར་འདོན་བྱ་འཆར་ཡོད་པའི་བཤད་ཡམས་ཤིག་ཁྱབ་པ་རེད།  ད་ལྟ་ཁྱེད་ཀྱིས་བལྟས་ན་དེ་འདྲ་ཞིག་འབྱུང་སྲིད་པར་མཐོང་གི་འདུག་གམ།  

ལན། དེ་འདྲ་ཞིག་འབྱུང་སྲིད་མིན་གྱི་རེ་བ་ནི་ཀླད་ཀོར་ཙམ་དུ་མ་ཚད་ལྡོག་གྲངས་ཀྱང་འབབ་པའི་ཚད་རེད།  དཀར་འདོན་བྱེད་སྲིད་པའི་རྣམ་པ་ཙམ་ཡང་ཁྱོན་ནས་མཐོང་ཐུབ་ཀྱི་མི་འདུག  གླེང་སློང་དེ་དག་ནི་དྲ་རྒྱའི་སྟེང་གི་བཤད་ཡམས་ཙམ་རེད།  དེར་མ་ཟད་ཉེ་བའི་དུས་ཀྱི་རྒྱ་གཞུང་གི་དྲིལ་བསྒྲགས་བྱེད་སྟངས་དག་ལ་བལྟས་ན།  དེ་རིང་གི་གུང་ཁྲན་ཏང་གིས་མཐའ་གཅིག་ཏུ་རྒྱ་ནག་རིག་གསར་གྱི་ཕྱོགས་སུ་ཕྱིར་འཁྲིད་ཀྱིན་འདུག  འདི་ལྟའི་གནས་སྟངས་ཤིག་གི་འོག་དྲུག་བཞི་དཀར་འདོན་ཡོང་ཐུབ་རྒྱུ་ཕར་ཞོག ཐ་ན་གུང་བྲན་ཏང་རྒྱ་ནག་སྲིད་སྟེགས་འདིར་ཉིན་གཅིག་ལ་བསྡད་པ་ཡིན་ནའང་དེ་ལྟའི་རེ་བ་ཇེ་ཆུང་ནས་ཇེ་ཆུང་དུ་འགྱུར་བཞིན་ཡོད།  ཁོ་ཚོ་མ་གཞི་ནས་མི་གསོད་ལག་དམར་གྱི་ཉེས་ཅན་པ་རྐྱང་རེད།  མི་གསོད་ལག་དམར་ཞིག་གིས་རང་མོས་ཐོག་སོ་སོ་བཙོན་དུ་འཇུག་བཞིན་པ་ཞིག་འཇིག་རྟེན་འདིར་ཧ་ཅང་མཐོང་དཀོན་པོ་རེད། དྲུག་བཞིའི་དམར་གསོད་དོན་རྐྱེན་ནི་རྒྱ་ནག་དམར་ཤོག་པས་བཟོས་བ་རེད།  རྒྱ་ནག་དམར་ཤོག་གིས་སོ་སོས་རང་ཉིད་ལ་ཁྲིམས་ཆད་གཅོད་པར་རེ་བ་ནི་དེ་ནི་ཧ་ཅང་འབྱུང་ཁག་པོའི་རྨི་ལམ་ཞིག་རེད། 

དྲི་བ། ཁྱེད་ཀྱིས་ཞི་འགྲིག་ཅེས་པའི་གླེང་ཕྱོགས་འདིར་ལྟ་སྟངས་ག་འདྲ་ཞིག་འཛིན་བཞིན་ཡོད་དམ།

ལན།  ངས་བསམ་ན། ད་ལྟའི་ཆར་ཞི་འགྲིག་གི་གནད་དོན་དེ་ང་ཚོའི་ངོས་ནས་ཕར་བཏོན་པ་ཡིན་ན། དེ་ནི་ཧ་ཅང་དགོད་བྲོ་བ་ཞིག་རེད། རྒྱུ་མཚན་ནི་ཕྱོགས་གཉིས་བར་གྱི་སྟོབས་ཤུགས་ལ་ཧེ་བག་ཧ་ཅང་ཆེན་པོ་ཡོད་པའི་གནས་བབས་འོག  ཞི་འགྲིག་ནི་དུས་ནམ་ཡང་གནོད་འཚེ་ཕོག་ཡུལ་གྱི་འདོན་པར་འོས་བབས་ཡོད་པ་མ་རེད། དཔེར་ན། མི་ཀ་བས་མི་ཁ་བའི་གཅར་རྡུང་འོག་གནོད་འཚེ་མྱོང་བཞིན་ད་དུང་ཕར་མི་ཁ་བ་དེར་ང་ཚོས་ཕན་ཚུན་གྲོགས་པོ་སྒྲིག་གི་ཡིན་བརྗོད་ཚེ། འདི་ལྟ་བུའི་དགོད་བྲོ་བའི་གནས་ཚུལ་ཞིག་གནམ་འོག་ཏུ་ཡོད་སྲིད་དམ།  སྤྱིར་ཞི་འགྲིག་གི་རྨང་གཞི་ནི་དོན་དངོས་གནས་ཚུལ་གསལ་འདོན་དང་དྲང་པོ་དྲང་བཞག་གི་ཐག་གཅོད་གཉིས་ལ་ཐུག་ཡོད་པ་རེད། ད་ལྟའི་ཆར་རྒྱ་གཞུང་གིས་སྔར་བཞིན་དྲུག་བཞིའི་དམར་གསོད་བྱ་སྤྱོད་དེ་རང་ཉིད་ཀྱི་ནོར་འཁྲུལ་ཡིན་པ་ངོས་ལེན་བྱེད་ཀྱིན་མེད་པ་མ་ཟད། སྐབས་དེའི་དོན་དངོས་གནས་ཚུལ་རྣམས་སྤྱི་ཚོགས་ཁྲོད་སྦ་གསང་བྱས་ཏེ།  དྲུག་བཞིའི་གནད་དོན་ཐད་ཡོངས་གྲགས་ཐོག་གཏམ་གླེང་བྱེད་མི་ཆོག་པ་བཟོས་ཡོད།  དེ་འདྲའི་གནས་སྟངས་འོག་ཞི་འགྲིག་གི་རྨང་གཞི་ག་རེ་ཡོད་པ་རེད། རྨང་གཞི་གང་ཡང་མེད་པའི་གནས་བབ་འོག་ཞི་འགྲིག་གི་གནད་དོན་གླེང་བ་ཡིན་ན།  དེ་ནི་དགེ་མཚན་མེད་པའི་ཕྱོགས་གཅིག་རྐྱང་པའི་འདོད་བློ་ཙམ་མ་ཡིན་ནམ།

དྲི་བ། གནས་སྟངས་ཅི་འདྲ་ཞིག་གི་འོག་ཏུ་ད་གཟོད་ཁྱོད་ཀྱིས་ཞི་འགྲིག་ཡོང་རྒྱུར་བསམ་བློ་གཏོང་གི་རེད་དམ།

ལན།  ང་ནི་ག་དུས་ཡིན་ཡང་བྲེལ་མྱུར་བྱེད་མཁན་ཞིག་མིན།  གཞི་རྩའི་རྩ་དོན་མ་དོར་བའི་རྨང་གཞིའི་ཐོག་ནས་སྤྱི་ཚོགས་ཞི་འགྲིག་དང་གྲོས་མོལ་གང་རུང་ཡོང་སྲིད་པ་ཞིག་རེད།  གཤམ་བཀོད་གནད་དོན་ཁག་རྒྱ་གཞུང་གིས་དངོས་སུ་ལག་བསྟར་བྱས་ཚེ་ད་གཟོད་ཞི་འགྲིག་གི་གནད་དོན་ཐད་བསམ་བློ་བཏང་ཆོག་གི་རེད།  གཅིག  དྲུག་བཞིའི་དམར་གསོད་ཆེན་མོའི་ཁྲོད་རྐྱེན་འདས་སུ་གྱུར་བ་དང་གནོད་འཚེ་ཕོག་མཁན་ཚང་མ་དཀར་འདོན་དང་གུན་གསབ་སྤྲོད་དགོས། གཉིས། ཕྱི་སྡོད་བཙན་བྱོལ་བ་དག་རྒྱལ་ནང་དུ་རང་དབང་ཐོག་ཕྱིར་ལོག་འཇུག་དགོས། གསུམ། ད་ལྟ་བཙོན་འོག་ཏུ་ཡོད་པའི་དྲུག་བཞིའི་གནད་དོན་དང་འབྲེལ་ཡོད་བཙོན་མ་ཆ་ཚང་བཙོན་གྲོལ་བྱ་དགོས།

 

ཚེ་རིང་རྒྱལ་གྱིས་བསྒྱུར།

ཤོག་ངོས་འདི་ཐེངས་ ༡༤༣༣ ལ་བཀླགས་འདུག
རིག་པ་འདོན་པ།
ཇོ་རུ་ཚེ་རིང་
༢༠༡༣/༠༦/༡༥ ཉིན་འདོན་སྤེལ་བྱས།
ཉི་མ་རྒྱལ་མཚན་ལགས་ཀྱིས། སྐྱོན་བརྗོད་ཐེར་འདོན་བྱས་པ་ལེགས་པོ་འདུག སྤྱིར་སྐྱོན་བརྗོད་ཐེར་འདོན་གླེང་མཁན་ལ་སྐྱོན་བརྗོད་ཐེར་འདོན་གྱི་བསུ་མ་བྱེད་དགོས་པ་རེད། ཡིན་ནའང་། ཉི་མ་རྒྱལ་མཚན་ལགས་ཀྱིས་སྐྱོན་བརྗོད་ཐེར་འདོན་དེ་གནས་ལུགས་རྒྱུ་མཚན་གྱིས་བྲིས་མི་འདུག ཞེན་ཁོག་ཆགས་སྡང་གིས་བཙུར་འདུག དོན་གྱིས་ཕར་ལ་སྐྱོན་བརྗོད་པའི་ཟོལ་གྱིས་རང་ཉིད་ཐེར་འདོན་བྱས་འདུག་པ་ལྟ་བུ་ཞིག་ཏུ་སྣང་
དང་པོ། ཁོང་གིས་ “དོན་དངོས་ཀྱི་རྒྱལ་གཅེས་པ་ཚང་མ་ནི་སྐྱོན་བརྗོད་ཐེར་འདོན་བྱེད་མཁན་དག་ཡིན། ” ཞེས་པའི་ཚིག་འདི་ཟུར་དུ་བཏོན་ཏེ་དགག་འདུག དགག་སྟངས་ནི་ཚིག་གི་འབྱུང་ཁུངས་ཆ་ནས་སུང་ཀྲུང་ཧྲན་དང་རིག་གསར་སྐབས་ནས་དར་བ་སྒྲུབ་བྱེད་དུ་དྲངས། དེའི་ཞོར་ལ་བོད་ཀྱི་གཞོན་སྐྱེས་ཚོ་དྲུད། དེའི་ཐོག་ལ་ “དགག་རྒྱག་ངོ་ལོག” ་ཅེས་པའི་ཚིག་ཅིག་བཙན་གྱིས་བསྣན་རྗེས། ཤེས་ཡོན་དར་བའི་སྤྱི་ཚོགས་ཤིག་གི་གཤིས་ཀ་མིན་པར་བསྒྲུབས་ཏེ། ཡར་ཐོན་སྤྱི་ཚོགས་ནང་སྐྱོན་བརྗོད་ཐེར་འདོན་པ་ཚང་མ་རྒྱལ་གཅེས་པ་ཡིན་པར་བརྗོད་ཚེ་དགོད་བྲོ་ཡིན་པའི་བཞི་ཤད་བཀོད་འདུག
ཁོང་གིས་འཁོར་གསུམ་སྐོར་བ་འདིའི་ནང་དུ་གནས་ལུགས་ཏོག་ཙམ་ཡོད་པའི་སྐད་ཅིག་ནི། སྐྱོན་བརྗོད་ཐེར་འདོན་པ་ཚང་མ་རྒྱལ་གཅེས་པ་ཡིན་པར་བརྗོད་ཚེ་དགོད་བྲོ་བའི་གཏམ་འདི་ཙམ་རེད། ཡིན་ནའང་། ཞིབ་ཏུ་བསམ་ཚེ་དེང་གི་འཛམ་གླིང་སྤྱི་ཚོགས་འདི་གཡོ་རྫུན་གྱིས་ལད་དེ་ཁ་དོག་ཡོད་ཚད་འགྱུར་བསྡད་ཡོད་སྟབས། ཐ་སྙད་ཀྱི་བཏགས་དོན་རྣམས་ཀྱང་འཐོར་བཤིག་ཏུ་གྱུར་ཏེ། ཐ་སྙད་རེ་རེ་ལའང་དྲང་ཕྱོགས་ལྡོག་ཕྱོགས་ཀྱི་འགྲེལ་གཉིས་རེ་རྒྱག་དགོས་བྱུང་གི་ཡོད། དེར་བརྟེན་ཁོང་གིས་བརྗོད་པའི་སྐྱོན་བརྗོད་ཐེར་འདོན་པ་ཚང་མ་རྒྱལ་གཅེས་པ་མ་ཡིན་པར་སྒྲུབ་བཞིན་པ་དེའང་ཐ་སྙད་ཀྱི་ལྡོག་ཕྱོགས་ཀྱི་གོ་བས་སྟེང་ནས་འགྲེལ་གྱི་ཡོད། རྒྱུ་མཚན་ནི་དེང་གི་སྤྱི་ཚོགས་ནང་དུ་རང་སེམས་སུ་སྐྱོན་དུ་མི་མཐོང་ནའང་དགོས་པ་དང་དམིགས་པ་ཡ་མཚན་པ་རེའི་ཆེད་དུ་བསམ་བཙུགས་ནས་སྐྱོན་དུ་བརྗོད་མཁན་ཡོང་གི་ཡོད། དོན་དངོས་ཐོག་དེ་ནི་སྐྱོན་བརྗོད་ཐེར་འདོན་མ་ཡིན་ཡང་། མི་མང་དཀྱུས་མའི་མཐོང་སྣང་དུ་སྐྱོན་བརྗོད་ཐེར་འདོན་དུ་ཚོར་ཡོང་གི་ཡོད། ཉི་མ་རྒྱལ་མཚན་ལགས་ཀྱིས་ཀྱང་ཐ་སྙད་ཀྱི་ལྡོག་ཕྱོགས་གོ་དོན་དེ་གཞིར་བཟུང་དགག་འདུག དེ་ལྟར་དགག་ན་མ་འགྲིག་པ་མི་འདུག་མོད། དེ་ནི་རང་གི་ཀུན་སློང་གིས་གཞན་གྱི་ཀུན་སློང་ལ་རྩི་བྱུགས་ཏེ་ཚོར་སྣང་ཙམ་གྱིས་དགག་སྒྲུབ་བྱས་པ་ཙམ་ལས་དོན་ལ་གནས་ཐུབ་པ་ཧ་ཅང་དཀའ་འོ། སྤྱིར་བརྡ་དོན་རང་སྟེང་གི་གོ་བ་ལྟར་འགྲེལ་ན། སྐྱོན་བརྗོད་ཅེས་པ་ནི་དངོས་ཡོད་གནས་སྟངས་ཀྱི་སྐྱོན་ཆ་ངོ་མ་དེ་བརྗོད་པ་གོ་བ་ལས། ཡོན་ཏན་གྱི་ཆ་ལ་སྐྱོན་འདོགས་བྱས་པར་གོ་མི་ཐུབ། དེར་བརྟེན་བརྡ་དོན་རང་སྟེང་གི་གོ་དོན་གྱི་ངོས་ནས་བཤད་ན་སྒྲུབ་བྱེད་དེའང་ཏག་ཏག་ཅིག་བསྡད་མི་འདུག
གཉིས་པ་ “དམངས་གཙོའི་རྩ་བའི་གྲུབ་ཆ་གལ་ཆེ་ཤོས་གཅིག་ནི་འཇིགས་ཞུམ་བྲལ་བའི་རང་དབང་ཡིན།” ཞེས་པའི་ཚིག་ཟུར་དུ་དྲངས་ཏེ་དགག་འདུག དགག་སྟངས་ནི་རྒྱ་རིགས་དམངས་གཙོ་དོན་གཉེར་བ་ཁོའི་རྒྱུད་དུ་ “རང་བཞིན་ལྷན་སྐྱེས་ཀྱི་དམངས་གཙོའི་གཤིས་ཀ་ཏིལ་འབྲུ་ཙམ་ཡང་མེད་པ” རུ་བརྗོད་དེ། ཐད་ཀར་རང་གི་ཆགས་སྡང་གིས་གཞན་གྱི་མི་གཤིས་ལ་དམའ་འབེབས་བྱས་རྗེས། སླར་ཡང་ཁོ་(ཝང་ཏན) “དམངས་གཙོ་ལ་དུངས་ག་དང་རེ་སྨོན་ཤུགས་དྲག” ཡོད་པར་ངོས་ལེན་དང་སྦྲགས། ཁོའི་(ཝང་ཏན)དམངས་གཙོའི་ཐད་ཀྱི་ “སེམས་ཚོར་དང་སྙིང་སྟོབས་ཉི་ཚེ་བ” ཡིན་པར་ཕན་ཚུན་ནང་འགལ་གྱིས་སྒྲུབ་འདུག དེའི་རྒྱབ་བརྟེན་དུ་ “དམངས་གཙོའི་རྩ་བའི་གྲུབ་ཆ་གལ་ཆེ་ཤོས་ནི་གུ་ཡངས་དཀྱེལ་ཆེ།” ཡོད་དགོས་པ་དང་། “ལྟ་བ་མཁྲེགས་འཛིན་” འདོར་དགོས་པའི་སྒྲུབ་བྱེད་ཡང་དག་ཅིག་དྲངས་འདུག་མོད། དེའི་འོག་ཏུ་སླར་ཡང་ “སྒེར་གཤིས་དོར་ནས་ཕར་རོལ་བསམ་སྤྱོད་ལ་གུས་བརྩི་བྱེད་པ།” ཞེས་བསླབ་བྱའི་ཚུལ་དུ་རང་གིས་རང་ཉིད་རྡུང་བྱེད་ཀྱི་ཚིག་ཅིག་རྟ་ཤོར་ཐག་དྲུད་ཀྱི་ཚུལ་དུ་ཞོར་ལ་ཤོར་འདུག དམངས་གཙོའི་འདུ་ཤེས་ཀྱི་གཞི་རྩ་ནི་ཕན་ཚུན་འདྲ་མཉམ་གྱི་སྒེར་གཤིས་སྟེང་ནས་གྲུབ་ཀྱི་ཡོད་སྟབས། སྒེར་གཤིས་མ་དོར་བའི་ཐོག་ནས་ཕ་རོལ་བའི་བསམ་སྤྱོད་ལ་འདྲ་མཉམ་གྱི་གུས་བརྩི་བྱེད་དགོས་པ་དེ་རེད།
དེ་ལྟར་རང་གིས་རང་གི་མགྲིན་པར་ཐག་པ་ཞིག་བརྒྱབ་རྗེས། “རང་གཞན་རོགས་གསུམ་ལ་མཐུན་སྦྱོར་དང་སྤྱི་ཚོགས་ལ་མཐུན་སྦྱོར། དམངས་ཀྱི་བསམ་ཕྱོགས་ལ་དང་ལེན་བྱེད་པ་སོགས་རེད།” ཅེས་ཀུན་སྤྱོད་ཀྱི་ངོས་ཐད་ནས་བམ་བཤད་ཅིག་བརྒྱབ་འདུག ཀུན་སྤྱོད་ཐད་ཀྱི་སྐད་ཆ་འདི་དག་ཀྱང་སྤྱིར་ཡིན་ན། སྒེར་གཤིས་མ་དོར་བར་རང་གཞན་འདྲ་མཉམ་ཀྱི་འདུ་ཤེས་ཐོག་ནས་ཡོང་དགོས་པ་ཞིག་ལས། སྒེར་གཤིས་དོར་བའི་ཤུལ་གྱི་བྲན་གཤིས་ཀྱི་ངོས་ཐད་ནས་མཐུན་སྦྱོར་ཞེས་པ་ཞིག་གླེང་རྒྱུ་ལྷག་མེད་ལ། དམངས་ཀྱི་བསམ་ཕྱོགས་ཟེར་བ་ཞིག་བཙལ་ཀྱང་རྙེད་དུ་མི་སྲིད།
མཐའ་དོན་ཉི་མ་རྒྱལ་མཚན་ལགས་ཀྱིས་ “འཇིགས་ཞུམ་བྲལ་བའི་རང་དབང་” ནི་ “ང་རྒྱལ་དང་ཞེ་སྡང་” གིས་ཁེངས་ཡོད་ཅེས་གཞི་རྩ་མེད་པའི་གཏམ་གང་བྱུང་ཅིག་རང་སྣང་དུ་བཤད་འདུག འདི་ལྟར་གཞན་གྱི་འཇིགས་ཞུམ་བྲལ་བའི་རང་དབང་གི་ཁོག་པའི་ནང་ལ་རང་སྣང་གང་ཤར་དུ་ང་རྒྱལ་དང་ཞེ་སྡང་གི་རྡོ་ལོག་བཙན་གྱིས་འཇུག་པ་འདི་ནི་སོ་སོས་བསམ་བཞིན་དུ་རང་ཉིད་སྒེར་གཅོད་པར་སྒྲུབ་པ་དང་ཁྱད་ཅི་ཡོད། མང་ཚོགས་དཀྱུས་མ་ཞིག་གིས་ཀྱང་འདི་ལྟར་ལབ་མི་སྲིད་པས། འདིའི་ཐད་ནས་མང་པོ་ཞིག་བཤད་ན་ཚིག་ལྷག་རེད། མཐར་ “སྤྱི་ཚོགས་ཤིག་གི་ཁ་ཐུག་ནས་བཤད་ན་དམངས་གཙོའི་དྲི་མ་ཙམ་ཡང་མི་འདུག” ཅེས་གནས་ལུགས་དང་རྒྱུ་མཚན་གཅིག་ཀྱང་མ་ཤོད་པར། སྐད་གསེང་མཐོན་པོས་ “མི་འདུག” ཅེས་འུད་ཆེན་པོ་ཞིག་གིས་བཞི་ཤེད་བརྒྱབ་སྟེ་རང་སེམས་རང་གིས་གསོས་འདུག
བོད་ཁ་བ་ཅན་གྱི་དམངས་ཁྲོད་ལ་གཏམ་ཞིག་ཡོད། “ གླེན་པས་བསྟོད་པ་ལས། མཁས་པས་སྨད་ན་ལེགས།” ཞེས་པ་ལྟར། ཉི་མ་རྒྱལ་མཚན་ལགས་ཀྱི་དགག་ལན་འདི་ནི་དེ་ལྟར་དུ་གྱུར་འདུག་ན། དེ་འདྲའི་དགག་ལན་རྒྱག་པ་ལས་མ་བརྒྱབ་ན་ཅི་མི་ལེགས།
མཇུག་མཐར་ཞུ་འདོད་པ་ཞིག་ནི། རང་ཉིད་གོང་གི་བཅར་འདྲི་འདི་སྒྱུར་མཁན་ཅིག་གི་ངོས་ནས་ཀྱང་། ཝང་ཏན་གྱིས་དྲི་ལན་དུ་བརྗོད་པའི་བསམ་ཚུལ་ཆ་ཚང་ལ་མོས་མཐུན་དང་ལེན་མེད་མོད། ཡིན་ནའང་། རྒྱུ་མཚན་གནས་ལུགས་ལ་བསམ་རྣོ་མི་གཏོང་བར་འུ་ཅག་གི་སྤྱི་ཚོགས་འདིས་ངན་གཤིས་ལྟར། གང་དྲན་བྱུང་རྒྱལ་དུ་བརྗོད་པ་འདི་ནི་ཡག་པོར་མཐོང་མ་སོང་། དེ་བཞིན་དུ་གཞན་ཞིག་གིས་མཐོང་ན་དགོད་བྲོ་བའི་རྒྱུ་མི་འགྱུར་གྲང་
སྤྱིར་རྒྱ་ནག་གི་དམངས་གཙོའི་རླབས་རྒྱུན་མཐོ་ཤོས་དེ་དྲུག་བཞི་སློབ་མའི་ཡར་ལངས་ཆགས་ཡོད་ལ། ཝང་ཏན་གྱི་བསམ་ཚུལ་གྱིས་མཐའ་གཅིག་ཏུ་རྒྱ་ནག་དམངས་གཙོ་དོན་གཉེར་བ་དག་གི་བསམ་ཚུལ་མཚོན་ཐུབ་ཀྱི་མེད་ནའང་། ཁོ་ནི་དྲུག་བཞིའི་སློབ་མའི་ཡར་ལངས་སྐབས་ཀྱི་ཚབ་མཚོན་མི་སྣ་ཞིག་ཏུ་གྱུར་ཡོད་སྟབས། ཁོས་བསམ་ཚུལ་གྱིས་ད་ལྟའི་རྒྱ་ནག་དམངས་གཙོ་དོན་གཉེར་བ་དག་གི་བསམ་ཚུལ་གྱི་ཟུར་ཙམ་དང་ཁ་དོག་ཙམ་མཚོན་ནུས། ཁ་དོག་དང་ཟུར་ངོས་འདི་དག་ལ་ང་ཚོས་ངོས་ནས་ཀྱང་དོ་སྣང་དང་གཟབ་ནན་བྱ་དགོས་པར་དམིགས་ཏེ། ལས་ཞོར་དུ་བོད་སྒྱུར་གྱིས་བོད་ཡིག་ཀློག་པ་པོ་ཚོར་སྤྱན་འབུལ་ཞུས་པ་ཡིན།
ང་ཚོས་རང་ཉིད་ཀྱི་རིམ་ཁོང་ཁོ་ན་མགོ་བཏུམ་སྟེ་རྨི་ལམ་བཏང་བསྡད་པ་ཡིན་ན། རང་གིས་རང་ཉིད་དབུགས་ཐུམ་དུ་བཅུག་སྟེ་རང་སྲོག་གཅོད་པར་འགྱུར་ངེས་ན། འཛམ་གླིང་གི་ལྟ་གྲུབ་འདྲ་མིན་བསམ་ཚུལ་སྣ་ཚོགས་ཉན་ཐོས་བྱེད་པར་གོམས་འདྲིས་བྱས་ཏེ། འཛམ་གླིང་མཐོང་ཐུབ་པ་དང་རང་ཉིད་འཚོལ་ཐུབ་པ་ཞིག་གནང་དགོས།
སྤྱི་ཚོགས་ཁྲོད་ཞེན་ཁོག་དང་ཤོག་སྒྲིལ་གྱི་དགག་རྒྱག་མ་ཡིན་པར་གནས་ལུགས་དང་རྒྱུ་མཚན་ཀྱི་དགག་སྒྲུབ་ནི་མེད་དུ་མི་རུང་བ་ཞིག་ཡིན་སྟབས། གོང་བཀོད་ཕྲན་གྱི་བོད་སྒྱུར་བཅར་འདྲིའི་མཚོན་མི་གཞན་གྱི་ལྟ་ཚུལ་ལ་གནས་ལུགས་དང་རྒྱུ་མཚན་གྱི་དགག་སྒྲུབ་དབྱར་གྱི་ཆར་ལྟར་འབབ་རུང་ངོ་། ཡིན་ནའང་། གནས་ལུགས་དང་རྒྱུ་མཚན་གྱི་རྨང་རྡོ་ཡལ་བར་དོར་ཏེ་ཆགས་ཞེན་དང་ཤོག་སྒྲིལ་གྱི་བསམ་བློས་གང་དྲན་བྱུང་རྒྱལ་དུ་བརྗོད་པ་ནི་སོ་སོའི་སྤྱི་ཚོགས་ཀྱི་ངོ་གདོང་ལ་སོ་སོས་སྐྱག་པ་བྱུགས་པ་དང་ཁྱད་མེད་པས། སྤྱི་ཚོགས་ཀྱི་གནས་ཚད་ལ་བསམ་ནའང་རང་ཉིད་ཀྱི་ངོ་ཚ་བསམ་ཏེ་གཏམ་ལ་བག་ཡོད་གནང་རོགས་ཞུ།
མཐར། གནས་ལུགས་རྒྱུ་མཚན་གྱི་དབྱར་ཆུ་གང་སར་བརྡོལ་ཏེ་རྨོངས་འཐོམ་བྲན་གཤིས་ཀྱི་བ་ཚྭའི་དྲི་མ་ཡོངས་སུ་འདག་པ་དང་། ཤེས་རབ་གནད་དུ་སྨིན་པའི་རིག་པའི་འོད་སྣང་ལ་བརྟེན་ནས། བཙན་གནོན་དབང་སྒྱུར་གྱི་མི་སེར་སྤེལ་བའི་དྲག་གནོན་འོག་ནས་ཡར་ལངས་ཏེ། འཇིགས་ཞུམ་བྲལ་བའི་རང་དབང་དམངས་གཙོའི་ལོངས་སྤྱོད་ཀྱི་ཉི་མ་འཆར་བའི་སྨོན་འདུན་དང་བཅས། ཚེ་རིང་རྒྱལ་གྱིས།
ཤར་ཕྱོགས་ཁུག་རྟ།
༢༠༡༣/༠༦/༡༥ ཉིན་འདོན་སྤེལ་བྱས།
སྐུ་ཞབས་བང་ཏན་འདི་གུང་བྲན་ཏང་ལ་མི་དགའ་ནའང། བོད་ཀྱི་སྐོར་ལ་གསུང་མི་དགོས་རྒྱུར་གཙོ་འདོན་གནང་གི་རེད། ཡིན་ནའང། ངས་བོད་རིགས་གཞོན་སྐྱེས་ཚོའི་ཁྲོད་ན་ཁོང་ལྟ་བུའི་དམིགས་འབེན་ལ་འཐབ་རྩོད་རྒྱུན་མ་ཆད་པར་གནང་མཁན་རེ་འགའ་ཡོད་ན་བསམས་མྱོང་མོད། ཐབས་ཤེས་ཟད།
བསོད་ནམ་དགའ་བ།
༢༠༡༣/༠༦/༡༥ ཉིན་འདོན་སྤེལ་བྱས།
རྒྱ་རིགས་དམངས་གཙོ་དོན་ཉེར་བ་དང་བོད་དོན་ལ་རྒྱབ་སྐྱོར་གནང་མཁན་མང་ཆེ་<བར་ཞན་ཆ་འདི་ཡོད་ཡོད་པ་རེད། རྒྱ་ནག་གཞུང་གིས་ཁོང་ཅག་རྒྱལ་ཁབ་ཀྱི་སྲིད་དབང་ལམ་ལུགས་དེ་(ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ནི་མི་མང་དམངས་གཙོའི་རྒྱལ་ཁབ་ཅིག་ཡིན)ཞེས་འུར་སྒྲོག་བྱེད་ཀྱིན་ཡོད་པ་ལྟར། རྒྱ་རིགས་ཤེས་ལྡན་པ་མང་པོ་ཞིག་གི་ཀླད་པའི་ནང་དུའང་འཛམ་གླིང་དམངས་གཙོའི་སྤྱི་སྲོལ་དང་མི་འདྲ་བའི་དམངས་གཙོའི་ཆར་ཡན་ཞིག་དང་། མཉམ་འབྲེལ་རྒྱལ་ཚོགས་འགྲོ་བ་མིའི་ཐོང་ཐང་ཡོངས་ཁྱབ་གསལ་བསྒྲགས་དང་མིའི་རིགས་རིག་པའི་གཞུང་ལུགས་དང་མི་འདྲ་བའི་འགྲོ་བ་མིའི་ཐོབ་ཐང་ཧམ་སེམས་ཤིག་འདུག
རྩ་བའི་ཁོ་རང་ཚོས་རྩོད་ཀྱི་ཡོད་པ་དང་ཁོ་རང་ཚོའི་མངོན་འདོད་སོགས་ཀྱང་རང་དབང་དང་དམངས་གཙོ། འགྲོ་བ་མིའི་ཐོབ་ཐང་སོགས་ཡིན་ནའང་ཤར་ཕྱོགས་པའི་རིག་གནས་རྙིང་པའི་བག་ཆགས་ཤིག་གམ། ཡང་ན་རྒྱ་ནག་དམར་ཤོག་གི་སློབ་གསོའི་ཤུགས་རྐྱེན་གང་རུང་ཞིག་གི་དབང་གིས། ཁོང་ཅག་གིས་ཤོད་ཀྱི་ཡོད་པ་དང་རྩོད་ཀྱི་ཡོད་པ་དེ་གཞན་དང་ཅུང་མ་འདྲ་བ་ཞིག་དང་། ཡང་ན་དངོས་ཡོད་སྤྱི་ཚོགས་འཚོ་བའི་ཉིན་རེའི་ལས་དོན་དང་། རྒྱལ་སྤྱིའི་འགྱུར་འགྲོས་ཀྱི་ལམ་ཕྱོགས་དངོས་དང་བར་ཐག་ཅིག་གམ་འགལ་བ་མང་པོ་ཡོད་པ་ཞིག་རེད།
ཉི་མ་རྒྱལ་མཚན།
༢༠༡༣/༠༦/༡༤ ཉིན་འདོན་སྤེལ་བྱས།
རྒྱ་མི་འདི་ལ་ཧྭན་མི་རིགས་གྱི་རང་གཤིས་ཤིག་དང་རྒྱ་ནག་དམར་ཤོག་གཞུང་གི་སྒེར་གཤིས་གཉིས་ཀ་འདུག ཁོ་རང་གི་སྐད་ཆ་བཤད་དག་ལ་དགག་བྱ་གང་ཡང་མེད། ཡིན་ནའང་དོན་དག་གཉིས་ཀྱི་ཐོག་ནས་གསལ་བཤད་ཅིག་མ་བྱས་ན། བློ་ཆུང་ཤེས་དམན་འགའ་རེས་ཧོལ་རྒྱུག་ཆོམ་རྒྱག་ཡོང་མི་སྲིད་པ་མིན་པའི་དབང་གིས་བསྡུས་ཙམ་ཞུ་རྒྱུ་ཡིན།
རྒྱ་མི་འདིའི་སྐད་ཆའི་ནང་དུ་“དོན་དངོས་ཀྱི་རྒྱལ་གཅེས་པ་ཚང་མ་ནི་སྐྱོན་བརྗོད་ཐེར་འདོན་བྱེད་མཁན་དག་ཡིན། ” ཞེས་ལབ་འདུག་པ་དེ་སྔོན་མའི་སོན་ཀྲུང་ཧྲན་གྱི་སྐབས་དང་། དེའི་རྗེས་རྒྱ་ནག་རྒྱལ་ཁབ་བཙུགས་རྗེས་རིག་གསར་སྐབས་ཡས་མས་ཀྱི་འབོད་ཚིག་ཅིག་རེད། དེའི་དབང་གིས་རྒྱ་མི་གཞོན་སྐྱེས་མང་ཆེ་བ་ཐེར་འདོན་དང་དགག་རྒྱག་ངོ་ལོག་སོགས་ལ་དགའ་མོས་ཡོད། དེའི་ཤུགས་རྐྱེན་བོད་ནང་གི་བོད་མི་གཞོན་སྐྱེས་ཚོར་ཐེབས་ཏེ་འདས་པའི་ལོ་བཅུ་ཕྲག་ཁ་ཤས་ནང་སྐད་བརྒྱབ་ཡོད་པ་རེད། འདི་ནི་རིག་གནས་དང་ཤེས་ཡོན་དར་བའི་སྤྱི་ཚོགས་ཤིག་གི་གཤིས་མ་མ་རེད། ལྷག་པར་ཡར་ཐོན་གྱི་སྤྱི་ཚོགས་ཞིག་གི་ནང་དུ་རྒྱལ་གཅེས་པ་ཚང་མ་སྐྱོན་བརྗོད་ཐེར་འདོན་བྱེད་མཁན་རེད་ཟེར་ཅེས་ལབ་པ་ཡིན་ན་ཧ་ཅང་དགོད་བྲོ་བོ་ཞིག་ཆགས་ཡོང་གི་རེད།
ད་དུང་རྒྱ་རིགས་དེས་“དམངས་གཙོའི་རྩ་བའི་གྲུབ་ཆ་གལ་ཆེ་ཤོས་གཅིག་<ནི་འཇིགས་ཞུམ་བྲལ་བའི་རང་དབང་ཡིན།” ཞེས་ལབ་འདུག་པ་དེ་ནི་ཁོ་རང་གི་རྒྱུད་དུ་རང་བཞིན་ལྷན་སྐྱེས་ཀྱི་དམངས་གཙོའི་གཤིས་ཀ་ཏུལ་འབྲུ་ཙམ་ཡང་མེད་པར། དམངས་གཙོ་ལ་དུངས་ག་དང་རེ་སྨོན་ཤུགས་དྲག་གིས་དེད་ཡོང་བའི་སེམས་ཚོར་དང་སྙིང་སྟོབས་ཉི་ཚེ་བ་ཞིག་རེད། དམངས་གཙོའི་རྩ་བའི་གྲུབ་ཆ་གལ་ཆེ་ཤོས་ནི་གུ་ཡངས་དཀྱེལ་ཆེ། ལྟ་བ་མཁྲེགས་འཛིན་དང་སྒེར་གཤིས་དོར་ནས་ཕར་རོལ་བསམ་སྤྱོད་ལ་གུས་བརྩི་བྱེད་པ། རང་གཞན་རོགས་གསུམ་ལ་མཐུན་སྦྱོར་དང་སྤྱི་ཚོགས་ལ་མཐུན་སྦྱོར། དམངས་ཀྱི་བསམ་ཕྱོགས་ལ་དང་ལེན་བྱེད་པ་སོགས་རེད། འཇིགས་ཞུམ་བྲལ་བའི་རང་དབང་ཟེར་བ་འདིའི་ནང་དུ་ང་རྒྱལ་དང་ཞེ་སྡང་གིས་ཁེངས་འདུག་པས་སྤྱི་ཚོགས་ཤིག་གི་ཁ་ཐུག་ནས་བཤད་ན་དམངས་གཙོའི་དྲི་མ་ཙང་མི་འདུག
རིག་པ་འདོན་པ།
རིག་པ་འདོན་ན་ངེས་པར་དུ་དེབ་སྐྱེལ་བྱེད་དགོས།
འདི་ལ་བསྣུན་ཏེ་དེབ་སྐྱེལ་བྱེད་རོགས།