རཀ་ར་རིན་པོ་ཆེའི་རྗེས་དྲན་ཚོགས་འདུ་ཚོགས་སོང་

འདོན་སྤེལ། ༢༠༡༣/༠༧/༡༠

དེ་རིང་སྔ་དྲོར་གངས་སྐྱིད་དུ་རཀ་ར་རིན་པོ་ཆེ་སྐུ་ཕྲེང་དྲུཔ་ཐུབ་བསྟན་ཆོས་དར་མཆོག་དགོངས་པ་རྫོགས་ཏེ། ལོ་གཅིག་ཧྲིལ་བོ་འཁོར་བའི་རྗེས་དྲན་ཚོགས་འདུ་ཞིག་དང་འབྲེལ་ཁོང་གི་སྐོར་ལ་བགྲོེ་གླེང་དང་བརྩམས་ཆོས་ཁག་འགྲེམས་སྟོན་བཅས་གནང་སོང་

དེ་རིང་ཞོགས་པར་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ་བོད་ཀྱི་དཔེ་མཛོད་ཁང་དང་ཨ་མྱེ་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གཉིས་ཀྱི་གོ་སྒྲིག་འོག རཀ་ར་རིན་པོ་ཆེ་བཀྲས་མཐོང་ཐུབ་བསྟན་ཆོས་དར་དམ་པ་མཆོག་སྐུ་ཤེགས་ཏེ་ལོ་གཅིག་འཁོར་བའི་རྗེས་དྲན་ཚོགས་འདུ་ཞིག་བསྐོངས་སོང་ལ། ཚོགས་འདུ་དེའི་སྟེང་སྐུ་གཤེགས་དམ་པ་ཁོང་གིས་འབྲི་བཞེངས་མཛད་པའི་རི་མོ་དང་། ད་སྔ་དཔར་འགྲེམས་ཟིན་པའི་དཔེ་དེབ་ཁག་ཅིག དེ་བཞིན། ཁོང་གི་ཡབ་གཙང་མདའ་བཀྲས་མཐོང་འགྱུར་མེད་རྒྱ་མཚོས་ ༡༩༡༣ ལོ་ནས་ཁམས་ཕྱོགས་སུ་རྒྱ་དམག་མཐར་སྐྲོད་གཏོང་སྐབས་དང་། ༡༩༡༧ ནས་ ༡༩༣༢ ལོའི་བར་སྡེ་དགེ་སྤྱི་ཁྱབ་གནང་སྐབས་བེད་སྤྱོད་གནང་བའི་དམག་དར་སོགས་འགྲེམས་སྟོན་གནང་སོང་

མཛད་སྒོ་དབུ་འཛུགས་ཀྱི་ཐོག་མར་བཀྲས་མཐོང་བསྟན་འཛིན་དགེ་བྱེད་ལགས་ཀྱིསྣང་གསལ་མར་མེ་ཞལ་འབྱེད་འབྲེལ། ཚོགས་ཞུགས་པ་ཡོངས་སྐུ་བཞེངས་ཐོག་དམ་པ་ཁོང་ལ་རྗེས་དྲན་མྱ་ངན་གུས་འདུད་རྗེས། ཨ་མྱེ་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་བཀྲ་ཤིས་ཚེ་རིང་ལགས་དང་ཀརྨ་སྨོན་ལམ་ལགས། ས་རཱ་མཐོ་སློབ་ཀྱི་ལོ་རྒྱུས་དགེ་རྒན་སྤྱི་འཐུས་བསོད་ནམས་རྒྱལ་མཚན་ལགས། ཆུང་ཚེ་རིང་ལགས་བཅས་ཀྱིས་རྗེས་དྲན་དང་འབྲེལ་བའི་གསུང་བཤད་གནང་ཡོད།

ཨ་མྱེ་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་འགན་འཛིན་བཀྲ་ཤིས་ཚེ་རིང་ལགས་ཀྱིས་རཀ་ར་རིན་པོ་ཆེའི་སྐུ་ཕྲེང་རིམ་པ་དང་། ལྷག་པར་དུ་སྐུ་ཕྲེང་དྲུག་པ་བཀྲས་མཐོང་ཐུབ་བསྟན་ཆོས་དར་མཆོག་གི་བསླབ་པ་སློབ་གཉེར་གནང་སྟངས་སྐོར་དང་ དགེ་འདུན་ཆོས་འཕེལ་སོགས་བཤེས་གཉེན་དུ་མར་བསྟེན་ཏེ་མདོ་སྔགས་རིག་གནས་སྤྱི་ལ་མཁས་པར་མཛད་སྐོར། མཐར་ ༡༩༥༠ ལོར་བལ་ཡུལ་དང་རྒྱ་གར་དུ་ཕེབས་འབྱོར་གྱིས་ལེགས་སྦྱར་སོགས་ཕྱི་ནང་གི་རིག་གནས་ལ་སློབ་གཉེར་དང་ཕྱག་ལས་གནང་བ་ངོ་སྤྲོད། དེ་བཞིན་བཙན་བྱོལ་ནང་བོད་ཀྱི་སྙན་སུམ་རིག་གནས་འཆད་འཁྲིད་དང་རྩོམ་ཡིག་དཔེ་དེབ་རིགས་མང་པོ་འབྲི་རྩོམ་གནང་མཐར་ ༢༠༡༢ ཕྱི་ཟླ་ ཚེས་ ༡༠ ཉིན་དགུང་གྲངས་ ༨༧ ཐོག་སྐུ་ཤེགསཔའི་སྐོར་སོགས་ངོ་སྤྲོད་གནང་སོང་

ཁོང་གིས་རཀ་ར་རིན་པོ་ཆེ་ལྟ་བུའི་མཁས་ཆེན་ཞིག་དགོངས་པ་རྫོགས་པར་བཙན་བྱོལ་གྱི་གསར་ཤོག་རླུང་འཕྲིན་སོགས་སུ་མཐོང་རྒྱུ་དཀོན་པའི་གནས་ཚུལ་དེ་ནི། དེང་སང་བཙན་བྱོལ་སྤྱི་ཚོགས་གཞུང་སྒེར་དང་བཅས་པར་བཟང་པོ་དང་ངན་པ་ལ་དབྱེ་བ་མེད་པ། མི་མཁས་པ་གྲོངས་ན་ཕངས་སེམས་མེད་པ། ཁྲམ་པ་དང་བཟང་བརྫུ་མཁན། ངོ་དགའ་སྤྲེལ་ལད་མཁན་པོ།  སྲིད་རྒལ་མཁན། ཁ་རུལ་མཁན། མགོ་བདེ་དྲན་འཁྲུལ་རིགས་ལ་ཆ་འཇོག་ཡོད་པ། མཁས་པའི་མི་ལ་བྱ་དགའ་གཟེངས་བསྟོད་བྱེད་སྲོལ་མེད་པའི་སྙིགས་མའི་སྤྱི་ཚོགས་འདི་འདྲ་ནི་བློ་ཕམ་གྱི་རང་བཞིན་ཞིག་རེད། མི་སྡེ་སྤྱི་ཚོགས་ཤིག་ཀླ་ཀློཡིན་དང་མིན་གྱི་ཁྱད་པར་ནི་གནའ་བོའི་རྗེས་ཤུལ་རིག་གཞུང་དང་ལོ་རྒྱུས་ཡོད་མེད་པ་ཐུག་ཡོད་པ་རེདཅེས་སོགས་བརྗོདསོང་

ཁོང་གིས་མུ་མཐུད་ད་སྔ་བྱུང་པ་དང་མ་འོངས་པར་འབྱུང་རྒྱུའི་སྐྱེ་སྟོབས་དང་སྦྱང་སྟོབས་ཅན་གྱི་མཁས་པ་བཟང་པོ། བག་ཡོད་ཚུལ་ལྡན་དག་གི་མཛད་པ་ཕྱག་རིས། ལྷག་པར་དུ་ལོ་རྒྱུས་ཡིག་ཚགས་སུ་འཇོག་པ་བཅས་ལ་བྱ་དགའ་གཟེངས་བསྟོད་མེད་པ་མ་ཟད་ཆེ་མཐོང་དང་གུས་གཙི་མེད་པར། ཁ་བཤད་ཆུ་ཡི་སྦི་བ་དང་ལག་ལེན་གསེར་གྱི་ཐིགས་པའི་རིགས། མཐོ་སར་འབྱར། འདྲ་མཉམ་ལ་ཕྲག་དོགས་དང་སྡིང་སེམས། དམས་ལ་ཐུབ་ཚོད། སྐྱབས་བཅོལ་འདྲ་འདྲའི་ནང་ནས་མི་འདྲ་བ་ཡིན་པའི་ཁ་སྤོབས་སྒྲོག་པ་སྟོང་གཏམ་རེད་ལ། ཡར་ཐོན་དང་བཟང་སྤྱོད། རིག་གཞུངཡོད་པའི་སྤྱི་ཚོགས་ཕར་བཞག མུན་ནག་དང་ཀླ་ཀློའི་ཁོར་ཡུག་ནང་ལུས་གྲབས་ཡོད་པ་རེད་”ཅེས་བརྗོད་སོང་

ཡང་ཁོང་གིས་རཀ་ར་རིན་པོ་ཆེ་མཆོག་ནི་བོད་པའི་བླ་སྤྲུལ་ཚོ་ནང་བཞིན་ཕྱི་རྒྱལ་ཁག་ཏུ་ཆོས་ཚོགས་བཙུགས་ཏེ་དངུལ་དངོས་ཀྱི་བྲན་དུ་གྱུར་བ་ལྟ་བུ་མིན་པར། བག་ཡོད་ཚུལ་ལྡན་ཐོག་ཆོལ་ཁ་ཆོས་ལུགས་ཀྱི་དབྱེ་བ་མེད་ཅིང་ བོད་མི་རྒན་གཞོན་སློབ་ཕྲུག་སུ་ཞིག་གམ་དུ་བཅར་ཡང་གསུང་ལན་འཇམ་པོ་གནང་མཁན་ཞིག་དང་ བཀའ་མོལ་གནང་ཚད་ཚང་མར་གནས་ཚུལ་གསར་པ་དང་མཐོང་རྒྱ་གསར་པ། གཏམ་རྒྱུད་གསར་པའི་ལེགས་བཤད་རིང་ཐུང་ཅི་རིགས་ཡོད་པ་ཞིག་ཡིན་པ། མི་ལོ་ ༥༢ རིང་སུད་སིར་རྟེན་གཞི་གནང་ཡང་ཡུལ་མིའི་མི་སེར་ཐོ་སྒྱུར་མ་བྱས་པར་མཐར་བོད་པ་རང་བྱས་ཏེ་སྐུ་ཚེ་རྫོགས་ཡོད་སྐོར་དང་ མདོ་སྔགས་རིག་གནས་སྒྱུ་རྩལ་དང་བཅས་པའི་མཁས་པའི་ཡང་རྩེསོན་པ་རཀ་ར་རིན་པོ་ཆེར་རྗེས་དྲན་ཞུ་རྒྱུ་དེ་ནི་མི་ལོ་ ༣༢ རིང་རིན་པོ་ཆེར་འབྲེལ་འདྲིས་ཡོད་པ་ཁོ་རང་གིས་འགན་འཁུར་ཆ་ཚང་ཞུ་རྒྱུ་ཡིན་སྐོར་བརྗོད་བྱུང་། 

དེའི་རྗེས་ཀརྨ་སྨོན་ལམ་ལགས་ཀྱིས་རཀ་ར་རིན་པོ་ཆེ་དང་འབྲེལ་ལམ་བྱུང་པའི་མཐོང་ཚུལ་མྱོང་ཚོར་དང་འབྲེལ་ཏེ། ཐོག་མར་ཤེས་རིག་ལས་ཁུངས་ཀྱི་ཚོགས་ཆེན་ཞིག་བརྒྱུད་ནས་ཐོག་མར་མཇལ་རྒྱུ་བྱུང་པ་ནས། ལས་ཁུངས་དང་ལས་དོན་གྱི་ངོས་ནས་ཁོང་དང་འབྲེལ་ལམ་བྱུང་པའི་རིམ་པ་སོགས་ངོ་སྤྲོད་དང་ ཤེས་རིག་ལས་ཁུངས་ཀྱིས་ཁོང་གི་བརྩམས་ཆོས་རིགས་པར་སྐྲུན་བྱས་པ་དང་ཤེས་རིག་གི་ལས་དོན་ཐད་ལམ་སྟོན་བཀའ་སློབ་སོགས་རིམ་པར་གནང་མྱོང་ཡོད་པའི་རིགས་དང་འབྲེལ་ཁོང་གིས་རིན་པོ་ཆེ་ཡིས་བཏང་འབྱོར་བྱུང་པའི་ཕྱག་ཡིག་ཅིག་ཏུ་ད་ཚེས་བྲོ་གར་ཤེས་ཀྱང་བྲོ་ར་མ་རྙེད་ཟེར་པའི་དཔེ་ལྟར་ཞེས་བཀོད་ཡོད་ཚུལ་དང་ དེ་ནི་རིན་པོ་ཆེ་ཡིས་བྲོ་འཁྲབ་ཤེས་ཀྱི་ཡོད་ཀྱང་འཁྲབ་སའི་སྡིངས་ཆ་མ་རག་པར་བརྗོད་པའི་དོན་ནི། བོད་པའི་རིག་གནས་དང་འབྲེལ་བའི་བརྩམས་ཆོས་རིང་ཐུང་སྣ་ཚོགས་ཤིག་ཡོད་ཀྱང་མར་འགྲེམས་སྤེལ་པར་སྐྲུན་གྱི་གོ་སྐབས་མ་རག་པ་བསྟན་ཡོད་པར་བརྗོད་སོང་

ཁོང་གིས་མུ་མཐུད་རིན་པོ་ཆེ་ཡིས་དབུགས་ཕར་བཏང་ན་འདྲ་ཚུར་འཐེན་ན་འདྲ། དགོངས་པའི་ནང་རིག་གནས་དང་རྩོམ་རིག་ལས་འཁོར་རྒྱུ་མེད་པ་ལྟ་བུ་ཞིགས་ཆགས་ཡོད་རེད།ཅེས་དང་ ཁོང་གིས་རིན་པོ་ཆེ་ཡིས་ཤེས་རིག་ལ་བོད་སྒྱུར་བྱས་པའི་འཁྲབ་གཞུང་ཁག་ཅིག་དང་རྩོམ་ཡིག་ཅིག་འབྱོར་ཡོད་པ་དང་ དུས་རྒྱུན་ཁོང་གི་རྩོམ་ཡིག་འབྲི་བ་དང་བོད་སྒྱུར་རིགས་གང་བྱེད་པ་དག་བོད་སྤྱི་བའི་རང་བཞིན་པའི་སྐད་ཐོག་ཡོང་རྒྱུའི་རྩ་འཛིན་གནང་གི་ཡོད་པ་དང་ དེ་ནི་གཙོ་བོ་ཤེས་ལྡན་པ་ཙམ་མ་ཡིན་པར་མི་མང་གིས་གོ་ཐུབ་པ་ཞིག་ཡོང་རྒྱུར་དགོངས་པ་བཞེཀྱི་ཡོད་པར་བརྗོད་བྱུང་

ས་རཱ་མཐོ་སློབ་ཀྱི་ལོ་རྒྱུས་དགེ་རྒན་སྤྱི་འཐུས་བསོད་ནམས་རྒྱལ་མཚན་ལགས་ཀྱིས་རིན་པོ་ཆེའི་དྲུང་ནས་དཔེ་ཁྲིད་ཞུས་པའི་མཐོང་ཐོས་མྱོང་ཚོར་དང་འབྲེལ་ཁོང་གིས། རིན་པོ་ཆེའི་མདུན་ནས་སྔ་ཕྱི་ཐེངས་གསུམ་སྟེ་ཟླ་ རིང་དཔེ་ཁྲིད་ཞུརྒྱུའི་གོ་སྐབས་རག་ཡོད་པ་དང་ ཁོང་ནི་བཟོ་ཡི་གནས་ཡོངས་རྫོགས་ལ་མཁས་པ་ཞིག་ཡིན་པ་དང་ ཁོང་གི་མཁྱེདཔྱོད་ཀྱི་སློབ་ཁྲིད་གནང་སྟངས་མ་འདྲ་བ་ཞིག་ཡིན་པར་བརྗོད་དེ།སྤྱིར་བོད་ཀྱི་རིག་གནས་ཁྲིད་རྒྱུར་ལམ་ལུགས་ཤིག་ཡོད་རེད། དེ་ནི་དང་པོ་ཁྲིད་གཞིའི་སློབ་ཚན་གྱི་ཕྱོགས་ཚང་མར་མཐའ་ཐིག་བརྟན་པོ་ཞིག་བརྒྱབ་སྟེ། ཨོ་ད་འདི་རེད་དཱ། ཐིག་འདི་ནས་རྒལ་ཆོག་གི་མ་རེད་ཅེས་ཕར་ཚུར་འགྲོ་ས་མེད་པ་ཞིག་གི་ཐོག་ནས་སློབ་ཁྲིད་གནང་སྟངས་དེ་ང་རང་ཚོའི་སློབ་གསོའི་བརྒྱུད་རིམ་ཞིག་རེད། འོན་ཀྱང་ རིན་པོ་ཆེ་ཡིས་སློབ་ཁྲིད་ག་རེ་གནང་ན་མཐའ་ཐིག་དེ་ཡོད་མ་རེད། སློབ་ཚན་གྱི་ངོ་གདོང་ལ་ངོ་སྤྲོད་དང་ཁ་ཕྱོགས་ཤིག་བསྟན་བཞག་དུས། ཐིག་མ་བརྒྱབ་པ་དེས་ལམ་ཁ་རྒྱ་ཆེན་པོ་ཞིག་དང་ཁ་ཕྱོགས་ཡང་པོ་ཞིག་བསམ་བློའི་ནང་བཞག་ཡོད་རེད།ཅེས་བརྗོད་བྱུང་

ཁོས་མུ་མཐུད་དུ་རཀ་རིན་པོ་ཆེ་མཆོག་གིས་ལེགས་སྦྱར་ནས་བོད་སྒྱུར་དང་དེར་འགྲེལ་བ་དང་ཡང་འགྲེལ་མང་པོ་ཞིག་བརྒྱབ་ཡོད་པ་དག་འཆད་ཁྲིད་སྐབས། རིན་པོ་ཆེ་ཡིས་ཐད་གར་ལེགས་སྦྱར་ལ་ཁུངས་གཏུགཏེ་སློབ་ཁྲིད་གནང་ཡོང་དུས་སེམས་ནང་གི་དོགས་འཆར་མང་པོ་ཞིག་རང་བཞིན་གྱིས་སེལ་ཡོང་གི་ཡོད་པ་དང་ གསུམ་པ་ཞིག་ལ་རིན་པོ་ཆེ་ཡིས་འཆད་ཁྲིད་གནང་སྐབས་ཞད་གད་རྩེད་མོ་དང་སྦྲགས་གནང་ཡོང་གི་ཡོད་སྟབས། ཉོབ་སྣང་མི་འབྱུང་པ་སོགས་ཀྱི་ཁྱད་ཆོས་ཡོད་པར་བརྗོད་སོང་

མཐར་ཁོང་གིས་རིན་པོ་ཆེ་ཡིས་ཁོང་ལ་གནང་པའི་ཕྱག་བྲིས་རྟོག་བརྗོད་ཅིག་དང་བོད་ཀྱི་ལོ་རྒྱུས་ཆ་ཚང་པ་ཞིག་ཉར་ཚགས་བྱས་ཡོད་སྐོར་དང་ རིན་པོ་ཆེ་ཡིས་དྲུང་ནས་སློབ་ཁྲིད་ཞུ་བའི་གོ་སྐབས་བྱུང་པ་དེ་ནི་སོ་སོའི་མི་ཚེའི་ནང་གི་གོ་སྐབས་བཟང་ཤོས་དང་རྩ་ཆེ་ཤོས་ཤིག་ཏུ་ངོས་འཛིན་བྱེད་ཀྱི་ཡོད་པར་བརྗོད།

མཐར་ཆུང་ཚེ་རིང་ལགས་ཀྱིས་ན་གཞོན་རྩོམ་པ་པོ་ཞིག་གིས་རཀ་ར་རིན་པོ་ཆེ་ལ་ལྟ་ཚུལ་ཞེས་པའི་ཐད་ནས། ཁོང་གིས་རང་ཉིད་རཀ་ར་རིན་པོ་ཆེའི་སློབ་མ་དེ་འདྲ་མིན་པ་དང་སློབ་ཁྲིད་ཀྱང་ཞུས་མྱོང་མེད་སྐོར་དང་འབྲེལ། རང་ཉིད་ཀྱིས་ཤེས་རིག་ལས་ཁུངས་སུ་ལས་ཀ་བྱེད་བཞིན་པའི་སྐབས་སུ་བོད་ཀྱི་སྐད་ཡིག་རིག་གཞུང་དང་འབྲེལ་བའི་ཐོག་དུས་ནས་དུས་སུ་མཁས་པ་ཚོའི་དགོངས་འཆར་བསྡུ་ཡི་ཡོད་ཀྱང་ མཁས་པ་མང་པོ་ཞིག་གིས་དགོངས་འཆར་གནང་རྒྱུ་ཕར་བཞག་ནས་ཡིག་ལན་ཙམ་ཡང་འབྱོར་རྒྱུ་ཁག་པོ་ཡོད་ནའང་ རཀ་ར་རིན་པོ་ཆེ་ཡིས་བརྒྱ་ཅ་བརྒྱ་དགོངས་འཆར་གནང་ངེས་ཡིན་པ་བཤད་ཐུབ་པ་ཞིག་ཡིན་སྐོར་དང་ གང་གནང་པའི་དགོངས་འཆར་རིགས་ཀྱང་ཁ་རུ་ཁ་ཐུག་དང་གསལ་བོ་གནང་གི་ཡོད་སྐོར་དང་འབྲེལ་ཁོང་གིས་དཔེ་མཚོན་ཞིག་ཏུ་ཤེས་ཡོན་སྲིད་བྱུས་གསར་པའི་ཐོག་དགོངས་འཆར་མང་པོ་གནང་ཡོད་པའི་ནང་ནས་ངས་གསལ་ཤོས་ཤིག་དྲན་པ་ནི། ཤེས་ཡོསྲིད་བྱུས་གསར་པ་འདི་གཞི་རིམ་གྱི་སྲིད་བྱུས་ཤིག་ཡིན་དུས། དེའི་ནང་ན་མདོ་དང་སྔགས་ཀྱི་ཆོས་ཚིག་གི་ཐ་སྙད་མཐོ་བོ་བཅུག་བཞག་པ་དེ་ཚོ་ཁྱོན་ནས་འགྲིག་གི་མི་འདུག་ཅེས་དགོངས་ཚུལ་ཤུགས་ཆེན་པོ་གནང་འདུག་ཅེས་བརྗོད་སོང་

ཡང་ཁོང་གིས་རིན་པོ་ཆེའི་རྩོམ་ཡིག་མང་པོ་ཞིག་གཞོན་སྐྱེ་དང་བྱིས་པའི་རྩོམ་རིག་ལ་ཐུགས་སྣང་ཆེན་པོ་ཡོད་པ་དང་ མཁས་པ་རྒན་རབས་པའི་ཁྲོད་ནས་དེང་དུས་དང་མཐུན་པའི་དུས་དེབ་ཁག་གི་ནང་རྩོམ་ཡིག་འཁོད་མང་ཤོས་ཤིག་དང་ རིན་པོ་ཆེའི་རྩོམ་ཡིག་ལ་བལྟས་ཡོང་ན་རྗེ་ཙོང་ཁ་བའི་རྣམ་ཐར་སོགས་ལ་སྔ་རབས་ཀྱི་རྩོམ་ཉམས་ཕུདུ་བྱུང་པ་ཡོད་པའི་རིགས་གཅིག་དང་ ཡང་ཁོང་གི་བརྩམས་ཆོས་གཡག་གིས་རང་ཉིད་ས་སྐྱེས་རྡོ་སྐྱེས་ཡིན་ཡང་རྒྱལ་དར་སྟེང་མ་བཀོད་པར། བོད་ན་མེད་པའི་གངས་སེང་བཀོད་པར་ཁྲིམས་གཏུག་བྱས་པ་ལྟ་བུ་མང་པོ་ཞིག་ཁ་སྐད་རང་གི་ཐོག་ལ་བབས་ཏེ་བརྩམས་ཡོད་པ་དང་ ཡང་གནས་བརྒྱད་ཀྱི་འགྲེལ་བ་སོགས་མང་པོ་ཞིག་ལ་ཞིབ་འཇུག་དཔྱད་རྩོམ་གྱི་ཚད་མཐོ་བོ་ཡིན་པ་བཅས་ལ་བལྟས་ཡོང་ན། རང་ཉིད་ཀྱི་ལྟ་ཚུལ་ལ་རིན་པོ་ཆེ་ཡི་གཟིགས་ཚུལ་ལ་བོད་ཀྱི་ཤེས་རིག་གི་སྤུས་ཚད་དེ་ཧ་ཅང་ཚད་མཐོ་བོ་ཡིན་པ་དང་ དེར་སློབ་སྦྱོང་བྱེད་མཁན་གྱི་སྡེ་ཆུང་ཆུང་ཞིག་གིས་མ་གཏོགས་ཤེས་ཀྱི་མེད་སྟབས། ཚད་མཐོ་བོའི་ཤེས་རིག་དེ་རྒྱ་ཁྱབ་ཏུ་དར་ཁྱབ་འགྲོ་ཐུབ་ཀྱི་མེད་པ། དེར་ངེས་པར་དུ་མཐུད་ཅིག་རྒྱག་དགོས་ཀྱི་ཡོད་ཅིང་ མཐུད་རྒྱག་རྒྱུ་དེ་ཛ་དྲག་ཡིན་པ། མཐུད་རྒྱག་མ་ཐུབ་ན་ཚད་མཐོ་བོའི་ཤེས་རིག་དེ་རྒྱུན་འཛིན་བྱ་ཐུབ་རྒྱུ་ཁག་པོ་ཡིན་པ་ཞིག་ལ་ངོས་འཛིན་གསལ་བོ་གནང་གི་ཡོད་པར་བརྗོད་བྱུང་

ཡང་ཁོང་གིས་དཔལ་འབྱོར་དང་མཚན་སྙན་གྲས་སོགས་ཀྱི་ཆེད་མང་པོ་ཞིག་གིས་བོད་པའི་རིག་གནས་ཕར་སྒྱུར་གྱི་ཡོད་ཀྱང་ རིན་པོ་ཆེའི་ཡི་སྐུ་ཚེ་ཧྲིལ་བོར་བལྟས་ཡོང་ན་ཕྱིའི་རིག་གནས་བོད་སྒྱུར་བྱས་པ་ལས་ཕར་སྒྱུར་གནང་མྱོང་མེད་སྐོར་དང་ སྐུ་ཚེ་ཧྲིལ་བོའི་ལངས་ཕྱོགས་ལ་བལྟས་ན་ཆབ་སྲིད་དང་གོ་གནས། ལུང་ཚན་ཆོལ་ཁ་སོགས་ཀྱི་འཐབ་རྩོད་རིགས་དང་ཁ་བྲལ་ཏེ། ཤེས་ཡོན་ཅན་ཞིག་དང་མཁས་པ་ཞིག་གི་ལངས་ཕྱོགས་རང་གི་ཐོག་ནས་མཛད་པ་འཕྲིན་ལས་བསྐྱངས་ཡོད་པ་ནི་རྗེས་རབས་པའི་ཤེས་ཡོན་ཅན་ཚོའི་མིག་དཔེར་བལྟ་ཡུལ་ཞིག་ཡིན་པར་བརྗོད་སོང་

མཐའ་དོན་ན་ག་སངས་རྒྱས་བསྟན་དར་ལགས་ཀྱིས་མཇུག་སྡོམ་དང་འབྲེལ་རཀ་ར་རིན་པོ་ཆེ་ནིརང་ཚུགས་མ་ཤོར། གཞན་སེམས་མ་དཀྲུགས་པའི་མཁས་པ་བཙུན་བཟང་གསུམ་འཛོམས་པའི་མི་སྣ་ཞིག་ཡིན་པར་བརྗོད་སོང་

གསར་འགོད་པ། བནྡེ་སྐྱབས།

ཤོག་ངོས་འདི་ཐེངས་ ༢༢༤༤ ལ་བཀླགས་འདུག
རིག་པ་འདོན་པ།
གཡག
༢༠༡༣/༠༧/༡༤ ཉིན་འདོན་སྤེལ་བྱས།
ཁོང་གིས་རཀ་ར་རིན་པོ་ཆེ་ལྟ་བུའི་མཁས་ཆེན་ཞིག་དགོངས་པ་རྫོགས་པར་བཙན་བྱོལ་གྱི་གསར་ཤོག་རླུང་འཕྲིན་སོགས་སུ་མཐོང་རྒྱུ་དཀོན་པའི་གནས་ཚུལ་དེ་ནི། “དེང་སང་བཙན་བྱོལ་སྤྱི་ཚོགས་གཞུང་སྒེར་དང་བཅས་པར་བཟང་པོ་དང་ངན་པ་ལ་དབྱེ་བ་མེད་པ། མི་མཁས་པ་གྲོངས་ན་ཕངས་སེམས་མེད་པ། ཁྲམ་པ་དང་བཟང་བརྫུ་མཁན། ངོ་དགའ་སྤྲེལ་ལད་མཁན་པོ། སྲིད་རྒལ་མཁན། ཁ་རུལ་མཁན། མགོ་བདེ་དྲན་འཁྲུལ་རིགས་ལ་ཆ་འཇོག་ཡོད་པ། མཁས་པའི་མི་ལ་བྱ་དགའ་གཟེངས་བསྟོད་བྱེད་སྲོལ་མེད་པའི་སྙིགས་མའི་སྤྱི་ཚོགས་འདི་འདྲ་ནི་བློ་ཕམ་གྱི་རང་བཞིན་ཞིག་རེད། མི་སྡེ་སྤྱི་ཚོགས་ཤིག་ཀླ་ཀློ་ཡིན་དང་མིན་གྱི་ཁྱད་པར་ནི་གནའ་བོའི་རྗེས་ཤུལ་རིག་གཞུང་དང་ལོ་རྒྱུས་ཡོད་མེད་པ་ཐུག་ཡོད་པ་རེད” ཅེས་སོགས་བརྗོད་སོང་
ཚགས་པ་ཐོག་འཁོད་མེད་ན་ཚགས་པ་ཐོག་འགོད་རོགས་ཟེར་ན་མ་འགྲིག་པ་གང་ཡོག་རེད།
ཁོ་ཁྲོ་ལངས་ནས་བཤད་ན་སུ་ཉན་གྱིས་རེད།
ཀརྨ་རྡོ་རྗེ།
༢༠༡༣/༠༧/༡༤ ཉིན་འདོན་སྤེལ་བྱས།
རཀ་ར་རིན་པོ་ཆེའི་བཀའ་དྲིན་བསམ་ཤེས་བྱེད་མི་ཐུབ་པ་འདི་ནི། སློབ་དཔོན་རིན་པོ་ཆེས། བོད་ལ་ཡག་པོ་བྱས་ན་ཡག་པོ་ཡིན་པ་མི་གོ་།ཞེས་གསུངས་པ་དང་གཅིག་མཚུངས་སུ་མཐོང་ལགས།
གཉན་མི།
༢༠༡༣/༠༧/༡༡ ཉིན་འདོན་སྤེལ་བྱས།
བོད་ཀྱི་ལོ་རྒྱུས་ནང་གི་རྒྱབ་ལྗོངས་ཆེན་པོ་གཉིས་ཏེ་བླ་སྤྲུལ་གྱི་མིང་དང་སྐུ་དྲག་གི་ཐོབ་ཡོད་པའི་རིགས་སུ་གཏོགས་པའི་རཀ་ར་རིན་པོ་ཆེ་ཞེས་པ་མཇལ་མ་མྱོང་ཡང་ཁོང་གི་ཚབ་མཚོན་བརྩམས་ཆོས་རེ་ལ་ལྟ་མྱོང་
གང་ལྟར་སྐབས་དེའི་བབ་ལ་ལྟོས་ནས་སློབ་གཉེར་གནང་རྒྱུའི་གོ་སྐབས་ཐོབ་མྱོང་མཁན་ཞིག་དང་དེ་ལ་དང་དོད་ཡོད་མཁན་ཞིག་ནི་ཡིན་འདུག དོན་དམ་གྱིས་མཁས་པ་ཞིག་ཡིན་ན་སློབ་མ་ཚད་ལྡན་དང་ཡང་ན་བརྩམས་ཆོས་ཚད་ལྡན་དགོས་པ་རེད།
སུ་ཞིག་ལ་རྗེས་དྲན་བྱེད་འདོད་ཡོད་མཁན་དག་གིས་རྗེས་དྲན་བྱེད་ཡུལ་དེའི་མངོན་གསལ་མི་གསལ་གྱི་ཡོན་ཏན་དང་བྱས་རྗེས་གབ་པ་མངོན་བྱུང་དང་རྒྱས་གླེང་བྱེད་དགོས་པ་རེད།
རྗེས་དྲན་བྱེད་ཡུལ་དེ་བེད་སྤྱད་ནས་སྤྱི་ཚོགས་ལ་ཟུར་ཟ་བྱ་དོན་གང་ཡང་མེད། སྤྱི་ཚོགས་ལ་ཁོ་མ་དགོས་པ་དེ་ཁོ་རང་ལ་སྤྱི་ཚོགས་དེ་མ་དགོས་པའི་གསང་བའི་རྒྱུ་མཚན་རེ་ལ་འབྲེལ་བའང་ཡོད། གང་ལྟར་མཐའ་དག་དེ་བཞིན་ནོ།
ཀརྨ་རྡོ་རྗེ།
༢༠༡༣/༠༧/༡༠ ཉིན་འདོན་སྤེལ་བྱས།
མི་ལོ་ ༥༢ རིང་སུད་སིར་རྟེན་གཞི་གནང་ཡང་ཡུལ་མིའི་མི་སེར་ཐོ་བསྒྱུར་མ་བྱས་པར་མཐར་བོད་པ་རང་བྱས་ཏེ་སྐུ་ཚེ་རྫོགས་ཡོད་སྐོར་དང་
མདོ་སྔགས་རིག་གནས་སྒྱུ་རྩལ་དང་བཅས་པའི་མཁས་པའི་ཡང་རྩེ་རཀ་ར་རིན་པོ་ཆེ་རྗེས་དྲན་ཞུ་བ་ཞེས་པའི་རྗེས་དྲན་ཆ་ཚང་གཞན་སུ་གང་ལ་ལས་འཁྲིས་འགན་འཁུར་མེད་པར་མི་ལོ་ ༣༢ རིང་རིན་པོ་ཆེར་འབྲེལ་འདྲིས་ཡོད་པའི་ཉམས་མྱོང་གཞིར་བཞག་ཁོང་རང་ཉིད་ཀྱི་ལྟ་ཚུལ་དང་བསམ་ཚུལ་ཁོ་ན་ཡིན་སྟབས།
མ་འགྲིག་མ་བྱུང་པ་ཅི་ཡོད་ཀྱི་འཁུར་གང་ཡོད་ཆ་ཚང་རྒྱབ་རྟེན་བཀའ་གཉན་བཙན་གསུམ་གང་ཡང་མེད་པའི་བོད་མི་ཉམས་ཆུང་བཀྲ་ཤིས་ཚེ་རིང་གི་མགོ་ཐོག་ཏུ་འགེལ་རོགས་ཞེས་བརྗོད་སོང་། ་ཟེར།
གཅན་བཟོད་རྒྱམ།
༢༠༡༣/༠༧/༡༠ ཉིན་འདོན་སྤེལ་བྱས།
ཨ་ཤུ་རེ་ཁོ། ཉིན་འགར་དྷ་སར་བསྡད་ཡོན་ན་ཏག་ཏག་ཡིན། མཁས་དབང་འདས་པོ་མཆོག་གི་དགོངས་རྫོགས་དུས་དྲན་ལ་ཞུགས་རྒྱུ་མ་བྱུང་བར་བློ་ཕམ།
ང་ཡང་སྔོན་ཆད་ས་རཱ་མཐོ་སྟོབ་ཏུ་སློབ་གཉེར་སྐབས་དམ་པ་ཁོང་གི་གནས་བརྒྱད་རྩ་འགྲེལ་དང་སྤྲིན་གྱི་ཕོ་ཉ་གཉིས་འཆད་ཁྲིད་གནང་སྐབས་དེར་ཉན་རྒྱུའི་སྐལ་བ་ཐོབ་པ་རེད།
སྐབས་དེར་ཁོང་གིས་མཁས་དབང་དགེ་འདུན་ཆོས་འཕེལ་གྱི་སྐོར་སྤྱི་དང་། དགོས་སུ་དགེ་ཆོས་ཀྱིས་ཁོང་ལ་སྙན་ངག་ཁྲིད་སྐབས་མེ་ལོང་མའི་དཔེར་བརྗོད་ལ་འགྲེལ་ཚུལ་དམིགས་བསལ་ཡོད་ཚུལ་སོགས་ཉིན་མང་པོར་འཆད་ཁྲིད་གནང་མོད། ད་ལྟ་ངའི་དྲན་ངོས་སུ་སབ་སུབ་རེ་དང་། ཁ་ཚང་བ་རེ། ཤོད་ཟེར་ན་བཤད་རྒྱུ་འདི་ཡིན་མེད་པ་རེ་མ་གཏོགས་མི་འདུག་པ་སྐྱོའང་
གང་ལྟར་མཁས་དབང་བཀྲ་ཚེ་མཆོག་གིས་འདས་པོ་མཁས་དབང་རཀ་ར་མཆོག་གི་དགོངས་རྫོགས་རྗེས་དྲན་འདུ་ཚོགས་བསྐངས་པར་བཀྲ་དྲིན་ཆེ་ཞུ་རྒྱུ་དང་། དེར་གཏམ་བཤད་གནང་མཁན་ཀརྨ་སྨོན་ལམ་ལགས་དང་བདག་གི་བཀུར་འོས་པའི་ལོ་རྒྱུས་སློབ་དཔོན་ཆེན་མོ་དགེན་བསོད་ནམས་ལགས། ཆུང་ཚེ་རིང་ལགས་སོགས་ལའང་ཞོར་ནས་བཀའ་དྲིན་ཆེ་ཞུའོ།།
རིག་པ་འདོན་པ།
རིག་པ་འདོན་ན་ངེས་པར་དུ་དེབ་སྐྱེལ་བྱེད་དགོས།
འདི་ལ་བསྣུན་ཏེ་དེབ་སྐྱེལ་བྱེད་རོགས།