སྦེལ་ཀོབ་དང་མོན་གྷོའི་རྒན་མགོ་ཚོར་དམིཊ་བསལ་མཇལ་ཁ་བཀའ་སློབ་བསྩལ།

འདོན་སྤེལ། ༢༠༡༣/༠༧/༢༢

ཟླ་འདིའི་ཕྱི་ཚེས་ ༥ ཉིན་ནས་བཟུང་༧གོང་ས་མཆོག་གིས་རྒྱ་གར་ལྷོ་ཕྱོགས་ཁུལ་དུ་ཆིབས་བསྒྱུར་བསྐྱངས་ཏེ། སྦེལ་ཀོབ་བོད་མིའི་གཞིས་སྒར་དང་སེ་ར་བྱེས་སྨད་གཉིས། རྣམ་གྲོལ་གླིང་། བཀྲ་ཤིས་ལྷུན་པོ། རྫོང་དཀར་ཆོས་སྡེ། རྒྱུད་སྨད་གྲྭ་ཚང་། དེ་བཞིན། མོན་གྷོ་འདོད་དགུ་གླིང་བོད་མིའི་གཞིས་སྒར་དང་། དགའ་འབྲས་གཉིས་བཅས་སུ་བཀའ་ཆོས་དང་གཞིས་མི་རྒན་རབས་པ་དག་ལ་དམིགས་བསལ་མཇལ་ཁ་བཀའ་སློབ་བསྩལ་འདུག

ཕྱི་ཚེས་ ༡༧ ཉིན་༧གོང་ས་མཆོག་མོན་གྷོ་འདོད་དགུ་གླིང་དུ་ཞབས་སོར་བཀོད་ཡོད་པ་དང་། ཕྱི་ཚེས་ ༡༨ ཉིན་འབྲས་སྤུངས་སྒོ་མང་གྲྭ་ཚང་གི་དགེ་འདུན་པ་ ༣༢༦ དང་  འབྲས་སྤུངས་བློ་གསལ་གླིང་གྲྭ་ཚང་གི་དགེ་འདུན་པ་ ༢༧༣། དགའ་ལྡན་ཤར་རྩེ་གྲྭ་ཚང་གི་དགེ་འདུན་པ་ ༥༨། དགའ་ལྡན་བྱང་རྩེ་གྲྭ་ཚང་གི་དགེ་འདུན་པ་ ༡༩༥ བཅས་ཁྱོན་དགེ་འདུན་པ་ ༨༥༢ ལ་བསྙེན་རྫོགས་བསྒྲུབས་ཡོད་འདུག

ཚེས་ ༡༩ འབྲས་སྤུངས་བླ་སྤྱིའི་འདུ་ཁང་དུ། མོན་གྷོ་འདོད་དགུ་གླིང་གཞིས་གྲོང་དྲུག་པ་དང་བདུན་པ། བརྒྱད་པ་བཞི་པ་བཅས་ཀྱི་རྒན་མགོ་རྣམས་ལ་དམིགས་བསལ་མཇལ་ཁ་བསྩལ་ཏེ། ཁྱེད་རང་ཚོ་མི་ཚེ་རིང་པོར་བསྡད་པ་རེད། སྐྱེས་པའི་མཐའ་མ་འཆི་བ་ཆོས་ཉིད་ཡིན་ཡང་། ང་ཚོར་ཚེ་རབས་དང་སྐྱེས་རབས་འགྲོ་རྒྱུ་ཡོད་སྟབས། སྐྱེས་པ་ཕྱི་མར་མི་ལུས་འཐོབ་རྒྱུ་དང་བོད་པའི་སྤྱི་ཚོགས་ནང་སྐྱེས་ཏེ་སངས་རྒྱས་བསྟན་པ་དང་བོད་སྤྱི་བར་ཞབས་འདེགས་བསྒྲུབ་ཐུབ་རྒྱུར་ཁྱེད་རང་ཚོས་སྨོན་ལམ་རྒྱོབས། ངས་ཀྱང་སྨོན་ལམ་རྒྱག་དགོསཞེས་གསུངས་ཡོད་འདུག གཞིས་གྲོང་དང་པོ་དང་གཉིས་པ། གསུམ་པ་དང་ལྔ་པ། དགུ་བ་བཅས་ཀྱི་རྒན་མགོ་ཚོར་དགའ་ལྡན་དགོན་དུ་དམིགས་བསལ་མཇལ་ཁ་གནང་རྒྱུ་ཡིན་འདུག

ཕྱི་ཚེས་ ༢༡ ཉིན་དགའ་ལྡན་བྱང་རྩེ་གྲྭ་ཚང་གི་འདུ་ཁང་འོག་ཤོད་དུ། ༧གོང་ས་མཆོག་གིས་སྐྱ་སེར་ཆིག་ཁྲི་བརྒལ་བར་སྒྲོལ་མའི་ཚེ་དབང་གནང་ཡོད་ཅིང་། ཐོག་མར་ནང་ཆོས་ངོ་སྤྲོད་དང་འབྲེལ་ཐོག་མ་བཙན་བྱོལ་དུ་འབྱོར་སྐབས་ཀྱི་ཕོ་གསར་མོ་གསར་དེ་ཚོ་ད་ལྟ་རྒན་མགོ་ཆགས་ཏེ། སོ་སོའི་ཕྲུ་གུ་དང་དེའི་ཕྲུ་གུ་སོགས་འཚར་ལོངས་བྱུང་ཡོད་ཅིང་། མི་སྒེར་ཞིག་གི་མི་ཚེའི་ཐད་ནས་ལོ་ལྔ་བཅུ་ཟེར་བ་ཅུང་རིང་པོ་ཡིན་ཡང་། མི་རིགས་ཤིག་གི་འཐབ་རྩོད་ཀྱི་ཐད་ནས་བཤད་ན་ལོ་ལྔ་བཅུ་དེ་ཐུང་ཐུང་ཡིན་པ། གཞིས་ལུས་རྒྱ་ཆེའི་མི་མང་གི་སྙིང་སྟོབས་དང་ལྷག་བསམ་གཡོ་བ་མེད་པར་གནས་བསྡད་ཡོད་པ་འཛམ་གླིང་ཀུན་གསལ་ཆགས་ཡོད་སྟབས། བོད་མི་ཚོར་ཆོས་དང་སྐད་ཡིག་ལོགས་སུ་ཡོད་པ་དེར་བདག་པོ་རྒྱག་བཙན་བྱོལ་ནང་གི་བོད་མི་ཚོར་ལས་འགན་ཡོད་པ། དེ་རྒྱ་གར་ཙམ་མ་ཡིན་པར་ནུབ་ཕྱོགས་ཡུལ་ཁག་ཏུ་སྡོད་མཁན་ཚོར་ཡང་བོད་མི་རིགས་ཀྱི་ལ་རྒྱ་དང་ཞེན་ཁོག་ཡོད་དགོས་སྐོར་སོགས་གསུངས་འདུག  

གཞན། ཉེ་ལམ་ཟླ་འདིའི་ཚེས་ ༦ ཉིན་སྦེལ་ཀོབ་སེར་བྱེས་གྲྭ་ཚང་གི་འདུ་ཁང་དུ། ༧གོང་ས་མཆོག་དགུང་གྲངས་ ༧༨ ལ་ཕེབས་པའི་སྐུ་འཁྲུངས་སྐར་མཛད་སྒོའི་ཚོགས་དགོན་དུ་ཆིབས་བསྒྱུར་བསྐྱངས་ཡོད་པ་དང་། ཚེས་ ༧ ཉིན་སེར་བྱེས་གྲྭ་ཚང་གི་ཚན་རིག་བསྟི་གནས་ཁང་གསར་པ་དབུ་འབྱེད་རབ་གནས་དང་འབྲེལ། ཚན་རིག་སློབ་སྦྱོང་གནང་མཁན་གྱི་དགེ་འདུན་ ༡༢༠ ཙམ་ལ་བཀའ་སློབ་བསྩལ་དོན།ཁྱེད་རང་ཚོས་ཚན་རིག་ལ་སློབ་སྦྱོང་བྱེད་རྒྱུ་དེ་སོ་སོའི་ཤེས་བྱའི་གནས་གཅིག་པུ་མིན། སངས་རྒྱས་ཀྱི་བསྟན་པ་དུས་རབས་ཉེར་གཅིག་པ་འདིིའི་ནང་ཚན་རིག་པས་འཛམ་གླིང་འདིའི་ཐོག་བདེན་དོན་རྩོད་ཀྱི་ཡོད་པ་རྩོད་མེད་ཡོངས་གྲགས་རེད། སངས་རྒྱས་པའི་ཆོས་དེ་ཚན་རིག་པ་དང་མཉམ་དུ་འགྲེལ་བཤད་རྒྱག་ཐུབ་པ་དང་ལག་སྦྲེལ་གཏོང་ཐུབ་པ་ཞིག་བྱུང་ན། དེ་ཡང་ངོས་ཀྱིས་སངས་རྒྱས་པའི་ཆོས་སྤེལ་རྒྱུའི་དོན་དག་མིན་པར། འཛམ་གླིང་འདིའི་ཐོག་མིའི་རྣམ་དཔྱོད་སྤེལ་རྒྱུར་ངོས་ཀྱིས་འབད་བརྩོན་བྱེད་བཞིན་ཡོད།ཅེས་སོགས་གསུངས་འདུག

ཕྱི་ཚེས་ ༨ ཉིན་སེར་སྨད་ཐོས་བསམ་ནོར་གླིང་གྲྭ་ཚང་དུ་ཕེབས་ཏེ་སེར་སྨད་གཙུག་ལག་ཁང་དུ་གནས་གཟིགས་དང་། སེར་སྨད་གྲྭ་ཚང་དང་དགའ་ལྡན་ཤར་རྩེ་གྲྭ་ཚང་གཉིས་ཀྱིས་བསམ་བློ་རྒྱ་ཆེ་ས་ནས་བཏང་སྟེ་དཀའ་ངལ་ལ་གདོང་ལེན་གྱིས་དད་པ་དམ་ཚིག་གཙང་མ་བཟོས་པར་བསྔགས་བརྗོད་དང་། དགེ་འདུན་པ་ ༥༠༠ ཙམ་ལ་བསྙེན་རྫོགས་ཀྱི་སྡོམ་པ་འབོགས་གནང་ཡོད་པ་དང་། ཉིན་དེའི་ཉིན་རྒྱབ་ཆུ་ཚོད་ ༢ ཙམ་ལ། རྒྱ་གར་གྲོང་ཁྱེར་བྷིང་ལོར་ཁུལ་དུ་མཐོ་སློབ་འགྲིམ་བཞིན་པའི་འབྲུག་པའི་སློབ་ཕྲུག་ ༡༠༠ ལྷག་ལ་མཇལ་ཁ་དང་བཀའ་སློབ་བསྩལ་ཡོད་འདུག

ཕྱི་ཚེས་ ༡༡ ཉིན་གྱི་སྔ་དྲོར་སྦེལ་ཀོབ་ལུགས་བསམ་བསམ་གྲུབ་གླིང་གཞིས་ཆགས་ཀྱི་མཉམ་འབྲེལ་ཚོགས་ཁང་ཆེན་མོ་དབུ་འབྱེད་རབ་གནས་དང་། སྦེལ་ཀོབ་གཞིས་ཆགས་གསར་རྙིང་གཉིས་ཀྱི་ལོ་ ༦༠ བརྒལ་བའི་རྒན་རྒོན་ ༡༠༠༠ ལྷག་ལ་མཇལ་ཁ་དང་ཁོ་ཚོའི་མི་ཚེ་དོན་དང་ལྡན་པ་ཞིག་བྱུང་ཡོད་སྐོར་དང་། རང་གི་ལུས་པོས་དཀའ་ལས་བརྒྱབ་སྟེ་བོད་བསྟན་སྲིད་ལ་ཞབས་འདེགས་བསྒྲུབས་པ་དེ་བསོད་ནམས་ཆེན་པོ་བསགས་ཡོད་པ་དེའི་མཐུ་ལ་བརྟེན་ནས་ཚེ་རབས་ནས་ཚེ་རབས་མི་ལུས་ཐོབ་ཐུབ་རྒྱུ་དང་། མི་ལུས་ཀྱི་ནང་ནས་ཀྱང་བོད་པའི་མི་རིགས་ཤིག་ཐོབ་རྒྱུའི་སྨོན་ལམ་རྒྱོབས་དང་སྨོན་ལམ་དེ་བསྒྲུབ་ངེས་རེད། ཅེས་སོགས་ཀྱི་བཀའ་སློབ་གནང་ཡོད་འདུག

གཞན། གཞིསགྲོང་དང་པོའི་བྱང་ཆུབ་མཆོད་རྟེན་ལ་རབ་གནས་དང་སྔ་འགྱུར་རྙིང་མའི་གདན་ས་རྣམ་གྲོལ་གླིང་དུ་ཆིབས་བསྒྱུར་བསྐྱངས་ཏེ། དགོན་པ་དེའི་གྲྭ་བཙུན་ ༣༠༠༠ ཉེ་བར་སངས་རྒྱས་ཀྱི་བསྟན་པ་ནི་ལུང་རྟོགས་ཀྱི་བསྟན་པར་ཐུག་ཡོད་པ་ལྟར། ཐོས་བསམ་སྒོམ་གསུམ་གནང་བའི་ཐོག་ནས་རང་རྒྱུད་ལ་ལུང་རྟོགས་གཉིས་ཀྱི་ཡོན་ཏན་གྱི་ཕྱུག་པ་ཞིག་བྱེད་རྒྱུ་དང་། ལུང་རྟོགས་ཀྱི་བསྟན་པ་འཛིན་སྐྱོང་སྤེལ་གསུམ་བྱ་གལ་ཆེ་བས་དེའི་ཐད་ཚང་མས་ཧུར་སྐྱེད་གནང་དགོསཔ། བོད་ཀྱི་སངས་རྒྱས་བསྟན་པ་དང་སྐད་ཡིག་དེ་བོད་ཀྱི་ཆབ་སྲིད་དང་འབྲེལ་བ་ཆགས་ཡོད་པ་མ་ཟད། བོད་མི་རིགས་ཀྱི་བླ་སྲོག་དེ་ཡང་སངས་རྒྱས་ཀྱི་བསྟན་པ་དང་བོད་ཀྱི་སྐད་ཡིག་གིས་བཟུང་ཡོད་སྐོར་བཀའ་སློབ་དང་ དགེ་འདུན་པ་ ༢༠ ཙམ་ལ་བསྙེན་རྫོགས་བསྒྲུབས་ཏེ་ཞག་བཞུགས་གནང་ཡོད་འདུག

ཕྱི་ཚེས་ ༡༢ ཉིན་གྱི་སྔ་དྲོར་བཀྲ་ཤིས་ལྷུན་པོར་ཆིབས་བསྒྱུར་གྱིས་ཆོས་རྭགསར་པ་དབུ་འབྱེད་རབ་གནས་དང་དགེ་འདུན་པ་རྣམས་ལ་བཀའ་སློབ་གནང་རྗེས་རྫོང་དཀར་ཆོས་སྡེ་གྲྭ་ཚང་དུ་ཆིབས་བསྒྱུར་བསྐྱངས་ཏེ། ཆོས་ཞུ་བ་ཆིག་ཁྲི་བརྒལ་བར་དགྲ་ནག་བཅུ་གསུམ་མའི་བཀའ་དབང་དང་བསྩལ་ཡོད།  

ཕྱི་ཚེས་ ༡༤ ཉིན་རྒྱུད་སྨད་གྲྭ་ཚང་དུ་༸པཎ་ཆེན་བློ་བཟང་ཆོས་རྒྱན་མཆོག་གིས་མཛད་པའི་ཕྱག་རྒྱ་ཆེན་པོའི་རྩ་འགྲེལ་དབྱངས་གསལ་སྒྲོན་མེའི་བཀའ་ཁྲིད་གནང་ཡོད་པ་དང་ཕྱི་ཚེས་ ༡༥ ཉིནམི་མང་ལ་བཀའ་སློབ་བསྩལ་ཡོད། ཁོང་གིས་མུ་མཐུད་དུ། བཙན་བྱོལ་དུ་ང་ཚོ་བོད་མི་འབུམ་གཅིག་དང་ཕྱེད་ཀ་ལྷག་ཡོད། དེའི་ནང་ནས་དངོས་གནས་སངས་རྒྱས་ཀྱི་བསྟན་པར་ཕྲན་བུ་གོ་བ་ཆགས་ཏེ་ཡོང་མཁན་ཉུང་ཉུང་རེད། སངས་རྒྱས་ཀྱི་བསྟན་པ་དཔལ་ན་ལེནྡྲའི་ཆོས་བརྒྱུད་དྲི་མ་མེད་པ་དེ་ཁ་ཡོད་ལག་ཡོད་ཀྱིས་འཛིན་རྒྱུའི་གོ་སྐབས་ཡོད་པ་དེ་ཕལ་ཆེར་ང་ཚོ་འདི་གར་ཡོད་པའི་ཉུང་ཤས་དེ་དག་རེད། ང་ཚོས་ཕྲན་བུ་གཟབ་ནན་དང་རིག་པ་མ་སྒྲིམ་ན་གཞན་དག་གིས་བྱེད་མཁན་ཡོད་པ་མ་རེད། བསྟན་པ་འཛིན་ཞེས་པ་ནི་གཙོ་བོ་ང་ཚོའི་རྒྱུད་ཀྱི་སེམས་མ་དུལ་བ་དེ་དག་འདུལ་བ་དང་མ་ཞི་བ་དེ་ཞི་བར་བྱེད་རྒྱུའི་ཐོག་ནས་འཛིན་དགོས་ཀྱི་ཡོད། སེམས་མ་དུལ་བ་འདུལ་བ་དང་མ་ཞི་བ་དེ་ཞི་བར་བྱེད་རྒྱུ་དེ་ཡང་ཡིད་ཆེས་དང་། སྨོན་ལམ། གཟུངས་སྔགས་བགྲངས་པ་ཁོ་ན་མིན། མ་དུལ་བ་བྱེད་མཁན་དེའི་མཚང་རྟོལ་ནས་ནུས་མེད་གཏོང་དགོས། མཚང་བརྟོལ་རྒྱུ་དེ་ཡང་དབང་ཡོད་ཤོད་རྒྱུ་མེད་སྟབས། རྒྱུ་མཚན་དྲངས་ནས་མཚང་བརྟོལ་དགོས་པར་བརྟེན་ཆོས་རབ་ཏུ་འབྱེད་པའི་རྣམ་དཔྱོད་ཀྱི་ཤེས་རབ་ཐོག་ནས་ཡོང་དགོས་པ་ཞིག་རེད།ཅེས་བཀའ་སློབ་གནང་ཡོད་འདུག

ཕྱི་ཚེས་ ༡༦ ཉིན་གྱི་སྔ་དྲོར་རྒྱུད་སྨད་གྲྭ་ཚང་དུ་ཆོས་ཞུ་བ་རྣམས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་གནང་བ་དང་འབྲེལ་བཀའ་སློབ་གནང་དོན། སྤྱིར་བཏང་ང་ཚོ་བོད་པའི་གནས་ཚུལ་ཕྱོགས་གཅིག་ནས་གཉན་འཕྲང་གི་དུས་ཚོད་ཐོག་བསླེབས་ཡོད། ང་ཚོ་བཙན་བྱོལ་དུ་ཡོད་མཁན་རྣམས་རང་དབང་གི་ལུང་པར་གནས་ཡོད། ང་ཚོའི་ལས་འགན་ནི་སོ་སོ་རང་ཉིད་འཚོ་གནས་ཁོ་ནའི་སྐད་ཆ་མིན། ང་ཚོ་བོད་མི་རིགས་ཀྱི་རིག་གཞུང་དང་བཅས་པའི་ཆེད་དུ་ཡིན་སྟབས། ང་ཚོ་རང་དབང་ལུང་པའི་ནང་གང་ལྟར་སོ་སོའི་དམིགས་ཡུལ་བཟུང་སྟེ་འགན་འཁྱེར་རྒྱུ་ཧ་ཅང་གལ་ཆེན་པོ་རེད། གལ་ཆེ་ཤོས་གཞོན་སྐྱེས་ཁྱེད་རང་ཚོ་རྒྱ་གར་དུ་སྐྱེས་ནས་འདི་གར་སློབ་སྦྱོང་བྱས་པ་དང་ཆབས་ཅིག་འཚར་ལོངས་ཡོང་བཞིན་ཡོད། ང་ཚོ་བོད་པ་དང་བོད་པའི་ཆོས་ཞེས་པ་འདི་གང་འདྲ་ཞིག་ཡིན་པ་དོ་སྣང་བྱས་ཐོག་སློབ་སྦྱོང་བྱས་ཏེ་ཤེས་པ་བྱེད་རྒྱུ་ཧ་ཅང་གལ་ཆེན་པོ་རེད། རྩ་བ་བོད་ཡིག་ཡིན་པར་བརྟེན་ཚང་མས་བོད་ཡིག་ལ་དོ་སྣང་བྱེད་རོགསཞེས་སོགས་བཀའ་གནང་ཡོད་འདུག

ཤོག་ངོས་འདི་ཐེངས་ ༡༩༢༠ ལ་བཀླགས་འདུག
རིག་པ་འདོན་པ།
བསྟན་འཛིན་ཐོག་མེད།
༢༠༡༣/༠༧/༢༢ ཉིན་འདོན་སྤེལ་བྱས།
“སེར་སྨད་གྲྭ་ཚང་དང་དགའ་ལྡན་ཤར་རྩེ་གྲྭ་ཚང་གཉིས་ཀྱིས་བསམ་བློ་རྒྱ་ཆེ་ས་ནས་བཏང་སྟེ་དཀའ་ངལ་ལ་གདོང་ལེན་གྱིས་དད་པ་དམ་ཚིག་གཙང་མ་བཟོས་པར་བསྔགས་བརྗོད་དང་།” ཞེས་གསུངས་པ་དེའི་ནང་དོན་ག་རེ་ཡིན་ནམ། དོལ་རྒྱལ་སྐོར་ལ་གསུང་གི་ཡོད་པ་རེད་དམ་ཡང་ན་ལོ་རྒྱུས་ཐཽག་ནས་གསུང་གི་ཡོད་པ་རེད་དེ་གཅིག་ཤཻས་འདོད་བྱུང་སོང་། དེ་ནས་༧གོང་ས་མཆོག་གིས་ད་རེས་སྦེལ་ལ་ཀོབ་པེ་དང་མོན་སྒོ་ཊི་གཉིས་ཀྱི་བོད་མིའི་གཞིས་གྲོང་ཁག་གི་རྒན་འཁོགས་ཚོར་དམིགས་བསལ་མཇལ་ཁ་དང་བཀའ་སློབ་གསུང་བཤད་གནང་བ་དེ་ཧ་ཅང་གལ་ཆེན་པོ་ཞིག་རེད། སྤྱིར་བཏང་བཙན་བྱོལ་བོད་མིའི་གཞིས་ཆགས་ཁག་ཚང་མའི་ནང་དུ་ལྷག་ཡོད་པ་ནི་སྔོན་མ་བཙན་བྱོལ་ལ་ཐོག་མར་ཡོང་མཁན་གྲས་ཀྱི་རྒན་མགོ་ཚོ་ཆགས་བསྡད་ཡོད་པ་རེད། ཁོང་ཚོ་ང་ཚོའི་བཙན་བྱོལ་སྤྱི་ཚོགས་གསར་འཛུགས་དང་དེ་རིང་གི་གནས་སྟངས་འདི་ལྟ་བུར་འཕེལ་རྒྱས་གཏོང་མཁན་གྱི་དཀའ་སྡུག་ཉེན་ཕྲེང་དུས་ཀྱི་འཐབ་མོ་བ་དག་རེད། དེའི་རྗེས་ཀྱི་གཞོན་པ་དག་ནི་སློབ་གྲྭ་དང་ཚོང་ལ་ཕྱིན་པ་དང་མང་ཤས་ཤིག་ཕྱི་རྒྱལ་ཁག་ཏུ་ཕྱིན་ཏེ་བཙན་བྱོལ་བོད་མིའི་སྤྱི་ཚོགས་ལ་ཕན་ཐོགས་པ་ཕར་ཞོགས་གཞིས་ཆགས་ཁག་གི་ཁང་པ་སང་ཞང་ས་སྲུང་ནས་སྡོད་མཁན་ཡང་ཐུབ་ཀྱི་ཡོད་པ་མ་རེད།
ཀརྨ་རྡོ་རྗེ།
༢༠༡༣/༠༧/༢༢ ཉིན་འདོན་སྤེལ་བྱས།

རྒན་མགོ་ལས། རྒན་རྒོན་འདི་དག་པ་འདུག་སྙམ་ལགས།

ཀརྨ་རྡོ་རྗེ།
༢༠༡༣/༠༧/༢༢ ཉིན་འདོན་སྤེལ་བྱས།
ཁྱེད་རང་ཚོ་མི་ཚེ་རིང་པོར་བསྡད་པ་རེད། སྐྱེས་པའི་མཐའ་མ་འཆི་བ་ཆོས་ཉིད་ཡིན་ཡང་། ང་ཚོར་ཚེ་རབས་དང་སྐྱེས་རབས་འགྲོ་རྒྱུ་ཡོད་སྟབས། སྐྱེས་པ་ཕྱི་མར་མི་ལུས་འཐོབ་རྒྱུ་དང་བོད་པའི་སྤྱི་ཚོགས་ནང་སྐྱེས་ཏེ་སངས་རྒྱས་བསྟན་པ་དང་བོད་སྤྱི་བར་ཞབས་འདེགས་བསྒྲུབ་ཐུབ་རྒྱུར་ཁྱེད་རང་ཚོས་སྨོན་ལམ་རྒྱོབས། ངས་ཀྱང་སྨོན་ལམ་རྒྱག་དགོས་ཞེས་གསུངས་ཡོད་འདུག ་
བཙན་བྱོལ་དུ་ང་ཚོ་བོད་མི་འབུམ་གཅིག་དང་ཕྱེད་ཀ་ལྷག་ཡོད། དེའི་ནང་ནས་དངོས་གནས་སངས་རྒྱས་ཀྱི་བསྟན་པར་ཕྲན་བུ་གོ་བ་ཆགས་ཏེ་ཡོང་མཁན་ཉུང་ཉུང་རེད། སངས་རྒྱས་ཀྱི་བསྟན་པ་དཔལ་ན་ལེནྡྲའི་ཆོས་བརྒྱུད་དྲི་མ་མེད་པ་དེ་ཁ་ཡོད་ལག་ཡོད་ཀྱིས་འཛིན་རྒྱུའི་གོ་སྐབས་ཡོད་པ་དེ་ཕལ་ཆེར་ང་ཚོ་འདི་གར་ཡོད་པའི་ཉུང་ཤས་དེ་དག་རེད། ང་ཚོས་ཕྲན་བུ་གཟབ་ནན་དང་རིག་པ་མ་སྒྲིམ་ན་གཞན་དག་གིས་བྱེད་མཁན་ཡོད་པ་མ་རེད། ་
གལ་ཆེ་ཤོས་གཞོན་སྐྱེས་ཁྱེད་རང་ཚོ་རྒྱ་གར་དུ་སྐྱེས་ནས་འདི་གར་སློབ་སྦྱོང་བྱས་པ་དང་ཆབས་ཅིག་འཚར་ལོངས་ཡོང་བཞིན་ཡོད། ང་ཚོ་བོད་པ་དང་བོད་པའི་ཆོས་ཞེས་པ་འདི་གང་འདྲ་ཞིག་ཡིན་པ་དོ་སྣང་བྱས་ཐོག་སློབ་སྦྱོང་བྱས་ཏེ་ཤེས་པ་བྱེད་རྒྱུ་ཧ་ཅང་གལ་ཆེན་པོ་རེད། རྩ་བ་བོད་ཡིག་ཡིན་པར་བརྟེན་ཚང་མས་བོད་ཡིག་ལ་དོ་སྣང་བྱེད་རོགས། ་
རིག་པ་འདོན་པ།
རིག་པ་འདོན་ན་ངེས་པར་དུ་དེབ་སྐྱེལ་བྱེད་དགོས།
འདི་ལ་བསྣུན་ཏེ་དེབ་སྐྱེལ་བྱེད་རོགས།