དགའ་ལྡན་ཕོ་བྲང་དང་དབུ་མའི་ལམ་གཉིས་ཁ་ཁ་རེད་ཟེར།

འདོན་སྤེལ། ༢༠༡༣/༠༧/༢༥

ཉེ་ལམ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་བཅོ་ལྔ་པའི་ཐོག གཞོན་ནུའི་རང་བཙན་ལངས་ཕྱོགས་ལ་འགྱུར་བ་གཏོང་མིན་ཐོག་དགོངས་ཚུལ་མི་མཐུན་པ་བྱུང་སྟེ། གཞོན་ནུའི་ས་གནས་ཁག་ཅིག་ཚོགས་ཆེན་ལས་ཕྱིར་ཐོན་པ་སོགས་ཀྱི་གནས་ཚུལ་བྱུང་ཡོད་སྟབས། སྐབས་བཅུ་བཞི་བའི་གཞོན་ནུའི་སློབ་སྟོན་པ་རྒན་ལྷ་བཟང་ཚེ་རིང་ལགས་སུ་བཅར་འདྲི་ཞུས་ཡོད།

དྲི་བ། རྒན་ལགས་བོད་ཀྱི་གཞོན་ནུ་ལྷན་ཚོགས་ཀྱི་སློབ་སྟོན་པར་བཞུགས་པའི་གནས་ཚུལ་ཞིག་འདུག དེའི་སྐོར་ངོ་སྤྲོད་ཅིག་གནང་རོགས།

ལན། གཞོན་ལྷན་གྱི་སློབ་སྟོན་པར་བསྐོ་བའི་ལམ་སྲོལ་དེ་གཅིག་ནས་གཞོན་ནུའི་སྒྲིག་འཛུགས་ངོས་ནས་གང་ཟག་དེར་མཐོང་དང་བརྩི་བཀུར་ཡོད་པར་ངོས་འཛིན་བྱེད་པ་ཞིག་དང་། གཉིས་ནས་དུས་རྒྱུན་གྱི་ལས་ཀའི་ཐད་ནས་ང་ཚོ་རྒྱུན་ལས་རྙིང་པ་ཚོ་གཞོན་ནུའི་ཚོགས་མི་རྒན་རབས་པ་ཡིན་སྟབས་ཉམས་མྱོང་གི་ཐོག་ནས་སྐབས་རེར་ལམ་སྟོན་ཞུ་ཆེད་དང་། ལྷག་པར་དུ་དཀའ་ངལ་འདྲ་འཕྲད་སྐབས་ཕན་ཐོགས་ཕྲན་བུ་རེ་བྱུང་ན་སྙམ་ནས་སློབ་སྟོན་པར་བསྐོ་བཞིན་ཡོད་པ་རེད། རྒྱུན་ལས་རྙིང་པའི་སྐབས་སུ་ང་སློབ་སྟོན་པ་གནང་རོགས་ཞེས་འབོད་སྐུལ་གནང་སོང་། ང་འདྲ་བོ་སྤྱི་ཚོགས་ནང་མཐོང་ཚུལ་ཤུགས་ཆེན་པོ་ཡོད་མཁན་ཞིག་གཞོན་ནུའི་སྒྲིག་འཛུགས་རྩ་ཆེན་པོ་འདིའི་སློབ་སྟོན་པར་མ་བསྐོ་རོགས། ལས་ཀ་ག་རེར་བཀོལ་ན་ངས་ཐུབ་ཚོད་ཀྱིས་ཤུགས་རྒྱག་དགོས་ལབ་ཡིན། འོན་ཀྱང་ཁོང་ཚོས་ཨུ་ཚུགས་བརྒྱབ་པ་བཞིན་ཁས་ལེན་བྱས་པ་ཡིན། ད་རྒྱུན་ལས་རྙིང་པ་འཁྱོལ་བ་ཡིན་སྟབས་སློབ་སྟོན་པའང་རང་བཞིན་གྱིས་འཁྱོལ་ཚར་བ་རེད།

དྲི་བ། གཞོན་ནུའི་འགན་འཛིན་ལྷན་ཚོགས་སྟེང་། བོད་མིའི་སྒྲིག་འཛུགས་ཀྱི་ཆབ་སྲིད་ལངས་ཕྱོགས་ལ་འགྱུར་བ་གཏོང་དགོས་ཞེས་གྲོས་ཆོད་བཞག་པ་སོགས་ལ་ད་རེབ་དགོངས་སེལ་ཞུས་པའི་ཐད་གཟིགས་ཚུལ་གང་འདྲ་ཡོད་དམ།   

ལན། བོད་གཞུང་གི་ལངས་ཕྱོགས་ལ་འགྱུར་བ་གཏོང་དགོས་པའི་གྲོས་ཆོད་བཞག་པ་དེའི་ཐད་ང་ཚོའི་མགོ་ཁྲིད་རྣམ་པ་ཚོ་དང་། ལྷག་པར་དུ་མང་ཚོགས་ནང་ལའང་བསམ་ཚུལ་ཡོང་གི་ཡོད་རེད། ང་ཚོ་དམངས་གཙོ་ཡིན་ལབ་ཀྱི་ཡོད་རེད། གཞོན་ནུའི་ངོས་ནས་ང་ཚོ་དམངས་གཙོ་ཡིན་པ་རང་ལ་ཡིད་ཆེས་བྱས་ཏེ། དམངས་གཙོའི་སྤྱི་ཚོགས་ནང་གཞུང་གི་སྲིད་བྱུས་སོ་སོའི་བློར་ལ་མ་མཐུན་པ་དང་འདོད་པ་མེད་པ་ཡོད་ན་འགྱུར་བ་གཏོང་རྒྱུར་ཐབས་ཤེས་བྱེད་ཆོག་གི་རེད། དེ་ལ་དགོངས་དག་ཞུ་དགོས་པའི་གནས་ཚུལ་ཞིག་མཐོང་མ་སོང་། དེ་བཞིན། དགའ་ལྡན་ཕོ་བྲང་གི་མཚན་བྱང་བརྗེ་བསྒྱུར་ལ་གཞོན་ནུས་མོས་མཐུན་མ་བྱས་པ་དེ་ཡང་། ལོ་རྒྱུས་ཐོག་གནད་འགག་ཅིག་ཆགས་ཡོད། གང་ཡིན་ཟེར་ན། གཞུང་འདི་བཙན་བྱོལ་དུ་གནས་པའི་བོད་གཞུང་རེད་མ་གཏོགས་བཙན་བྱོལ་མི་མང་གི་གཞུང་མ་རེད། ད་ལྟ་ང་ཚོས་རྩོད་བཞིན་པ་འདི་དེ་སྔོན་བོད་རང་བཙན་ལྡན་པའི་རྒྱལ་ཁབ་ཅིག་ཡིན། དེ་ཡིན་པའི་ཁུངས་སྐྱེལ་གཅིག་ང་ཚོའི་གཞུང་དགའ་ལྡན་ཕོ་བྲང་རེད། འདིའི་མིང་ལོ་རྒྱུས་ཀྱི་ཐོག་ནས་གལ་ཆེན་པོ་ཞིག་ཆགས་བསྡད་ཡོད་སྟབས། འདི་ལ་བདག་པོ་རྒྱག་གི་ཡིན་ཟེར་པ་དེ་འགྲིག་བསྡད་ཡོད་རེད། དེར་དགོངས་དག་ཞུ་དགོས་པ་ཞིག་ངས་མཐོང་གི་མེད། དགའ་ལྡན་ཕོ་བྲང་དང་དབུ་མའི་ལམ་གཉིས་རྦད་དེ་ཁ་ཁ་རེད། རྒྱལ་དབང་སྐུ་ཕྲེང་རིམ་བྱོན་གྱིས་བོད་རྒྱལ་ཁབ་དང་མི་རིགས་ཀྱི་དབུ་ཁྲིད་གནང་པའི་ལམ་སྲོལ་དང་དེའི་མིང་བྱང་ཕྱིར་བསྡུ་གནང་གི་ཡིན་གསུང་ན་དེ་རྒྱལ་དབང་སྐུ་ཕྲེང་རིམ་བྱོན་གྱི་སྐུ་དབང་རེད། འོན་ཀྱང་། དབུ་མའི་ལམ་འདི་བོད་རྒྱལ་ཁབ་དང་མི་རིགས་ཀྱི་མ་འོངས་པའི་གནད་དོན་ཞིག་གི་སྟེང་ལ་ལམ་སྟོན་བྱེད་པའི་སྲིད་བྱུས་ཤིག་ཡིན་སྟབས། བོད་རྒྱལ་ཁབ་ཀྱི་ཤི་དང་གསོན་ལ་ཐུག་པའི་གནད་དོན་ཞིག་ཡིན་དུས་མི་མང་ལ་འབྲེལ་བ་ཆགས་ཡོད་རེད། དེར་བརྟེན་བློ་མཐུན་པས་རྒྱབ་སྐྱོར་བྱེད་ཆོག་གི་རེད་ལ། བློ་མི་མཐུན་པས་སྐྱོན་འཛུགས་ཀྱང་བྱེད་ཆོག་གི་རེད་དྲན་ཡོད།

དྲི་བ། གཞོན་ལྷན་གྱི་སྒྲིག་གཞིའི་མགོར་༧གོང་ས་མཆོག་གི་བཀའ་དགོངས་འོག་འགྲོ་རྒྱུ་ཡིན་ཟེར་བ་དང་། དེའི་འོག་ཏུ་རང་བཙན་བཤད་བསྡད་པ་དེ་འགལ་ཟླ་ཞིག་ཏུ་མཐོང་གི་ཡོད་དམ།

ལན། གཞོན་ལྷན་ཐོག་མ་བཙུགས་དུས་བོད་གཞུང་གི་ལངས་ཕྱོགས་རང་བཙན་རེད། གཞོན་ནུའི་སྒྲིག་གཞི་སྐབས་དེར་གཏན་འབེབས་བྱས་པ་ཞིག་རེད། ཕྱིས་སུ་རྒྱལ་བ་རིན་པོ་ཆེ་མཆོག་གིས་དབུ་མའི་ལམ་ལ་དགོངས་འཆར་བཏོན། བོད་གཞུང་གིས་དབུ་མའི་ལམ་གཏན་འབེབས་གནང་པ་རེད། ཡིན་ནའང་གཞོན་ནུས་དབུ་མའི་ལམ་ལ་རྒྱབ་སྐྱོར་ཁས་ལེན་མ་བྱས་པ་དེ་ག་རེ་རེད་ཟེར་ན། རྒྱལ་བ་རིན་པོ་ཆེ་ཡིས་ཐོག་མ་དབུ་མའི་ལམ་གསལ་བསྒྲགས་གནང་སྐབས། ང་ཚོའི་དཀའ་ངལ་སེལ་རྒྱུར་ཞེ་དྲག་ཁག་པོ་དང་འུ་ཐུག་པའི་གནས་སྟངས་ཤིག་ལ་བསླེབས་ཡོད་པ་རེད། དཀའ་ངལ་འདི་སེལ་རྒྱུའི་ཐབས་ལམ་ངས་འདི་འདྲ་ཞིག་དྲན་གྱི་འདུག མཐའ་མའི་ཐག་གཅོད་བོད་མི་མང་ཡིན་ཞེས་གསུངས་པ་རེད། སི་ཊ་སི་སྦག་གི་གྲོས་འཆར་དོན་ཚན་ལྔ་ལ་གཟིགས་དང་གསལ་བོ་ཡོད། དེར་བརྟེན། བོད་ཀྱི་གཞོན་ནུ་ལྷན་ཚོགས་འདི་བོད་མི་མང་ནང་གི་སྒྲིག་འཛུགས་ཤིག་ཡིན་སྟབས། སོ་སོའི་དབུ་ཁྲིད་ལ་སོ་སོའི་བསམ་ཚུལ་དྲང་པོར་ཞུས་པ་རེད།

དྲི་བ། བོད་ནང་གི་ད་ལྟའི་ཛ་དྲག་གནས་སྟངས་དང་རྒྱ་ནག་གཞུང་གི་བཤད་སྤྱོད། རྒྱལ་སྤྱིའི་རྒྱབ་སྐྱོར་གྱི་ཁ་ཕྱོགས་བཅས་ལ་གཞིགས་ན་རང་བཙན་ལས་དབུ་མའི་ལམ་བོད་དོན་སེལ་རྒྱུར་ཅུང་ཐག་ཉེ་བར་མཐོང་གི་མེད་དམ།

ལན། རྒྱལ་དབང་སྐུ་ཕྲེང་རིམ་བྱོན་བོད་རྒྱལ་ཁབ་དང་མི་རིགས་ཀྱི་དབུ་ཁྲིད་གནང་གི་མིན་གསུང་པ་ཡིན་ན། དེའི་རྗེས་ལ་སྐུ་སྒེར་བོད་མི་ཡིན་པའི་ཆ་ནས་མ་གཏོགས་དབུ་ཁྲིད་ཡིན་པའི་ཆ་ནས་གསུང་སྟངས་ཡོད་མ་རེད། གང་ཡིན་ཟེར་ན་ཁོང་དབུ་ཁྲིད་མ་རེད། ང་ཚོའི་མི་མང་གིས་ཤེས་དགོས་པ་གལ་ཆེ་ཤོས་ཤིག་ནི། གཞོན་ལྷན་གྱིས་ཐོག་མ་དབུ་མའི་ལམ་འགྲིག་གི་མི་འདུག་ཅེས་ཞུ་མཁན་དེ་ང་ཡིན། སྐབས་དེར་ང་གཞོན་ནུའི་ཚོགས་གཙོ་རེད། རྒྱལ་བ་རིན་པོ་ཆེ་ཡིས་སི་ཊ་སི་སྦག་གི་དགོངས་འཆར་གནང་པའི་ཉིན་མོ་རང་ལ་དེ་འགྲིག་མ་སོང་ཞུས་པ་ཡིན། ངས་དེ་ཞུ་དགོས་པའི་རྒྱུ་མཚན་ནི་གཅིག་ནས་ང་ཚོའི་རང་བཙན་འཐབ་རྩོད་དེ་བདེན་པའི་འཐབ་རྩོད་ཅིག་རེད། ཚོང་མ་རེད། ཚོང་ཡིན་ན་བརྗེ་བོ་རྒྱག་ཆོག་གི་རེད། བདེན་པའི་འཐབ་རྩོད་དེ་ཐོབ་ན་རྩོད་རྒྱུ་ཞིག་དང་མ་ཐོབ་ན་གཡུག་ཆོག་པ་ཞིག་མ་རེད། ང་ཚོའི་ལམ་དབུ་མ་རང་མཐའ་གཅིག་ཏུ་འགྲིག་གི་མི་འདུག་ཟེར་གྱི་ཡོད་པ་མ་རེད། ཆ་རྐྱེན་གསུམ་བཞག་པའི་ཐོག་ཞུ་བའི་གྲོས་འཆར་དོན་ཚན་ལྔ་ལ་ང་ཚོ་གཞོན་ནུས་རྒྱབ་སྐྱོར་བྱས་ཡོད་རེད། འོན་ཀྱང་དབུ་མའི་ལམ་འགྲུབ་དང་མ་འགྲུབ་ཆ་ཚང་དགྲ་བོ་རྒྱ་དམར་གྱི་སྲིད་གཞུང་ལ་རག་ལས་ཡོད། ང་ཚོ་རྒྱ་དམར་གཞུང་ལ་རེ་བ་དང་ཡིད་ཆེས་མེད། ང་ཚོའི་ཕ་མ་གསོད་མཁན་མི་དེ་ཚོ་ལ་ང་ཚོའི་བུ་ཕྲུག་བདག་པོ་རྒྱག་རྒྱུ་དེ་རྩིས་སྤྲོད་ཐུབ་ས་མ་རེད་ཞུ་གི་ཡོད། ༡༩༥༡ ལོའི་གྲོས་མཐུན་དོན་ཚན་བཅུ་བདུན་གྱི་བསླབ་བྱ་དེ་ང་ཚོས་བརྗེད་ཉན་གི་མི་འདུག་ཟེར་གྱི་ཡོད། ཁ་སྙན་པོ་བཤད་དེ་གྲོས་ཆོད་བཞག བོད་ནང་ལམ་ཁ་བཟོས་ཏེ་དཔུང་དམག་ཚང་མ་བོད་དུ་བསླེབས་ཚར་རྗེས། གྲོས་མཐུན་དེ་དག་ཁོ་རང་ཚོས་རྡོག་རོལ་བཏང་སོང་། དེ་བཞིན། ད་ལྟ་རྒྱལ་སྤྱིའི་སྡིངས་ཆའི་སྟེང་གི་རྒྱལ་བ་རིན་པོ་ཆེའི་མཚན་སྙན་གྲགས་དང་ང་ཚོ་བཙན་བྱོལ་སྒྲིག་འཛུགས་ཚགས་ཚུད་པོ་ཡོད་དུས། གཞིས་ལུས་མི་མང་ཡར་ལངས་བརྒྱབ་ནས་ཡོང་གི་ཡོད་དུས། དབུ་མའི་ལམ་ལ་ཁས་ལེན་ཁུལ་བྱས་ཏེ། ང་ཚོའི་བཙན་བྱོལ་གཞུང་སྒོ་བརྒྱབ། རྒྱལ་སྤྱིའི་སྟེང་གི་བོད་དོན་ལས་འགུལ་ཚང་མ་སྒོ་བརྒྱབ། རྒྱལ་བ་རིན་པོ་ཆེ་ཕར་གདན་འདྲེན་ཞུས་རྗེས། ལམ་དབུ་མ་རྩིས་མེད་བཏང་པ་ཡིན་ན་ང་ཚོས་ག་རེ་བྱེད་རྒྱུ་ཡིན། ངས་དབུ་མའི་ལམ་འདི་ཉེན་ཁ་ཆེན་པོ་ཞིག་རེད་ཟེར་དོན་འདི་ཡིན།   

དྲི་བ། གཞོན་ནུའི་ཚོགས་མིའི་ཁྲོད་དབུ་མའི་ལམ་ལ་འགྱུར་བ་གཏོང་དགོས་པའི་བསམ་ཚུལ་ཡོང་གི་ཡོད་པ་དང་། ད་རེབ་ཚོགས་ཆེན་ཐོག་ས་གནས་ཁག་ཅིག་ཕྱིར་འཐེན་བྱས་པའི་ཐད་དགོངས་ཚུལ་ག་རེ་ཡོད།

ལན། ཐོག་མ་གཞོན་ནུའི་སྒྲིག་འཛུགས་ནང་ཞུགས་སྐབས། གཞོན་ནུའི་དམིགས་ཡུལ་ལངས་ཕྱོགས་ཤེས་པའི་ཐོག་ནས་ཞུགས་པ་ཡིན་སྟབས། སྒྲིག་འཛུགས་དེར་བརྩི་བཀུར་ཞུ་དགོས་རེད། ཕྱིས་སུ་བསམ་བློར་འགྱུར་བ་ཐེབས་ནས་ད་ལྟའི་སྒྲིག་འཛུགས་ཀྱི་ཆབ་སྲིད་ལངས་ཕྱོགས་ལ་འདོད་མོས་མེད་པ་ཡིན་ན་སྒེར་ངོས་ནས་དགོངས་པ་ཞུ་ཆོག་གི་རེད། ས་གནས་སོ་སོའི་ཚོགས་མི་ཚོགས་འདུ་ཚོགས་ཏེ་ཐག་གཅོད་བྱས་པ་ཞིག་ཡིན་ན། དེ་ཕངས་པོ་ཞེ་དྲག་རེད། ཁོ་ཚོས་དེ་བྱེད་ཆོག་གི་རེད་དམ་ཟེར་ན་ཆོག་གི་རེད། ཡིན་ནའང་། གཞོན་ནུའི་སྒྲིག་འཛུགས་ལ་འགྱུར་བ་གཏོང་རྒྱུ་དང་གཞོན་ནུའི་སྒྲིག་འཛུགས་འདི་མེད་པ་བཟོ་རྩིས་བྱས་ན་འགྲིག་གི་མ་རེད། དབུ་མའི་ལམ་གྱི་ཐོག་ངས་བསམ་ཚུལ་ཤུགས་ཆེ་ཤོས་ཞུ་རྒྱུ་དེ། དབུ་མའི་ལམ་འགྲིག་དང་མ་འགྲིག་ཆ་ཚང་དགྲ་བོ་རྒྱ་དམར་ལ་རག་ལས་ཡོད་པ་རེད། ངས་རྒྱུན་དུ་དགྲ་བོ་རྒྱ་དམར་ལ་རེ་བ་དང་ཡིད་ཆེས་མེད་ཞུ་བཞིན་ཡོད། ལམ་དབུ་མ་ཡག་པོ་ཡོད་ཅེས་ང་ཚོ་ལ་གསུང་བསྡད་ན་ཕན་གྱི་མི་འདུག ག་རེ་བྱས་ནས་ཟེར་ན་བོད་ནང་ལ་གཞོན་ནུ་ལྷན་ཚོགས་ཀྱིས་བཙན་འཛུལ་བྱས་ཡོད་མ་རེད། དེ་ལས་ལམ་དབུ་མ་ཡག་པོ་ཡོད་རབས་དེ་དགྲ་བོ་རྒྱ་དམར་ལ་འགྲེལ་བཤད་བསྐྱོན་ཏེ་ལམ་དབུ་མ་བསྒྲུབ་རོགས་ཞེས་ཞུ་བ་འཐེན་དགོས་པ་རེད། ལམ་དབུ་མ་བསྒྲུབས་ཏེ་ང་ལྟ་བུ་ལྐུགས་པ་ནོར་འཁྲུལ་ཡིན་པ་ཁུངས་སྐྱེལ་བ་ཡིན་ན་ང་སྐྱིད་པོ་ཞེ་དྲག་ཅིག་ཡོང་ས་རེད། གཞོན་ནུའི་རང་བཙན་ལངས་ཕྱོགས་ལ་འགྱུར་བ་བཏང་ན་ང་ཚོས་དབུ་མའི་ལམ་ལ་ཁས་ལེན་བྱེད་ཀྱི་ཡིན་ཞེས་རྒྱ་དམར་གཞུང་གིས་ཆ་རྐྱེན་བཞག་ཡོད་པ་རེད་དམ། ལམ་དབུ་མ་ལ་བདག་པོ་མ་བརྒྱབ་པ་ཡིན་ན་ཕར་ཕྱོགས་ནས་རང་བཙན་ཐོག་འགྲོ་རྒྱུའི་ཉེན་ཁ་ཞིག་མཐོང་སྟེ། ལམ་དབུ་མར་བདག་པོ་རྒྱག་པ་ལ་རེ་བ་ཆེ་རུ་འགྲོ་གི་རེད་མ་གཏོགས། གཞོན་ནུའི་ལངས་ཕྱོགས་རང་བཙན་བཟུང་པ་དེས་དབུ་མའི་ལམ་ལ་ཕན་པ་མ་གཏོགས་གནོད་ཡོད་པ་མ་རེད།

དྲི་བ། སྐུ་ཉིད་ཀྱི་དགོངས་ཚུལ་ལྟར་ན། བོད་ཀྱི་གཞོན་ནུ་ལྷན་ཚོགས་ཀྱི་ལས་འགན་གཙོ་བོ་གང་དག་ཡིན་པར་ངོས་འཛིན་གནང་གི་ཡོད་དམ།

ལན། གཞོན་ནུའི་ལས་དོན་ཐད་ནས་ནུས་པ་ཆེ་ཤོས་ཆབ་སྲིད་སྟེང་འཇོག་དགོས་རེད། ལས་འགུལ་ལས་ད་དུང་གོ་སྐབས་འདྲ་མིན་འཛིན་དགོས་རེད། རྒྱལ་སྤྱིའི་སྡིངས་ཆའི་སྟེང་ངོ་བོ་དང་ཁྱབ་ཁོངས་འདྲ་མིན་ཐོག་ནས་གོ་སྐབས་ལེན་ཐུབ་དགོས་རེད། རྒྱལ་སྤྱིའི་སྡིངས་ཆའི་སྟེང་བོད་ཀྱི་བུད་མེད་ཀྱི་སྡིངས་ཆ་ཞིག་འཛིན་ཐུབ་རྒྱུ་གལ་ཆེན་པོ་ཡིན་སྟབས་བུད་མེད་ལྷན་ཚོགས་ཐོག་མར་ངས་བཙུགས་པ་ཡིན། སྒྲིག་གཞི་ཡན་ཆད་ངས་བཟོས་པ་ཡིན། དེ་བཞིན་ང་ཚོའི་སྤྱི་ཚོགས་ནང་ཆོལ་ཁ་ཆོས་ལུགས་ཀྱི་ལམ་སྲོལ་འདི་ཏག་ཏག་བསྡད་མི་འདུག མ་འོངས་པར་སྲིད་དོན་ཚོགས་པའི་ལམ་སྲོལ་ལ་འགྲོ་དགོས་རེད། དམངས་གཙོ་དངོས་སུ་ལག་བསྟར་བྱ་རྒྱུར་སྲིད་དོན་ཚོགས་པའི་ལམ་ལུགས་ནང་འགྲོ་དགོས་རེད་ཅེས་བོད་རྒྱལ་ཡོངས་མང་གཙོ་ཚོགས་པ་ངས་བཙུགས་པ་ཡིན། སྒྲིག་གཞི་ངས་བྲིས་པ་ཡིན། དེ་དུས་སྤྱི་འཐུས་ཀརྨ་ཆོས་འཕེལ་ལ་རེ་བ་ཞུས་ཏེ་ཚོགས་གཙོ་དང་པོ་ཁོང་གནང་པ་རེད། མ་འོངས་པར་གཞོན་ལྷན་མུ་མཐུད་གནས་དགོས་པར་རྒྱུ་མཚན་གཞན་པ་མང་པོ་ཡོད་རྒྱུ་རེད་དེ། གལ་ཆེ་ཤོས་རང་བཙན་གྱི་དམིགས་ཡུལ་དང་རེ་བའི་བདེན་པའི་མར་མེ་འདི་ཤི་རུ་མ་བཅུག་པར་གནས་ཐུབ་རྒྱུར་གཞོན་ནུའི་སྒྲིག་འཛུགས་འདི་ཡིན་གཅིག་མིན་གཉིས་གནས་དགོས་ཀྱི་འདུག

དྲི་བ། ད་རེབ་གཞོན་ནུའི་ཚོགས་ཆེན་བཅོ་ལྔ་པའི་སྟེང་འབོད་སྐུལ་ཞུས་དོན་ལྟར། དགའ་ལྡན་ཕོ་བྲང་གི་སྐུ་ཚབ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ཕེབས་ཏེ་བཀའ་སློབ་གནང་བའི་ཐོག་དགོངས་ཚུལ་གང་འདྲ་ཡོད་དམ།

ལན། ཟམ་གདོང་རིན་པོ་ཆེ་ཡིས་གསུངས་པ་ནང་བཞིན་གཞོན་ནུ་ལྷན་ཚོགས་ལས་འགུལ་ཚོགས་པ་རེད་མ་གཏོགས་བོད་གཞུང་གི་ཁ་གཏད་ཚོགས་པ་མ་རེད་གསུངས་པ་དེ་བདེན་པ་རེད། ཡིན་ནའང་། གཞོན་ལྷན་སོ་སོའི་སྤྱི་ཚོགས་ཀྱི་ཆ་ཤས་ཤིག་ཡིན་པ་གཅིག་དང་། འདི་སོ་སོའི་གཞུང་ཡིན་སྟབས། སྐྱོན་བརྗོད་བྱེད་ཆོག་པ་ཙམ་མ་ཟད། གཞུང་གི་ནོར་འཁྲུལ་ལ་སྐྱོན་བརྗོད་བྱེད་རྒྱུ་དེ་ལས་འགན་ཞིག་ཆགས་ཡོད་རེད་མ་གཏོགས་སྐྱོན་འདོན་མཁན་དེ་སྡུག་ཅག་མ་རེད། སྐྱོན་བརྗོད་དེ་ཡར་རྒྱས་ཀྱི་ཆེད་དུ་རེད། ཆབ་སྲིད་ལངས་ཕྱོགས་ཀྱི་ཐོག་ནས་ང་ཚོས་དབུ་མའི་ལམ་ལ་ཁས་ལེན་བྱེད་མ་ཐུབ་པ་དེ་གོང་དུ་ཞུས་པ་ནང་བཞིན་རེད། གཞུང་གི་ལངས་ཕྱོགས་རང་བཙན་ལ་འགྱུར་བ་གཏོང་དགོས་ཀྱི་འདུག་ཟེར་བ་དེས་ཁ་གཏད་ཚོགས་པ་ཡིན་ཟེར་གྱི་ཡོད་མ་རེད། སོ་སོ་སྤྱི་ཚོགས་འདིའི་ཆ་ཤས་ཤིག་ཡིན་པས་རེད། ཁ་གཏད་ཚོགས་པ་ཟེར་ནས་གཞུང་གང་དེ་མར་ཕབ་སྟེ་སོ་སོས་གཞུང་འཛིན་ཐབས་བྱེད་ཀྱི་ཡོད་པ་མ་རེད།  ང་ཚོའི་གཞུང་དེ་ག་རང་གནས་པའི་ཐོག་སྲིད་བྱུས་དང་ལངས་ཕྱོགས་ལ་འགྱུར་བ་གཏོང་ཐབས་བྱེད་པ་མ་གཏོགས་གཞུང་འགྱུར་བ་གཏོང་གི་ཡིན་ཟེར་གྱི་ཡོད་མ་རེད།

གསར་འགོད་པ། བནྡེ་སྐྱབས།

བོད་ཀྱི་དུས་བབ་ཚགས་པར་ལས་འདིར་བཀོད།

ཤོག་ངོས་འདི་ཐེངས་ ༥༡༤༣ ལ་བཀླགས་འདུག
རིག་པ་འདོན་པ།
ཀརྨ་རྡོ་རྗེ།
༢༠༡༣/༠༧/༢༩ ཉིན་འདོན་སྤེལ་བྱས།
རྒྱལ་སྤྱིའི་སྡིངས་ཆའི་སྟེང་བོད་ཀྱི་བུད་མེད་ཀྱི་སྡིངས་ཆ་ཞིག་འཛིན་ཐུབ་རྒྱུ་གལ་ཆེན་པོ་ཡིན་སྟབས་བུད་མེད་ལྷན་ཚོགས་ཐོག་མར་ངས་བཙུགས་པ་ཡིན། སྒྲིག་གཞི་ཡན་ཆད་ངས་བཟོས་པ་ཡིན།
དེ་བཞིན་ང་ཚོའི་སྤྱི་ཚོགས་ནང་ཆོལ་ཁ་ཆོས་ལུགས་ཀྱི་ལམ་སྲོལ་འདི་ཏག་ཏག་བསྡད་མི་འདུག མ་འོངས་པར་སྲིད་དོན་ཚོགས་པའི་ལམ་སྲོལ་ལ་འགྲོ་དགོས་རེད།
དམངས་གཙོ་དངོས་སུ་ལག་བསྟར་བྱ་རྒྱུར་སྲིད་དོན་ཚོགས་པའི་ལམ་ལུགས་ནང་འགྲོ་དགོས་རེད་ཅེས་བོད་རྒྱལ་ཡོངས་མང་གཙོ་ཚོགས་པ་ངས་བཙུགས་པ་ཡིན། ་
མི་རྒོད།
༢༠༡༣/༠༧/༢༩ ཉིན་འདོན་སྤེལ་བྱས།

གནས་ཚུལ་འདི་འདྲ་ཡིན་ན་ང་ཚོ་ད་གང་བྱེད་དམ་?


ལྷག་པར་དུ་འཛམ་གླིང་དཔལ་འབྱོར་ཁྲོམ་རའི་ནང་རྒྱ་ནག་སླེབས་ཐུབ་མེད་པ་མ་ཟད་ཁྲོམ་རའི་ཕྱི་ལོགས་སུ་ཡང་རྒྱ་ནག་གི་ཤུགས་རྐྱེན་གང་ཡང་ཡོད་པ་མ་རེད། ད་ལྟའི་སྐབས་ལ་མཉམ་འབྲེལ་རྒྱལ་ཚོགས་ལ་རྒྱ་ནག་གིས་བཟོ་ལྟ་ག་རེ་བཟོ་བཟོ་ཆགས་ཡོད་ལ། འཛམ་གླིང་རྒྱལ་ཁབ་ཆུང་ཁག་རྒྱ་ནག་གི་རྗེས་སུ་ཁྱི་བཞིན་འདུར་རྒྱུག་བྱེད་ཀྱིན་ཡོད། མ་ཟད་ཨ་རི་དང་ཡུ་རོབ་རྒྱལ་ཁབ་སྟོབས་ཆེན་དག་ཀྱང་རྒྱ་ནག་གི་ཕྱོགས་སུ་གཡོ་བཞིན་ཡོད་པ་ཚང་མས་མཐོང་གསལ་རེད།
མི་རྒོད།
༢༠༡༣/༠༧/༢༩ ཉིན་འདོན་སྤེལ་བྱས།
ཀྱེ་རྒན་ལགས་ལྷག་བསམ་ལགས། སྐུ་ཉིད་ཀྱི་ད་བར་སེམས་ཤུགས་ཆེན་པོས་ཕྱག་ལས་གནང་བ་བཀྲིན་བླ་མེད་དུ་ཆེ། ད་ེམིན་ཁྱེད་ཀྱིས་བཀའ་སློབ་རྣམས་རྒྱུ་ཚན་ཡང་དག་ལྡན་འདུག་རེད་རེད་དགའ་ལྡན་ཕོ་བྲང་དང་དབུ་མིའི་ལམ་གཉིས་ཁ་ཕྱོགས་གཅིག་པ་མ་རེད་དེ་འདྲ་ཡིན་ན་ཨ་བོད་མིའི་བསྒྲིགས་འཛུགས་འདི་བླ་མིའི་གཞུང་ཆགས་པ་རེད། དེ་ཡིན་ན་མང་གཙོ་ཞེས་པ་དོན་མེད་ཆགས་པ། ད་དེང་སྐབས་རྒྱ་དམར་ཡང་འོ་ད་བོད་གཞོན་ནུ་ཚོགས་པ་ཟེར་བ་དེ་ཉམས་ནས་ཏཱ་ལིའི་བླ་མས་ཀྱང་བརྒྱབ་སྐྱོར་མེད་པ་ཆགས་ཤག་ཞེས་དགའ་བསུ་བྱེད་པ་ནི་ཁོ་ཚོར་སེམས་ནང་ད་བར་གནོན་ཤུགས་ཆེན་པོ་བྱུང་བ་གསལ་པོ་རེད། གོང་ས་མཆོག་༡༩༨༤དུས་དབང་སྐབས་ ད་བོད་ལ་ལོག་རྒྱུ་ཡོང་གི་རེད་ཁྱེད་རང་བློ་བདེ་པོ་བྱིས་སེམས་སྐྱིད་པོ་བྱིས་གསུངས་པ་བྱུང་ཡོ་བ་རེད་ཁོང་བྱང་ཆུབ་སེམས་པ་གཞན་དོན་ཁོ་ན་དགོངས་པ་བརྟེན་སྡུག་པོ་ག་དུས་ཀྱང་གསུངས་ཀྱི་མ་རེད་བོད་མི་ཚོ་ད་གཉིད་སད་ཤོག། སྔོན་སི་ཏྲས་སི་སྦག་ཏུ་དོན་མཚན་བཅུ་བདུན་གྲོས་མདུན་དེ་ཡང་དེང་གི་དུས་གནང་ཐུབ་ཚེ་གང་ཅིའི་བསྒྱུར་བ་ཆེ་བའི་དུས་སྐབས་རེད་ཤག། ང་ཚོ་མང་གཙོ་ཡིན་ན་སྨྲ་བརྗོད་རང་དབང་ལག་བསྟར་དགོས་པ་རེད་དེ་ཡང་གོང་ས་མཆོག་ཞལ་བཞུགས་དུས་རྩོད་དགོས་པ་རེད། ནམ་ཞིག་དུས་ཚོད་ནག་ཁུང་ཅན་སླེབས་སྐབས་རྩོད་པ་ན་ཟ་ཟིང་ཧ་ཅང་ཆེ་ལ་དབུ་མ་དང་། རང་བཙན་སོགས་གང་ཡང་མེད་པ་ཞིག་ཆགས་ཉེན་ཡོང་རྒྱུ་བརྟེན་དངོས་ནས་གཟབ་དགོས་པ་རེད། བོད་བདེན་པ་ཉིད་རྟག་ཏུ་རྒྱལ་གྱུར་ཅིག།།།
མི་རྒོད།
༢༠༡༣/༠༧/༢༨ ཉིན་འདོན་སྤེལ་བྱས།
འོ་རྒན་ལྷག་བསམ་ལགས་བཀྲིན་ཆེ་རེད་རེད་ང་ཚོ་ག་ཚོད་འཇམས་ཀྱང་རྒྱུ་འབྲས་ཇེ་སྡུག་རེད། ད་འདི་འདྲ་ཟེར་གནོན་ཤུགས་སྤྲད་ཐུབ་ཚེ་རྒྱ་དམར་ཀྱག་པ་མ་ཤོར་ཡང་གཅིན་པ་ག་ཤོར་བཟོ་ངེས་རེད། དེང་སྐབས་རྒྱ་དམར་ནས་ད་བོད་ཀྱི་གཞོན་ནུ་ཟེར་བ་ཁོ་ཏཱ་ལི་བླ་མས་མི་དགོས་ཞེས་ལབ་ནས་ཉམས་འགྲོ་ལེ་ཡོད་རེད་པ་ཞེས་བོད་ནས་གཉེན་འཕྲད་དུ་འགྲོ་མི་ལ་འདྲི་གཅོད་སྐབས་སྐད་མཐོ་པོས་ལབ་བཞིན་ཡོད་རེད།། སྔོན་མ་ཨ་ལེ་ད་གཞོན་ནུ་ཚོགས་པ་ག་རེ་བྱེད་ཀྱི་འདུག་ཟེ་འདྲ་ཞེ་སྣང་དང་གི་རྣམ་འགྱུར་དང་འབྲེལ་ལབ་བཞིན་ཡོད་རེད། དེར་བརྟེན་གོང་ས་མཆོག་ཞལ་མ་བཞུགས་ཀྱང་ང་ཚོའི་མི་ཐོག་འདི་མུ་འཐུད་དགོས་དུས་བསམ་བློ་ནན་གཏན་གཏོང་དགོས། རྒྱལ་ཁབ་གཞན་གྱི་བསླུ་ཁྲིད་འོག་མ་ཤོར་བ་ཞིབ་༡༩༨༤ ལོར་གོང་ས་མཆོག་ང་གཏན་གཏན་ལོག་རྒྱུ་ཡོང་གི་རེད་གསུངས་པ་རེད་བློ་བདེ་པོ་བྱིས་སེམས་སྐྱིད་པོ་བྱིས་གསུངས་པ་ད་ག་པ་བོད་མི་ཚོ་ཁོང་འདུ་བྱའི་ཁམས་དང་མོས་པ་ལ་བྱང་སེམས་ལྡན་པ་ཡིན་རྩང་འདི་འདྲ་གསུངས་མཁྱེན་སོང་ཧ་ཧ་ཧ་ གདོངས་པ་ཡག་པོ་ལ་དགས་སུ་ཁོང་གི་ང་ལ་ནོང་འགྱོད་མེད་ངས་ཧུར་བརྩོན་བྱས་པ་བོད་བདེན་ཆེད་གསུང་ས་རེད་ཁོང་གིས་དེ་གནང་པ་རེད། ད་ང་ཚོ་ཁོང་ལ་མ་བརྟེན་རང་འགོ་རང་འཕེར་དགོས་པ་རེད་གསུངས་པ་ཧ་གོ་སོང་
འབྲུག་གྲགས་རྒྱལ་པོ།
༢༠༡༣/༠༧/༢༧ ཉིན་འདོན་སྤེལ་བྱས།
ལྷ་བཟང་སྨྱོ་བཞག །མང་གཙོ་ཚོགས་པ་དང་བུད་མེད་ཚོགས་པ་གཉིས་ངས་བཙུགས་པ་ཡིན་ཟེར།
nyimowa
༢༠༡༣/༠༧/༢༧ ཉིན་འདོན་སྤེལ་བྱས།
དགའ་ལྡན་ཕོ་བྲང་དང་དབུ་མའི་ལམ་ཁ་ཁ་རེད་ཟེར་བ་ནི་ཕྲུ་གུ་ལ་བཤད་ཡ་གི་གཏམ་ཞིག་རེད། ༧གོང་ས་མཆོག་དང་དགའ་ལྡན་ཕོ་བྲང་གཉིས་དབྱེ་བ་མེད་པ་ཞིག་ཡིན་པར་སོང་༧གོང་ས་མཆོག་གི་ཆབ་སྲིད་ཀྱི་ལམ་ཕྱོགས་ནི་ལམ་དབུ་མ་ཡིན་པ་ཙམ་དུ་མ་ཟད་ལམ་དབུ་མ་ཟེར་བ་དེ་༧གོང་ས་མཆོག་ནས་ཆབ་སྲིད་ལམ་སྟོན་གནང་བ་ཞིག་ཡིན་ཙང་དགའ་ལྡན་ཕོ་བྲང་དང་ལམ་དབུ་མ་གཉིས་ཁ་ཁ་མ་རེད་གཅིག་པ་རེད་དོ།
ལྷ་བཟང་ལགས་ནས་གསུངས་དོན་བཞིན་ཟམ་གདོང་བླ་མས་གཞོན་ལྷན་ཁ་གཏད་ཚོགས་པ་མ་རེད་ཟེར་བ་ཡང་མི་བདེན་དེ།
ལྷ་བཟང་ལགས་ནས་གལ་སྲིད་ཁ་གཏད་ཚོགས་པ་ཡིན་ན་གཞུང་འཛིན་པ་དེ་མར་ཕབ་ནས་སོ་སོས་གཞུང་འཛིན་པ་ཞིག་ལ་གོ་དགོས་གསུངས་མེད་དམ། དེ་ལྟར་ཡིན་ན་གཞོན་ལྷན་གྱི་དགོས་དོན་གཙོ་བོ་གཞུང་གི་ཆབ་སྲིད་ལམ་ཕྱོགས་དེ་དབུ་མའི་ལམ་ནས་འགྱུར་བ་གཏང་ནས་རང་བཙན་གཙང་མའི་ཆབ་སྲིད་ཀྱི་གཞུང་ཞིག་འགྱུར་རྒྱུ་དེ་རེད། གཞུང་རང་བཙན་གཙང་མའི་ཆབ་སྲིད་ཞིག་ཏུ་འགྱུར་བའི་ཉིན་དེར་གཞོན་ལྷན་སོ་སོས་གཞུང་འཛིན་པ་གནང་དགོས་ངེས་རེད། གང་ཡིན་ཟེར་ན་གཞུང་གི་ཆབ་སྲིད་ལམ་ཕྱོགས་དེ་སྒྲིག་གི་མི་འདུག་འགྱུར་བ་གཏོང་དགོས་གསུངས་མཁན་གཞོན་ལྷན་ཉག་གཅིག་ཡིན་པས་སོ།
གོང་དུ་ལྷ་བཟང་ནས་བཤད་པའི་གཏམ་དེ་རང་བཞིན་གྲུབ་སོང་བ་རེད། གཞུང་འཛིན་དབུ་མའི་ལམ་མར་ཕབ་ནས་ཆབ་སྲིད་ལམ་ཕྱོགས་རང་བཙན་གཙང་མའི་གཞོན་ལྷན་གཞུང་འཛིན་པ་ཆག་རྒྱུ་དེ་རེད། རྒྱུ་མཚན་དེ་དག་ལ་རྟེན་གཞོན་ལྷན་ད་ལྟའི་དབུ་མའི་ལམ་གྱི་གཞུང་འཛིན་པའི་ཁ་གཏད་ངོ་མ་དེ་རེད་དོ།
མཉམ་ཞུགས
༢༠༡༣/༠༧/༢༧ ཉིན་འདོན་སྤེལ་བྱས།
དྲ་གྲོགས་བོད་ཀྱི་བུ་ལགས།ང་དྲ་འབུ་ཞིག་གིས་ཤེས་པའི་དངོས་གནས་ཚུལ་དེ་ཁྱོད་བོད་ཀྱི་བུ་ཞིག་གིས་ད་དུང་ཤེས་མེད་པ་དེ་ཏོག་ཙམ་བློ་ཕམ་བྱུང་།ཨ་རིའི་གྲོས་ཚོགས་གོང་འོག་གི་ཚོགས་གཙོ་དང་ཚོགས་མི་རྣམས་ཀྱིས་རྒྱ་ནག་གཞུང་ལ་༸གོང་ས་མཆོག་གི་སྐུ་ཚབ་རྣམས་དང་གྲོས་མོལ་བྱས་ཏེ་བོད་ཀྱི་དཀའ་ངལ་སེལ་དགོས་པར་ཡང་དང་རིམ་པར་སྣོན་ཤུགས་སྤྲོད་ཀྱི་ཡོད་པ་དེའང་དབུ་མའི་ལམ་གྱི་ལྟ་གྲུབ་ལ་རྒྱབ་སྐྱོར་བྱས་ཏེ་དེ་ལྟར་སྣོན་ཤུགས་སྤྲད་པ་ལས་རང་བཙན་ལ་རྒྱབ་སྐྱོར་བྱས་པ་མ་ཡིན་པ་བོད་ཀྱི་བུ་ཁྱོད་ཀྱིས་མཚོན་པའི་བོད་མི་རྣམས་ཀྱི་ངེས་པར་ཤེས་དགོས་པའི་གནད་དོན་ཞིག་ཡིན་པར་སེམས།ད་དུང་བོད་ཀྱི་བུ་ཁྱོད་ཀྱིས་བོད་རང་བཙན་ལ་ཨ་རི་དང་རྒྱ་གར་སོགས་ཀྱིས་རྒྱབ་སྐྱོར་བྱེད་ཀྱི་མེད་པ་ལ་སྐྲག་དགོས་ཡོད་མ་རེད་ཅེས་ང་ལ་བསླབ་བྱ་རྒྱགས་སྟངས་ལ་བལྟོས་ན་ཁྱེད་རང་ཡང་བདེ་འཇགས་ཡིན་པའི་ས་ཆ་ཞིག་ལ་སླེབས་ཡོད་ས་རེད།སོ་སོ་བདེ་ས་སྐྱིད་ས་ནས་བསྡད་དེ་ཁ་ནས་དཀའ་སྡུག་དང་ནོར་གཅོད་མྱོང་བཞིན་པའི་གཞི་ལུས་བོད་མི་རྣམས་ལ་ཤ་ཚ་མདོག་མདོག་གིས་ཁོང་ཚོའི་དཀའ་སྡུག་སེལ་རྒྱུར་རེ་བ་དང་ཁ་ཕྱོགས་ཏོག་ཙམ་ཡོད་ས་ནས་གཏན་ནས་མེད་སར་འཁྲིད་མཁན་རྣམས་ལ་དངོས་ཡོད་གནས་ཚུལ་ལས་རིང་དུ་བརྒལ་བའི་ཚིག་རྐམ་པོ་དེ་ལ་དེ་འདྲའི་ཞེན་ཆགས་བྱེད་དགོས་དོན་ཅི་ཞིག་ཡིན་མིན་ང་དངོས་གནས་དོགས་པ་ཟ་གི་འདུག
བོད་ཀྱི་བུ།
༢༠༡༣/༠༧/༢༦ ཉིན་འདོན་སྤེལ་བྱས།
དྲ་འབུ་མཉམ་ཞུགས་ལགས། བོད་རང་བཙན་བཤད་ན་ཨ་རི་དང་རྒྱ་གར་གྱི་རྒྱབ་སྐྱོར་བྱེད་གི་མེད་པར་ཁྱེད་རང་ཧ་སངས་ནས་སྐྲག་དགོས་མ་རེད། བོད་རང་བཙན་བོད་མི་ཡོད་ཚད་ཀྱིས་རྩོད་དགོས་རེད་མ་གཏོགས་ཕྱི་ཞིག་ལ་རེ་བ་བརྒྱབ་ན་ལྐུགས་པ་རེད། ཨ་རི་དང་རྒྱ་གར་སོགས་ཀྱིས་དབུ་མའི་ལམ་ལ་རྒྱབ་སྐྱོར་བྱེད་ཀི་ཡོད་མ་རེད་དོ། ཡོད་ན་ཡོད་ལས་ཡོད་སྟོན་དང་། ད་ལྟ་དབུ་མའི་ལམ་གང་ལ་ལུས་བསྡད་ཤེས་སམ།
ཀརྨ་རྡོ་རྗེ།
༢༠༡༣/༠༧/༢༦ ཉིན་འདོན་སྤེལ་བྱས།
། བོད་རང་བཙན་ཡིན་པ་བདེན་པ་ཡིན་ཞེས་བདེན་པའི་ཚིག་རྐམ་ཞིག་ཁ་ཁྱེར་ནས་སྡོད་༼ལྷག་བསམ་༽པའང་ཞིབ་ཏུ་བསམ་ཚེ་བོད་མི་དམངས་ཀྱི་བདེ་སྡུག་ལ་འགན་འཁུར་གྱི་མེད་པ་མ་ཟད་ཉིན་རེར་འཚོ་ཐབས་འཁྱོལ་དཀའ་བའི་དཀའ་སྡུག་འོག་ཡོད་པའི་གཞི་ལུས་བོད་མི་རྣམས་ལ་ཤ་ཚ་ཙམ་ཡང་གཏན་ནས་མེད་པའི་དན་རྟགས་ཤིག་ཏུ་མཐོང་སོང་། ་ཟེར།
མཉམ་ཞུགས
༢༠༡༣/༠༧/༢༦ ཉིན་འདོན་སྤེལ་བྱས།
ལྷ་བཟང་ཚེ་རིང་ལགས་ནས་ཁོ་རང་རྒྱ་དམར་གཞུང་ལ་ཡིད་ཆེ་དང་རེ་བ་མེད་ཅེས་བཤད་པ་ལྟར་ང་ཡང་ལྷ་བཟང་ཚེ་རིང་ལ་ཡིད་ཆེ་དང་རེ་བ་རྩ་བ་མེད།གཅིག་བྱས་ན་ང་སྔོན་མ་ཁོ་ལ་ཡིད་ཆེ་དང་རེ་བ་ཆེ་དྲགས་པས་ཀྱང་ཡིན་སྲིད།སྐབས་ཤིག་ལ་ང་རང་གིས་མཚོན་པས་བོད་མི་མང་པོ་ཞིག་གིས་ཁོ་དངོས་དོན་གྱི་བོད་ཀྱི་རང་དབང་འཐབ་རྩོད་པ་ཞིག་ཏུ་ངོས་འཛིན་གྱིས་གུས་བཀུར་བྱེད་མྱོང་།དེ་དུས་ཁོས་བོད་རང་བཙན་མ་ཐོབ་བར་དུ་ཁྱིམ་ཐབ་མི་འཛིན་པར་བཤད་མྱོང་ཡོད་ལ་རྡ་ས་སོགས་སུ་ས་ཆ་དང་ཁང་པ་ཉོ་མཁན་རྣམས་ལ་ཁོས་ཁ་བརྡུངཡང་བཏང་མྱོང་ཡོད།ཁོས་ཆང་ས་བརྒྱབས་ཏེ་ཁྱིམ་ཐབ་མི་འཛིན་པའི་རྒྱུ་མཚན་ནི་དེ་ལྟར་བྱས་ཚེ་བོད་དོན་འཐུས་ཤོར་ལ་འགྲོ་ངེས་རྒྱུ་མཚན་གྱིས་ཡིན་པར་བཤད་ཀྱིན་ཡོད།འོན་ཀྱང་དེང་སྐབས་ང་ཚོས་བལྟས་ཚེ་དེ་དུས་བོད་དོན་ཁོ་ན་ལས་བསམ་རྒྱུ་མེད་པའི་ལྷ་བཟང་ཚེ་རིང་ཁོང་གི་ཁོག་པའི་ནང་མི་གཞན་ཞིག་ཞུགས་པ་མིན་ཚེ་ཁོས་དེ་དུས་བཤད་པའི་སྐད་ཆ་དེ་དག་ཚང་མ་རྫུན་མ་རྫུན་རྐྱང་ཡིན་པ་ང་ཚོས་གསལ་བོར་ཤེས་ཐུབ་པ་ཡིན།ཁོས་ཆང་ས་བརྒྱབས་ནས་ཁྱིམ་ཐབ་བཟུང་ཡོད་པ་མ་ཟད་ས་ཆ་ཉོས་ཏེ་ཁང་པ་ཐོག་བརྩེགས་ཀྱང་བརྩིགས་ཡོད།འདི་དག་ཚང་མ་ཁོ་རང་རང་གིས་དམ་བཅའ་ལ་རྡོག་བརྫུས་བྱས་པ་ལས་བཙན་བྱོལ་སྒྲིག་འཛུགས་སོགས་སུ་ཞིག་གིས་ཀྱང་ཁོ་ལ་བཙན་བཀའ་བཏང་མྱོང་མེད།དེ་ཕྱིར་ངས་ཁོ་རང་གིས་བོད་རང་བཙན་
བློས་གཏོང་ཐུབ་ཀྱི་མེད་པ་དེའང་བོད་མི་ས་ཡ་དྲུག་གི་བདེ་དོན་གྱི་ཆེད་དུ་ཡིན་ནམ་ཡང་ན་ཁོ་རང་གི་སྒོར་དོན་གྱི་ཆེད་དུ་ཡིན་དོགས་པ་ཟ་གི་འདུག།ང་ཚོས་གཟབ་གཟབ་བྱས་ནས་བསམ་བློ་བཏང་ཚེ་སྟོབས་ཆེན་རྒྱལ་
ཁབ་ཨ་རི་དང་ཁྱམ་མཚེས་རྒྱལ་ཁབ་རྒྱ་གར་གྱིས་མཚོན་པའི་རྒྱལ་ཁབ་སུ་ཞིག་གིས་ཀྱང་ད་ལྟའི་བར་བོད་རང་བཙན་ལ་རྒྱབ་སྐྱོར་བྱེད་རྒྱུ་ཕར་ཞོག་མཐའ་ན་གཞུང་འབྲེལ་གྱི་ཐོག་བོད་རང་བཙན་ཡིན་པ་ངོས་ལེན་ཙམ་ཡང་རྩ་བ་ནས་བྱེད་ཀྱི་མེད་པ་དངོས་ཡོད་གནས་ཚུལ་ཆགས་ཡོད།བོད་རང་བཙན་ཡིན་པ་བདེན་པ་ཡིན་ཞེས་བདེན་པའི་ཚིག་རྐམ་ཞིག་ཁ་ཁྱེར་ནས་སྡོད་པའང་ཞིབ་ཏུ་བསམ་ཚེ་བོད་མི་དམངས་ཀྱི་བདེ་སྡུག་ལ་འགན་འཁུར་གྱི་མེད་པ་མ་ཟད་ཉིན་རེར་འཚོ་ཐབས་འཁྱོལ་དཀའ་བའི་དཀའ་སྡུག་འོག་ཡོད་པའི་གཞི་ལུས་བོད་མི་
རྣམས་ལ་ཤ་ཚ་ཙམ་ཡང་གཏན་ནས་མེད་པའི་དན་རྟགས་ཤིག་ཏུ་མཐོང་སོང་
ཀརྨ་རྡོ་རྗེ།
༢༠༡༣/༠༧/༢༦ ཉིན་འདོན་སྤེལ་བྱས།
བོད་གཞས་བྱེས་གཉིས་ནང་རྒན་ལྷ་བཟང་ལགས་ཀྱི་རྗེས་སུ་འབྲང་མཁན་མང་བ་ཡོད་དམ། ༧གོང་ས་མཆོག་དང་བཙན་བྱོལ་བོད་གཞུང་གི་རྗེས་སུ་འབྲང་མཁན་མང་བ་ཡོད། དམངས་གཙོ་དངོས་གནས་དེ་དབུ་མའི་ལམ་ལ་ཤར་སྐྱོད་དང་༧གོང་ས་མཆོག་དང་བོད་གཞུང་གི་བཀའ་དགོངས་ལ་བརྩི་བཀུར་ཞུ་རྒྱུ་དེ་ཆགས་ཡོད། ་ཟེར།
བཀྲ་ཤིས་ནོར་འཛིན།
༢༠༡༣/༠༧/༢༦ ཉིན་འདོན་སྤེལ་བྱས།
མ་གཞི་ང་རང་ལྷ་བཟང་ཚེ་རིང་ལ་དགའ་བོ་ཡོད། གཅིག་ནས་མི་ཚེ་གང་བོར་རྡ་རམ་ས་ལ་ནས་བསྡད་དེ་ཡག་སྡུག་ག་རེ་བཤད་མིན་ལ་མ་ལྟོས་པར་བོད་པའི་རྩ་དོན་འཐབ་རྩོད་ནང་ཞུགས་པ་རེད། གཉིས་ནས་མི་ཤེས་ཡོན་ཅན་རེད། རྡ་རམ་ས་ལའི་སློབ་སྦྱོང་དང་བསམ་བློ་གཉིས་ཀ་མེད་པའི་ཆབ་སྲིད་པ་འུར་གཏུམ་ཚ་བོ་ཅན་དག་དང་བསྡུར་ན་རྒན་ལྷ་བཟང་ཚེ་རིང་ལགས་ཀྱིས་སྐད་ཆ་ཞིག་བཤད་ན་ནང་དོན་ཡོད་པ་རེད། གསུམ་ནས་ཁོ་རང་མི་ཆེན་པོར་ངོ་དགའ་སྤྲེལ་ལད་འཁྲབ་མཁན་དེ་འདྲ་ཞིག་མ་རེད། ཁ་རུ་ཁ་ཐུག་དང་ཁ་ཞེ་གཉིས་མེད་ཅིག་ཏུ་མཐོང་སོང་
ཡིན་ནའང་ཁོ་རང་ལ་ཞན་ཆ་མང་པོ་ཡོད་པར་མཐོང་གི་ཡོད། ཚོར་བ་ཤུགས་ཆེ་དྲག་སྟེ་གནས་ལུགས་ལ་མི་བལྟ་བ་དང་། རང་གི་འདོད་ཕྱོགས་བསམ་ཕྱོགས་དེ་མཁྲེགས་འཛིན་ཆེ་དྲག་ནས་ཕ་རོལ་བོའི་བསམ་འདུན་ལ་བརྩི་བཀུར་མི་བྱེད་པ་དེ་ནི་སྡུག་ཤོས་ཤིག་རེད། དེ་ནས་ཁོ་རང་གིས་ནམ་རྒྱུན་བཤད་བསྡད་པའི་རང་བཙན་གྱི་སྒྲུབ་ཕྱོགས་དང་དབུ་མའི་ལམ་གྱི་དགག་ཕྱོགས་ཀྱི་གཏམ་བཤད་དང་རྩོམ་ཡིག་ཁག་ནང་ལུང་རིགས་རྒྱུ་མཚན་མང་པོ་བཀོད་ཡོད་པ་དག་ཏུ་བདེན་པ་མིན་པ་དང་དངོས་ཡོད་དང་མི་མཐུན་པ། ཕུགས་རྒྱང་རིང་པོར་བསམ་བློས་ཟིན་མེད་པ། ཕན་པ་དང་གནོད་པ་ལས་གནོད་པ་ཚབས་ཆེ་བ་དང་ཉེན་ཁ་ཡོད་པ། དོན་ཆེན་ལས་དོན་ཆུང་བརྩོན་ལེན་བྱེ་དཔ་དང་། སྤྱི་བའི་ལས་དོན་ལས་སྒེར་བ་དང་བྱེ་བྲག་པའི་མངོན་འདོད་ཐོག་ཤུགས་རྒྱག་གི་ཡོད་པ་དེ་འདྲ་མང་པོ་ཞིག་ཡོང་གི་འདུག
ངས་དཔེ་མཚོན་ཁ་ཤས་ཤིག་འགོད་རྒྱུ་ཡིན། དང་པོ། རྒན་ལྷ་བཟང་ལགས་ཀྱིས་གོང་གི་གཏམ་བཤད་ནང་། རྒྱ་ནག་གཞུང་ལ་ཡིད་ཆེས་མེད་པ་དང་དབུ་མའི་ལམ་དེ་ཉེན་ཁ་ཆེ་བའི་སྒྲུབ་བྱེད་དུ་ ༡༩༥༢ ལོར་གྲོས་མཐུན་དོན་ཚན་བཅུ་བདུན་ལ་མིང་རྟགས་བཀོད་ཡོད་ཀྱང་རྗེས་སུ་རྒྱ་ནག་གཞུང་གིས་རྡོག་རོལ་དུ་བཏང་སྟེ་བོད་ནང་ཡ་ང་བའི་གནས་ཚུལ་མང་པོ་བྱུང་ཡོད་སྐོར་བཤད་འདུག དེ་སྒྲུབ་བྱེད་ཡང་དག་ཅིག་རྩ་བ་ཉིད་ནས་མ་རེད། ལྷག་པར་དུ་ཧོབ་ཏེ་ལྟ་མཁན་ཞིག་གིས་སྐད་ཆ་དེར་བདེན་པ་ཡོད་པའི་ཚོར་བ་བསྟེར་སྲིད་ཀྱང་། དོན་ལ་རྒྱུ་མཚན་མེད་པའི་ཞ་དཔེ་ལྷམ་འགེབ་ལྟ་བུ་ཞིག་ཆགས་ཡོད། གང་ཡིན་ཟེར་ན། སྐབས་དེར་བོད་དེ་ལྷུང་ས་བཅོ་བརྒྱད་ལ་ལྷུང་ཚར་ཡོད་པ་རེད། ལམ་ཁ་དེ་ལས་གཞན་ཅི་གང་ལྷག་མེད་པ་ཆགས་ཡོད། གཉིས་པ་གྲོས་མཐུན་དེ་བོད་ཕྱོགས་ནས་དགའ་བཞིན་སྤྲོ་བཞིན་བཞག་པ་ཞིག་མ་རེད། སྐབས་དེར་རྒྱ་གཞུང་གིས་བོད་པའི་སྐུ་ཚབ་ཚོའི་ཀླད་པའི་སྟེང་ལ་མེ་མདའ་བཙུགས་བསྡད་ནས་བཙན་དབང་འོག་མིང་རྟགས་བཀོད་ཅིག་པ་ཞིག་ཡིན་པ་༧གོང་ས་མཆོག་གིས་སྔ་ཕྱི་བར་གསུམ་དུ་གསུངས་ཡོད་ལ། བཙན་བྱོལ་བོད་གཞུང་གི་ཡིག་ཆ་ཁག་ནང་དུའང་གསལ་ཡོད་པ་རེད།
དེ་ནས་ལྷ་བཟང་ཚེ་རིང་གིས་དབུ་མའི་ལམ་མ་བྱུང་སྔོན་གྱི་དྲུག་ཅུ་རེ་གྲངས་ནང་རྒྱལ་སྤྱིའི་ཐོག་ཏུ་བོད་དོན་ལ་རྒྱབ་སྐྱོར་ཆེན་པོ་ཡོད་པ་དང་། ལྷག་པར་དུ་འཛམ་གླིང་མཉམ་འབྲེལ་རྒྱལ་ཚོགས་ནང་བོད་དོན་ཐོག་གྲོས་ཆོད་སྔ་ཕྱི་ཁ་ཤས་འཇོག་ཐུབ་ཡོད་པ་དེ་བོད་རང་བཙན་རྩོད་བཞིན་པའི་སྐབས་ཡིན་སྐོར་བརྗོད་བཞིན་ཡོད། དེ་ནི་བོད་མི་ཚོས་བོད་རང་བཙན་ལངས་ཕྱོགས་བཟུང་ཡང་རྒྱལ་སྤྱིའི་ཐོག་གི་རྒྱབ་སྐྱོར་མེད་པ་ཆགས་རྒྱུ་མིན་པའི་སྒྲུབ་བྱེད་ཅིག་ཡིན་པའི་ཁུལ་རེད། རྒན་ལྷ་བཟང་གི་སྐད་ཆ་འདི་གོང་གི་བཅར་འདྲིའི་ནང་ཡོད་མེད་གསལ་བོ་ཤེས་མ་སོང་མོད། འོན་ཀྱང་ཁོ་རང་གིས་ནམ་རྒྱུན་དེ་ལྟར་ཤོད་སྡོད་ང་རང་གིས་མཐོང་ཐོས་མང་པོ་ཡོད། བཀའ་མོལ་འདི་སྔ་ཕྱིའི་གནས་ཚུལ་དང་སྐབས་དེའི་གནས་སྟངས་ལ་བསམ་གཞིགས་ཡག་པོ་མ་བྱས་པར་གང་བྱུང་བཤད་པ་ཞིག་རེད། མཉམ་འབྲེལ་རྒྱལ་ཚོགས་ནང་སྤྱི་ལོ་ ༡༩༦༠ དང་ ༡༩༦༢ ། ༡༩༦༥ བཅས་སུ་གླེང་སློང་དང་གྲོས་ཆོད་བཞག་ཡོད་པ་བདེན་པ་རེད། ཡིན་ནའང་སྐབས་དེར་མཉམ་འབྲེལ་རྒྱལ་ཚོགས་ནང་རྒྱ་ནག་ཡོད་པ་མ་རེད་ལ། རྒྱལ་སྤྱིའི་ཐོག་རྒྱ་ནག་ལ་སྟོབས་ཤུགས་གང་ཡང་ཡོད་པ་མ་རེད། ལྷག་པར་དུ་འཛམ་གླིང་དཔལ་འབྱོར་ཁྲོམ་རའི་ནང་རྒྱ་ནག་སླེབས་ཐུབ་མེད་པ་མ་ཟད་ཁྲོམ་རའི་ཕྱི་ལོགས་སུ་ཡང་རྒྱ་ནག་གི་ཤུགས་རྐྱེན་གང་ཡང་ཡོད་པ་མ་རེད། ད་ལྟའི་སྐབས་ལ་མཉམ་འབྲེལ་རྒྱལ་ཚོགས་ལ་རྒྱ་ནག་གིས་བཟོ་ལྟ་ག་རེ་བཟོ་བཟོ་ཆགས་ཡོད་ལ། འཛམ་གླིང་རྒྱལ་ཁབ་ཆུང་ཁག་རྒྱ་ནག་གི་རྗེས་སུ་ཁྱི་བཞིན་འདུར་རྒྱུག་བྱེད་ཀྱིན་ཡོད། མ་ཟད་ཨ་རི་དང་ཡུ་རོབ་རྒྱལ་ཁབ་སྟོབས་ཆེན་དག་ཀྱང་རྒྱ་ནག་གི་ཕྱོགས་སུ་གཡོ་བཞིན་ཡོད་པ་ཚང་མས་མཐོང་གསལ་རེད།
མཐའ་མ་དེ་ལ་རྒན་ལྷ་བཟང་ལགས་ཀྱིས་བཙན་བྱོལ་ནང་དམངས་གཙོ་ཡོད་མེད་ཅིག་ལབ་འདུག ལྷག་པར་དུ་བོད་རང་བཙན་བཤད་པ་དང་བོད་གཞུང་དཀའ་ལྡན་ཕོ་བྲང་གི་མཚན་བྱང་དེ་ཉར་རྒྱུ་ཡིན་སྐོར་བཤད་པ་དང་དམངས་གཙོ་བརྩོན་ལེན་བྱས་པ་ཡིན་སྐོར་ཞིག་བཤད་འདུག བཀའ་མོལ་འདི་ལ་དགོངས་པ་ཡག་པོ་བཞེས་པ་ཡིན་ན་སུ་ཞིག་གིས་དམངས་གཙོར་བརྩི་བཀུར་མ་བྱས་པ་དང་གང་ཞིག་ཏུ་དམངས་གཙོ་ཡོད་མེད་གསལ་བོར་མཁྱེན་ཡོང་གི་རེད། བོད་གཞས་བྱེས་གཉིས་ནང་རྒན་ལྷ་བཟང་ལགས་ཀྱི་རྗེས་སུ་འབྲང་མཁན་མང་བ་ཡོད་དམ། ༧གོང་ས་མཆོག་དང་བཙན་བྱོལ་བོད་གཞུང་གི་རྗེས་སུ་འབྲང་མཁན་མང་བ་ཡོད། དམངས་གཙོ་དངོས་གནས་དེ་དབུ་མའི་ལམ་ལ་ཤར་སྐྱོད་དང་༧གོང་ས་མཆོག་དང་བོད་གཞུང་གི་བཀའ་དགོངས་ལ་བརྩི་བཀུར་ཞུ་རྒྱུ་དེ་ཆགས་ཡོད། རྒྱུ་མཚན་དབུ་མའི་ལམ་ལ་བོད་གཞིས་བྱེས་རྒྱ་ཆེའི་མང་ཚོགས་ཀྱིས་མང་མོས་ཐོབ་ཡོད་པ་མ་ཟད་གྲོས་ཚོགས་ནང་དུའང་སྤྱི་མོས་གྲོས་ཆོད་རབས་དང་རིམ་པ་བཞག་ཡོད་པ་རེད། འདི་ལ་ཤར་སྐྱོད་བྱེད་དགོས་པ་རེད། འདི་ལ་བརྩི་བཀུར་ཞུ་དགོས་པ་རེད། འདི་དམངས་གཙོའི་འགྲོ་སྟངས་རེད། གནས་སྐབས་རིང་དེ་ཙམ་གྱིས་ཆོག་པ་བྱོས། བཀྲ་ཤིས་བདེ་ལེགས།
ཀརྨ་རྡོ་རྗེ།
༢༠༡༣/༠༧/༢༦ ཉིན་འདོན་སྤེལ་བྱས།
དགའ་ལྡན་ཕོ་བྲང་དང་དབུ་མའི་ལམ་གཉིས་ཁ་ཁག་ཡིན་མིན་ལ་ང་ལ་ཁྱད་པར་གང་ཡང་མི་འདུག བོད་རིགས་གཞོན་ལྷན་དང་། རང་བཙན་འཐབ་རྩོད་པ་གཉིས་ཁ་ཁག་ངེས་པར་དུ་བཟོ་དགོས་འདུག་གོ། །།
དྲང་བདེན་གྱི་སློང་མོ་བ།
༢༠༡༣/༠༧/༢༦ ཉིན་འདོན་སྤེལ་བྱས།
རྒན་ལྷག་བཟང་ནས་དགོངས་ཚུལ་མང་པོ་གསུངས་འདུག གལ་ཆེ་ཤོས་ཤིག་ནི་ད་ལྟ་དུས་ལ་༧རྒྱལ་བ་རིན་པོ་ཆེའི་ཐུགས་དགོངས་བཞིན་འགྲོ་རྒྱུ་དེ་རེད། དེ་ཡང་འགྲོ་སྟངས་འདྲ་མིན་ཡོང་གི་རེད། ངས་བསམ་ན་རང་བཙན་འཐབ་རྩོད་པ་རྣམས་ཀྱི་༧རྒྱལ་བའི་བཀའ་དགོངས་སྒྲུབ་སྟངས་ཤིག་དང་དེ་མིན་གཞན་ཞིག་ཡོད་པ་མཐོང་གི་འདུག འོན་ཀྱང་རང་བཙན་རྩོད་ཁུལ་གྱི་༧རྒྱལ་བའི་བཀའ་ལ་ངོ་རྒོལ་བྱས་མཁན་ཡོད་ན་དེ་ནི་དགྲ་བོའི་རྒྱུགས་ཁྱི་ལས་དོན་དམ་བོད་པ་ཞིག་མ་རེད། དཔེ་མཚོན་ན་གཞོན་ནུའི་ཐོག་མ་བྱས་སྟངས་ནོར་ཡོད་པ་ཅིག་ནི་དམིགས་འབེན་དགྲ་བོར་མ་བཏད་པ་རང་གཞུང་གི་དབུ་ལམ་ཐོག་ཕྱོགས་པ་འདི་རེད་རང་རེད། སྐད་ཆ་འདིའི་ཕུགས་ལྷ་བཟང་གི་ནོར་བ་རེད་དེ་ད་དུང་ནོར་བར་ཁས་མ་ལེན་པ་འདི་བཟང་སྤྱོད་ཞིག་མ་རེད། སྐད་ཆ་འདི་ཡོང་བ་བརྟན་ནས་༧རྒྱལ་བའི་བཀའ་མང་པོ་ཕེབས་དགོས་བྱུང་བ་སོགས་ཀྱི་ནང་དོན་སྙིང་པོ་ཞིག་བླ་མ་ཟམ་གདོང་གི་གསུངས་སོང་། དེ་བརྟེན་གཞོན་ནུའི་ངོས་ནས་རང་བཙན་རྩོད་མ་རྩོད་སྐད་ཆ་འདི་ཆེ་པོ་མ་རེད་དེ་ཆབ་སྲིད་ཀྱི་ལྟ་གྲུབ་མེད་ལ་མི་རིགས་ཀྱི་ལ་རྒྱ་དང་སྙིང་ཆུང་ལྷོ་ཕྱོགས་དར་ལྕོགས་བརྒྱད་ནས་དཔུང་སྒྲིགས་པ་རེད་
ཀརྨ་རྡོ་རྗེ།
༢༠༡༣/༠༧/༢༥ ཉིན་འདོན་སྤེལ་བྱས།
གལ་ཆེ་ཤོས་རང་བཙན་གྱི་དམིགས་ཡུལ་དང་རེ་བའི་བདེན་པའི་མར་མེ་འདི་ཤི་རུ་མ་བཅུག་པར་གནས་ཐུབ་རྒྱུར་གཞོན་ནུའི་སྒྲིག་འཛུགས་འདི་ཡིན་གཅིག་མིན་གཉིས་གནས་དགོས་ཀྱི་འདུག ་ཟེར།
ཤོག་གྲངས་: [༡] [རྗེས་མ།]
རིག་པ་འདོན་པ།
རིག་པ་འདོན་ན་ངེས་པར་དུ་དེབ་སྐྱེལ་བྱེད་དགོས།
འདི་ལ་བསྣུན་ཏེ་དེབ་སྐྱེལ་བྱེད་རོགས།